Panaon na Panliket Diad Saray Balkan

Taon 1922 ed saman. Sakey a miting na saray Masimoon ya Estudyante na Biblia, bilang tawag ed saray Tastasi nen Jehova nensaman, so ginawa diad Innsbruck, Austria. Kaiba ed saray onderengel si Franz Brand, sakey a kalangweran a laki a nanlapud Apatin ed Vojvodina, Serbia. Diad impanalambit na espiker ed ngaran na Dios, a Jehova, ginmapon inmungol so sakey a pangkat, kanian agto la nituloy so ibabaga to, tan anampot iman a miting. Ingen, nipaslep a maong ed si Franz so nadngel to, tan inggapo ton impulong so maong a balita na Panarian. Saraya so melag a gapoan na makapasagyat ya espiritual ya ibubulaslas ed sakey ed saray bansa na Balkan.

PARAD maslak a totoo natan, say Yugoslavia et sakey a bansan natatabek na bakal tan pateyan. Onsebang ed kanonotan iray makapaermen ya eksena na saray makapataktakot a palanit a panagpatey, desperado iran refugee, aderalderal a kaabungan, tan nagogonigon iran naulila. Agnadeskribe so pirmin ot-ot tan ermen a makasengeg ed bakal ya angapekta ed Balkan Peninsula manlapud 1991 anggad 1995, ya aneral ed amin ya ilalo parad maaligwas tan andiay problema ya arapen panamegley na saray sagpot na totoo. Bilang resulta na bakal, saray totoo ed datin Yugoslavia so akipuligesgesan ed kairapan ed ekonomya tan pirmin inkaduka. *

Lapud saratan a kairapan, agnailaloan na sakey a walaray maliket a totoo a naromog ed satan a lugar. Anggaman singa nikadkaduma itan, talagan walaray maliket a totoo ditan. Diad tua, naeksperiensya ra so agew na nikaduman panliliket diad pansamposampot na koma-20 siglo. Panon ya alanor si Franz Brand, say kalangweran a laki ya asalambit ed gapo, ed satan a panliliket?

Say Espiritual ya Ibubulaslas ed Saray Balkan

Manliket si Franz Brand nipaakar ed balo iran katuaan a nadngelan to tan denesidi ton ikayat so maong a balita. Sikatoy akapantrabaho bilang barbero diad Maribor, sakey a syudad ed Slovenia ya asingger la’d ketegan na Austria, insan pinulongan to iray suki to, a naynay ya akayurong tan mareen ya ontatalineng legan to iran kikiskisan na balbas. Bilang resulta na saray sagpot to, niletneg so melag a grupo na saray manangiyabawag na Panarian diad Maribor  sanen mansamposampot so dekada na 1920. Walaray nibase’d Biblia a paliwawa diad sakey a restawran, a matukoy a tinawag ed saginonor bilang Novi svet (New World) Seafood Restaurant.

Sinmabi panaon, kinmayat so maong a balita ed interon bansa. Baleg so nitulong na impangusar ed “Photo-Drama of Creation” (waloy-oras a palabas a laktipen na saray pelikula, slides, tan recordings) diad sayan inlaknab. Insan diad dekada na 1930 sanen nidunget iray Tastasi nen Jehova ed pirmin panamasegsegang diad Alemanya, saray Tastasi ed Kingdom of Yugoslavia so apabiskeg ed saray Aleman a payunir a tinmaynan ed binalegan dan dalin. Diad impangisakripisyo ra ed personal a pakainawaan odino inkakombiniente, nansagpotan dan sabien so nisulsulinek a parte na sayan mapalandey a bansa pian manpulong. Diad primero et singa daiset so ondengel ed mensahe ra. Diad kasakbayan na dekaday 1940, 150 lambengat a manangipalapag so nanreport ed lawak na serbisyo.

Nen 1941, ginmapo so maramsak a panamasegsegang, a binmayag anggad 1952. Agaylan makapaliket ta nirehistron siansia a legal iray Tastasi nen Jehova nen Setyembre 9, 1953, diad silong na Komunistan uley nen General Tito! Diad saman a taon, wala so 914 a manangipalapag na maong a balita, tan ondarakel so bilang da. Kasabi 1991, say bilang na manangipalapag so dinmakel anggad 7,420, tan 16,072 so inmatendi ed Memoryal ed satan a taon.

Manlapud Agosto 16 anggad 18, 1991, say inmunan internasyonal a kombension na Tastasi nen Jehova ed sayan bansa so ginawa ed Zagreb, Croatia. Diad loob tan paway na bansa et walay 14,684 ya inmatendi. Satan a makatantandan kombension so angiparaan ed saray totoo nen Jehova parad saray subok ed arapen. Kabiangan ed saray sankaunoran lan luluganan a linmabas ed checkpoint a walad baetan na Croatia tan Serbia et saray bus ya angisempet ed saray delegadon nanlapud Serbia. Kalabas na sankaunoran a bus, insara so ketegan tan ginmapo lay bakal.

Walaan na Rason Iray Totoo nen Jehova Pian Manliket

Saray taon na bakal so talagan panaon na pirmin subok parad saray Tastasi nen Jehova diad saray Balkan. Anggaman kuan, walaan ira na rason pian manliket lapud benendisyonan nen Jehova so totoo to ditan diad matalonggaring ya indaak. Manlapu la’d 1991, say bilang na saray manangipalapag na Panarian ed datin Yugoslavia so dinmaak na masulok ya 80 porsiento. Nen 2001 a serbisyon taon et asabi so pantok na 13,472.

Saray opisina ed Zagreb tan Belgrade (Serbia) so datin angasikaso ed kimey na saray Tastasi nen Jehova diad amin a datin Yugoslavia. Lapud satan ya indaak tan saray pananguman ed politika, kinaukolan so pangiletneg na balo iran opisina diad Ljubljana (Slovenia), tan Skopje (Macedonia), niarum ni ed impakawalaan na saray balon opisina diad Belgrade tan Zagreb. Ngalngali 140 membro so manlilingkor ed sarayan opisina. Maslak ed sikara et kalangweran tan napno na seseg tan aro ed si Jehova. Dakel ed sikara so mibibiang ed panangipatalos ed saray katulongan ed panagaral na Biblia diad Croatian, Macedonian, Serbian, tan Slovenian. Agaylan bendisyon itan lapud maslak ed saray magasin tan literatura na Tastasi nen Jehova ed saratan a lenguahe so nipapalapag lan kabansag na orihinal ya edisyon ed Ingles! Sarayan publikasyon so akatulong ed dakel a totoo a makaromog na ligliwa tan ilalo.

 Say kaaruman a rason pian manliket et say mabunlok a suporta na dakel a sigpot-panaon a lingkor a nanlapud arum a bansa. Pigaran mararakep a Kingdom Hall so impaalagey ed apalabas iran taon, ya angarum na liket ed saray kongregasyon. Anggaman kuan, wala so dakel nin panggayagaan a mantatalaran ed sikara. Panon ya ontan?

Sakey a Nikadkaduman Proyekto

Oniay mabetbet ya uumamengen na dakel a manangipalapag, ‘Kasin nawalaan tayo met na New World Translation ed lenguahe tayo?’ Tinaon dan pitalaran so pakadngel ed sakey ya anunsio ed satan diad sakey a distriton kombension. Balet, panon a nagawaan itan ya abalbaleg a proyekto, lapud ta pigay taon ni labat ya aporma iray grupo na managpatalos ed sarayan lenguahe tan pigpigara ni so managpatalos?

Kayari na impangusisa ed saray pamaakaran, inabobonan na Mananguley ya Ulop so sakey a proyekton maapit a pantutulongan na saray grupo na managpatalos ed Croatian, Macedonian, tan Serbian pian diad ontan et nagunggonaan ira ed kimey tan suhestion na arum. Idaulo itan na grupo na Croatian.

Sakey ya Agew na Gayaga

Agbalot nalingwanan na saray Tastasi nen Jehova ed saray Balkan so Hulyo 23, 1999. Saray serye na “Mapropetikon Salita na Dios” a Distrito Iran Kombension so nagawan manbabansag ed Belgrade, Sarajevo (Bosnia-Herzegovina), Skopje, tan Zagreb. Diad pigaran panaon et agmaseguro no kasin nagawa so kombension ed Belgrade lapud peles so pambobomba na NATO, kanian agnaabuloyan iray publikon miting. Agaylan liket na saray agagi ed ilalon makapanlilimog ira kayari na pigaran bulan na agpakakaseguro! Balet, apalumbasan na inkapeteg iray iilaloan da.

Diad ngarem na Biernes, walay nikaduman inyanunsio ed apatiran syudad a nankombensionan. Marendeen so 13,497 a delegado ed walan agawa. Sanen impaway a siansia na espiker so New World Translation of the Christian Greek Scriptures diad Croatian tan Serbian tan imbaga to ed dumerengel a maabig so kagagawa na peles nin pangipapatalos ed Macedonian, agnapokpokan na saray delegado so liknaan da. Agla asumpal na espiker so anunsio lapud maksil ya impantipak. Diad kombension ed Sarajevo, dinmeen a bigla iray dumerengel, a sigpot ya asurprisa. Tinumbokan itan na andukey ya impantipak. Dakel so akalua ed Belgrade, tan say espiker so naamper ed aminpigan impantipak sakbay ton nasumpal so anunsio to. Malikeliket iran amin!

Sayan langkap so lalon pinabli lapud katuaan a saray Tastasi nen Jehova so awalaan na kanepegan a mangimprinta ed patalos na Biblia a Croatian ontan met ed Serbian. Kanian, say New World Translation of the Christian Greek Scriptures ed sarayan duaran lenguahe so impantekep ed sakey a tomo a katekep na sakey a patalos ed Hebreon Kasulatan diad parehon lenguahe. Niarum ni, say Serbian a Biblia so inimprinta ed letran Roman tan Cyrillic.

Lapud pisalsalamat ed amin a bendisyon tan panangiwanwan a naawat da, inapresyan maong na saray totoo nen Jehova ed saray Balkan iray salita nen David: “Anggan manakar ak ed lawak na anino na patey, agak la ontakot ed mauges: ta sika wala ka ya ibak; say baras tan say tayukor mo ligliwaen da ak.” Anggaman ed amin a kairapan a kidudungetan da ni, determinado ira a gawaen so ‘gayaga ed si Jehova bilang pakdaal da.’​—Salmo 23:4; Nehemias 8:10.

[Paimano ed Leksab]

[Litrato ed pahina 20]

Say inmunan grupo na saray manangipalapag ed Maribor, Slovenia, a nampulong ed arawin teritorya