Saray Tobonbalon Mangaaro ed Katuaan

“PANON a linisan na kalangweran a laki so basbas to?” so intepet na Hebreon salmista masulok a 2,400 a taon lay apalabas. (Salmo 119:9, NW) Makana ni iyan tepet natan ta dakel so kaproproblemaan na saray kalangweran dia ed mundo. Dakel a kalangweran so nipaarap ed AIDS lapud nanduruma so piseseksoan da, a ngalngali kapaldua ed saramay naalisan la na sayan graben sakit so man-edad na 15 ya anggad 24. Dakel so problema lapud panag-abuso ed druga, a sengegay masakbay ya ipapatey na arum. Makaderal ya impluensya ed kalangweran so mabanday a musika; marawal tan imoral iran pelikula, saray palabas ed TV, tan saray video, tan pornograpiya ed Internet. Kanian nodnonoten a maong na dakel ya ateng tan tobonbalo natan so intepet na salmista.

Oniay inyebat na satan met a salmista ed dili ton tepet: “Diad pansiansian akabantay unong ed salitam.” Tuan lugan na Salitay Dios, say Biblia, so maabig a panangiwanwan parad saray kalangweran, tan no tumboken itan et onaligwas so bilay na dakel a tobonbalo. (Salmo 119:105) Usisaen tayoy pigaran napanuliranan a tobonbalo a mangaaro ed Dios tan magunaet a mansiansian mabiskeg ed espiritual diad mahilig ed liket tan materyalistiko a mundo.

Akisalamatan Day Panangiwanwan na Ateng

Pigara lan taon a sigpot-panaon a ministron payunir si Jacob Emmanuel sakbay a nanlingkor ed sangan opisina na Tastasi nen Jehova diad Mexico. Maapresya ton anonotan no panon ton abayuboan so aro ed panaglingkor ed Dios: “Manunan impluensya so atateng ko, anggaman pirmi met ya akatulong so pigaran eksperiensyadon agagi’d espiritual a sikaray akikaaroan ko. Pinaseseg da ak ya aroen so panagpulong. Kalkalna da ak ya intonton ed dugan dalan; agkon balot alikna a pinaskar da ak.”

Nanonotan ni nen David, a pigay talon lan walad sigpot-panaon a ministeryo, no panon a nipaslep ed sikato imay inggapon impanserbi na atateng to ya espisyal payunir sanen melag ni ra nen agi ton laki. Sanen inatey si ama to, intultuloy nen ina to so nan-espisyal payunir. Inasikaso tora nilikud ed panangipulong na maong a balita. Inkuan nen David: “Agda ak balot pinaskar a manpayunir, balet ta nanliketan min maong so panagpayunir bilang pamilya kanian say ulopan tan kipapasen mi so amakiwas ed siak ya ontan met so gawaen ko.” Nipaakar ed kaimportantian na maong a panangiwanwan tan panangimano na atateng, inkuan nen David: “Kada labi et ibasaan kami nen nanay na saray istorya ed libron From Paradise Lost to Paradise Regained. * Say impangisalaysay to ed saratan et akatulong ed sikamin aroen so igamor na espiritual a tagano.”

Panamabli ed Saray Miting

Agtanton papablien na arum a tobonbalo iray Kristianon miting. Onaatendi ira lapud itatagar ira na atateng da. Balet no itultuloy da komon so miaral et napabli  ran siansia iray miting. Konsideraen pa si Alfredo, a ginmapo ed sigpot-panaon a serbisyo sanen sikatoy mantaon na 11. Inako to a sanen sikatoy mantaon na limara et ilim-limot toy ag-miaral lapud sikatoy makakaugip balet ta agpaugipen na atateng to leleg na aral. Nanonotan to: “Nen ombabaleg ak la, kalkalnan labalabay ko la iray miting, nagkalalo la sanen naaralan ko lay manbasa tan mansulat lapud mankokomento ak la ed saman ed dili iran salitak.”

Inkuan nen Cintia, sakey a 17 años a marikit a manlilingkor a payunir, a baleg so agawaan ed sikato na maong a pipiulop pian naaro toy panserbi ed Dios. Inkuan to: “Lapud maabig a siglaotan ed saray agagi tan regular a piaral et agko la nailiwan iray kaarok ed mundo tan saray aktibidad a labalabay na saray kalangweran, singa say pandisco. Nampilalekan kon iter ed si Jehova so amin a walad siak lapud itatalineng ko ed saray komento tan eksperiensya diad saray miting, tan ipasen kon say sankaabigan a walad siak et say inkatobonbalok. Kanian denesidik ya usaren itan ed panlingkor ed sikato.”

Balet inkuan to: “Walay bektan sakbay ak a manpabautismo et napapaulyan ko lay miaral, ya ibaraan ko lay panggaway homework odino arum ya aktibidad ed eskuelaan. Aminpigan agak akapiaral, kanian naapektaan so espiritualidad ko. Miuulop ak la ed lakin agmanaaral na Biblia. Balet diad tulong nen Jehova et nipetek kon siansia iray bengatla.”

Personal a Desisyon

Sanen atepetan si Pablo, sakey nin tobonbalo a sigpot-panaon a manseserbi ed si Jehova, no antoy impasen ton sankaimportantian pian nabayuboan so panangaro ed katuaan na Salitay Dios, inkuan to: “Nibagak a walay duaran bengatla: regular ed personal a panagaral tan seseg ed panagpulong. Misalsalamat ak ed atateng ko lapud imbangat da’d siak so katuaan nipaakar ed si Jehova, tan nibagak a satan so sankaabigan a niiter da ed siak. Balet, kaukolan a siak so nakombinsin mismo no akin ya inarok si Jehova. Lapud satan et kaukolan kon amtaen so ‘kaawang tan kaaralem’ na katuaay Biblia. Diad saya labat a paraan a makapanpilalek itayo ed Salita nen Jehova, a singa “mandarlang ya apoy” ed dalem tayo pian itongtong itan ed arum. Napabli tayon maong so katuaan lapud satan a seseg ed panagpulong.”​—Efeso 3:18; Jeremias 20:9.

Anonotan met ni nen Jacob Emmanuel, ya inmunan abitla, so kaimportantian na pandesisyon a bukor diad panlingkor ed si Jehova. Imbaga ton sikatoy agbalot pinaskar na atateng to pian manpabautismo. “Panisiaan kon satan so sankaabigan a kurang lapud agamoran koray maong a nansumpalan. Alimbawa, walaray apiulopan kon tobonbalo a nandesisyon a manbabansag a manpabautismo. Maabig itan, balet naimanok a pigara ed sikara so lapud emosyon labat, kanian agnambayag et tinmayer lay seseg da ed kimey nipaakar ed Panarian. Diad biang ko agak pinaskar na atateng ko a mandesisyon ya idedikay inkasiak ed si Jehova. Desisyon kon bukor itan.”

 Say Betang na Kongregasyon

Naaralan a bukor na arum a kalangweran so katuaan na Salitay Dios ya andiay tulong na atateng da. Talagan walay irap-irap ed ontan iran kipapasen pian manaral a manggaway maong tan mansiansia ed satan.

Anonotan ni nen Noé a dakel so agunggona to lapud katuaan. Sikatoy misasanok tan marawal nen ugaw ni. Sanen nanaral lay Biblia ed edad a 14, sikatoy agla misasanok, kanian akisalsalamat iray atateng to, ya agni interesado ed Biblia diad saman. Diad iyaaligwas nen Noé ed espiritual, labay ton usaren a nagkalalo so bilay to diad panlingkor ed Dios. Sikato natan so walad sigpot-panaon a ministeryo.

Mipadpara, ugaw nin tuloy si Alejandro sanen naninteres ed Makristianon katuaan anggaman ag-interesado iray atateng to. Diad impangibalikas to ed panamabli to’d katuaan, inkuanto: “Binmaleg ak ed sipor lan Katolikon pamilya. Balet lalo ak a nanmatalek ed ateistan Komunista, lapud agnaebatan na simbaan iray tepet ko a mangogonigon la’d siak nen ugaw ak ni. Atulongan ak na organisasyon nen Jehova pian nagamoran so pikakabat na Dios. Satan so literal ya angiliktar ed bilay ko lapud no agak nanaral na Biblia et ompan imoral, mainum na alak, odino mandrudruga ak la. Nayarin kaiba ak la ingen na arum a grupoy rebolusyonaryo, a makapaermen iray pansumpalan.”

Panon a makapantultuloy so tobonbalo a mananap na katuaan tan mansiansia ed satan anggano anggapoy tulong na atateng to? Mapatnag ya im-importante so betang na mamatatken tan arum ed kongregasyon. Anonotan nen Noé: “Agko aliknan bukbukor ko, ta lawas maap-apit ed siak si Jehova. Atulongan ak met na dakel a maaron agagi a nagmaliw ya espiritual iran ama, ina, tan agagi.” Sikatoy manlilingkor la natan ed Bethel tan nauusar to lay panaon to ed panaglingkor ed Dios. Insalaysay met nen Alejandro: “Say lawas kon pisalsalamatan et lapud agunggonaan ak ed inkiwalak ed kongregasyon a kaibay ulop na mamatatken ya angipanengneng na maaron interes ed siak. Nagkalalo lan misalsalamat ak lapud sanen nanaral ak na Biblia, diad edad a 16, agonigon ak met a singa ed maslak a nagagawa ed tobonbalo. Agak balot pinaulyan na saray pamilya dia ed kongregasyon. Walan naynay so mamaparawes ed siak tan aliwa labat lan abung tan kakanen so inanabang to ed siak noagta mililikna met.” Masulok la natan a 13 taon ed sigpot-panaon a serbisyo si Alejandro.

Isipen na arum a totoo a parad saray maedad labat so relihyon. Anggaman ontan et dakel a kalangweran so akaaral ed katuaan na Biblia nen ugaw ni tan naaro da si Jehova insan nansiansian matoor ed sikato. Niyaplika ed sarayan tobonbalo iray salita nen David a nirekord ed Salmo 110:3: “Say katooan mo yapay da so inkasikara a mabulbulos dia ed agew na pakayarim, dia ed masanton ulop: ya ompaway ed panag-anakay kabuasan wala ed sika so linaew na kaugawan mo.”

Kaukolan so sagpot tan determinasyon parad kalangweran pian naaralan da so katuaan tan makapanmatoor ira ed satan. Makapalikliket so pakanengneng a dakel so mansiasiansian maap-apit ed organisasyon nen Jehova, onaatendin regular ed saray miting, tan makulin manaaral ed Biblia. Diad impanggawa’d satan et apaaligwas da so masimoon a panangaro ra ed Salitay Dios tan say panaglingkor da ed sikato!​—Salmo 119:15, 16.

[Paimano ed Leksab]