“Dago Kayo’d Siak, . . . et Ikdan ta Kayoy Pampainawa”

Saray Kalangweran a Singa Ira Makarepreskon Linaew

SEGURADON inlaktip nen Jesu-Kristo iray kalangweran a papatumbok to sanen inkuan to: “Dago kayo’d siak, . . . et ikdan ta kayoy pampainawa [“pakarepreskoan,” NW].” (Mateo 11:28) Sanen inyasingger ed sikato na totoo iray ugugaw nin ananak da, sikaray inamper na saray babangatan to. Balet inkuan nen Jesus: “Paulyan yo so saray ankekelag ya ugugaw ya ondago ed siak, agyo ra sebelan.” Si Jesus so ‘angala [ni ingen] ed [ugugaw] ed saray taklay to, tan benendisyonan to ra.’ (Marcos 10:14-16) Seguradon pinablin maong nen Jesus iray ugugaw.

Tutukoyen na Biblia iray matoor a tobonbalon lalaki tan bibii, ontan met ed saray kalangweran tan ankelag niran ugugaw, a mangipapanengneng na maabig iran ehemplo diad panlilingkor ed Dios. Sakey ya “ulop na kalangweran a lalaki” a singa makarepreskon linaew so nipasakbay ed libro na Salmos. Tutukoyen to met iray “tobonbalo a lalaki” tan “birhenes” a mangidadayew ed ngaran nen Jehova.​—Salmo 110:3, NW; 148:12, 13.

Pasen Parad Saray Kalangweran Pian Ombulaslas

Matukoy so panangiyaliling ed saray kalangweran ed saray linaew, lapud nisiglaot so linaew ed inkadaakan tan bendisyon. (Genesis 27:28) Saray linaew so matamoy, tan makarepresko. Diad sayan panaon na kiwawala nen Kristo, dakerakel a kalangweran a Kristiano so mabulos tan magunaet a mangiyaapay ed inkasikara. Singa ed makarepresko iran linaew, dakel a tobonbalon lalaki tan bibii so masayaksak a manlilingkor ed Dios tan ontutulong ed saray kapara ran managdayew.​—Salmo 71:17.

Saray Kristianon tobonbalo so aliwa labat lan makarepresko ed arum; narerepreskoan met ira ed serbisyo ra. Say organisasyon na Dios so mangitatarya na pasen a ditan ira ombulaslas. Diad panmamantini ra ed atagey iran moral, panggagayagaan na saray tobonbalon lalaki tan bibii so maapit a relasyon ed Dios. (Salmo 119:9) Diad loob na kongregasyon, sikara met so mibibiang ed makapabiskeg iran aktibidad tan makakaromog na maong a kakaaro​—a saraya so makatulong ed makapenek tan makabaliksan a bilay.

‘Makapaabig tan Makarepresko’

Kasin liknaen na saray mismon Kristianon tobonbalo a singa ira “saray linaew”? Si Tania, sakey a kalangweran a bii so aktibon mibibiang ed kongregasyon tan maliket a mangidedeboto na masulok a 70 oras kada bulan diad ministeryo. Antoy liknaan to? “Narerepreskoan tan napapaseseg ak,” inkuanto. “Say impakapikabat ko ed si Jehova tan ed mangaraldalin ya organisasyon to so ‘makapaabig tan makarepresko’ ed siak.”​—Uliran 3:8, NW.

Si Ariel, sakey met a kalangweran a sigpot-panaon a ministro, so mamapabli ed espiritual a tagano a nagagamoran to diad loob na kongregasyon. “Sano onaatendi ak ed saray pantitipon na saray Kristiano,  saray kombension, tan saray asamblea tan makakarungo ak ed espiritual a lamisaan nen Jehova, saya so talagan manrerepresko ed siak ed espiritual a paraan,” so inkuan to. “Tan napapaseseg ak a makaamta a diad interon mundo et walaray kakimeyan ko.” Diad panedeskribe to ed manunan lapuan na pakarepreskoan, inkuan to: “Talagan makarepreskon maong so pakapikaaro ed si Jehova, nagkalalo la sano narerengel odino nanenengneng ko so grabe iran epekto na sayan sistema ed totoo.”​—Santiago 2:23.

Diad edad a 20, si Abishai so manlilingkor bilang sigpot-panaon ya ebanghelisador tan ministeryal a lingkor ed kongregasyon. Oniay impaneskribe to ed eksperiensya to: “Narerepreskoan ak lapud amtak ya arapen iray dakel a probleman kidudungetan na saray kalangweran natan. Say katuaan a naromog ed Biblia so ontutulong ed siak pian niyapasakey ko ed kaukolan kon gawaen pian lingkoran si Jehova tekep na interon kamarerwa.”

Diad asasakbay ya inkatin-edyer to, si Antoine so misasanok. Aminsan et imbasig to so yurongan ed kapara ton estudyante, tan sinaksak to na lapis so sakey ni. Talagan makapaalipanes a too si Antoine! Balet lapud bangat na Biblia et nauman so walna to. Diad taon to la natan a 19 tan manseserbi bilang ministeryal a lingkor tan sigpot-panaon a ministro diad kongregasyon, inkuan to: “Misalamat ak ed si Jehova lapud inabuloyan toak a makagamor na pikakabat ed sikato tan lapud panutulong to’d siak a makaimano ed pankaukolan ya agamilen so dangka tan umanen so kurang ko. Diad onian paraan, apaliisan koy dakel a problema.”

Naiimano na arum so makarepreskon awawey na saray kalangweran a Kristiano. Si Matteo so sakey a kalangweran a Tasi diad Italya. Denesidi na maestro to a siopaman ed klase a mansalita na mabanday et manmulta. Diad saginonor, kinerew na saray ugugaw ya ekalen lay totontonen lapud, inkuan da, “imposible a napaliisan so pangusar na mabanday a salita.” “Balet,” impaliwawa nen Matteo, “inkuan na maestra ya aliwan imposible itan, tan inusar toak, sakey ed Tastasi nen Jehova, bilang ehemplo, ya idadayew toak ed arap na interon klase lapud desentin panagsalitak.”

Diad loob na agnakontrol a kuarton panaaralan ed Thailand, pinaalagey na maestra so mantaon na 11 a si Racha ed arap na klase tan kinomendaan to lapud walna to, a kuanto: “Akin a sikatoy agyo aligen ya amin? Sikatoy makulin manaral tan maong so walna to.” Insan inkuan to ed saray estudyante: “Komon ta magmaliw kayon sakey ed Tastasi nen Jehova, singa si Racha, pian ondakep so kondukta yo.”

Makapaliket so pakanengneng ed saray nilibon Kristianon tobonbalo a makakapikabat a maong ed si Jehova tan manggagawa ed linawa to. Ipapatnag na saratan a maong a kalangweran so kakabatan a kaslakan a napatnagan ed saray mas panguloan ed sikara. Natulongan ira na Dios pian ontalona ed peles a bilay da tan mangiter met ed sikara na maglorian arapen ed onsabin balon mundo. (1 Timoteo 4:8) Diad sayan peles a sistema na saray bengatla a lepes ed espiritual a kipapasen tan apusek na agmaliket tan dismayado iran kalangweran, sikaray mangipapanengneng na makarepreskon pidumaan!