Report na Saray Manangiyabawag na Panarian

Lukas Iray Kingdom Hall Parad Amin

LEGAN ya ipapasal nen Jesu-Kristo iray babangatan to parad ministeryo ed publiko, pinaseseg to iran ‘mangibelyaw ed toktok na kaabungan.’ (Mateo 10:27) On, kaukolan a maparungtal dan gawaen so Makristianon ministeryo ra, tan naiimano na publiko. Diad prinsipyo na sayan bilin, say kimey na saray Tastasi nen Jehova so maparungtal met a gagawaen. Saya so akatulong ed saray Tastasi a natalonaan so isusumpa tan paborablin naimano.

Anggaman lukas ed publiko iray miting ed kongregasyon na Tastasi nen Jehova, lapud panangidumaduma et masuyat so totoo ya onloob ed Kingdom Hall. Ontan ed Finland. Saray arum so masuyat labat lan onla ed saray balon pasen. Sano ipaalagey so balon Kingdom Hall odino apigeren so dati lan hall, kaslakan lan iyaarunsa so lukas a pampasyar. Nayarin walay nikaduman panangimbita ed saray kakaabay pian nabisita ra so Kingdom Hall tan nakabisado ra so kimey na saray Tastasi nen Jehova.

Diad sakey a lugar, inyarunsa na Tastasi so kampanya a pangibunog na magasin ed agew a nagawa so lukas a pampasyar ed balon Kingdom Hall da. Akatongtong na duaran Tasi so masiken ya angikuan a labalabay ton basaen iray magasin a Panag-Bantayan tan Awake! Imbalita na agagi ed sikato so nipaakar ed lukas a pampasyar tan inyopresi ran itagar ed Kingdom Hall. Inkuan na laki a labay to so onla. Say akulaw to, ya ondedengel ed tongtongan, so kinmelyaw, “Mila ak met!”

Sanen linmoob ira ed Kingdom Hall, ninengneng na laki so kaliberliber tan inkuan to: “Aliwa met manayan andeket ed loob. Saya so marakdakep tan maliwliwawa. Imbaga ra’d siak ya andeket ed loob na Kingdom Hall!” Nansiansia ni so sanasawa a magano tan angala ni na pigaran literatura a wad’man.

Kaliktan na sakey a kongregasyon ya ipa-anunsyo diad peryodiko so lukas a pampasyar sano idedika ra so Kingdom Hall. Kapangawat na pangulon editor ed paimano ed okasyon, insuheri to a mansulat ira na sakey ya artikulo nipaakar ed satan. Inmabobon iray agagi, tan diad saginonor et pinmatnag ed peryodiko so kapalduay-pahina ya artikulo, a manasaglawi ed okasyon tan manideskribe ed kimkimey na kongregasyon na saray Tastasi nen Jehova ed saman a lugar.

Kayarin nipalapag so artikulo, akatongtong na sakey a Tasin akulaw so kaabay to ya angikuan ed sikato: “Walay marakep ya artikulo nipaakar ed saray Tastasi nen Jehova ed peryodiko natan!” Akapanpulong so agin bii insan akapangipalima na brosyur a Jehovah’s Witnesses in the Twentieth Century diad saginonor.

Niarum ni ed pamalinew ed pigaran lingon panmoria nipaakar ed saray Tastasi nen Jehova, say ontan ya uksoyan a lukas a pampasyar tan saray programa na dedikasyon diad balo iran Kingdom Hall so lalon akapasesegan na saray manangipalapag a mangimbita na dakel nin totoo ya onatendi ed saray miting. On, diad dakel a bansa, a pati diad Finland, akabatan na totoo a saray Kingdom Hall na Tastasi nen Jehova et lukas ed amin.