Akin a Mair-irap so Onkerew na Dispensa?

NEN Hulyo 2000, say Lehislatura na Estado na California diad Estados Unidos so angipasa na ley a denesinyon mangabsuelto ed eebatan na totoo no misimpatya ira ed too ya arisgo ed aksidentin inkilanoran dan mismo. Akin a ginawa itan a ley? Naimano a sano walay arisgo odino aderal lapud aksidente et mabetbet a masuyat so totoo ya onkerew na dispensa lapud takot ya ompan nabaloan ed korte a pangaaksobi itan ed kasalanan. Diad biek a dapag, saramay manliknan nepeg a pidispensaan so nayarin onsyodot, tan say melag ya aksidente so magmaliw a baleg a sangsangan.

Siempre, agnakaukolan so ikerew na dispensa ed aksidente ya aliwan sikay akankasalanan. Tan nayarin walaray panaon sano makabat so pan-alwar ed ibagam. Inkuan na abayag lan proverbio: “Dia ed karaklan na saray salita ag-onkulang so pakalukso; balet say mamokpok ed saray bibil to sikato so makabat.” (Uliran 10:19; 27:12) Anggaman ontan, nayarian mo so magmaliw a magalang tan matulong.

Ingen, agta tua a dakel a totoo so agla onkekerew na dispensa, anggaman anggapoy  nalalanor a demandaan? Diad abung et nayarin iyey-ey na asawan bii, ‘Agbalot onkekerew na dispensa so masiken ko.’ Diad trabaho et nayarin ireklamo na kapatas, ‘Ag-aakoen na totook iray lingo ra, tan ngalngali agda ibaga a kaermenan da so agawa. Diad eskuelaan et nayarin ireport na maestra, ‘saray ugugaw so agnipasal a mangibagay “excuse me.”’

Nayarin say sakey a rason no akin a masuyat so too ya onkerew na dispensa et lapud kapapagaan a sikatoy ipulisay. Lapud iisipen ton ompano agda la imanoen, nayarin agto ibalikas so peteg a nalilikna to. Ompan sigpot lan paliisan na toon asakitan so akaopendi, a mamairap ed pakapipulangan.

Nayarin say sananey nin rason no akin ya ag-onkekerew na dispensa so arum et lapud anggapoy pibabali da ed liknaan na arum a totoo. Nayarin ikatunongan da, ‘Agla naandi so impakalingok diad ikerew ko na dispensa.’ Walaray arum a masuyat a mangibaga a kaermenan da so agawa lapud saray posiblin pansumpalan. Nononoten da, ‘Kasin paako tan pabayaran da’d siak itan?’ Anggaman ontan, say sankabalgan a babeng diad pamidbir ed lingo et say kinon. Say too a masyadon makinon ya agto nibagay “sorry” so diad arum a salita et mangibabagan, ‘Agko labay a naderal so kagalangan ko diad pamidbir ed impakalingok. Satan so mangipaabeba ed kipapasen ko.’

Antokaman so rason, dakel so naiirapan ya onkerew na dispensa. Balet peteg kasin kaukolan so ikerew na dispensa? Antoray gunggona diad ikerew na dispensa?

[Litrato ed pahina 3]

“Saray ugugaw so agnipasal a mangibagay ‘excuse me’”

[Litrato ed pahina 3]

“Ag-aakoen na totook iray lingo ra”

[Litrato ed pahina 3]

“Agbalot onkekerew na dispensa so masiken ko”