Ligliwa ed Panaon na Krisis

TALAGAN agmakaligliwa iray balita ed sarayan panaon. Onia so insulat na sakey a too: “Saray peles a nagagawa so pirmin makapasinagem, a mabetbet ya agtayo makapandesidi no kasin nitepel tayo odino andi so manbantay na saray balita ed ala-sais.” Say mundo so natatabek na bakal, saray terorismo, kairapan, krimen, tan sakit​—a sarayan kaugsan so magano lan mangapekta ed sikatayo a direkta no aliwa nin direktan mangaapekta ed sikatayo iratan.

Sayan kipapasen so mabitar ya impasakbay na Biblia. Diad panedeskribe ed panaon tayo, inkuan nen Jesus a nagawa iray angkakabaleg a bakal, saray salot, kakisiran na tagano, tan saray yegyeg. (Lucas 21:10, 11) Mipadpara, insulat nen apostol Pablo so nipaakar ed “maatap a panaon a mairap a pidenengan,” sano saray totoo so magmaliw a masebeg, maaro na kuarta, tan andian na aro ed kaabigan. Tinawag to itan a panaon bilang “kaunoran iran agew.”​—2 Timoteo 3:1-5, NW.

Kanian, diad panedeskribe ed saray kipapasen na mundo, saray balita so walaan na piulibayan ed impasakbay na Biblia. Balet angangga labat ed piulibayan. Say Biblia so mangiiter na punto de bista ya ag-iiter na saray balita. Diad panamegley na impuyan a Salita na Dios, natalosan tayo no akin a dakerakel so kaugsan tan no anto so nagawa ed arapen.

 No Panon so Panmoria na Dios ed Karelmengan

Ipapaliwawa na Biblia no panon so panmoria na Dios ed saray makapagonigon a kipapasen ed panaon tayo. Anggaman amta to lan unona iray peles a kaguloan, agto aabobonan iratan odino abuloyan iratan a mansiansia. “Say Dios sikato so aro,” so insulat nen apostol Juan. (1 Juan 4:8) Iyaansakit a maong nen Jehova iray totoo to tan gugulaen to so amin a kaugsan. Matukotukoy a makapanilalo itayo ed Dios parad ligliwa, lapud sikato so maong tan maabagey tan walaan na pakapanyari tan linawa pian sigpot ton ekalen so kaugsan ed dalin. Insulat na salmista: “Iliktar [na tinuro na Dios a mangatatawen ya Ari] so naukolan no oney-ey, say makabos met, ya anggapo so mananulong ed sikato. Sikato ilagak to so makabos tan naukolan, tan ilaban to so kamarerwa na naukolan. Sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.”​—Salmo 72:12-14.

Kasin nakakasian yo iray maniirap? Nayarin ontan. Say pililikna et kalidad nen Jehova ya impasen to ed sikatayo, lapud sikatayoy apalsa unong ed indengan to. (Genesis 1:26, 27) Makapanmatalek tayo sirin a nalilikna nen Jehova so paniirap na too. Si Jesus, a kabkabat ton maong si Jehova nen say siopaman ni, so angibangat a si Jehova so interesadon maong ed sikatayo tan napno na matamoy a panangabagey.​—Mateo 10:29, 31.

Papaneknekan na saray pinalsa a mismo ya iyaansakit na Dios so katooan. Inkuan nen Jesus a say Dios et “pabutayen to so banwa to ed saray mauges tan maong, tan papelagen toy uran ed saray matunong tan aliwan matunong.” (Mateo 5:45) Onia so inkuan nen apostol Pablo ed saray totoo diad syudad na Listra: “[Say Dios] agto kinaindan ya anggapo so makatasi ed sikato, a nanggawa na maong, tan initdan to kayo na saray uran a nanlapu ed tawen tan mabunga a panaon, a pinano to so saray kapusoan yo na tagano tan gayaga.”​—Gawa 14:17.

Siopa so Responsable ed Karelmengan?

Makatantanda ya inkuan met nen Pablo ed saray taga Listra: “Dia ed saray kailalakan a linmabas, pinaulyan [na Dios] iray amin a nasyones a manakar ira ed saray dalan dan dili.” Kanian, saray nasyon​—odino totoo a mismo​—so manunan responsable ed maslak iran kairapan a nasasagmak da. Agnepeg a tetelen so Dios.​—Gawa 14:16

Akin ya aabuloyan nen Jehova a nagawa iray mauges a bengatla? Wala ta ni so gawaen to nipaakar ed satan? Say ebat ed sarayan tepet so naromog labat ed Salita na Dios. Say rason et lapud say ebat so mangilalanor a tuloy ed sananey ya espiritun persona tan ed isyu a pinalesa to diad agnanengneng ya espiritun ayaman.

[Saray litrato ed pahina 4]

Saray totoo so walaan na pililikna. Kasin agtanto mililikna so Dios ed paniirap na too?

 [Picture Credit Lines ed pahina 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Picture Credit Line ed pahina 3]

Tagey a kawigi, Croatia: UN PHOTO 159208/S. Whitehouse; naeerasan ya ugaw: UN PHOTO 146150 BY O. MONSEN