Kaukolan Kasin Manimon Iray Kristiano?

IMON​—kasin satan a kalidad so kaukolan a bayuboan na saray Kristiano? Bilang Kristiano et pinaseseg itayon ‘tumboken so aro,’ tan imbaga ed sikatayon “say aro et aliwan maimon.” (1 Corinto 13:4; 14:1, NW) Diad biek a dapag, imbaga met ed sikatayo a si “Jehova, . . . sikato so Dios a maimon” tan ingganggan itayon ‘aligen so Dios.’ (Exodo 34:14; Efeso 5:1) Akin a singa mankontraan?

Lapud saray salitan Hebreo tan Griego a nipatalos ya “imon” diad Biblia et malaklaknab iray kabaliksan to. Saratan so nayarin mankabaliksan na balanglan paborabli odino andi, depende ed inkausar na saray salita. Singa bilang, say salitan Hebreo a nipatalos ya “imon” et mankabaliksay “pamasiansia ed nikabkabiig a debosyon; agpangiyabuloy ed kalaslasan; seseg; ligsa; imon [matunong odino makasalanan]; pan-ibeg.” Mipadpara so kabaliksan na misimbangan a Griegon salita. Ontukoy irayan salita ed pikewet, ag-asimbang a liknaan ed iinapen a kalaslasan odino sakey ya ipasen a makakagamor na gunggona. (Uliran 14:30) Tukoyen met na saratan so maabig a kalidad ya inter na Dios​—pankaliktan a salimbengan so inad-aro ed kasakitan.​—2 Corinto 11:2.

Sankaabigan ya Alimbawa

Impanengneng nen Jehova so sankaabigan ya alimbawa diad impangusar na manepeg ya imon. Puro tan malinis iray motibo to, ya apakiwas lapud agto labay a narutakan ed espiritual tan moral so totoo to. Oniay inkuanto nipaakar ed totoo to nensaman, a piguratibon tinukoy bilang Sion: “Siak manimon ak ed Sion ed baleg ya imon, et manimon ak nipaakar ed sikato ed baleg a sanok.” (Zacarias 8:2) Singa ed say maaron ama ya aliston manalimbeng ed ananak to ed kasakitan, alisto si Jehova a manalimbeng ed saray lingkor to ed pisikal tan espiritual a kapeligroan.

Pian nasalimbengan so totoo to, intarya nen Jehova so Salita to, say Biblia. Lugan na satan so dakel a panamaseseg ed sikara a manakar a makabat, tan daakan itan na saray alimbawa na saramay akapanggawa ed satan. Nabasa tayo diad Isaias 48:17: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” Agaylan makaligliwa so pakaamtan say imon to so mamakiwas ed sikato pian asikasoen tan bantayan to itayo! No sikatoy aliwan maimon ed onian maabig a dalan, nasagmak tayon amin so nengneng na kasakitan lapud ag-itayo eksperiensyado. Agbalot masiblet so impangipatnag nen Jehova na imon.

Kanian sirin, antoy pandumaan na maridios ya imon ed say agmanepeg ya imon? Pian naamtaan et konsideraen tayoy alimbawa di Miriam tan Pinehas. Imanoen so amakiwas ed sikaran gawaen itan.

Miriam tan Pinehas

Si Miriam so atsi nen Moises tan Aaron, saray angidaulo ed Israelitas diad impaway da. Leleg a walad kalawakan iray Israelita, nanimonan nen Miriam si agi ton Moises. Inkuan na rekord ed Biblia: “Di Miriam tan Aaron nansalita ra na onsumpa ed Moises, nisengeg  ed biin taga Etiopia ya inasawa to . . . Et inkuan da, Si Moises ta labat so pisalitaan nen Jehova? Aglabat misalita kasi ed sikata?” Mapatnag, si Miriam so angigaulon sinmumpa’d si Moises, ta si Miriam so dinusa nen Jehova, aliwan si Aaron, ya akating a sakey simba lapud agto impangingalngalep.​—Numeros 12:1-15.

Antoy anagdag ed si Miriam pian onsumpa ed si Moises? Kasin lapud paga to ed tuan panagdayew tan pilalek a salimbengan iray kaparan Israelita ed kasakitan? Andin balot. Ompatnag ya inabuloyan nen Miriam so makapuy a pilalek ed puso to pian gamoran so babaleg ya impluensya tan autoridad. Bilang propetesa ed Israel, sikatoy ginalang a maong na totoo, nagkalautla ed saray bibii. Indaulo to ra’d impantogtog tan impankansion kayari mamilagron inkiliktar na Israel ed Ambalangan Dayat. Balet ag-abayag, nayarin mapaga lan maong si Miriam ompan naandi lay inkaprominente to ed iinapen a kalaslasan, say asawa nen Moises. Lapud sinisiblet ya impanimon et sikatoy akisangsangan ed si Moises, say tinuro nen Jehova.​—Exodo 15:1, 20, 21.

Diad biek a dapag et duma so motibo nen Pinehas ed inkiwas to. Antis na inloob da ed Insipan a Dalin, sanen nankampamento so Israel ed Patar na Moab, inayat na bibiin Moabita tan Midianita so dakel ya Israelitan lalaki a manggaway imoralidad tan panagtalintao. Pian nalinisan so kampo tan napakepa so pirmin sanok nen Jehova, abilin iray ukom na Israel a pateyen so amin a lalakin kinmasipa. Lapud imoral iran gagala, matangas ya inawit nen Zimri a panguloy Simeonita so biin Midianita a si Cozbi diad kampo a “sankanengneng na amin a duypo na saray anak na Israel.” Makmakpel a kinmiwas si Pinehas. Lapud pinakiwas na panimon, odino seseg, ed panagdayew ed si Jehova tan pilalek a napansiansiay moral a kalinisan ed kampo et pinatey toray managlawan diad tolda ra. Sikatoy kinomendaan ed “maimon a sanok” to, ‘ya agton balot inyabuloy a walay kalaslasan’ nen Jehova. Lapud tampol a kinmiwas si Pinehas, tinmunda so pananusa a salot ya amatey la na 24,000, tan sikatoy tinumangan nen Jehova na sipanan ed inka-saserdote a mansiansia lawas ed poli to.​—Numeros 25:4-13; The New English Bible.

Antoy pandumaan na sayan duaran impangipatnag na imon? Sinumpa nen Miriam so agi to lapud sinisiblet ya imon, bangta si Pinehas so angipaakseb na inkahustisya base ed maridios ya imon. Walaray panaon a singa itayo si Pinehas, a kaukolan a prangkan mangibalikas ed opinyon tayo odino onkiwas a mangidepensa ed ngaran nen Jehova, say panagdayew ed sikato, tan say totoo to.

Lingon Panag-imon

Balet, posibli met kasin nalikna so lingon panag-imon? On. Kaslakan iyan agawa ed saray Judio nen inmunan siglo. Maimon dan sinalimbengan so inter na Dios a Ganggan tan saray tradisyon da. Diad gunaet dan protektaan so Ganggan, nanggawa ira na amayamay a detalyadon totontonen tan panameget a nagmaliw a makapabelat ed totoo. (Mateo 23:4) Agda sarag tan agda labay a bidbiren a sinalatan la na Dios so Mosaikon Ganggan ya angiyanino ed kapetegan, kanian say lingon  panag-imon da so amakiwas ed sikaran onsanok a maong ed papatumbok nen Jesu-Kristo. Impabitar nen apostol Pablo, a datin maimon tan matoor ed Ganggan diad lingon pantalos, a saray totoon mangiyaagel ed Ganggan et walaay ‘seseg [imon] ed Dios; bangbalet aliwa ya unong ed kakabatan.’​—Roma 10:2; Galacia 1:14.

Nairapan ni ingen so dakel a Judion nagmaliw a Kristiano a makalukpos ed sayan inkigalet ed Ganggan. Kayari mikatlon impan-misionaryo to, imbalita nen Pablo ed inmunan-siglon mananguley ya ulop so inkakomberte na saray nasyones. Diad saman a panaon et nilibon Judion Kristiano so ‘mapilit [“maseseg,” NW] a manumpal ed Ganggan.’ (Gawa 21:20) Pigay taon la iya kayari impandesisyon na mananguley ya ulop ya agla kaukolan a nagalsiman iray Kristianon Gentil. Nankokolkolan ed kongregasyon iray isyun misiglaotan ed panangunor ed Ganggan. (Gawa 15:1, 2, 28, 29; Galacia 4:9, 10; 5:7-12) Lapud kulang na pakatalos ed pidedeneng nen Jehova ed totoo to, impasoot na pigaran Judion Kristiano so dilin punto de bista ra, a babalawen da so arum.​—Colosas 2:17; Hebreos 10:1.

Paliisan tayo sirin so patit na pagmaliw a maimon diad pamasiansia ed saray dilin pinablin ideya odino paraan tayo ya agmalet a nibase’d Salitay Dios. Awaten tayo so balo tan apaaligwas a pakatalos ed Salitay Dios panamegley na paralanan ya uusaren nen Jehova natan.

Magmaliw a Maimon Parad si Jehova

Anggaman ontan, say maridios ya imon so manepeg ed tuan panagdayew. Sano pampagaan tayon maong so dilin reputasyon odino saray kanepegan tayo, ipaarap na maridios ya imon so imano tayo ed si Jehova. Pakiwasen itayo na satan ya anapen iray nanduruman paraan pian iyabawag so katuaan nipaakar ed sikato tan idepensa iray dalan tan totoo to.

Si Akiko, sakey a sigpot-panaon a ministro na saray Tastasi nen Jehova, so pirmin tinuringan na unabung a walaay lingon panmoria ed ganggan na Dios nipaakar ed dala. Mataktikan indepensa nen Akiko so Salitay Dios, a binitla to ni ingen iray komplikasyon tan problema ed medikal nisengeg ed panagpasaksak na dala. Lapud apakiwas na masimoon a pilalek ya itongtong so nipaakar ed si Jehova, impaarap toy tongtongan ed atebek ton isusuppiat na bii​—say agto panisia ed kiwawala na Manamalsa. Inkatunongan nen Akiko ed unabung a say panamalsa so manusuporta’d panisia ed Manamalsa. Lapud makpel ya impangidepensa to et aglabat la nauman iray andiay basiyan ya opinyon na bii noagta sikatoy iyaaralan met la na Biblia. Mandadayew la natan ed si Jehova imay datin mapasnok ya unabung.

Pakiwasen itayo na manepeg ya imon, odino seseg, parad tuan panagdayew a manalerto tan anamoten iray pankanawnawa pian itongtong tan idepensa so pananisia tayo diad trabaho, eskuelaan, diad lakoan, tan leleg a manbiabiahe. Alimbawa, determinadon intongtong nen Midori ed saray katrabahoan to so nipaakar ed pananisia to. Inkuan na katrabahoan to a mantaon na masulok a 40, ya agton balot labay so  mitongtong ed Tastasi nen Jehova. Ag-abayag, diad impantongtong da lamet, inyey-ey na bii so onlelesan makapuy ya ugali na marikit to. Impanengneng nen Midori ed sikato so libron Questions Young People Ask​—Answers That Work, * insan to inyopresi so pangiyaral ed libro ed anak to. Nigapo so panagaral, balet ag-akibiang so ina ed diskusyon. Denesidi nen Midori ya ipabantay ed bii so video a Jehovah’s Witnesses​—The Organization Behind the Name.* Lapud saya et alinewan iray dakel a lingon panmoria to. Lapud apakiwas ed abantayan to, inkuan to: “Labay koy magmaliw a singa ed saray Tastasi nen Jehova.” Sikatoy akiiba la’d si anak ton manaaral na Biblia.

Importante met ed Kristianon kongregasyon so manepeg ya imon. Pawalaen to so maligsan awawey na aro tan paga insan mamakiwas ed sikatayon labanan iray makaderal ya impluensya a makapasakit ed saray agagi tayo ed espiritual, singa say makaderal a talabutob tan apostatan kaisipan. Pakiwasen itayo na maridios ya imon a suportaan iray desisyon na mamatatken, a no maminsan et kaukolan dan baaten iray managkasalanan. (1 Corinto 5:11-13; 1 Timoteo 5:20) Diad impansulat nipaakar ed maimon a liknaan to ed saray kapananisiaan ed kongregasyon ed Corinto, inkuan nen Pablo: ‘Maimon ak ed sikayo ed imon na Dios, ta inyasawa takayo ed sakey a laki, pian nipatnag takayo a singa sakey a marikit ya andi tilol ed Kristo.’ (2 Corinto 11:2) Kanian pakiwasen itayo met na imon tayo pian nasalimbengan tayon maong so kalinisan na amin ed kongregasyon nipaakar ed doktrina, espiritual, tan moral.

On, maong ya impluensya ed arum so manepeg a panag-imon, salanti, maridios ya imon. Mamawala itan na panangabobon nen Jehova tan sakey itan ed saray kalidad a kaukolan a tumboken na saray Kristiano natan.​—Juan 2:17.

[Paimano ed Leksab]

[Saray litrato ed pahina 29]

Nibase ed maridios ya imon so inkiwas nen Pinehas

[Saray litrato ed pahina 30]

Paliisay patit na lingon panag-imon

[Saray litrato ed pahina 31]

Pakiwasen itayo na maridios ya imon pian inabang so pananisia tayo tan pablien so impanaagi tayo