Report na Saray Manangiyabawag na Panarian

Medalya Parad Kingdom Hall

SAY Ministry of Environment diad Finland so ananda ed taon 2000 bilang say “Year of Landscaping.” Inkuan na sakey ed saray angorganisa a say “gagala na landscaping (panagmasitas) bilang tema ed taon et pian panonotan itayon amin ed epekto na saray maberdin kaliberliber ed inagew-agew a kabibilay tayo tan ed pankaabigan tayo.”

Nen Enero 12, 2001, akaawat na sakey a sulat so sangan opisina na Tastasi nen Jehova diad Finland a nanlapud Finnish Association of Landscape Industries. Insalaysay na sulat a say Kingdom Hall na Tastasi nen Jehova diad Tikkurila so akaawat na sakey ed saray medalya parad landscaping bilang tema ed taon lapud ekselentin desinyo na saray kaliberliber tan saray balibalin hardin na Kingdom Hall. Inyarum ni na sulat a “say interamentin itsura na kaliberliber, balanglan diad tiagew odino panaon na ambetel, so maabig, marakdakep, tan atagey a kalidad.”

Say medalya so inyawat ed Tastasi nen Jehova diad Rosendahl Hotel ed Tampere, Finland, diad sakey ya okasyon ya inatendian na 400 iran propesyonal tan negosyante. Onia so impaiyabawag na Finnish Association of Landscape Industries ed media: “Diad nanduruman parte na bansa, amin lawarin Kingdom Hall na Tastasi nen Jehova so marakdakep a niplaplano. Say panangasikaso ed kaliberliber so makapasagyat ed amin lawarin ondadalan. Say Kingdom Hall diad Tikkurila so sakey ed alimbawa parad marakdakep a hardin bilang interamenti. Say bilding tan say maawang ya arapan so pakapatnagan na inkadeen tan inkabalanse.”

Diad Finland et wala so 233 a Kingdom Hall, a dakel so apaliberan na mararakep iran hardin. Balet, say talagan mamaparakep ed saraya et saratan so sentro na tuan panagdayew tan edukasyon ed Biblia. Parad masulok ya anemiran milyon a Tastasi nen Jehova ed interon mundo, say Kingdom Hall so labalabay a pasen​—marakdakep man itan odino kabkaabigan. Satan so rason no akin a sikaray maseet tan labalabay dan asikasoen itan. Lukas parad amin iray Kingdom Hall diad komunidad yo!