“Pansiansiaen Yon Maabig so Kondukta Yo ed Limog na Saray Nasyon”
“Pansiansiaen Yon Maabig so Kondukta Yo ed Limog na Saray Nasyon”
“Igalang yo so amin a totoo. Aroen yo so impanaagi.”—1 PEDRO 2:17.
1, 2. (a) Anto so komento na sakey a reporter ed peryodiko nipaakar ed saray Tastasi nen Jehova? (b) Akin a pambabanikelan na saray Tastasi nen Jehova so pamasiansia ed atagey iran estandarte na kondukta?
PIGAY taon lay linmabas, binisita na sakey a reporter ed peryodiko diad Amarillo, Texas, E.U.A. so nanduruman relihyon ed lugar da insan to inreport so adiskobre to. Walay sakey a grupo a makatantanda ed sikato. Inkuanto: “Diad loob na taloy taon, inatendian ko so tinaon iran kombension na saray Tastasi nen Jehova diad Amarillo Civic Center. Diad impimogelmogel ko ed sikara, anggapon balot so anengneng kon nansigarilyo, inminum na serbesa, odino nanayew. Sikara so sankalinisan, sankakalakalan, sankasimpitan a mangawes, maomaong a grupo na totoo ya akabat ko.” Mabetbet a nipalapag so ontan met iran komento nipaakar ed saray Tastasi nen Jehova. Akin a saray Tastasi nen Jehova so mabetbet ya irarayew na totoon agda kapananisiaan?
2 Kaslakan et nidadayew so totoo na Dios lapud maong a kondukta ra. Anggaman onaabeba iray estandarte ed inkalapagan, momoriaen na saray Tastasi nen Jehova iray atagey ya estandarte na kondukta bilang sakey ya obligasyon, a kabiangan na panagdayew da. Amta ra ya ipatnag na saray kiwas da so nipaakar ed si Jehova tan saray Kristianon agagi ra tan magmaliw a makapasagyat so katuaan ya ipupulong da lapud maong a kondukta ra. (Juan 15:8; Tito 2:7, 8) Imanoen tayo sirin no panon tayon napansiansia so maabig a kondukta ta pian nitultuloy tayon nitandoro so maabig a reputasyon nen Jehova tan saray Tastasi to tan no panon itayon nagunggonaan ed panggawa ed satan.
Say Kristianon Pamilya
3. Manlapud anto so nepeg a pakasalimbengan na saray Kristianon pamilya?
3 Ikonsidera tayo so kondukta tayo ed loob na pamilya. Oniay kuan na libron Die Neuen Inquisitoren: Religionsfreiheit und Glaubensneid (The New Inquisitors: Freedom of Religion and Religious Envy), nen Gerhard Besier tan Erwin K. Scheuch: “Parad [saray Tastasi nen Jehova] say pamilya so nagkalalo lan nakaukolan a salimbengan.” Tua itan a balikas, tan natan et nepeg a nasalimbengan so pamilya manlapud dakel a kapeligroan. Walaray ananak a “matulay ed atateng” tan walaray wala la’d edad ya andian na “aro ed nianakan” odino “aliwa ran maadia.” (2 Timoteo 3:2, 3) Naimatonan ed saray pamilya so panagduksa ed kapareha, aabusoen odino ikakaindan na atateng so ananak da, tan saray ananak so manrerebeldi, nalalanor ed panagdruga tan imoralidad, odino ontataynan ed abung. Amin na saya so resulta na makaderal ya impluensya na ‘espiritu na mundo.’ (Efeso 2:1, 2) Nepeg tayon protektaan iray pamilya tayo sumpad satan ya espiritu. Panon? Diad italineng ed simbawa tan panangidirehi nen Jehova parad saray membro na pamilya.
4. Antoray responsabilidad na saray Kristianon membro na pamilya ed balang sakey?
4 Bibidbiren na saray Kristianon sanasawa a walaan ira na saray emosyonal, espiritual, tan pisikal ya obligasyon ed balang sakey. (1 Corinto 7:3-5; Efeso 5:21-23; 1 Pedro 3:7) Ambelat iray responsabilidad na Kristianon atateng ed saray ilalak da. (Uliran 22:6; 2 Corinto 12:14; Efeso 6:4) Tan diad ibabaleg na saray ananak ed loob na Kristianon pamilya, naaaralan da a walaan met ira na saray obligasyon. (Uliran 1:8, 9; 23:22; Efeso 6:1; 1 Timoteo 5:3, 4, 8) Say panumpal ed saray obligasyon na pamilya so mankaukolan na sagpot, determinasyon, tan espiritu na aro tan dilin-panagsakripisyo. Anggaman ontan, no nagkalalon kakapeten na amin a membro na pamilya iray obligasyon ya inter ed sikara na Dios, lalon magmaliw iran bendisyon ed balang sakey tan ed kongregasyon. Mas importante et gagalangen da so Angiletneg na pamilya, si Jehova a Dios.—Genesis 1:27, 28; Efeso 3:15.
Say Kristianon Impanaagi
5. Antoran gunggona so nagamoran tayo ed pililimog ed saray kaparan Kristiano?
5 Bilang Kristiano, walaan itayo met na responsabilidad ed saray kapanisiaan ed kongregasyon tan manuna et diad saramay manutugyop na “interon ulopan na . . . saray agagi ed mundo.” (1 Pedro 5:9, NW) Say relasyon tayo ed kongregasyon so makana ed espiritual a bunigas tayo. Sano milimog itayo ed saray kaparan Kristiano, panggayagaan tayo so makapabiskeg a pitutuyaw da ontan met ed makapabunigas ya espiritual a taganon manlalapud “matoor tan makabat ya aripen.” (Mateo 24:45-47) No walaray problema tayo, makaasingger itayo ed saray agagi tayo parad makagunggonan bilin a nibase ed Makasulatan iran prinsipyo. (Uliran 17:17; Eclesiastes 4:9; Santiago 5:13-18) No mankakaukolan itayo, ag-itayo ikaindan na agagi tayo. Agaylan bendisyon so pagmaliw a kabiangan na organisasyon na Dios!
6. Panon ya impatnag nen Pablo a walaan itayo na saray responsabilidad ed arum a Kristiano?
6 Balet, wadtan itayo ed kongregasyon pian aglambengat mangawat; wadtan itayo met pian mangiter. On, inkuan nen Jesus: “Lalo a mapalar so mangiter nen say mangawat.” (Gawa 20:35) Impabitar nen apostol Pablo so mabulos a panangiter sanen insulat to: “Mansiansia itayo komon a malet tan agnagiing ed panangiparungtal [“panangiyabawag,” NW] na ilalo tayo; ta matoor iman so angisipan: Tan manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.”—Hebreos 10:23-25.
7, 8. Panon tayon nipanengneng so mabunlok ya awawey ed loob na kongregasyon tayo tan ed saray Kristiano ed arum a daldalin?
7 Diad loob na kongregasyon, ‘iyaabawag tayo so ilalo tayo’ sano mankokomento tayo legan na saray miting odino mibibiang itayo ed arum niran paraan diad programa. Saratan a sagpot so seguradon mamaseseg ed agagi tayo. Napaseseg tayo met ira diad pitongtong tayo sakbay tan kayari na aral. Satan so pankanawnawa a napabiskeg tayoray maletey, natambayo iray nanaermenan, tan naligliwa iray mansasakit. (1 Tesalonica 5:14) Mabunlok iray masimoon a Kristiano ed satan a klase na panangiter, tan satan so makasengeg no akin a dakel ya inmatendi ed saray miting tayo ed primeron pankanawnawa so asagyat ed aro ya alikna ra ed limog tayo.—Salmo 37:21; Juan 15:12; 1 Corinto 14:25.
8 Ingen, say aro tayo so aglambengat nipaarap ed mismon kongregasyon tayo. Onnatnat itan ed interon ulopan na saray agagi tayo ed sankamundoan. Alimbawa, satan so makasengeg no akin a walay kahon a pangipelagan na kontribusyon parad Kingdom Hall Fund diad kada Kingdom Hall. Nayarin marakep so Kingdom Hall tayo, balet amta tayo a nilibo ed saray kapara tayon Kristiano ed arum a bansa so andian na matukoy a pasen a pantitiponan. Sano mandonasyon itayo parad Kingdom Hall Fund, nipanengneng tayo so aro ed saratan ya indibidual anggaman agtayo ira kabat a personal.
9. Anto so manunan rason a manaaroan iray Tastasi nen Jehova?
9 Akin a manaaroan iray Tastasi nen Jehova? On, lapud sikara so ingganggan nen Jesus a manggawa ed satan. (Juan 15:17) Tan say aro ra ed balang sakey so ebidensya ya onkukurang ed sikara so espiritu na Dios bilang indibidual tan bilang sakey a grupo. Say aro et kabiangan na “bunga na espiritu.” (Galacia 5:22, 23) Diad panaaral na saray Tastasi nen Jehova ed Biblia, iyaatendi ed saray pantitipon na Kristiano, tan naynay a pampikasi ed Dios, say aro so magmamaliw a natural la’d sikara anggaman manbibilay ira ed mundon ‘binmetel lay aro na amayamay.’—Mateo 24:12.
Pideneng ed Sosyedad a Pambibilayan Tayo
10. Anto so responsabilidad tayo ed sosyedad a pambibilayan tayo?
10 Say impanalambit nen Pablo ed ‘panangiyabawag ed ilalo tayo’ so mangipapanonot ed sikatayo ed sananey nin responsabilidad. Laktipen na sayan mapublikon panangiyabawag so pangipulong na maong a balita ed saramay aliwa nin Kristianon agagi tayo. (Mateo 24:14; 28:19, 20; Roma 10:9, 10, 13-15) Satan a panagpulong so kaaruman nin gawa na panangiter. Say pibiang ed satan so mankaukolan na panaon, biskeg, panagparaan, panagpasal, tan pangusar na personal iran kayarian. Ingen, insulat met nen Pablo: “Maotang ak ed saray Griegos tan Barbaros, makabat tan agmakabat. Kanian, unong na wala ed siak, atadia ak a mangipakabat na ebanghelyo met ed sikayo a wala ed Roma.” (Roma 1:14, 15) Singa si Pablo, komon ta mabunlok tayon bayaran itan ya ‘otang.’
11. Anton duaran Makasulatan a prinsipyo so mangigiya ed pisisiglaotan tayo ed mundo, balet anto so bidbiren tayo?
11 Wala ni kasi so arum a responsabilidad tayo ed saramay agtayo kapanisiaan? On. Siempre, bibidbiren tayo a “say sankamundoan mandukdukol ed kaugsan.” (1 Juan 5:19) Amta tayo so inkuan nen Jesus nipaakar ed saray babangatan to: “Ag-ira taga mundo, salanti unong ya agak taga mundo.” Balet, manbibilay itayo ed mundo, a manaanap itayo na napambilay ditan, tan makakaawat itayo na saray serbisyo manlapud satan. (Juan 17:11, 15, 16) Kanian walaan itayo na saray obligasyon ed sosyedad a pambibilayan tayo. Anto iratan? Inebatan nen apostol Pedro itan a tepet. Sakbay na kaderal na Jerusalem, sinulat to iray Kristiano diad Asia Minor, tan sakey a teksto ed satan a sulat so ontulong ed sikatayo pian nawalaan na asimbang a pisisiglaotan ed mundo.
12. Diad anton dalan a saray Kristiano so “sankaili tan temporaryon manaayam,” tan lapud satan et anto so nepeg dan paliisan?
12 Diad pangigapo, oniay kuan nen Pedro: “Inararok ira, pikasik komon ed sikayo, a singa sankaili tan manakarakar [“temporaryon manaayam,” NW], ya italirak yo komon so kalamanan na lawan, a mibakal ed kamarerwa.” (1 Pedro 2:11) Diad espiritual a pantalos, saray tuan Kristiano et “sankaili tan temporaryon manaayam” lapud say peteg a pangiyaapasakeyan day bilay da et say ilalon andi-anggaan a bilay—saray alanaan na espiritu diad tawen tan say ‘arum a karnero’ diad arapen a paraison dalin. (Juan 10:16; Filipos 3:20, 21; Hebreos 11:13; Apocalipsis 7:9, 14-17) Anto balet so nipaakar ed saray pilalek na laman? Saraya so mangilaktip ed saray bengatla a singa say pilalek ya onyaman, say pilalek ya ombantog, imoral iran pilalek ed sekso, tan saray pilalek ya adeskribe bilang “siblet” tan “agum.”—Colosas 3:5; 1 Timoteo 6:4, 9; 1 Juan 2:15, 16.
13. Panon a saray pilalek na laman et ‘mibabakal ed kamarerwa tayo’?
13 Saratan a pilalek so peteg a ‘mibabakal ed kamarerwa [tayo].’ Pakapuyen na saratan so siglaotan tayo ed Dios tan satan so mameligro ed ilalo tayo (say “kamarerwa,” odino bilay tayo) bilang Kristiano. Alimbawa, no bayuboan tayo so interes ed imoral iran bengatla, panon tayon nipresenta so inkasikatayo bilang “mabilay a bagat, masantos, makapaliket ed Dios”? No napelag tayo ed patit na materyalismo, panon tayon ‘niyuna so panarian’? (Roma 12:1, 2; Mateo 6:33; 1 Timoteo 6:17-19) Say magmaong a kurang et say panumbok ed alimbawa nen Moises, ya ipulisay iray pakasagyatan ed mundo, tan iyuna ed bilay tayo so panaglingkor ed si Jehova. (Mateo 6:19, 20; Hebreos 11:24-26) Satan so importantin sengegan pian nagamoran so asimbang a pisisiglaotan ed mundo.
‘Pansiansiaen so Maabig a Kondukta’
14. Akin a panggunaetan tayo bilang Kristiano so pamasiansia ed maabig a kondukta?
14 Say sakey nin importantin giya so naromog ed onggendan iran salita nen Pedro: “Pansiansiaen yon maabig so kondukta yo ed limog na saray nasyon, ta pian, diad bengatlan sasalitaen da sumpad sikayo a singa managgawa na mauges, igloria ra so Dios diad agew na pangusisa to bilang resulta na maabig iran gawa yo a naiimatonan da.” (1 Pedro 2:12, NW) Bilang Kristiano et panggunaetan tayo so magmaliw a napanuliranan. Maseet itayon manaral ed eskuelaan. Makuli tan matua itayo ed pantratrabahoan tayo—anggaman singa agmakatunongan so amo tayo. Diad sankaabungan a nandudumaan so pananisia, say mananisian asawan laki odino bii so mansagpot a maong pian tumboken iray Kristianon prinsipyo. Aliwan naynay a mainomay itan, balet amta tayo a say napanuliranan a kondukta tayo so mamaliket ed si Jehova tan mabetbet et maong so epekto na satan ed saray aliwan Tastasi.—1 Pedro 2:18-20; 3:1.
15. Panon tayon amta a say atagey ya estandarte na kondukta na saray Tastasi nen Jehova so malaknab a bibidbiren?
15 Say intalona na maslak ed saray Tastasi nen Jehova diad impamasiansia ra ed napanuliranan iran estandarte et nanengneng ed saray komento ed sikara a nipapalapag ed dakel lan taon. Alimbawa, oniay imbalita na Il Tempo ed Italya: “Saray totoo a katrabahoan na saray Tastasi nen Jehova so aneskribe ed sikara bilang matuan empleyado, a kombinsidon tuloy ed pananisia ra a singara panatiko ed satan; anggaman kuan, makanepegan ira na respeto lapud moral a katooran da.” Oniay kuan na Herald na Buenos Aires, Argentina: “Apaneknekan la na saray Tastasi nen Jehova ed loob na dakel a taon a sikaray makukuli, makalakal, maigot, tan matakot ed Dios a mibabaley.” Inkuan na Ruson iskolar a si Sergei Ivanenko: “Kabkabat iray Tastasi nen Jehova ed interon mundo bilang totoon maalwar a manutumbok ed ley tan nagkalautla say masimoon ya awawey da nipaakar ed panagbuis.” Oniay inkuan na manedyer na sakey a pasilidad ed Zimbabwe ya inusar na saray Tastasi nen Jehova parad kombension da: “Anengneng ko iray pigaran Tastasi a mandodokdok na papel tan manlilinis na kasilyas. Say sular so tinaynan a malinlinis. Makalakal iray tin-edyer yo. Komon ta say interon mundo so napano na saray Tastasi nen Jehova.”
Panagpasakop na Kristiano
16. Anto so siglaotan tayo ed sekular iran pakauley, tan akin?
16 Sinaglawi met nen Pedro so nipaakar ed siglaotan tayo ed sekular iran pakauley. Inkuanto: “Tuloken yo so ganagana a pakauley na too, nisengeg ed Katawan: unong ed ari, a singa katageyan; odino dia ed saray gobernador, ya iganggan to a mamales ed saray managgawa na mauges, tan mangiter na galang ed saray managgawa na maong. Ta saya so linaway Dios, a dia ed panggawa yo na kaabigan padeenen yo so agpikakabat na saray totoon makulangkulang.” (1 Pedro 2:13-15) Misalamat itayo ed saray gunggonan naaawat tayo ed mauksoy a gobierno, tan lapud nigiya ed saray salita nen Pedro, tutuloken tayo iray ley na satan tan manbuibuis itayo. Anggaman bibidbiren tayo so inter na Dios a kanepegan na saray gobierno a manusa ed saray mananumlang ed ley, say manunan rason na pampapasakop tayo ed sekular ya autoridad et “nisengeg ed Katawan.” Satan so linawa na Dios. Niarum ni, agtayo labay a napabanday so ngaran nen Jehova diad kadusa lapud gawan-mauges.—Roma 13:1, 4-7; Tito 3:1; 1 Pedro 3:17.
17. Sano sumpaen itayo na “totoon makulangkulang,” anto so napanmatalkan tayo?
17 Makapaermen, arum a “totoon makulangkulang” a walad autoridad so mamapasegsegang odino onsusumpa ed sikatayo diad arum a paraan, singa say pangiyalibansa na saray kampanyan panagderal ed sikatayo. Balet, diad nigeter a panaon nen Jehova, lawas a niwalwal iray katilaan da, tan say ‘agmakabat a tongtong’ da so sigpot a napatunda. Paneknekan itan na rekord na Makristianon kondukta tayo. Satan so rason no akin a saray matuan opisyales na gobierno so mabetbet a mangokomenda ed sikatayo bilang managgawa na maabig.—Roma 13:3; Tito 2:7, 8.
Saray Aripen na Dios
18. Bilang Kristiano, diad antoran dalan a napaliisan tayo so pangabuso ed kawayangan tayo?
18 Oniay impasakbay natan nen Pedro: “Unong ed bulos kayo, ya aliwa a say aagamilen yo ya inkablos sikato so sakbong na kaugsan, noag ingen lapu ed aripen kayoy Dios.” (1 Pedro 2:16; Galacia 5:13) Natan, say pikakabat tayo ed katuaan na Biblia so mangibulos ed sikatayo manlapud saray palson bangat na relihyon. (Juan 8:32) Niarum ni, walaan itayo na bulos a panagdesisyon, tan makapanpili itayo. Balet, agtayo aabusoen so kawayangan tayo. Sano manpipili na saray pilimogan, kawesen, panag-ayos, panligliwaan—anggan say tagano tan inumen—nodnonoten tayo a saray tuan Kristiano so ariripen na Dios, ya agda papaliketen so inkasikara. Nilabay tayo so manlingkor ed si Jehova imbes a magmaliw ya aripen na dilin pilpilalek na laman tayo odino say moda tan uso ed mundo.—Galacia 5:24; 2 Timoteo 2:22; Tito 2:11, 12.
19-21. (a)Panon tayon moriaen iramay walad sekular a pakauley? (b) Panon ya impatnag na arum so ‘aro ed impanaagi’? (c) Anto so sankaimportantian a responsabilidad tayo?
19 Intuloy ya inkuan nen Pedro: “Igalang yo so amin a totoo. Aroen yo so impanaagi, takotan yo so Dios. Igalang yo so ari.” (1 Pedro 2:17) Lapud aabuloyan ni nen Jehova a Dios iray totoo ed nanduruman posisyon na pakauley, ipanengneng tayo so manepeg a panamagalang ed sikara. Ipikasi tayo ni ingen ira, diad gagala a nitultuloy tayo so ministeryo tayo a walaay deen tan maridios a debosyon. (1 Timoteo 2:1-4) Balet, ontan met, walaan itayo na ‘aro ed impanaagi.’ Lawas tayon gawaen so maong, aliwan pankaugsan, na Kristianon agagi tayo.
20 Alimbawa, sanen naapag so sakey a nasyon ed Aprika lapud etnikon karawalan, pinmatnag so Makristianon kondukta na saray Tastasi nen Jehova. Oniay imbalita na peryodikon Reformierte Presse na Switzerland: “Nen 1995, apaneknekan na African Rights . . . so impibiang na amin a relihyon [ed panlalaban] nilikud ed saray Tastasi nen Jehova.” Sanen abalitaan na arum a bansa so makapasinagem iran agawa ed sikara, saray Tastasi nen Jehova ed Europa so angipawit a tampol na tagano tan medisina ed saray agagi ra tan ed arum nira diad satan a maniirap a bansa. (Galacia 6:10) Tinulok da iray salita ed Uliran 3:27: “Agmo abalaen so maong ed saray kanepegan to, sano wala ed pakayari na limam so panggawa.”
21 Balet, wala ni so mas importantin responsabilidad nen say panamagalang tayo ed dinanman a sekular ya autoridad tan anggan say panangaro tayo ed agagi tayo. Anto itan? Inkuan nen Pedro: “Takotan yo so Dios.” Mas baleg ni so obligasyon tayo ed si Jehova nen say siopaman a too. Panon itan a tua? Tan panon tayon nasimbang iray obligasyon tayo ed Dios ed saray obligasyon tayo ed saray sekular a pakauley? Saratan a tepet so naebatan ed ontumbok ya artikulo.
Kasin Nanonotan Yo?
• Antoray responsabilidad na saray Kristiano ed loob na pamilya?
• Panon tayon nipanengneng so mabunlok ya awawey ed kongregasyon?
• Antoray responsabilidad tayo ed sosyedad a pambibilayan tayo?
• Anto so pigaran gunggona a resulta na panamasiansia tayo ed atagey ya estandarte na kondukta tayo?
[Tepetepet Parad Panagaral]
[Litrato ed pahina 9]
Panon a panlapuan na baleg a liket so Kristianon pamilya?
[Saray litrato ed pahina 10]
Akin a manaaroan iray Tastasi nen Jehova?
[Saray litrato ed pahina 10]
Nipanengneng tayo kasi so aro ed saray agagi tayo anggano agtayo ra kabkabat a personal?