Propesiya nen Isaias​—Liwawa Parad Amin a Katooan II

Kapitulo Kuatro

“Sikayo so Saray Tasik”!

Isaias 43:1-28

1. Panon ya uusaren nen Jehova so propesiya, tan panon so nepeg ya ikiwas na totoo to ed asumpal a propesiya?

 SAY pakayari a mangipasakbay ed arapen et sakey a bengatlan pakabidbiran ed tuan Dios manlapud amin a palson dirios. Balet sano manpropesiya si Jehova, nagkalalo ni nen say pamaneknek ed inka-Dios to so walad kanonotan to. Unong a nipabitar ed Isaias kapitulo 43, si Jehova so manpropropesiya bilang paneknek ed inka-Dios tan aro to ed akisipanan a totoo to. Diad biek a dapag, saray totoo to so agbasta manebek ed kasumpalan na propesiya insan mansiansian andi-esel; nepeg a tasian da so anengneng da. On, kaukolan iran magmaliw a tastasi nen Jehova!

2. (a) Antoy espiritual a kipapasen na Israel diad panaon nen Isaias? (b) Panon a nilukasan nen Jehova so kamataan na totoo to?

² Makapaermen, diad panaon nen Isaias say Israel so wala’d makapasinagem a kipapasen kanian impasen nen Jehova so totoo a walay depekto ed espiritual a paraan. “Ipatnag mo so saray bulag a totoo a wala so mata ra, saray telek a wala so layag da.” (Isaias 43:8) Panon ya onkanan mabilay a tastasi ed si Jehova so totoon bulag tan telek ed espiritual? Wala labat lay saksakey a paraan. Nepeg a mamilagron nalukasan iray mata tan layag da. Tan petepeteg a nilukasan iratan nen Jehova! Panon? Unona, impaakseb nen Jehova so pirmin pananisiplina​—saray manaayam ed mamaamianen a panarian na Israel so adestiero nen 740 K.K.P., insan saramay walad Juda, nen 607 K.K.P. Kayari na satan, mabiskeg a kinmiwas si Jehova nisengeg ed totoo to diad impangibulos to ed sikara tan pinasempet to so apabiskeg ed espiritual tan magbabawin nakdaan ed nianakan dan dalin nen 537 K.K.P. Diad tua et sigpot a matalek si Jehova a say gagala to ed sayan pamaakaran so agnaamper kanian manga 200 a taon antis na satan, sinaglawi to so kibulos na Israel a singa agawa la itan.

3. Antoy inter nen Jehova a panamaseseg ed saray nadestiero?

³ “Onia so kuan nen Jehova ya amalsa ed sika, O Jacob, tan sikato ya anibukel ed sika, O Israel; agka antakot, ta siak dinondon ta ka; siak tinawag ta ka ed ngaran mo, sika so kayarian ko. Sano baliwen mo so saray danum, wala ak ed sika; tan dia ed saray ilog, agka nadelap naani: sano manakar ka ya onlabas ed apoy, agka naani napoolan, tan agto ka met silayutan na dalang. Ta siak si Jehova a Dios mo, say Santo na Israel, a Manangilaban mo.”​—Isaias 43:1-3a.

4. Panon a si Jehova so Manamalsa na Israel, tan anto so impaseguro to ed totoo to nipaakar ed ipawil da ed nianakan dan dalin?

⁴ Interesadon tuloy si Jehova ed Israel lapud kien to so nasyon. Pinalsa to itan a dili bilang kasumpalan na Abrahamikon sipanan. (Genesis 12:1-3) Kanian, oniay kuan na Salmo 100:3: “Amtaen yo a si Jehova sikato so Dios: sikato so nanggawa ed sikatayo, ya aliwa a sikatayo a dili; totoo to itayo, sikatayo so karkarnero na pastolan to.” Bilang Manamalsa tan Mananondon na Israel, maligen ya ipawil nen Jehova so totoo to ed nianakan dan dalin. Saray babeng, a singa say kadanuman, araralem iran ilog, tan makaatong iran desierto, so agmangamper odino mamasakit ed sikara, no panon a saratan met a bengatla so ag-amatayer ed saray inmunan atateng da sanen mamapaarap ira ed Insipan a Dalin nilibon taon lay apalabas.

5. (a) Panon ya akaligliwa iray salita nen Jehova ed espiritual ya Israel? (b) Sioparay kaulop na espiritual ya Israel, tan siopa so angilitratoan ed sikara?

⁵ Saray salita nen Jehova so manliligliwa met ed modernon-agew a nakdaan na espiritual ya Israel, a saray membro na satan so nailalak ed espiritu a “balon pinalsa.” (2 Corinto 5:17) Diad makpel ya impangiparungtal da’d inkasikara ed “saray danum” na katooan, nalilikna ra so maaron salimbeng na Dios diad saray piguratibon delap. Saray singa apoy  a subok a manlalapud kakabusol da so ag-amasakit ed sikara, noagta saratan so nandalisay ed sikara. (Zacarias 13:9; Apocalipsis 12:15-17) Ninatnat met so panangasikaso nen Jehova ed “baleg ya ulop” na ‘arum a karnero,’ ya akiulop ed espiritual a nasyon na Dios. (Apocalipsis 7:9; Juan 10:16) Saraya so inlitrato na ‘dakel a bilang na saray nagsisananey a totoo’ a tinmaynan ed Ehipto kaiba iray Israelita ontan met ed saray aliwan-Judio a pinmawil kaiba iray imbulos ya adestiero manlapud Babilonia.​—Exodo 12:38; Esdras 2:1, 43, 55, 58.

6. Panon ya ipapanengneng nen Jehova a sikatoy Dios na inkahustisya no nipaakar ed pananondon ed (a) natural ya Israel? (b) espiritual ya Israel?

⁶ Insipan nen Jehova ya iliktar to so totoo to manlapud Babilonia panamegley na saray armada na Media tan Persia. (Isaias 13:17-19; 21:2, 9; 44:28; Daniel 5:28) Bilang Dios na inkahustisya, bayaran nen Jehova iray Medo-Persia ya “empleyado” to na magenap a dondon bilang kasalat na Israel. “Initer ko so Ehipto a singa panagkadondon mo, nisalat ed sika so Etiopia tan Saba. Lapu ed mabli ka nensaman ed pakanengneng ko, tan magalang tan inaro ta ka; kanian iter ko naani so saray totoo a salat mo, tan saray baley ya onsandi ed bilay mo.” (Isaias 43:3b, 4) Papaneknekan na awaran a peteg a kinubkob na Empiryo na Persia so Ehipto, Etiopia, tan say asingger a Saba, unong ya impasakbay na Dios. (Uliran 21:18) Nen 1919 panamegley nen Jesu-Kristo, imbulos met nen Jehova manlapud inkakautibo so nakdaan na espiritual ya Israel. Bangbalet, agkaukolan nen Jesus so tumang parad serbisyo to. Sikatoy aliwan paganon manuley. Tan ibubulos to so dilin agagi to ed espiritual. Sakey ni, nen 1914 et inter la ed sikato nen Jehova iray “nasyon ya onkana a tawir [to], tan say kasampotan a kabiangan na dalin ya onkana a kayarian [to].”​—Salmo 2:8.

7. Panoy liknaan nen Jehova ed totoo to, nensaman tan natan?

⁷ Imanoen no panon a mabulbulos ya imbalikas nen Jehova so matamoy iran liknaan to ed saray arondon a destiero. Inkuan to’d sikara a “mabli” tan “magalang” ira ed sikato tan “inaro” to ra. (Jeremias 31:3) Ontan met so liknaan to​—tan nagkalalo la​—ed saray matoor a lingkor to natan. Saray alanaan a Kristiano so walaan na relasyon ed Dios, aliwan lapud inkianak, noagta lapud ikukurang na masanton espiritu na Dios kayari na personal a dedikasyon da ed Manamalsa ra. Inyasingger nen Jehova iraya ed Anak to tan ed inkasikato tan insulat to iray ganggan tan prinsipyo to ed maawat a kapusoan da.​—Jeremias 31:31-34; Juan 6:44.

8. Anto so impaseguro lamet nen Jehova ed saray adestiero, tan antoy liknaan da ed kililiktar da?

⁸ Bilang nagkalalon panamaseguro ed saray destiero et oniay inyarum nen Jehova: “Agka antakot; ta wala ak ed sika: yakar ko naani so bukel mo a manlapu ed bukig tan tiponen ta ka naani a manlapu ed sagur; ikuan ko naani ed amianen, Ikbanan mo; tan ed abalaten, Agmo pokpokan; yakar mo so saray anak [ko] a lalaki a manlapu ed arawi, tan saray anak [ko] a bibii a manlapu ed sampot na dalin; balang sakey a natumangan ed ngaran ko, tan sikato so pinalsak a nipaakar ed gloriak, sikato so tinibukel ko, on ginawak.” (Isaias 43:5-7) Anggan say sankasulinekan a parte na dalin so mainomay a sabien nen Jehova sano onsabi panaon ya ibulos to la ray anak ton lalaki tan bibii tan ipawil tora ed pinabli ran dalin a nianakan. (Jeremias 30:10, 11) Andi-duaruwan parad sikara et palumbasan na sayan kibulos so datin inkiliktar na nasyon ed Ehipto.​—Jeremias 16:14, 15.

9. Diad anton duaran dalan ya insiglaot nen Jehova so ngaran to ed saray gawa na panangiliktar to?

⁹ Diad pangipapanonot ed totoo to a tinawag ira ed ngaran to, pepekderan nen Jehova so sipan to ya iliktar so Israel. (Isaias 54:5, 6) Nagkalalo ni, insiglaot nen Jehova so ngaran to ed saray sipan to a panangibulos. Diad ontan, seseguroen to a naawat to so dayew sano nasumpal so mapropetikon salita to. Anggan say mangonkesta ed Babilonia so agmakanepegan ed satan a galang a para ed saksakey tan alenleneg a mabilay a Dios.

Uusayen Iray Dirios

10. Anton angat so inyarap nen Jehova ed saray nasyon tan ed dirios da?

¹⁰ Natan et ginawa nen Jehova a pinagkabasiyan so sipan to ya ibulos so Israel diad sakey a kaso ed sankatalbaan a korte a ditan et usayen to so dirios na nasyones. Oniay nabasa tayo: “Natipon komon so saray amin a nasyon, tan manmumuyong so saray balbaley: siopa [ed saray dirios da] ed sikara so mangipaliwawa na saya, tan mangipatnag na saray akauna a bengatla ed sikatayo? Itarok da [na saray dirios da] komon so saray tasi ra, pian napatunong ira; odino, denglen da komon, tan kuan da, Sikato so tua.” (Isaias 43:9) Inyarap nen Jehova so mairap ya angat ed saray nasyon ed mundo. Singa ibabaga nen Jehova a: ‘Paneknekan na dirios yo a dirios ira panamegley na suston panangipasakbay ed  arapen.’ Lapud say tuan Dios lambengat so agnalingo a makapanpropesiya, sayan subok so mangiparungtal ed amin ya impostor. (Isaias 48:5) Balet inyarum ni na Makapanyarin-amin so sakey a legal a paknaan: Amin a mankuan a tuan dirios so nepeg a mamawala na tastasi, parad saray prediksion da tan ed kasumpalan na saraya. Natural labat ya ag-ipuera nen Jehova so inkasikato ed sayan legal a kakaukolanen.

11. Anto so impabtang nen Jehova ed lingkor to, tan antoy imparungtal nen Jehova nipaakar ed inka-Dios to?

¹¹ Lapud andian ira na pakayari, saray palson dirios so agmakapawala na tastasi. Kanian, makapabaing a mansiasiansian bakante so pasen a nigana parad tasi. Balet turno la nen Jehova a pekderan so inka-Dios to. Legan ya onnenengneng ed totoo to, inkuan to: “Sikayo so saray tasik, . . . tan say aripen ko a pinilik; pian naamtaan yo tan sisiaen yo ak tan natalosan yo a siak iman: anggapo nensaman so agawa a Dios ya inmuna nen siak, tan anggapo met naani so ontumbok ed siak. Siak, siak lanlamang si Jehova; no aliwa a siak anggapo komon so manangilaban. Impaliwawak, tan inlaban ko, tan impanengneng ko; et anggapo so sananey a Dios ed sikayo: kanian sikayo so tasik, . . . et siak so Dios. On, nanlapu ed inkiwala na agew siak iman; et anggapo a balot so makaokpos ed limak; labay ko a gawaen, et siopa so makasbel [ed limak]?”​—Isaias 43:10-13.

12, 13. (a) Anton daakan a paneknek so kaukolan ya iparungtal na totoo nen Jehova? (b) Panon ya akabkabat so ngaran nen Jehova diad modernon panaon?

¹² Bilang ebat ed saray salita nen Jehova, say pasen a nigana parad tasi so apusek na magayagan muyong na tastasi. Say paneknek da so malinew tan agnasuppiat. Singa si Josue, pinamintuan da ya ‘amin a sinalita nen Jehova so agawa. Anggapo so anggan sakey a linmiwat.’ (Josue 23:14) Nanonotan ni na totoo nen Jehova iray salita nen Isaias, Jeremias, Ezequiel, tan arum nin propeta, a walaan na saksakey a mensahe, ya angipasakbay ed pakadestiero na Israel tan say mamilagron kiliktar da ed pakadestiero. (Jeremias 25:11, 12) Say manangiliktar na Israel, si Ciro so asalambit la antis ni na inkianak to!​—Isaias 44:26–45:1.

¹³ Lapud sayan abalbaleg ya ebidensya, siopay makapangiburi a si Jehova so alenleneg a tuan Dios? Aliwan singa saray paganon dirios, si Jehova lambengat so agpinalsa; sikato lambengat so tua a Dios. * Lapud satan, saray totoon mangaakbibit ed ngaran nen Jehova so walaan na nikadkaduma tan makapalikliket a pribilehyon mangipasabi ed makapakelaw iran gawa to ed saray ontumbok a kailalakan tan ed arum ya ontupleg nipaakar ed sikato. (Salmo 78:5-7) Mipadpara, saray modernon-agew a Tastasi nen Jehova so walaan na pribilehyo a mangiyabawag ed ngaran nen Jehova diad interon dalin. Nen dekada na 1920 nagkalalon atalosan na saray Estudyante na Biblia so malaknab a kakanaan na ngaran na Dios, a Jehova. Insan, nen Hulyo 26, 1931, imparungtal na presidente na Sosyedad a si Joseph F. Rutherford diad kombension ed Columbus, Ohio, so resolusyon ya atituloan na “Sakey a Balon Ngaran.” Saray balikas a, “Pampipilalekan mi so nakabat tan natawag ed ngaran, salanti, saray tastasi nen Jehova,” so amaliket ed saray inmatendi ed kombension, ya angabobon ed resolusyon diad impangikelyaw na “On!” Manlapu la’d saman, akabkabat ed sankamundoan so ngaran nen Jehova.​—Salmo 83:18.

14. Anto so impanonot nen Jehova ed saray Israelita, tan akin a nipanpanaon iyan panonot?

¹⁴ Inaro nen Jehova iramay magalang a mangaakbibit ed ngaran to, a momoriaen to ira a singa “bukel na mata to.” Impanonot to iya ed saray Israelita, ya insalaysay to’d sikara no panon to ran inliktar ed Ehipto tan maligen ya inwanwan diad kalawakan. (Deuteronomio 32:10, 12) Diad saman a panaon et anggapoy nikaduman dios ed limog da, lapud anengneng dan mismo so makapabaing ya asagmak na amin a dirios na Ehipto. On, amin a dirios na Ehipsio so ag-akasalimbeng ed Ehipto nisay akaamper ed itaynan na Israel. (Exodo 12:12) Ontan met, say mabiskeg a Babilonia, a say syudad to so apaliberan na ag-onkulang a 50 templo na palson dirios, so agmakaamper ed lima na Makapanyarin-amin sano ibulos to so totoo to. Malinew, ‘anggapoy manangilaban’ likud ed si Jehova.

Nalukbob Iray Kabayo a Parad Bakal, Nalukasan Iray Prisoan

15. Antoy impropesiya nen Jehova nipaakar ed Babilonia?

¹⁵ “Onia so kuan nen Jehova, a Mananondon ed sikayo, say Santo na Israel: Lapu ed sikayo nambaki ak ed Babilonia, tan yakseb ko ra ya amin a singa ontaynan, a sikara so saray Caldeo, ed saray sakayan so panliket da. Siak si Jehova a Santo yo, say Amalsa ed Israel ya Ari yo. Onia so kuan nen Jehova a nanggawa na dalan ed dayat, tan sakey a basbas ed saray makapanyari a danum; sikato so mangala na luganan tan kabayo, say ehersito  tan mabayani a too (nipasag ira ya amin, ag-ira naani ombangon; napaandi ra, naerep ira a singa say pabilo).”​—Isaias 43:14-17.

16. Antoy sagmaken na Babilonia, saray managlakon Caldeo, tan siopaman a mangidepensa ed Babilonia?

¹⁶ Say Babilonia so singa prisoan ed saray adestiero lapud satan so mangaamper ed ipawil da ed Jerusalem. Balet, saray depensa na Babilonia so aliwan babeng parad Makapanyarin-amin, say Sakey a nanggawa nensaman na “dalan ed [Ambalangan Dayat], tan sakey a basbas ed saray makapanyari a danum”​—a nayarin samay Jordan. (Exodo 14:16; Josue 3:13) Diad mipadparan dalan, paekatan na ahente nen Jehova, a si Ciro, so mabiskeg a Eufrates, pian makaloob ed syudad iray mibabakal to. Saray managlako a manlalamo diad saray banawang na Babilonia​—danum a dadalanan na nilibon baloto a pannegosyo tan parad saray bapor a mangaawit ed dirios na Babilonia​—so onorangal lapud kaermenan sano say makapanyari a kabisera ra so nageba. Singa saray karwahe nen Faraon diad Ambalangan Dayat, anggapo met so nagawaan na saray masiglat a karwahe na Babilonia. Sikatoy agda niliktar. Singa kainomay ed pangerep na makuykuyep a pabilo na larak a lamparaan, katsepen na saray onlulubak so bilay na siopaman a mangidepensa.

Maligen ya Iwanwan nen Jehova so Totoo To a Pasempet

17, 18. (a) Anton “balo” a bengatla so impropesiya nen Jehova? (b) Diad anton dalan ya agla nonoten na totoo iray apalabas, tan akin?

¹⁷ Legan ya ikokompara nen Jehova so ginawa to a panangiliktar nensaman tan ed gawaen to ni labat, oniay inkuan to: “Agyo nodnonoten so saray inmuna a bengatla, tan agyo met nonoten so saray daan a bengatla. Nia, manggawa ak naani na balo a bengatla; ompaway la natan; agyo ta naani naamtaan? Mangiyan ak naani na sakey ni a dalan ed kalawakan, tan saray ilog ed saray kabueran. Saray ayep ed uma igalang da ak naani, saray chacal tan avestruz; lapu ed mangiter ak na danum ed saray kalawakan, tan saray ilog ed saray kabueran, pian oninum so baley ko a pinilik, say ombaley a ginawak a nipaakar ed siak lanlamang, pian ipatnag da komon so kigalang ko.”​—Isaias 43:18-21.

¹⁸ Diad pangibabagan, “agyo nodnonoten so saray inmuna a bengatla,” ag-isusuheri nen Jehova a lingwanan la na saray lingkor to iray imbeneg a panangiliktar to. Diad tua, dakel ed sarayan gawa so kabiangan ed impuyan na Dios ya awaran na Israel, tan ingganggan nen Jehova a nodnonoten a tinaon so inkiliktar ed Ehipto diad selebrasyon na Paskua. (Levitico 23:5; Deuteronomio 16:1-4) Balet, kaliktan nen Jehova natan a sikatoy idayew na totoo to lapud “balo a bengatla”​—bengatlan naeksperiensya ra a mismo. Aliwan say kibulos lambengat ed Babilonia so kabiangan ed saya noagta pati say mamilagron pambaroy dan pasempet, a nayarin say mas direkta a rota ed desierto. Diad satan a kelang a dalin, manggawa si Jehova na “dalan” parad sikara tan manggawa na makapanyari iran gawa a pakanodnonotan ed ginawa to parad saray Israelita diad panaon nen Moises​—diad tua et taganoen to diad desierto iray onsesempet tan peneken to so inkapgaan da panamegley na tudtua iran ilog. Daakan a tuloy so probisyon nen Jehova ya anggan saray atap ya ayep so mangigloria ed Dios tan agda sakitan so totoo.

19. Panon ya onkukurang ed “say Dalan na Inkasanto” so nakdaan na espiritual ya Israel tan saray kaiba ra?

¹⁹ Mipadpara, nen 1919 saray nakdaan na espiritual ya Israel so imbulos diad inkakautibo ed Babilonia, tan nambaroy ira ed rota ya imparaan nen Jehova parad sikara, “say Dalan na Inkasanto.” (Isaias 35:8) Aliwan singa saray Israelita, agda kaukolan so manalis-alis ed mansasnit iran desierto, tan ag-angangga so pambabaroy da kayari pigaran bulan diad pakasabi ed Jerusalem. Bangbalet, “say Dalan na Inkasanto” so peteg ya angiwanwan ed saray nakdaan na alanaan a Kristiano diad espiritual a paraiso. Diad kaso ra, nansiansia ira ed satan a “Dalan na Inkasanto,” lapud kaukolan ni ran manbaroy ed sayan sistema na bengabengatla. Daput no mansiasiansia ira ed dalan​—daput no tutuloken da iray estandarte na Dios ed kalinisan tan kasantosan​—mansiansia ira ed espiritual a paraiso. Tan agaylan gayaga ra a nakaiba so baleg ya ulop na “aliwan-Israelita”! Diad piduman tuloy ed saramay ontutupleg ed sistema nen Satanas, saray nakdaan tan saray kaiba ra so mantutultuloy a manggagayaga ed mayaman ya espiritual a ponsia diad panangasikaso nen Jehova. (Isaias 25:6; 65:13, 14) Lapud natetebek da so panamendisyon nen Jehova ed totoo to, dakel a singa-ayep a totoo so anguman ed kabibilay da tan angigloria ed tuan Dios.​—Isaias 11:6-9.

Impaamta nen Jehova so Impakasakitan To

20. Panon a dinismaya na Israel ed panaon nen Isaias si Jehova?

²⁰ Nensaman a panaon, say nipawil a nakdaan na Israel so anguman lan totoo no ikompara ed marelmeng  a kapanaonan nen Isaias. Diad sarayay walad unor et oniay inkuan nen Jehova: “Sika agmo [ak] tinawag, O Jacob; noag ingen sika abanalan ka ed siak, O Israel. Agka angiyakar ed siak na nanlapu ed saray karnerom a nipaakar a napoolan a bagat: agmo ak inggalang ed saray bagat mo. Agtaka pinaawitan ed saray nibagat, agtaka pinakapuy ed insenso [“olibano,” NW]. Agmo ak insaliwan ed pilak na unas, tan agmo ak met pinera ed taba na saray bagat mo: noag ingen pinabelatan mo ak ed saray kasalanan mo, pinakesaw mo ak ed saray inkauges mo.”​—Isaias 43:22-24.

21, 22. (a) Akin a nibagan agmakapabelat iray kakaukolanen nen Jehova? (b) Panon a singa gagawaen na totoo a si Jehova so manlingkor ed sikara?

²¹ Diad impangibagan, ‘agtaka pinaawitan ed saray nibagat, agtaka pinakapuy ed olibano,’ ag-isusuheri nen Jehova ya agla nakaukolan so panagbagat tan olibano (laok ed masanton insenso). Peteg a manunan kabiangan iraya ed tuan panagdayew diad silong na Ganggan a sipanan. Ontan met ed “unas,” ya ontutukoy ed masamyong a calamus, ambalingit a laok na masanton larak a panlana. Lilingwanan la na saray Israelita so pangusar ed saraya diad panaglingkor ed templo. Balet kasin makapabelat irayan kakaukolanen? Andin balot! Mainomay iray kakaukolanen nen Jehova no ikompara ed kakaukolanen na palson dirios. Singa bilang, kakaukolanen na palson dios a Molek so panagbagat na ugaw​—bengatlan agbalot kinaukolan nen Jehova!​—Deuteronomio 30:11; Miqueas 6:3, 4, 8.

²² No wala labat lay espiritual a pakatebek na saray Israelita, ag-iran balot komon ‘abanalan ed si Jehova.’ Diad itupleg ed Ganggan to, nanengneng da so aralem a panangaro to ed sikara tan maliket dan ibagat ed sikato so “taba,” say sankaabigan a kabiangan na bagbagat da. Imbes, sinisiblet dan inala so taba. (Levitico 3:9-11, 16) Agaylay impangonigon na sayan marelmeng a nasyon ed si Jehova lapud makapabelat iran kasalanan da​—a singa sikato so pipiliten da a manlingkor ed sikara!​—Nehemias 9:28-30.

Man-ani na Bunga so Disiplina

23. (a) Akin a makanepegan so disiplina nen Jehova? (b) Antoy nalalanor ed pandisiplina na Dios ed Israel?

²³ Anggaman mapeget, tan makanepegan, say disiplina nen Jehova so mamawala na kalkaliktan iran resulta, a pagmaliwen ton posibli so panangasi. “Siak, siak lanlamang so amunas ed saray impakasumlang mo lapu ed dili a kakanaan ko; et agko la naani nonoten so saray kasalanan mo. Ipanonot mo ed siak; mansangsangan ita: ipatnag mo so sengegan mo, pian napatunong ka. Say inmuna ya amam nankasalanan, tan saray managbangat [“managpatalos,” NW, paimano’d leksab] mo sinmumpa ra ed siak. Kanian mudmoraen ko naani so saray prinsipe na santuaryo; et gawaen ko naani si Jacob a sakey ya ayew, tan say Israel a sakey a kibabaing.” (Isaias 43:25-28) Singa ed amin a nasyon ed mundo, say Israel so nanlapu ed si Adan, “say inmuna.” Kanian, anggapoy Israelita a makapaneknek a sikatoy “napatunong.” Anggan “saray managbangat” na Israel, odino saray managpatalos to, ed Ganggan, so nankasalanan ed si Jehova tan imbangat da iray katilaan. Bilang resulta, abuloyan nen Jehova so interon nasyon to a ‘naayew’ tan ‘nibabaing.’ Mudmoraen to met so amin a mangidadaulo ed masanto a pasen, odino “santuaryo.”

24. Diad anton manunan rason a perdonaen nen Jehova so totoo to​—nensaman tan natan​—ingen, antoy liknaan to ed sikara?

²⁴ Imanoen balet, a say resultan panangasi na Dios et agbasta lapud impagbabawi na Israel; satan so parad dilin pankaabigan nen Jehova. On, nalalanor so ngaran to. No sigpot to lan ipulisay so adestieron Israel, say mismon ngaran to so balawen na saray mangiimano. (Salmo 79:9; Ezequiel 20:8-10) Ontan met natan, say kililiktar na totoo so onkokomadua lambengat ed pamasantos ed ngaran nen Jehova tan say kiyalangon na inkasoberano to. Anggaman ontan, inaro nen Jehova iramay agmasuyat a mangaawat na disiplina tan mandadayew ed sikato ed espiritu tan katuaan. Ipapatnag toy panangaro to ed saraya​—balanglan alanaan odino arum a karnero​—diad pamunas ed saray lingo ra a base ed bagat nen Jesu-Kristo.​—Juan 3:16; 4:23, 24.

25. Antoran makapakelkelaw a bengatla so gawaen nen Jehova ed maganon arapen, tan panon tayon nipatnag so pisasalamat tayo natan?

²⁵ Niarum ni, magano lan ipatnag nen Jehova so panangaro to ed baleg ya ulop na matoor iran managlingkor ed sikato sano manggawa na bengatlan balo nisengeg ed sikara diad pangiliktar ed sikara diad “baleg ya irap” a mamaarap ed alinisan a ‘balon dalin.’ (Apocalipsis 7:14; 2 Pedro 3:13) Naimatonan da so sankamakapakelawan a panangipatnag na pakapanyari nen Jehova ya agnin balot anengneng na totoo ed kapiganman. Lapud segseguradon kagawa na satan ya ebento, saray nakdaan ya alanaan tan amin na saramay kabiangan na baleg ya ulop so manggayaga tan inagew-agew a manbilay a mitunosan ed satan ya atagtagey ya impanawag: “Sikayo so saray tasik”!​—Isaias 43:10.

[Paimano ed Leksab]

[Tepetepet Parad Panagaral]