Iyaansakit Kayo nen Jehova

“Imatalek yo ya amin ed [Dios] so kapagaan yo; ta sikato asikasoen [“iyaansakit,” NW] to kayo.”​—1 PEDRO 5:7.

1. Anton importantin pamaakaran a sigpot a mandumaan si Jehova tan si Satanas?

 SI Jehova tan si Satanas so sigpot a mandumaan. Siopaman a malabay ya onapit ed si Jehova so busolen na Diablo. Sayan pandumaan so nidalatdat ed sakey a pangibabasiyan a reperensya. Nipaakar ed saray gagawaen nen Satanas a nidalatdat ed libro na Biblia a Job, oniay kuan na Encyclopædia Britannica (1970): ‘Say gagawaen nen Satanas et say iliber ed dalin pian anapen iray gawa odino totoo a naakusan mauges; say gagawaen to sirin et midumaan ed ‘saray mata na Katawan,’ ya onnenengneng ed interon dalin a mamapabiskeg ed amin a maong (2 Awa. 16:9). Kabkabusol nen Satanas so nipaakar ed mabulos a kamaongan na too tan naabuloyan a manubok ed satan diad silong na pakauley tan panangontrol na Dios tan diad loob na saray panangigeter na Dios.’ On, agaylan pidumaan!​—Job 1:6-12; 2:1-7.

2, 3. (a) Panon a say kabaliksan na salitan “Diablo” so matukoy a niyilustra diad agawa ed si Job? (b) Panon ya impabitar na Biblia ya itutultuloy nen Satanas ya akusaen iray lingkor nen Jehova diad dalin?

² Say salitan “Diablo” so nanlapu ed Griegon salita a mankabaliksan na “palson manag-akusa,” “managpauges.” Imparungtal na libro nen Job ya inyakusa nen Satanas a say matoor a lingkor nen Jehova a si Job so manlilingkor ed Sikato lapu labat ed dilin pankaabigan, a kuanto: “Si Job antakot ta ed Dios ya andi-kabaliksan?” (Job 1:9) Impabitar na salaysay ed libro na Job ya anggaman ed saray subok ed sikato, lalon inmapit si  Job ed si Jehova. (Job 10:9, 12; 12:9, 10; 19:25; 27:5; 28:28) Kayari na impanirap to, oniay inkuanto ed Dios: “Nadngel ko so nipaakar ed sika lapu ed panamegley na pakadngel na layag; balet natan say matak nanengneng to ka.”​—Job 42:5.

³ Kasin tinmunda lan manaakusa si Satanas ed saray matoor a lingkor na Dios nanlapu la’d panaon nen Job? Andi. Impanengneng na libroy Apocalipsis a diad sayan panaon na anggaan et itutultuloy nen Satanas ya akusaen iray alanaan ya agagi nen Kristo tan maseguron pati saray matoor a kakaiba ra. (2 Timoteo 3:12; Apocalipsis 12:10, 17) Kanian, say pirmin nakaukolan tayon amin bilang tuan Kristiano et say pampasakop ed manangiyansakit a Dios tayo, si Jehova, a manlingkor ed sikato lapud aralem a panangaro tan diad ontan et napaneknekan a palso so akusasyon nen Satanas. Sano gawaen tayo itan, napaliket tayo si Jehova.​—Uliran 27:11.

Panggugunaetan nen Jehova so Ontulong ed Sikatayo

4, 5. (a) Miduma ed si Satanas, anto so nenengnengen nen Jehova ed dalin? (b) Ta pian nagamoran tayo so pabor nen Jehova, anto so nakaukolan ed biang tayo?

⁴ Onliliber so Diablo ed dalin, a manaanap na akusaen tan akmonen to. (Job 1:7, 9; 1 Pedro 5:8) Diad pidumaan, panggugunaetan nen Jehova a tulongan iramay mankaukolan na biskeg. Oniay inkuan nen propetan Hanani ed si Arin Asa: “Saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9) Agaylay pidumaan na magulan inenengneng nen Satanas ed say maaron panangiyansakit nen Jehova!

⁵ Ag-itayo babantayan nen Jehova pian anapen so kada lingo tan insaew tayo. Oniay insulat na salmista: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Salmo 130:3) Say mapatnag ya ebat et: anggapo. (Eclesiastes 7:20) No onapit itayo ed si Jehova tekep na masimoon a kapusoan, imatonan to itayo, ya agto itayo kondenaen, noagta imanoen to iray pansasagpot tayo tan ebatan to iray pikakasi tayo parad tulong tan panamerdona. Oniay insulat nen apostol Pedro: “Saray mata na Katawan wala ed saray matunong tan saray layag to imatleken to so pikakasi ra, say lupa balet na Katawan wala ed saray manggawa na mauges.”​—1 Pedro 3:12.

6. Panon a say kipapasen nen David so parehon makaligliwa tan mamasakbay ed sikatayo?

⁶ Si David so ag-ayadyari tan seryoson nankasalanan. (2 Samuel 12:7-9) Balet ta imbesngaw to’d si Jehova so walad puso to tan inmasingger ed sikato panamegley na masimoon a pikakasi. (Salmo 51:1-12) Dinengel nen Jehova so pikakasi to tan sikatoy pinerdona To, anggaman sinagmak nen David so makapasinagem iran epekto na impankasalanan to. (2 Samuel 12:10-14) Saya so parehon makaligliwa tan mamasakbay ed sikatayo. Makapaligliwan naamtaan a mabulos si Jehova a mamerdona ed impankasalanan tayo no peteg a magbabawi itayo, balet makabat a moriaen a saray kasalanan tayo so mabetbet a mangitarok na seryoso iran pansumpalan. (Galacia 6:7-9) No labay tayoy onapit ed si Jehova, nepeg ya onarawi itayo no nayadyari manlapud antokaman a bengatlan makapaermen ed sikato.​—Salmo 97:10.

Papaapiten nen Jehova ed Sikato so Totoo To

7. Anton klase na totoo so nenengnengen nen Jehova, tan panon to ira ya iyaasingger ed sikato?

⁷ Oniay insulat nen David ed sakey ed saray salmo to: “Si Jehova et atagey [anggaman ontan] wala so panangimano to ed makabos a too: bangbalet say mankinon kabat to ya anggan wala ed arawi.” (Salmo 138:6) Mipadpara, oniay kuan na sakey nin salmo: “Siopa so mipadpara ed Jehova a Dios tayo, sikato a manaayam ed tagey? Sikato a mampaabeba ya onnengneng ed saray bengabengatla ed tawen, tan dia ed dalin?” (Salmo 113:5-7) On, say makapanyarin-amin a Manamalsa na uniberso so onuusdong ed dalin, tan nengnengen to iray “makabos,” ‘saray mapaabeba,’ totoo a “mansibek tan manakis lapu ed amin a kadimlaan a nagagawa.” (Ezequiel 9:4) Saratan so iyaasingger to ed sikato panamegley na Anak to. Sanen wadiad dalin, oniay kuan nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to . . . Anggapo so too a makadago ed siak, likud  no sikato so niiter ed sikato manlapu ed Ama.”​—Juan 6:44, 65.

8, 9. (a) Akin a nakaukolan tayon amin so onasingger ed si Jesus? (b) Anto so makatantanda nipaakar ed uksoyan nipaakar ed dondon?

⁸ Amin a totoo komon so onasingger ed si Jesus tan manisia ira ed dondon bagat lapud sikara so nianak a makasalanan tan nisian ed Dios. (Juan 3:36) Nakaukolan a mipulangan ira ed Dios. (2 Corinto 5:20) Agla inalagar na Dios iray managkasalanan ya oney-ey ed sikato pian itarya to so uksoyan a nayarin makapikareenan ira ed sikato. Oniay insulat nen apostol Pablo: “Say Dios ipurek to so dilin aro to ed sikatayo, ta anta, makasalanan itayo ni, si Kristo inatey lapud sikatayo. . . . Anta kabusol itayo, akapipulangan itayo ed Dios ed panamegley na patey na Anak to, lalo lamet, dia ed impakapipulangan tayo, nilaban itayo naani lapu ed bilay to.”​—Roma 5:8, 10.

⁹ Pinekderan nen apostol Juan so matalonggaring a katuaan a kaliktan na Dios a mipulangan ed sikato iray totoo, ya oniay insulat to: “Dia ed saya nipatnag so aro na Dios ed sikatayo, a say Dios imbaki to ed mundo so Anak ton bogbogtong, pian manbilay itayo ed panamegley to. Onia so panangaro: aliwa a lapu ed sikatayo so angaro ed Dios, noag ingen sikato so angaro ed sikatayo, tan imbaki to so Anak to a makapamaandi kasalanan tayo.” (1 Juan 4:9, 10) Say inmunan kinmiwas et say Dios, aliwan say too. Agkayo kasi napapaapit ed Dios ya angipatnag ed ontanlan panangaro ed ‘saray nankasalanan,’ a ‘kakabusol’ ni ingen?​—Juan 3:16.

Nakaukolan Tayon Anapen si Jehova

10, 11. (a) Anto so gawaen tayo pian anapen si Jehova? (b) Panon tayon moriaen so sistema na bengabengatla nen Satanas?

¹⁰ Siempre, ag-itayo papaskaren nen Jehova ya onasingger ed sikato. Sikatoy anapen tayo, a ‘sikatoy karapkapen tan peteg a naromog, anggano, diad tua et sikatoy ag-arawi ed sinansakey ed sikatayo.’ (Gawa 17:27, NW) Bidbiren tayo so kanepegan nen Jehova a mankaukolan na panagpasakop tayo. Oniay insulat nen babangatan a Santiago: “Ontulok kayo sirin ed Dios; balet onsumpa kayo ed Diablo, et sikato so onarawi ed sikayo. Singger kayo ed Dios, et sikato so onsingger naani ed sikayo. Linisan yo so limalima yo, sikayo a managkasalanan; tan gogolan yo so puspuso yo, sikayo a nankadua so linawa.” (Santiago 4:7, 8) Mabulos itayon ontalindeg a malet sumpad say Diablo tan ondapag itayo ed si Jehova.

¹¹ Kabaliksan na satan ya onarawi itayo ed marelmeng a sistema na bengabengatla nen Satanas. Insulat met nen Santiago: “Sikayo a palalawanan, agyo ta amta a say pikakaaro ed mundo et sikato so pibubusol ed Dios? Kanian siopaman a magmaliw naani a kaaro na mundo sikato so kabusol na Dios.” (Santiago 4:4) Diad pidumaan, no labay tayo so magmaliw a kaaro nen Jehova, ilaloan tayo a busolen itayo na mundo nen Satanas.​—Juan 15:19; 1 Juan 3:13.

12. (a) Antoran makaligliwan salita so insulat nen David? (b) Anto so impasakbay nen Jehova panamegley nen propeta Azarias?

¹² Sano sumpaen itayo na mundo nen Satanas diad sakey a paraan, nagkalalo lan nakaukolan tayo so onasingger ed si Jehova diad pikakasi, ya onkerew na tulong to. Si David, ya aminpigan inliktar nen Jehova, so angisulat parad kaligliwaan tayo: “Si Jehova asingger ed amin ya ontawag ed sikato, ed amin day ontawag ed sikato ed katuaan. Gawaen to so pilalek na saray ontakot ed sikato; sikato denglen to met so akis da, tan ilaban tora. Si Jehova yapiger to so amin a mangaro ed sikato; bangbalet amin na babagel  gaygayen tora.” (Salmo 145:18-20) Ipapabitar na sayan salmo a niliktar itayo nen Jehova sano nasusubok itayo bilang indibidual tan iliktar to so totoo to bilang grupo diad panaon na ‘baleg a kairapan.’ (Apocalipsis 7:14) Si Jehova so mansiansian maapit ed sikatayo no mansiansia itayon maapit ed sikato. Lapud inwanwan na “espiritu na Dios,” oniay inkuan nen propetan Azarias a nipasen tayo bilang katuaan a walaay inkalapagan ya aplikasyon: “Si Jehova wala ed sikayo, leleg a wala kayo ed sikato; et no sikato so anapen yo, sikato so naromog yo; balet no sikato so ikaindan yo, sikayo so ikaindan to.”​—2 Awaran 15:1, 2.

Nepeg a Petepeteg ed Sikatayo si Jehova

13. Panon tayon nipanengneng a petepeteg ed sikatayo si Jehova?

¹³ Insulat nen apostol Pablo a si Moises so “nansiansia a singa to nengnengnengen so agnanengneng.” (Hebreos 11:27) Siempre, si Jehova so agbalot anengneng nen Moises. (Exodo 33:20) Balet si Jehova so petepeteg ed sikato a singano Sikatoy anengneng to la. Mipadpara, kayari na inkasubok to, saray mata na pananisia nen Job so malinlinew ya akanengneng ed si Jehova, bilang Dios a mangiyaabuloy ed saray matoor a lingkor to a nidunget ed subsubok balet agto’ran balot paulyanan. (Job 42:5) Nibaga a si Enoc tan si Noe so ‘nankurang a kaiba so Dios.’ Ginawa ra itan diad impanggunaet dan paliketen tan unoren so Dios. (Genesis 5:22-24; 6:9, 22; Hebreos 11:5, 7) No petepeteg ed sikatayo si Jehova a singano ed si Enoc, Noe, Job, tan si Moises, sikatoy ‘bidbiren tayo’ ed amin a dalan tayo, diad ontan et ‘itonton to iray basbas [tayo].’​—Uliran 3:5, 6.

14. Anto so kabaliksan na “ompeket” ed si Jehova?

¹⁴ Antis ya onloob iray Israelita ed Insipan a Dalin, sikara so sinimbawa nen Moises: “Nepeg yo so manakar unong ed linawa nen Jehova a Dios yo, tan takotan yo, tan unoren yo so saray ganggan to, tan ontulok kayo ed boses to tan  manlingkor kayo ed sikato, tan ompeket kayo ed sikato.” (Deuteronomio 13:4) Sikara so nepeg ya ontumbok, ontakot, ontulok, tan ompapeg ed si Jehova. Nipaakar ed salitan nipatalos dia ya “ompeket,” inkuan na sakey ya iskolar na Biblia a “say lenguahe so mangipapabitar ed maasingger tan maap-apit a relasyon.” Inkuan na salmista: “Say pikakaaro ed Jehova wala ed saray ontakot ed sikato.” (Salmo 25:14) Nawalaan itayo na onian mabli tan maapit a siglaotan ed si Jehova no sikatoy petepeteg ed sikatayo tan no sikatoy inad-aro tayo, ya antakot tayon paermenen ed antokaman a paraan.​—Salmo 19:9-14.

Kasin Sikakabat Kayo ed Panangiyansakit nen Jehova?

15, 16. (a) Panon ya impatnag na Salmo 34 ya iyaansakit itayo nen Jehova? (b) Anto so gawaen tayo sano agtayo nanonotan iray ginawa nen Jehova a kaabigan ed sikatayo?

¹⁵ Sakey ed saray masilib a gawa nen Satanas et say panangguyor ed sikatayo a mangilingwan ed katuaan a say Dios tayo, si Jehova, so lawas mangiyaansakit ed saray matoor a lingkor to. Sikakabat si Arin David na Israel ed mananalimbeng a pakayari nen Jehova sanen nidunget ed mapeligron tuloy a bekta. Sanen sikatoy apilitan a mantapistapisan ed arap nen Arin Akis na Gat, sikatoy nanggawa na kanta, sakey ya alay abig a salmo, ya angilaktip ed sarayan balikas na pananisia: “O yabalbaleg tayo si Jehova, tan bansagan yoak a mangiyabalbaleg ed ngaran to. Inanap ko si Jehova, et sikato inebatan toak, tan inliktar toak ed amin a pagpagak. Say anghel nen Jehova mankampamento ed liberliber na saray ontakot ed sikato, tan iliktar tora. O tawayan yo et nanengneng yo a si Jehova maong: mapalar so too a manmatalek ed sikato. Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi. Amayamay so pakapaermenan na matunong: balet si Jehova iliktar to ya ipaway ed saraya ya amin.”​—Salmo 34:3, 4, 7, 8, 18, 19; 1 Samuel 21:10-15.

¹⁶ Kasin kombinsido kayo ed manangiliktar a pakayari nen Jehova? Kasin sikakabat kayo ed pananalimbeng na saray anghel to? Kasin asali yo tan naeksperiensya yo lan mismo so kamaongan nen Jehova? Kapigan so sampot ya  impakaeksperiensya yo a si Jehova so maomaong ed sikayo? Salien pan nonoten. Kasin agawa itan diad sampot ya abung a dinalaw yo ed ministeryo, sanen nalilikna yon anggapo lay nagawaan yo? Nayarin awalaan kayo ed saman na alay abig ya impitongtong ed unabung. Kasin anonotan yoy misalamat ed si Jehova lapud impangiter to ed sikayo na kaaruman a biskeg tan ed impanumang to ed sikayo? (2 Corinto 4:7) Diad biek a dapag, nayarin agyo la nanonotan so sakey a kaabigan a ginawa nen Jehova ed sikayo. Nayarin kaukolan yo nin nonoten so apalabas a sakey simba, bulan, taon, odino onsulok ni. No ontan so kipapasen, akin ya agpanpelengan so iyapit ed si Jehova tan salien a nengnengen no panon so pangiwawanwan tan pangididirehi to ed sikayo? Oniay insimbawa nen apostol Pedro ed saray Kristiano: ‘Manpaabeba kayo . . . ed silong na makapanyarin limay Dios, . . . imatalek yo ya amin ed sikato so kapagaan yo; ta sikato asikasoen to kayo.’ (1 Pedro 5:6, 7) On, sikayo so nikelawan ed no panon so pangiyaansakit to ed sikayo!​—Salmo 73:28.

Mantultuloy ya Anapen si Jehova

17. Anto so nakaukolan ta pian nitultuloy tayon naanap si Jehova?

¹⁷ Tuloytuloy tayon mantinien so siglaotan tayo ed si Jehova. Oniay kuan nen Jesus ed pikakasi to ed si Ama to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Say igamor na pikakabat ed si Jehova tan ed Anak to so mankaukolan na tuloytuloy a sagpot ed biang tayo. Nakaukolan tayo so tulong na pikakasi tan masanton espiritu pian natalosan tayon maong so ‘aralem iran bengatla na Dios.’ (1 Corinto 2:10; Lucas 11:13) Nakaukolan tayo met so panangigiya na “matoor tan makabat ya aripen” pian napano so kanonotan tayo na espiritual a tagano a nitatarya ed ‘manepeg a panaon.’ (Mateo 24:45) Panamegley na satan a paralanan, sikatayo so sisimbawaen nen Jehova ed inagew-agew a basaen so Salita to, maparanay ya atendian iray Makristianon pantitipon, tan masimoon a mibiang ed panangipulong ed “ebanghelyo na panarian.” (Mateo 24:14) Diad panggawa ed satan, nitultuloy tayon naanap so manangiyansakit a Dios tayo, si Jehova.

18, 19. (a) Anto so determinadon gawaen tayo? (b) No ontalindeg itayon malet sumpad Diablo tan mantultuloy tayon anapen si Jehova, panon itayon nabendisyonan?

¹⁸ Gagawaen nen Satanas so amin a nayarian to pian itarok so panamasegsegang, isusumpa, tan pananesdes diad amin a kawalaan na saray totoo nen Jehova. Sasalien to itayon guloen tan deralen so maabig a talindeg tayo ed Dios tayo. Agto labay a mantultuloy itayo ed kimey na panag-anap ed saray matuan-impanpuson totoo tan ontulong ed sikara ya ondapag ed si Jehova nipaakar ed isyu na sankatalbaan ya inkasoberano. Balet nepeg a determinado itayon manmatoor ed si Jehova, a manmatalek ed sikato ya iliktar to itayo manlapud marelmeng. No paiwanwan itayo ed Salitay Dios tan mansiansia itayon aktibo ed nanengneng ya organisasyon to, makapanseguro itayo a sikato so lawas akaparaan ya ontulong ed sikatayo.​—Isaias 41:8-13.

¹⁹ Komon ta amin tayo sirin so ontalindeg a malet sumpad Diablo tan ed saray masilib a gawa to, a lawas anapen so pinabli tayon Dios, si Jehova, a tuloytuloy a ‘mamapaelet, mamapabiskeg ed sikatayo.’ (1 Pedro 5:8-11) Diad ontan et sikatayo so ‘mansiansia ed panangaro na Dios, tan manalagar ed panangasi na Katawan tayo a Jesu-Kristo ya onkana ed bilay ya andi-angga.’​—Judas 21.

Panon Yon Ebatan?

• Anto so kabaliksan na salitan “Diablo,” tan panon a say Diablo so matukoy ed satan a tawag?

• Panon a midumaan si Jehova ed say Diablo diad paraan na pangiimano To ed saray manaayam diad dalin?

• Akin ya awaten na sakey a too so dondon diad iyasingger ed si Jehova?

• Anto so kabaliksan na “ompeket” ed si Jehova, tan panon tayon nitultuloy so pananap ed sikato?

[Tepetepet Parad Panagaral]

[Litrato ed pahina 15]

Anggaman ed saray subok ed sikato, amoria nen Job a sikatoy iyaansakit nen Jehova

[Saray litrato ed pahina 16, 17]

Say inagew-agew a panagbasa na Biblia, regular ya iyaatendi ed saray Makristianon miting, tan maseseg a pibiang ed panagpulong so mangipanonot ed sikatayo a si Jehova so mangiyaansakit ed sikatayo