Bebendisyonan tan Sasalimbengan nen Jehova Iramay Matulok

“Anggan siopa ya ondengel ed siak manayam ed katalkan, tan sikato naani mareen ya andi-takot ed mauges.”​—ULIRAN 1:33.

1, 2. Akin ya importante so katutulok ed Dios? Iyilustra.

 TOKTOK a toktok ed karikaan iray mabago tan manuyawduyaw a siwsiw, ya agdan balot nalilimen so mantektekkiab a baga ed tagey. Bigbigla et maksil a kinmutak so nganak pian mamasakbay insan imbuskag to iray payak to. Batik ed sikato iray siwsiw to, tan pigaran segundo labat et sikaray maligen lan akaamot ed silong na payapayak to. Agla intuloy na baga so pansibar to. * Anto so leksion? Say katutulok so mangiliktar ed bilay!

² Satan a leksion et nagkalalo lan importante ed saray Kristiano natan, lapud pambabanikelan nen Satanas a sibaren so totoo na Dios. (Apocalipsis 12:9, 12, 17) Say getma to et say paneral ed espiritualidad tayo ta pian naandi ed sikatayo so pabor nen Jehova tan say ilalo ya andi-anggaan a bilay. (1 Pedro 5:8) Balet, no mansiansia itayon maapit ed Dios tan onkiwas itayon tampol ed panangidirehi na Salita tan say organisasyon to, napaseguroan itayo ed makasalimbeng a panangasikaso to. “Sikato sakbongan to ka na saray bagobago to, et dia ed silong na saray payak to manmatalek ka,” so insulat na salmista.​—Salmo 91:4.

Nagmaliw a Samsam so Sakey a Matungangan Nasyon

3. Anto so resulta na aminpigan intunganga na Israel?

³ Sanen matulok ni ed si Jehova so nasyon na Israel, naynay itan a nagunggonaan ed maimanon panangasikaso to. Ingen ta, aminpigan imbeneg na sayan totoo so Nanggawa ed sikara tan dinmapag ira ed dirios a gawa ed kiew tan bato​—‘saray maapa a bengatla ya agnapinabangan nisay makapangilaban.’ (1 Samuel 12:21) Kayari na dakel a siglo na impanrebeldi ra, say interon nasyon so naimpluensyaan a maong ed apostasya kanian nigalet lan maong ed satan. Sirin, oniay intagleey nen Jesus: “Jerusalem, Jerusalem, a mamatey ed saray propeta, tan tupaken to ray nibaki ed sikato! Aminpigapigan nilabay ko komon a tinipon ya impandaragup iray anak mo. A singa sakey a nganak a tiponen to ’ray siwsiw to ed silong na saray payak to, et agmo nilabay! Nia say abung yo nataynan ed sikayo ya andi lugan.”​—Mateo 23:37, 38.

4. Panon a pinmatnag so impangitalirak nen Jehova ed Jerusalem nen 70 K.P.?

⁴ Say impangitalirak nen Jehova ed rebelyoson Israel so makapasinagem ya apatnagan nen 70 K.P. Diad satan a taon, saray armada na Roma, ya akabemben ed saray simbolo ra a naukitan na imahen na agila, so dinmapo ed Jerusalem pian mangipaakseb na makapataktakot a panagpatey. Say syudad so apusek na saray manseselebra na Paskua. Anggapoy agawaan na dakel a bagbagat da pian nagamoran da so pabor na Dios. Satan so makapasinagem a mangipanonot ed saray salita nen Samuel ed matungangan Arin Saul: “Walaan kasi si Jehova na baleg a liket dia ed bagbagat  a poolan tan bagbagat, singa say panangunor ed boses nen Jehova? Nia, say panangunor sikato so magmaong nen say bagat, tan say pangimatlek nen say taba na saray karnero a kalakian.”​—1 Samuel 15:22.

5. Anton nengneng na katutulok so kakaukolanen nen Jehova, tan panon tayon amta a posibli itan a katutulok?

⁵ Anggaman ed nikaduman kakaukolanen to ya ontulok itayo, kabkabat nen Jehova iray limitasyon na ag-ayadyarin totoo. (Salmo 130:3, 4) Say kakaukolanen to et say inkasimoon na puso tan katutulok a nibase ed pananisia, aro, tan say mabunigas a takot a sikatoy napaermen. (Deuteronomio 10:12, 13; Uliran 16:6; Isaias 43:10; Miqueas 6:8; Roma 6:17) Posibli itan a katutulok lapud nipatnag la itan na ‘baleg a lurem na saray sakbay-Kristianon tastasi,’ a nanmantini ed katooran da diad saray mairap a subok, anggan diad ipapatey. (Hebreos 11:36, 37; 12:1) Talagan apaliket da so puso nen Jehova! (Uliran 27:11) Anggaman ontan, walaray ginmapon matoor balet ta ag-ira nansiansian matulok. Sakey la ed saratan si Arin Joas na kadaanan a Juda.

Sakey ya Arin Naimpluensyaan na Makapuy Lapud Mauges Iran Kalimog

6, 7. Anton nengneng na ari si Joas sanen mabilay ni si Joiada?

⁶ Dawdawit ya apapatey si Arin Joas sanen sikatoy ugaw ni. Sanen manedad lay pitora si Arin Joas, sikatoy makpel ya impaway na Atagey a Saserdoten si Joiada insan to ginawan ari. Lapud inmakto so matakot ed Dios a si Joiada bilang ama tan mananimbawa nen Joas, say malangwer nin manuley so ‘nanggawa na maptek ed saray mata nen Jehova ed saray amin ya agew nen Joiada a saserdote.’​—2 Awaran 22:10–23:1, 11; 24:1, 2.

⁷ Kabiangan ed saray maabig a gawa nen Joas et say impangapiger ed templo nen Jehova​—sakey a gawa a ‘maapit ed puso nen Joas.’ Pinanonotan to so Atagey a Saserdoten si Joiada nipaakar ed pankaukolan a mangolekta na buis ed templo manlapud Juda tan Jerusalem, unong ya ‘ingganggan nen Moises,’ pian nasuportaan ed pinansyal so panangapiger. Mapatnag, tinmalona si Joiada ed impamaseseg ed kalangweran nin ari pian manaral tan ontulok ed Ganggan na Dios. Bilang resulta, say kimey ed templo tan saray kagawaan ed templo so maples ya asumpal.​—2 Awaran 24:4, 6, 13, 14, NW; Deuteronomio 17:18.

8. (a) Anto so manunan sengegan na inkaplag nen Joas ed espiritual? (b) Anto so ginawa na ari ed saginonor lapud katutunganga to?

⁸ Makapaermen ta agnansiansia so katutulok nen Joas ed si Jehova. Akin? Oniay ibabaga ed sikatayo na Salitay Dios: “Kayari na impatey nen Joiada linma so saray prinsipe na Juda, tan nanggawa ra na panangigalang ed ari. Nensaman say ari dinmengel ed sikara. Et inkaindan da so abung nen Jehova, a Dios na saray atateng da, tan nanlingkor ira ed saray Ashera tan saray talintao: et say sanok sinmabi ed Juda tan Jerusalem lapu ed saya a kasalanan da.” Say makapuy ya impluensya na saray prinsipe ed Juda so angitonton met ed ari a mangibaliwala ed saray propeta na Dios, a sakey ed saratan et say anak nen Joiada a si Zacarias, a makpel ya amaat ed si Joas tan ed saray totoo lapud katutunganga ra. Imbes a magbabawi, impatupak nen Joas si Zacarias anggad inatey. Agaylan maruksa tan matunganga so nagmaliwan nen Joas​—makasengeg itan ed inyabobon to ed impluensya na mauges iran kalimog!​—2 Awaran 24:17-22; 1 Corinto 15:33.

9. Panon ya impabitar na say nansumpalan nen Joas tan saray prinsipe so kakulangkulangan na katutunganga?

⁹ Lapud imbeneg da si Jehova, anto so nansumpalan  nen Joas tan ed saray marelmeng a prinsipen kalimog to? Say puersa militar na Sirya​—a “melag [labat] ya ulop na lalaki”​—so linmubak ed Juda tan ‘binagbag da so amin a prinsipe na baley.’ Pinaskar met na saray linmubak so ari a mangiter ed dili ton kaykayarian ontan met ed balitok tan pilak ed santuaryo. Anggaman akaliktar si Joas, sikato so linmetey tan nansakit. Agnambayag, sikatoy pinatey na saray nankokomplot ed limog na saray lingkor to. (2 Awaran 24:23-25; 2 Arari 12:17, 18) Tudtua iray salita nen Jehova ed Israel: “No agmo talinengen so boses nen Jehova a Dios mo pian sumpalen tan gawaen mo so amin a bilibilin to, tan saray pananontonan to, . . . [say] aye-ayew onsabi’ra ed sika naani, et singkaten da ka naani”!​—Deuteronomio 28:15.

Sakey a Sekretaryon Aliktar Lapud Katutulok

10, 11. (a) Akin a makatulong so panmolimoli ed simbawa nen Jehova ed si Baruc? (b) Anto so insimbawa nen Jehova ed si Baruc?

¹⁰ Kasin nadidismaya kayo no maminsan lapud dagdaiset a totoo ed Makristianon ministeryo tayo so interesado ed maong a balita? Kasin panib-ibegan yo no maminsan iray mayayaman tan saray malukak so estiloy kabibilay da? No ontan, molimolien so nipaakar ed si Baruc, a sekretaryo nen Jeremias, tan ed say maaron simbawa ed sikato nen Jehova.

¹¹ Peles ya isusulat nen Baruc so mapropetikon mensahe sanen sikaton mismo so inimano nen Jehova. Akin? Lapud paneermenan nen Baruc so kipapasen to ed bilay tan pinirawat to so mas maabig ni nen say nikaduman pribilehyo to ed serbisyo ed Dios. Diad impakaimano to ed sayan impanguman na awawey nen Baruc, si Jehova so angiter ed sikato na malinew balet ta mapangasin simbawa, a kuanto: “Anapen mo so saray baleg a bengatla a nipaakar ed sika lanlamang? Agmo ra anapen; ta nia, yakar ko naani mauges ed amin a laman, . . . balet say bilay mo iter ko naani ed sika a tekmel ed saray amin a pasen a laen mo.”​—Jeremias 36:4; 45:5.

12. Akin ya agtayo nepeg ya anapen iray ‘angkakabaleg a bengatla’ ed peles a sistema na bengabengatla?

¹² Natebek yo kasi ed saray salita nen Jehova ed si Baruc so pirmin panagpaga To ed sayan maong a too, a matoor tan makpel a nanlingkor ed sikato kaiba si Jeremias? Ontan met natan, si Jehova so mapagpaga ed saramay natutukson manggegemtan ed saray isipen dan magmaong a pakaasensoan ed sayan sistema na bengabengatla. Makapaliket ta singa si Baruc, dakel ed sikara so kinmiwas ed maaron panangipetek na saray matakken ed espiritual ya agagi. (Lucas 15:4-7) On, komon ta natebek tayon amin ya anggapo so arapen na saramay manaanap na ‘angkakabaleg a bengatla’ ed sayan sistema. Agda lambengat nasaew a naromog so tuan liket noagta, alodloor ni, sikara so napideral ed sayan mundo tan amin na saray sinisiblet a pilalek na satan.​—Mateo 6:19, 20; 1 Juan 2:15-17.

13. Anton leksion nipaakar ed kapaabebaan so ibabangat ed sikatayo na salaysay nipaakar ed si Baruc?

¹³ Say salaysay nipaakar ed si Baruc so mangibangat met ed sikatayo na maabig a leksion nipaakar ed kapaabebaan. Imanoen pa ya agdirektan sinimbawa nen Jehova si Baruc noagta sikatoy nansalita panamegley nen Jeremias, a nayarin mikabat a maong ed ag-inkayadyari tan nikaduman ugali nen Baruc. (Jeremias 45:1, 2) Ingen, si Baruc so ag-impadaeg ed kinon; mapaabeba ton atebek so peteg a nanlapuan na simbawa​—si Jehova. (2 Awaran 26:3, 4, 16; Uliran 18:12; 19:20) Kanian no ‘makagawa [itayo] na antokaman a lingon kundang sakbay tayon namoria itan’ tan makaawat itayo na nakaukolan a simbawa manlapud Salitay Dios, komon ta aligen tayo so inkatakken, espiritual a pakatebek, tan kapaabebaan nen Baruc.​—Galacia 6:1, NW.

14. Akin a makagunggona ed sikatayo so pagmaliw a matulok ed saramay mangidadaulo ed limog tayo?

¹⁴ Say ontan a mapaabeban awawey ed biang tayo so ontulong met ed saramay manisimbawa. Inkuan na Hebreos 13:17: “Ontulo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipapalinewan: pian sikato‘ya so gawaen da a sigagayaga, tan aliwa a sieermen: ta saya agmakapaabig ed sikayo.” Talagan mabetbet so pampipikasin masimoon na saray mamatatken  ed si Jehova, ya ipipikasi ran nawalaan ira na pakpel, kakabatan, tan inkataktika a nakaukolan pian nagawaan da iyan mairap ya aspekto na panagpastol a kimey! Komon ta ‘bidbiren tayo iray ontan a totoo.’​—1 Corinto 16:18.

15. (a) Panon ya impatnag nen Jeremias so panagmatalek to ed si Baruc? (b) Panon ya atumangan si Baruc ed mapaabeban katutulok to?

¹⁵ Mapatnag so impanguman na panag-isip nen Baruc, lapud inter ed sikato nen Jeremias so sananey lamet a makapaangat ya asainmin, salanti, say iyakar to ed templo tan basaen ton maksil so mismon mensahe na panangukom ya impaisulat ed sikato nen Jeremias. Kasin tinmulok si Baruc? On, ‘ginawa ton amin so ingganggan ed sikato nen Jeremias a propeta.’ Diad tua et imbasa to ni ingen itan a mensahe ed saray prinsipe ed Jerusalem, a maseguron mankaukolan na pirmin panagpakpel. (Jeremias 36:1-6, 8, 14, 15) Sanen nagba so syudad ed saray taga-Babilonia kayari na manga 18 taon, isipen pa so pisasalamat nen Baruc ed inkilegyas to lapud tinalineng to so pasakbay nen Jehova tan intunda ton anapen iray ‘angkabaleg a bengatla’ a parad inkasikato!​—Jeremias 39:1, 2, 11, 12; 43:6.

Say Intulok Legan na Kakokobkob so Angiliktar ed Saray Bilay

16. Panon ya inabagey nen Jehova iray Judio diad Jerusalem legan na impangubkob na Babilonia nen 607 K.K.P.?

¹⁶ Sanen angangga so Jerusalem nen 607 K.K.P., pinmatnag lamet so panangabagey na Dios ed saray matulok. Diad kapantokan na panangobkob, oniay inkuan nen Jehova ed saray Judio: “Nia, ’yan ko ed arap mo so dalan na bilay tan say dalan na patey. Say manayam ed saya a syudad ompatey naani ed kampilan, tan ed eras, tan ed salot; balet say ompaway tan ontipon ed saray Caldeo a mangubkob ed sikayo, manbilay naani tan say bilay to nipaakar naani a sakey a samsam.” (Jeremias 21:8, 9) Anggaman makanepegan lan deralen iray manaayam ed Jerusalem, inabagey nen Jehova iramay tinmulok ed sikato, anggaman ed saman a mapeligro tan unor la ran bekta. *

17. (a) Diad anton duaran dalan ya asubok so katutulok nen Jeremias sanen sikatoy ingganggan nen Jehova ya ibaga ed akobkob laran Judio ya ‘ontipon ira ed saray Caldeo’? (b) Panon itayon nagunggonaan ed alimbawa nen Jeremias nipaakar ed makpel a katutulok?

¹⁷ Maseguron asubok met so katutulok nen Jeremias diad impangibaga to ed saray Judio ya onsuko la ra. Sakey a rason et sikato so maseseg parad ngaran na Dios. Agto labay a pabandayen itan na kakabusol a mangipasen a nambiktorya ira lapud saray andiay-bilay a talintao ra. (Jeremias 50:2, 11; Tagleey 2:16) Niarum ni, amta nen Jeremias a diad pangibaga to ed totoo ya onsuko la ra et niiyan ed kapeligroan so bilay to, lapud nayarin isipen na karaklan a sumpad pakauley so imbaga to. Ingen ta agto pinmayakot, noagta sikato so matulok ya angibaga ed saray panangiyabawag nen Jehova. (Jeremias 38:4, 17, 18) Singa si Jeremias, iyaabawag tayo met so mensahen agmainomay ya awaten. Satan imay mensahen akamudmoraan  nen Jesus. (Isaias 53:3; Mateo 24:9) Kanian agtayo ‘ontatakot ed totoo,’ noagta, singa si Jeremias, komon ta makpel itayon ontulok ed si Jehova, a sigpot itayon manmatalek ed sikato.​—Uliran 29:25.

Say Katutulok ed Arap na Panangataki nen Gog

18. Antoran subok ed katutulok diad arapen so kidungetan na saray lingkor nen Jehova?

¹⁸ Agmanbayag, say interon marelmeng a sistema so naderal ed agnaparaan a ‘baleg a kairapan.’ (Mateo 24:21) Andi-duaruwan sakbay tan legan na satan a panaon, nasagmak na totoo na Dios so mapalalo iran subok ed pananisia tan katutulok da. Singa bilang, ibabaga ed sikatayo na Biblia a si Satanas, diad betang to bilang ‘Gog ed dalin na Magog,’ so sigpot ya onataki ed saray lingkor nen Jehova, ya iparaan to iray puersa to ya adeskribe bilang “sakey a mabiskeg ya inayuraan . . . , a singa sakey a lurem a manakbong na dalin.” (Ezequiel 38:2, 14-16) Lapud daiset ira tan anggapoy ayura ra, mansalimbeng iray totoo na Dios ed “saray payak” nen Jehova, ya inanatnat to pian protektaan to iray matulok.

19, 20. (a) Akin a makanakana so katutulok ed biang na Israel sanen wala ra ed Ambalangan Dayat? (b) Panon a say masimoon a panmolimoli ed salaysay nipaakar ed Ambalangan Dayat so makagunggona ed sikatayo natan?

¹⁹ Ipapanonot ed sikatayo na sayan inkagawa so impaway na Israel ed Ehipto. Kayari ton indapo ed Ehipto so samploran makadesyang a bakbak, inwanwan nen Jehova so totoo to, aliwan ed sankaganoan a rota a mamaarap ed Insipan a Dalin, balet diad Ambalangan Dayat, a mainomay iran nasaruko tan nalusob. Unong ed punto de bista na militar, satan so ompatnag a makadesyang a kurang. No wadman kayo, kasin unoren yo so salita nen Jehova panamegley nen Moises tan matalek kayon manmartsa anggad Ambalangan Dayat, ya amta yon say Insipan a Dalin et walad sananey a direksion?​—Exodo 14:1-4.

²⁰ No basaen tayo so Exodo kapitulo 14, nanengneng tayo so impangiliktar nen Jehova ed totoo to diad makapakelkelaw a panangipatnag na pakayari. Talagan napabiskeg so pananisia tayo ed saratan a salaysay sano ipanaon tayo so panagaral tan panagdalepdep ed saratan! (2 Pedro 2:9) Bilang resulta, say malet a pananisia so mamabiskeg ed sikatayo ya ontulok ed si Jehova, anggaman saray kakaukolanen to so ompatnag a miduma ed panagkatunongan na too. (Uliran 3:5, 6) Kanian tepetan yoy inkasikayo, ‘Kasin pambabanikelan kon pabiskegen so pananisiak panamegley na maseet a panagaral na Biblia, pikakasi, tan panagdalepdep, ontan met ed regular a pililimog ed totoo na Dios?’​—Hebreos 10:24, 25; 12:1-3.

Say Katutulok so Mangiter na Ilalo

21. Antoran bendisyon, natan tan ed arapen, so onsabi ed saramay ontulok ed si Jehova?

²¹ Saramay ontutulok ed si Jehova diad kabibilay da so makaeksperiensia la ingen natan na kasumpalan na Uliran 1:33, a kuanto: “Anggan siopa [a matulok] ya ondengel ed siak manayam ed katalkan, tan sikato naani mareen ya andi takot ed mauges.” Agaylan abig so kiyaplika na sarayan makaligliwan salita legan na onsasabin agew na panamales nen Jehova! Diad tua,  inkuan nen Jesus ed saray babangatan to: “Sano onggapo a nagawa so saraya a bengatla, tangay kayo, et itangwa yo so saray ulo yo; ta say karondon yo asingger la.” (Lucas 21:28) Malinew, saraman lambengat so matulok ed Dios so nawalaan na kompiyansa ya ontalineng ed sarayan salita.​—Mateo 7:21.

22. (a) Akin a say totoo nen Jehova so walaan na basiyan pian mankompiyansa? (b) Antoran pamaakaran so singbaten ed ontumbok ya artikulo?

²² Sakey nin rason no akin a mankompiyansa et ‘petepeteg ya anggapo so gawaen nen Katawan a Jehova, ya agni nipuyan so inamot to ed saray aripen to a propeta.’ (Amos 3:7) Natan, si Jehova so agmamupuyan na saray propeta a singa nensaman; imbes, sikatoy anuro na matoor ya aripen a klase pian mangitarya na nipanpanaon ya espiritual a tagano parad sankaabungan to. (Mateo 24:45-47) Agaylan importante sirin a walaan itayo na matulok ya awawey ed satan ya “aripen”! Unong ya ipanengneng na ontumbok ya artikulo, ipatnag met na ontan a katutulok so awawey tayo nipaakar ed si Jesus, say katawan na “aripen.” Sikato imay Sakey a ‘tutuloken na katooan.’​—Genesis 49:10.

[Saray paimano ed leksab]

Kasin Nanonotan Yo?

• Anto so resulta na aminpigan intunganga na Israel?

• Panon a naapektaan si Arin Joas ed saray kalimog to, diad asasakbay tan kaunoran a parte na impanbilay to?

• Antoran leksion so naaralan tayo ed si Baruc?

• Akin ya anggapoy sengegan na itakot na matulok a totoo nen Jehova legan a manasingger lay anggaan na sayan kaplesan a sistema na bengabengatla?

[Tepetepet Parad Panagaral]

[Litrato ed pahina 13]

Diad panangigiya nen Joiada, say kalangweran a si Joas so matulok ed si Jehova

[Litrato ed pahina 15]

Si Joas so naimpluensyaan na saray mauges a kalimog pian ipapatey to so propeta na Dios

[Litrato ed pahina 16]

Kasin tutuloken yo si Jehova pian naimatonan yo so makapakelaw a pakayari ton mangilaban?