Amin Tayo so Mankaukolan na Komendasyon

SAMAN so marakdakep ya agew parad melag ya ugaw a bii. Anggaman kinaukolan a sikatoy baaten no maminsan, diad saman ya agew et sikatoy makalkalakal. Balet, kasabi labi, kayarin pinaugip so ugaw, sikatoy nadngel nen ina to ya onaakis. Sanen atepetan no akin a sikatoy mansibsibek, oniay inkuanto: “Agta maong ak ya ugaw natan?”

Say ina so atiknan maong ed satan a tepet. Sikatoy lawas maples a mangokorehi ed anak to. Balet diad saman ya agew, anggaman naimano ton nanggunaetan na melag nin anak to so mankalakal, say ina so aglambengat angapresya ed satan.

Aliwan saray ugugaw lambengat so mankakaukolan na komendasyon tan panamaseguro. Satan so kaukolan tayon amin​—a singa ed pankaukolan tayo na pananimbawa tan panangorehi.

Antoy nalikna tayo sano sikatayoy impapuson nakokomendaan? Agta satan so mamapaliket tan mamapaligsa ed sikatayo? Nayarin isipen tayo a no walay makakaimano ed sikatayo, walay mangaaro ed sikatayo. Napapaseguroan itayo a say ginawa tayo so makanakana, tan napapakiwas itayo a mansagpot lamet ed arapen. Agpankelawan a say masimoon a komendasyon so mabetbet a mamapaapit ed sikatayo ed toon mangipapanaon a mangibaga na bengatlan makapaseseg.​—Uliran 15:23.

Atebek nen Jesu-Kristo so pankaukolan a mangomenda. Diad parabolo to nipaakar ed saray talento, say katawan (a mangililitrato a mismo ed si Jesus) so maliket ya angomenda ed duaran matoor ya aripen, diad impangikuan: “Maabig a gawa, maong tan napanmatalkan ya aripen.” Agaylan makapaligsay-puso! Anggaman nandumaan a tuloy iray abilidad tan agawaan da, nampara so komendasyon ed sikara.​—Mateo 25:19-23.

Kanian tandaan tayo so ina na samay melag ya ugaw. Agtayo la kaukolan ya alagden a makalua ni so arum antis a komendaan tayo ira. Imbes, nayarian tayoy mananap na saray pankanawnawa a mangomenda. On, walaan itayoy maabig a rason pian masimoon a mangomenda ed amin a pankanawnawa.