Ligliwa Manlapud Suston Pikakabat Nipaakar ed Dios

PARAD pigaran totoo, say ibabaga na Biblia nipaakar ed aro tan panangasi na Dios so mamapawala na makawetwet iran tepet. Itetepet da: No kaliktan na Dios a sigpot ya ekalen so kaugsan, ya amta ton gawaen itan, tan walaan na pakapanyarin manggawa ed satan, akin a mantutultuloy ya onkakasmak so kaugsan? Parad sikara say problema et no panon a mantunosan so taloran bengatla: (1) say Dios so makapanyarin-amin; (2) say Dios so maaro tan maong; tan (3) mantutultuloy a nagagawa iray desyang. Ikakatunongan da a lapud agniburi so komatlon punto, sirin et aliwa met a tua so anggan sakey ed duara nin punto. Parad sikara, balanglan agnayarian na Dios a patundaen so kaugsan odino sikatoy agmangiyaansakit.

Pigaran agew kayari inkaderal na World Trade Center ed New York, inkuan na sakey a prominentin lider na relihyon diad Estados Unidos: “Siak so atepetan . . . a nilasus lan danay legay pambibilay ko no akin ya aabuloyan na Dios so trahedya tan kairapan. Aksobien ko a talagan agko amta so sigpot ya ebat, anggan ed mismon kapenek ko.”

Bilang reaksion ed sayan komento, insulat na sakey a propesor na teologo a sikatoy mandinayew ed “maong a teolohiya” ya inkalar na sayan lider na relihyon. Sikatoy onabobon met ed panmoria na sakey ya iskolar a nansulat: “Say agpakarandan ed kairapan so kabiangan ed agpakarandan ed Dios.” Balet kasin talagan imposible a talosan no akin ya aabuloyan na Dios so kaugsan?

Say Gapoan na Kaugsan

Diad pidumaan na nayarin ibaga na saray lider na relihyon, ag-ipapabitar na Biblia ya agnarandan so pangiyaabuloy na Dios ed kaugsan. Say manunan punto pian natalosan so tepet nipaakar ed kaugsan et say pamidbir ya ag-amalsa si Jehova na sakey a marelmeng a mundo. Pinalsa to so inmunan sanasawa ya ayadyari, anggapoy kasalanan. Inimano nen Jehova so panamalsan kimey to tan naimano ton “maong iran tuloy.” (Genesis 1:26, 31) Gagala to parad si Adan tan Eva ya inatnat da so Paraison Eden ed interon dalin tan panoen da itan na maliket a totoo diad silong na pananalimbeng na maaron inkasoberano to.​—Isaias 45:18.

Ginmapo so kaugsan panamegley na espiritun pinalsa ya, anggaman diad inmuna et matoor ed Dios, abayuboan toy pampilalek a nidayew. (Santiago 1:14, 15) Say panagrebeldi to so apatnagan a mismo ed dalin sanen inimpluensyaan to so inmunan sanasawa a mibiang ed sikato ya onsumpa ed Dios. Imbes a manpasakop ed mabitabitar a bilin ya agmamangan odino ondiwit ed bunga na kiew a pakaamtaan na maong tan mauges, si Adan tan Eva so amurbor na bunga tan kinan da itan. (Genesis 3:1-6) Lapud satan, agda labat sinunggay so Dios noagta impanengneng da met a pilalek day onsian manlapud sikato.

Linmesa so Moral ya Isyu

Sayan rebelyon ed Eden so amalesa na moral ya isyu, sakey ya angat a mangilalanor ed  sankatalbaan. Sinuppiat na rebeldin totoo no kasin aagamilen nen Jehova so pananguley to ed saray pinalsa to diad suston paraan. Kasin say Manamalsa so walaan na kanepegan pian kaukolanen to ed katooan so sigpot a katutulok? Kasin magmaong so kipapasen na totoo no onkiwas iran independente?

Inasikaso nen Jehova iyan angat ed pananguley to diad paraan a pakapatnagan na nagnap ya inkabalanse na aro, inkahustisya, kakabatan, tan pakapanyari to. Nayarian to komon ya usaren so pakapanyari to pian deralen a tampol iray rebelde. Nayarin singa makatunongan itan, lapud kanepegan ton gawaen itan. Balet agnaebatan so moral iran isyu ya apalesa no gawaen to itan. Diad biek a dapag, nayarian komon na Dios a basta ibaliwala lay kasalanan. Say ontan a kurang so nayarin ompatnag ed arum natan bilang panangaro. Ingen, saya met so agmangebat ed ibabaga nen Satanas a saray totoo so magmaong a manguley ed sikaran dili. Sakey ni, no ontan so agawa, agkasi itan managyat ed arum ni pian onkasipa ed dalan nen Jehova? Say resulta et agmanganggan kairapan.

Diad kakabatan to, inabuloyan nen Jehova so totoo a man-independente ed loob na sakey a panaon. Anggaman kabaliksan na saya so temporaryon pangiyabuloy ed kaugsan a mansiansia ni, saray totoo so nawalaan na pankanawnawan mangipanengneng no kasin sikaray matalonan manguley ed inkasikara a biig ed Dios, a manbilay ira ed dili ran estandarte ed no anto so duga tan aliwa. Anto so resulta? Say awaran na too so tuloytuloy a pakakapatnagan na bakal, ag-inkahustisya, panaglames, tan kairapan. Say sankaunoran ya isaew na rebelyon sumpad si Jehova so permanente lan manolbar ed saray isyu ya apalesa ed Eden.

Kaleganan to, impanengneng na Dios so aro to diad impangitarya to na Anak to, si Jesu-Kristo, ya angisuko ed bilay to bilang too a pinagka-dondon bagat. Saya so mangibulos ed saray matulok a totoo manlapud panangondena na kasalanan tan ipapatey a resulta na intunganga nen Adan. Say dondon so angilukas na dalan parad andi-anggaan a bilay parad amin a  mangaagamil na pananisia ed si Jesus.​—Juan 3:16.

Walaan itayo na makaligliwan panamaseguro nen Jehova a temporaryo so paniirap na too. Insulat na salmista: “Wala ni so daiset, et say bagel onandi: on, imanom so pasen to, et onandi. Ingen ta saray mauyamo tawiren da naani dalin: tan manliket ira a dili ed inkadaakan na kareenan.”​—Salmo 37:10, 11.

Maligen tan Maliket ya Arapen

Napatnagan ed saray kasumpalan na saray propesiya na Biblia a magano lan panganggaen na Dios so sakit, kaermenan, tan ipapatey. Imanoen so makapakelkelaw a pansumpalan na saray bengatla ya onsabi, a niiter ed si apostol Juan diad sakey a pasingawey. Insulat to: “Akanengneng ak na sakey a tawen a balo tan sakey a dalin a balo: ta say una a tawen tan say una a dalin linmabas lara; tan say dayat andi la. . . . Tan say Dios met lanlamang so wala naani ed [katooan]: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” Diad sakey a balikas a mangipupurek ed katuaan na sarayan sipan, onia so nibaga ed si Juan: “Isulat mo; ta saraya a salita sikara so matoor tan matua.”​—Apocalipsis 21:1-5.

Komusta met so binilyon ya inosentin totoo ya inaatey la nanlapula’d impanrebeldi diad Eden? Insipan nen Jehova a pabilayen to so totoo a nauugip natan ed patey. Inkuan nen apostol Pablo: “Wala so ilalok ed Dios . . . a wala naani kioli ed bilay na saray matunong tan agmatunong.” (Gawa 24:15) Saraya so nawalaan na ilalon manbilay ed sakey a mundo a ditan et “panayaman na katunongan.”​—2 Pedro 3:13.

No panon a say maaron ama et abuloyan toy anak to ya ondalan et makapaot-ot ya operasyon no amta ton satan so mangiter na manbayag iran gunggona, ontan met ya aabuloyan nen Jehova so katooan a makaeksperiensya ed temporaryon kaugsan a nagagawa diad dalin. Ingen, walay magnayon iran bendisyon a manatalaran ed amin a manggunaet a manggawa na linaway Dios. Impaliwawa nen Pablo: “Say pinalsa impauleyan ed kaapaan, aliwan lapud panlabay to, noag say makalanor so anguley ed sikato, ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.”​—Roma 8:20, 21.

Saya so tudtuan balita​—ya aliwan singa ed samay nababantayan tayo ed telebisyon odino nababasa ed peryodiko, noagta maong a balita. Satan so sankaabigan a balita a manlalapud “Dios na ami’ ligliwa,” a peteg a mangiyaansakit ed sikatayo.​—2 Corinto 1:3.

[Saray litrato ed pahina 6]

Ipapanengneng na panaon ya agnauleyan na katooan so inkasikara a matalona a biig ed Dios

[Credit Lines]

Pamilyan Somalia: UN PHOTO 159849/M. GRANT; bomba atomika: USAF photo; panangipangawan a kampo: U.S. National Archives photo