Bayuboan so Katutulok Legan a Manasingger so Anggaan

“Dia ed [Siloh] wala naani katutulok na saray katooan.”​—GENESIS 49:10.

1. (a) Nensaman, anto so mabetbet a kabaliksan na katutulok ed si Jehova? (b) Anto so impropesiya nen Jacob nipaakar ed katutulok?

 SAY katutulok ed si Jehova so mabetbet a mankabaliksan na katutulok ed saray mangilalaman ed sikato. Laktipen na saratan iray anghel, patriarka, ukom, saserdote, propeta, tan arari. Say trono na saray arari ed Israel so tinawag ni ingen a trono nen Jehova. (1 Awaran 29:23) Makapaermen balet, ta dakel ed saray manuley ed Israel so tinmunganga ed Dios, ya angitarok na desyang ed sikaran dili tan ed saray uuleyan da. Balet ag-inkaindan nen Jehova iray matoor ed sikato ya andian na ilalo; niligliwa to ra panamegley na sipan a sikatoy mangipuesto na ag-ompatey ya Ari, a panliketan a tuloken na saray matunong. (Isaias 9:6, 7) Oniay impropesiya na magano lan ompatey a patriarkan Jacob nipaakar ed sayan arapen a manuley, a mankuan: “Say setro ag-ontaynan ed Juda naani, nisay tayukor na mananguley agnaekal ed leet na saray salisali to, angga ed isabi nen Siloh; tan dia ed sikato wala naani katutulok na saray katooan.”​—Genesis 49:10.

2. Anto so kabaliksan na “Siloh,” tan anto so lanoren na maarin pananguley to?

² Say “Siloh” et sakey a Hebreon termino a mankabaliksay “Sikato a Makankayarian ed Satan.” On, say Siloh so manawir ed sigpot a kanepegan ed pananguley, unong ya insimbolo na setro, tan say pakayarin mangiganggan, unong ya inrepresenta na tayukor na komandante. Niarum  ni, say maarin uley to so mangisakop ed, aliwa labat lan saray kapolian nen Jacob, noagta amin a “katooan.” Saya so mitunosan ed sipan nen Jehova ed si Abraham: “Say ilalak mo [“binim,” NW] kayarianen to naani pulongpinto na kakabusol to. Tan dia ed ilalak mo so pakapikapalaranan na saray amin a nasyon dia.” (Genesis 22:17, 18) Pinekderan nen Jehova so pakabidbiran ed sayan ‘bini’ nen 29 K.P. sanen si Jesus na Nazaret so nilanaan to na masanton espiritu.​—Lucas 3:21-23, 34; Galacia 3:16.

Say Inmunan Panarian nen Jesus

3. Anton pananguley so inawat nen Jesus sanen sikatoy tinmokotok ed tawen?

³ Sanen tinmokotok si Jesus ed tawen, agtampol niiter ed sikato so setro na pananguley ed katooan diad mundo. (Salmo 110:1) Balet, sikatoy akaawat na ‘panarian’ a walaan na saray uuleyan a matulok ed sikato. Satan a panarian so impabidbir nen apostol Pablo sanen insulat to: “[Say Dios so] angilaban ed sikatayo [alanaan na espiritu a Kristianos] ed biskeg na kabilungetan, tan angiyalis ed sikatayo ed panariay Anak na aro to.” (Colosas 1:13) Sayan impangilaban so ginmapo nen Pentecostes 33 K.P., sanen niyibung so masanton espiritu ed matoor iran patumbok nen Jesus.​—Gawa 2:1-4; 1 Pedro 2:9.

4. Antoran dalan ya impatnag na saray akadkaunan babangatan nen Jesus so katutulok da, tan panon so impangipabidbir nen Jesus ed sikara bilang grupo?

⁴ Bilang ‘ibabaki nen Kristo,’ saray alanaan na espiritun babangatan so matulok ya anipon ed arum nin magmaliw a “kabaleyan” ed satan ya espiritual a panarian. (2 Corinto 5:20; Efeso 2:19; Gawa 1:8) Niarum ni, saraya so kinaukolan a mansiansian ‘ayadyari a nannononong ed saksakey a nonot tan saksakey ya isip’ ta pian napanggayagaan da so panangabobon na Ari ran si Jesu-Kristo. (1 Corinto 1:10) Bilang grupo, tugyopen da so “matoor tan makabat ya aripen,” odino matoor a managpaga a klase.​—Mateo 24:45; Lucas 12:42.

Abendisyonan Lapud Katutulok ed “Managpaga” na Dios

5. Nanlapu la’d nensaman, panon so impangibangat nen Jehova ed totoo to?

⁵ Lawas angitarya si Jehova na saray managbangat parad totoo to. Alimbawa, kapawil na saray Judio manlapud Babilonia, si Esdras tan pigaran kualipikadon lalaki so aglabat angibasa ed Ganggan na Dios ed totoo, sikara so ‘angipaliwawa’ ed satan a ganggan, ya ‘inter da so belas, tan talos’ na Salitay Dios.​—Nehemias 8:8.

6, 7. Panon so pangitatarya na aripen a klase ed nipanpanaon ya espiritual a tagano panamegley na Mananguley ya Ulop na satan, tan akin a matukoy so pampasakop ed aripen a klase?

⁶ Nen inmunan siglo, sanen linmesa so isyu nipaakar ed panaggalsim nen 49 K.P., say mananguley ya ulop na satan ya inmunan aripen a klase so masimoon ya angikonsidera ed pamaakaran tan awalaan ira na Makasulatan  a konklusyon. Sanen inyanunsio ra so desisyon da panamegley na sulat, tinulok na saray kongregasyon so direksion a niiter tan nanggayagaan da so mayaman a bendisyon na Dios. (Gawa 15:6-15, 22-29; 16:4, 5) Ontan met ed modernon panaon, say matoor ya aripen panamegley na Mananguley ya Ulop na satan so angipalinew ed saray importantin isyu a singa say neutralidad na Kristiano, say inkasagrado na dala, tan say usar na druga tan tabako. (Isaias 2:4; Gawa 21:25; 2 Corinto 7:1) Benendisyonan nen Jehova so totoo to lapud katutulok da ed Salita to tan ed matoor ya aripen.

⁷ BDiad pampapasakop da ed aripen a klase, impanengneng met na totoo na Dios so panagpasakop da ed Katawan dan Jesu-Kristo. Satan a panagpasakop so lalon makabaliksan diad modernon panaon lapud apalaknab ya autoridad nen Jesus, unong a nipasakbay ed propesiya nen Jacob sanen sikatoy magano lan ompatey.

Say Siloh so Nagmaliw a Makanepegan a Manuley na Dalin

8. Panon tan kapigan a linmaknab so autoridad nen Kristo?

⁸ Impasakbay na propesiya nen Jacob a kaukolanen na Siloh so ‘katutulok na katooan.’ Malinew, say pananguley nen Kristo so onnatnat ed paway na espiritual ya Israel. Anto so saglawien na satan? Oniay ebat na Apocalipsis 11:15: “Saray nanarian na mundo agawa ran nanarian na Katawan tayo, tan si Kristo to: tan manari ed ando lan ando.” Imparungtal na Biblia a naawat nen Jesus itan ya autoridad diad anggaan na mapropetikon “pitoran panaon”​—“saray aturon panaon na saray nasyon”​—nen 1914. * (Daniel 4:16, 17; Lucas 21:24, NW) Diad satan a taon et ginmapo so agnanengneng a “kiwawala” nen Kristo bilang Mesianikon Ari, ontan met ed panaon to a ‘manuley ed pegley na kakabusol [to].’​—Mateo 24:3, NW; Salmo 110:2.

9. Anto so ginawa nen Jesus sanen naawat to so Panarian to, tan anto so agmaparungtal ya epekto na satan ed katooan, nagkalalo la ed saray babangatan to?

⁹ Say inmunan ginawa nen Jesus kapangawat to ed maarin pakayari et say impangibasileng to ed mismon mangilalaman ed katutunganga​—si Satanas​—kaiba iray demonyo to ‘diad dalin.’ Manlapu la’d saman, pinalesa na sarayan marelmeng ya espiritu so pirmin irap ed katooan, nilikud ed pangiyaalibansa na sakey a kaliberliber a makapaangat so itulok ed si Jehova. (Apocalipsis 12:7-12; 2 Timoteo 3:1-5) Diad tua, say manunan puntirya na pibabakal nen Satanas ed espiritual et saray nilanaan nen Jehova, ‘a manguunor ed ganggan na Dios, tan wala ed sikara so kimey a panagtasi ed si Jesus,’ tan say ‘arum a karnero’ a kakaiba ra.​—Apocalipsis 12:17; Juan 10:16.

10. Say kasumpalan na antoran propesiya na Biblia so mangigarantiya ed isaew na pibabakal nen Satanas ed saray tuan Kristiano?

¹⁰ Balet, si Satanas so nipasakbay lan onsaew lapud saya so “agew na Katawan,” tan anggapo so makaamper ed si Jesus diad ‘panumpal to ed pananalo to.’ (Apocalipsis 1:10; 6:2, NW) Alimbawa, seguroen to so unor a panagtatak ed 144,000 ya espiritual ya Israelita. Salimbengan to met so “baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita.” (Apocalipsis  7:1-4, 9, 14-16) Anggaman ontan, aliwan singa ed saray alanaan a kakaiba ra, saraya so magmaliw a matulok ya uuleyan nen Jesus diad dalin. (Daniel 7:13, 14) Say mismon kiwawala ra ed dalin so angitarya la na nanengneng ya ebidensya a say Siloh so peteg a Manuley ed ‘say panarian ed mundo.’​—Apocalipsis 11:15.

Natan la so Panaon Pian ‘Tuloken so Ebanghelyo’

11, 12. (a) Siopa lambengat so makaliktar ed anggaan na kaplesan a sistema na bengabengatla? (b) Antoran ugali so babayuboan na saramay mangaawat ed “espiritu na mundo”?

¹¹ Amin a malabay a manbilay na andi-anggaan so nepeg a manaral ya ontulok, lapud malinew ya idadatak na Biblia a “saray agmikabat ed Dios, tan dia ed saray ag-ontulok ed ebanghelyo na Katawan tayon Jesus” so agmakaliktar ed agew na panamales na Dios. (2 Tesalonica 1:8) Balet, lapud kaplesan a marelmeng a kaliberliber tan say awawey a panagrebeldi ed saray ganggan tan prinsipyo na Biblia, makapaangat so itulok ed maong a balita.

¹² Sayan awawey ya isusumpa ed Dios so deneskribe na Biblia bilang say “espiritu na mundo.” (1 Corinto 2:12) Diad impangisalaysay to ed saray epekto na satan ed totoo, oniay insulat nen apostol Pablo ed saray inmunan-siglon Kristiano diad Efeso, a kuanto: “Nanakaran yo nensaman a panaon unong ed kaugalian na sayan mundo, unong ed pangulo na pakayari dagem, na espiritu a natan manggawa ed saray anak na kasusumpa. Diad pegley na saraman sikatayo met ya amin nensaman a panaon nambilay itayo ed saray kaalakan na laman tayo, a sinumpal tayo so saray kaliktan na laman tan saray kanonotan, tan dia ed inkatoo anak to itayo ed sanok, a singa saray arum.”​—Efeso 2:2, 3.

13. Panon ya epektibon naresistian na saray Kristiano so espiritu na mundo, tan tekep na antoran makagunggonan resulta?

¹³ Makapaliket ta saray Kristiano ed Efeso so agnansiansian aripen na satan ya espiritu na katutunganga. Imbes, sikara so nagmaliw a matulok ya ananak na Dios diad pampapasakop da ed espiritu to tan panaani da na daakan tan makagunggonan bunga na satan. (Galacia 5:22, 23) Ontan met natan, say espiritu na Dios​—say sankabiskegan a puersa ed uniberso​—so ontutulong ed minilyon pian magmaliw a matulok ed si Jehova, a manresulta ed pakawalaan da na “nagnap a pakaseguroan ed ilalo ya anggad anggaan.”​—Hebreos 6:11, NW; Zacarias 4:6.

14. Panon ya inalertoan nen Jesus so amin a Kristiano a manbibilay ed kaunoran iran agew nipaakar ed espisipiko iran bengatla a manubok ed katutulok da?

¹⁴ Nodnonoten met a sikatayo so mabiskeg a susuportaan na Siloh, kaiba so Ama to, ya agda iyabuloy so kakabusol​—demonyo odino totoo​—a manubok ed katutulok tayo ed labas na nayarian tayo. (1 Corinto 10:13) Diad tua, pian natulongan itayo ed espiritual a pibabakal tayo, deneskribe nen Jesus so pigaran espesipikon problema a kidungetan tayo diad sarayan kaunoran ya agew. Ginawa to itan diad panamegley na pitoran sulat, ya inter to ed si apostol Juan panamegley na sakey a pasingawey. (Apocalipsis 1:10, 11) Pian makaseguro, lugan na satan so importantin simbawa parad saray Kristiano nensaman, balet say manunan aplikasyon na saratan et diad “agew na Katawan,” manlapu la’d nen 1914. Matukotukoy sirin, ya imanoen tayo irayan mensahe! *

Paliisan so Agpangingalngalep, Imoralidad, tan Materyalismo

15. Akin a nepeg itayon manbantay sumpad probleman angapekta ed kongregasyon na Efeso, tan panon tayon nagawaan itan? (2 Pedro 1:5-8, NW)

¹⁵ Say primeron sulat nen Jesus et parad kongregasyon na Efeso. Kayari ton kinomendaan so kongregasyon lapud panagsungdo ra, inkuan nen Jesus: “Balet wala so isumpak ed sika, ta inkaindan mo so akauna ya arom.” (Apocalipsis 2:1-4) Natan, walaray datin maseseg a Kristiano ya akabalang met la ed datin masimoon ya aro ra ed Dios. Say ontan ya inkabalang so mamaletey ed relasyon na sakey ed Dios kanian nepeg ya ipetek itan a tampol. Panon a napabiskeg lamet so ontan ya aro? Diad regular a panagaral na Biblia, iyaatendi ed saray miting, pikakasi, tan panagdalepdep. (1 Juan 5:3) Tua, saya so mankaukolan  na “masimoon a sagpot,” balet maseguron makanakana itan. (2 Pedro 1:5-8, NW) No ipatnag na matuan dilin-panangusisa a say aro yo so binmetel la, ipetek sirin a tampol so kipapasen, bilang katutulok ed simbawa nen Jesus: “Pakanonoten mo sirin no iner so naplagan mo, tan magbabawi ka, tan gawam so saray manunaan a gawa.”​—Apocalipsis 2:5.

16. Antoran impluensya a mapeligro ed espiritual so niwala ed saray kongregasyon ed Pergamo tan Tiatira, tan akin a matukoy natan iray salita nen Jesus ed sikara?

¹⁶ Akomendaan iray Kristiano ed Pergamo tan Tiatira lapud integridad, panagsungdo, tan seseg da. (Apocalipsis 2:12, 13, 18, 19) Ingen ta naimpluensyaan ira na pigaran mangipapatnag na marelmeng ya espiritu nen Balaam tan Jezabel, a diad panamegley na seksual ya imoralidad tan panagdayew ed Baal et kinmana ira bilang mauges ya impluensya a singa ed kadaanan ya Israel. (Numeros 31:16; 1 Arari 16:30, 31; Apocalipsis 2:14, 16, 20-23) Balet komusta ed panaon tayo​—say “agew na Katawan”? Kasin mapatnag met natan so ontan a mauges iran impluensya? On, lapud say imoralidad so maseguron manunan sengegan na kadidispelosip na arum ed limog na totoo na Dios. Agaylan importante sirin ya agtayo pilimogan so amin ya indibidual​—diad loob tan paway na kongregasyon​—a mauges so impluensya ra ed moral! (1 Corinto 5:9-11; 15:33) Saramay malabay a magmaliw a matulok ya uuleyan na Siloh so ompaliis met ed kuestionable iran panagligliwaan ontan met ed pornograpiya ya inimprinta tan diad Internet.​—Amos 5:15; Mateo 5:28, 29.

17. Panon a nikompara so panmoria tan awawey na saramay walad Sardis tan Laodicea ed panmoria nen Jesus ed espiritual a kipapasen da?

¹⁷ Nilikud ed pigaran indibidual, anggapoy komendasyon a naawat na kongregasyon ed Sardis. Walaan itan na “ngaran,” odino itsura, na pagmaliw a mabilay, balet ta nigalet ira ed espiritual ya agpangingalngalep kanian parad si Jesus et satan so “inatey” la. Rotina lambengat ed sikara so katutulok. Agaylan panangondena! (Apocalipsis 3:1-3) Ontan met so kipapasen na kongregasyon ed Laodicea. Ipapangta na satan so materyal a kayamanan, a kuanto, “Mayaman ak,” ingen ta parad si Kristo et satan so “pakaskasi tan makibot tan duka tan bulag tan labos-lakseb.”​—Apocalipsis 3:14-17.

18. Panon a napaliisan na sakey so pagmaliw a malainem-em ed espiritual diad imaton na Dios?

¹⁸ Natan, walaray datin matoor a Kristianos a naplag met ed parehon nengneng na katutunganga. Nayarin inabuloyan da so espiritu na mundo a manaeg ed liknaan da nipaakar ed inkaganatan na panaon, kanian abayuboan da so  inkamalainem-em ed espiritual nipaakar ed panagaral na Biblia, pikakasi, saray miting na Kristiano, tan say ministeryo. (2 Pedro 3:3, 4, 11, 12) Agaylan importante ya ontulok iratan ed si Kristo diad pangisimpen da na espiritual iran kayamanan​—on, ‘manaliw ira ed [si Kristo] na balitok a ginogolan ed apoy’! (Apocalipsis 3:18) Laktipen na satan a tuan kayamanan so pagmaliw a ‘mayaman ed maabig iran gawa, mapalangkap, mainomay a mangiter.’ Diad pangisimpen ed sarayan mabmablin kayamanan, sikatayo so ‘mantitipon na sakey a maabig a pangiletnegan a niparaan ed panaon ya onsabi, pian nabembenan so bilay, a sikato so bilay a peteg.’​—1 Timoteo 6:17-19.

Akomendaan Lapud Katutulok Da

19. Antoran komendasyon tan pananimbawa so inter nen Jesus ed saray Kristiano diad Smyrna tan Filadelfia?

¹⁹ Nikadkaduma iray kongregasyon ed Smyrna tan Filadelfia bilang alimbawa na katutulok, lapud anggapoy panamaat a lugan na saray sulat nen Jesus ed sikara. Inkuanto ed saramay walad Smyrna: “Amtak so saray irap mo, tan kadukaan mo (balet sika mayaman ka).” (Apocalipsis 2:9) Nidumaduma iramay walad Laodicea, ya angipangta ed minumundon kayamanan da balet ta sikara so peteg a pobpobri! Siempre, agpanliketan na Diablo so siopaman a mangipapatnag na katooran tan katutulok ed si Kristo. Kanian, oniay impasakbay nen Jesus: “Agka ontakot na mogmo ed saray bengatla ya asingger la ya akoen mo: nia, say Diablo asingger lay pangiyan to ed arum ed sikayo ed panangipangawan, pian nasali kayo; tan wala so irap yo ed samploy agew. Mansiansia ka angga ed patey, tan siak iter ko ed sika so balanget na bilay.” (Apocalipsis 2:10) Mipadpara, kinomendaan nen Jesus iramay walad Filadelfia, a kuanto: “Inunor mo so salitak [odino, tinulok mo ak], tan agmo imburi so ngaran ko. Siak ondago ak a magano: pokpokan mo so wala ed sika, pian anggapo so mangala ed balanget mo.”​—Apocalipsis 3:8, 11.

20. Panon so panguunor na minilyon natan ed salita nen Jesus, tan anggaman ed antoran sirkumstansya?

²⁰ Diad “agew na Katawan,” a ginmapo nen 1914, say matoor a nakdaan tan say kakaiba ran arum a karnero, a manbilang la natan na minilyon, so angunor met ed salita nen Jesus diad panamegley na maseseg a pibibiang ed ministeryo tan diad impansiansia ran malet ed katooran da. Singa ed saray inmunan-siglon agagi ra, arum so apairap lapud katutulok da ed Kristo, a niiyan ni ingen ira ed prisoan tan ed panangipangawan a kampo. Arum so angunor ed salita nen Jesus diad impamasiansia ra ed ‘simplin mata,’ anggaman apaliberan ira na kayamanan tan agum. (Mateo 6:22, 23, NW) On, diad kada kaliberliber, tan kada kipapasen, saray tuan Kristiano, panamegley na katutulok da, so nantultuloy a mamapaliket ed puso nen Jehova.​—Uliran 27:11.

21. (a) Anton espiritual ya obligasyon so mantutultuloy a susumpalen na aripen a klase? (b) Panon tayon nipanengneng a labay tayon tuloken so Siloh?

²¹ Diad panasingger tayo ed baleg a kairapan, mansiasiansian determinado so “matoor tan makabat ya aripen” ed agda pangikompromiso ed katutulok da ed Katawan, si Kristo. Laktipen na saya so pangipaparaan ed nipanpanaon ya espiritual a tagano parad sankaabungan na Dios. Komon ta mantultuloy tayon apresyaen so makapakelaw a teokratikon organisasyon nen Jehova tan saray itatarya na satan. Diad sayan paraan, nipatnag tayo so panagpasakop ed Siloh, a mangitumang na andi-anggaan a bilay ed amin a matulok ya uuleyan to.​—Mateo 24:45-47; 25:40; Juan 5:22-24.

[Saray paimano ed leksab]

Kasin Nanonotan Yo?

• Anto so betang a gawaen nen Jesus ya impropesiya nen Jacob nen magano lan ompatey?

• Panon tayon bidbiren si Jesus bilang Siloh, tan anton espiritu so nepeg tayon paliisan?

• Anton matukoy a simbawa ed panaon tayo so lugan na saray sulat ed pitoran kongregasyon ed Apocalipsis?

• Diad antoran paraan a naalig tayo iramay walad kongregasyon na kadaanan ya Smyrna tan Filadelfia?

[Tepetepet Parad Panagaral]

[Saray litrato ed pahina 18]

Bebendisyonan nen Jehova so totoo to diad panguunor da ed matoor a “managpaga”

[Litrato ed pahina 19]

Lapud impluensya nen Satanas, makapaangat so itulok ed Dios

[Saray litrato ed pahina 21]

Ontulong ed sikatayo so malet a relasyon ed si Jehova pian magmaliw a matulok ed sikato