Saray Managsuporta ed Tuan Panagdayew​—Nensaman tan Natan

NANONOTAN mo ta so ngaran na samay lakin ninangisan toy kadaanan a syudad na Jerusalem? ‘Jesus,’ so nayarin ikuan mo​—tua, ninangisan itan nen Jesus. (Lucas 19:28, 41) Balet, pigara nin siglo sakbay a nambilay diad dalin si Jesus, wala ni so matoor a lingkor na Dios a ninangisan to met so Jerusalem. Satan et si Nehemias.​—Nehemias 1:3, 4.

Antoy amaermen a maong ed si Nehemias kanian ninangisan to so Jerusalem? Anto so ginawa to ya akagunggonaan na syudad tan saray manaayam ditan? Tan anto so naaralan tayo manlapud ehemplo to? Pian naebatan, repasoen tayo iray agawa ed panaon to.

Toon Mililikna tan Desididon Onkiwas

Si Nehemias so aturon gobernador ed Jerusalem, balet sakbay ni na satan et sikatoy atagey-ranggon opisyal ed palasyo na Persia diad syudad na Susan. Ingen, anggaman mainawa lay bilay to et mapaga nin siansia ed pankaabigan na saray Judion agagi to diman ed Jerusalem. Diad tua, say unonan ginawa to sanen dinmalaw ed Susan iray manangilaman na Judion nanlapud Jerusa lem et ‘tinepet to ed sikara so nipaakar ed saray Judion akataynan, atilak ed inkadakep, tan say nipaakar ed Jerusalem.’ (Nehemias 1:2) Sanen inmebat iray dinmalaw a saray totoo ed Jerusalem et “wala ra ed baleg a kairapan” tan “nagba” so bakor na syudad, si Nehemias so ‘yinmurong tan nannangis, tan nanagogol ed pigaran agew.’ Kayari na satan et imbalikas toy kaermenan to diad masimoon a pikakasi ed si Jehova. (Nehemias 1:3-11) Akin et maer-ermen si Nehemias? Lapud apaulyan la so Jerusalem bilang sentro na panagdayewan ed si Jehova diad dalin. (1 Arari 11:36) Sakey ni, say nagban kipapasen na syudad so pakapatnagan na makapuy ya espiritualidad na saray manaayam ditan.​—Nehemias 1:6, 7.

Say paga nen Nehemias ed Jerusalem tan say panangabagey to ed saray Judion manaayam diman so amakiwas ed sikaton manlingkor diman. Sanen inabuloyan na ari na Persia so patanir ton liwatan a magano iray kimey to, implano nen Nehemias so andukey a pambaroy ya onla’d Jerusalem. (Nehemias 2:5, 6) Kinaliktan ton usaren so biskeg, panaon, tan dunong to bilang panuporta ed kakaukolanen a pangapiger. Pigay agew ni labat na insabi to, sikatoy akapanplano la parad pangapiger ed interon bakor na Jerusalem.​—Nehemias 2:11-18.

Inyapag-apag nen Nehemias so baleg a kimey ed pangapiger ed bakor diad limog na dakel a pamilya, ya amin da so saniiban nankimey. * Masulok a 40 nanduruman grupo so apabtangan a mangapiger ed “sananey a gaton.” Antoy resulta? Lapud dakel iray komikimey​—kabiangan iray atateng ya inibaan na ananak da​—ya angiter ed panaon tan biskeg da, nagmaliw a posibli so singa mairap a kimey. (Nehemias 3:11, 12, 19, 20) Diad duay bulan ya impasyan kimey et naapiger so interon bakor! Insulat nen Nehemias ya anggan saramay sinmumpa ed pangaapiger so apaskar a mamidbir a “saya a kimey agawa nisengeg ed Dios mi.”​—Nehemias 6:15, 16.

Sakey ya Ehemplo a Nodnonoten

Aliwa labat lan say panaon tan saray dunong ed panagplano so intulong nen Nehemias. Inusar to met iray materyal a kayarian to pian suportaan so tuan panagdayew. Inusar toy dilin kuarta to pian narondon ed inkaaripen iray Judion agagi to. Nampaotang ya anggapoy tubo. Agton balot ‘dinetdetan’ iray Judio diad agto inkerew na upa to bilang gobernador, a kanepegan to komon itan. Imbes, pinansiansia ton lukas so abung to diad impamakan ed “sanlasus limamplo a lalaki, nilikud so saramay sinmabi ed sikami a nanlapu ed saray nasyon a wala ed kaliberliber mi.” Kada agew et sikatoy angitadia na “sakey a baka tan anem a pinili a karnero; ontan met ed mano-manok ed tagey” parad saray sankaili to. Likud ni, maminsan ed samploy agew et opresian to ra na “amin a nengneng na alak a daakan”​—a ginastosan ton amin itan.​—Nehemias 5:8, 10, 14-18.

Agaylan abig ya ehemplo na inkamabunlok so impanengneng nen Nehemias parad amin a lingkor na Dios nensaman tan natan! Mabulos ya inusar na sayan makpel a lingkor na Dios iray materyal a kayarian to pian suportaan iray komikimey parad kiyabanti na tuan panagdayew. Matukotukoy ton kerewen ed si Jehova: “Nonoten moak, O Dios ko, nipaakar ed maong, amin a ginawak a nipaakar ed sayan baley.” (Nehemias 5:19) Seguradon ontan so gawaen nen Jehova.​—Hebreos 6:10.

Tutumboken so Ehemplo nen Nehemias Natan

Makapaliket a naimanon saray totoo nen Jehova natan so mangipapatnag met na panangaro, inkamabulos ya onkiwas, tan dilin-panagsakripisyon awawey nisesengeg ed tuan panagdayew. Sano nabalitaan tayon maniirap iray kapananisiaan tayo, mapagpaga itayo nipaakar ed pankaabigan da. (Roma 12:15) Singa si Nehemias, onasingger itayo ed si Jehova diad pikakasi pian suportaan iray agagi tayo ed pananisia, a kerewen ed sikaton: “Pikasik ed sika, natan say layag mo ontalineng ed pikakasi na aripen mo, tan ed pikakasi na saray ariripen mo, a maliket ya ontakot ed ngaran mo.”​—Nehemias 1:11; Colosas 4:2.

Anggaman ontan, say panagpaga tayo ed espiritual tan pisikal a pankaabigan na saray Kristianon agagi tayo tan ed kiyabanti na tuan panagdayew so aglambengat mangaapekta ed liknaan  tayo. Satan met so mamapakiwas ed sikatayo. Lapud aro et napapakiwas iramay iyabuloy na kipapasen da pian taynan so kabkaabigan ya inawa ed saray ayaman da tan, singa si Nehemias, onaalis ed arum a pasen pian ontulong ed saramay mankakaukolan. Saratan a boluntaryo so agnadidismaya ed agmainawan kipapasen na panagbilay a nayarin kidungetan da diad arum a parte na mundo, sikaray manusuporta ed kiyabanti na tuan panagdayew diman, tan manlilingkor a kaibay Kristianon agagi ra. Peteg a nakomendaan so dilin-panagsakripisyon awawey ya ipapatnag da.

Pakapibiang Tayo Diad Mismon Lugar Tayo

Natalosan a maslak ed sikatayo so agmakaalis ed sananey a lugar. Diad lugar tayon mismo et nasuportaan tayo so tuan panagdayew. Niyilustra met itan diad libro na Nehemias. Imanoen so detalyin inyarum nen Nehemias nipaakar ed arum a matoor a pamilyan akibiang ed panag-apiger. Insulat to: “Inapiger nen Jedaya ya anak a laki nen Harumaf, [so] arap na abung to . . . Inapiger nen Benjamin tan Hasub so arap na abung da. Kayari ra inapiger nen Azarias ya anak a laki nen Maasias ya anak a laki nen Ananias so abay na dili ya abung to.” (Nehemias 3:10, 23, 28-30) Baleg so intulong na saratan a lalaki tan saray pamilya ra ed inyaligwas na tuan panagdayew diad impibiang da ed panangapiger diad asingger ed ayaman da.

Natan et dakel ed sikatayo so manusuporta ed tuan panagdayew diad mismon komunidad tayo  diad nanduruman paraan. Mibibiang itayo ed saray proyekton panagpaalagey na Kingdom Hall, panangiter na tulong sano walay desyang tan, sankaimportantian, diad panangipulong ed Panarian. Nilikud ni, balanglan nayarian tayo odino andi so mibiang a personal ed panagpaalagey odino itutulong, amin tayo so masimoon a manpilalek a suportaan so tuan panagdayew panamegley na materyal a kaykayarian tayo, a singa met ed pirmin inkamabunlok a ginawa nen Nehemias diad panaon to.​—Nengnengen so kahon a “Saray Pakapatnagan ed Boluntaryon Panangiter.”

Nayarin mairap no maminsan so pananap ed nakaukolan a pundo pian nasuportaan ed pinansyal so onlalaknab iran kimey ed panag-imprinta, panangiter na tulong, tan dakel nin serbisyo a gagawaen diad sankagloboan. Balet tandaan a say kimey a pangapiger ed abalbaleg a bakor na Jerusalem so ompatnag met a mairap. (Nehemias 4:10) Ingen, lapud inyapag-apag so kimey ed limog na dakel a mabulos a pamilya, satan so asumpal. Ontan met natan, posibli so pakaromog na dakel a bengatlan nakakaukolan ed pakasumpal na sankamundoan a kimey tayo no asikasoen na balang sakey ed sikatayo so nabebetangan to diad kimey.

Ipapanengneng na say a kahon a “Saray Paraan a Pinili na Arum Pian Mangiter” so pigaran dalan pian nasuportaan ed pinansyal so kimey a nipaakar ed Panarian. Diad apalabas a taon, dakel ed limog na totoo na Dios so sinmuporta ed  satan, tan labay ya anamoten na Mananguley ya Ulop na Tastasi nen Jehova iyan pankanawnawa pian ibalikas so aralem a pisasalamat da ed amin a pinakiwas na kapusoan da a mibiang ed sayan boluntaryon panangiter. Nagkalalo ed amin, pisalamatan tayo si Jehova ed mayaman a pamebendisyon to ed interon-puso iran sagpot na totoo to ed pangiyaalibansa na tuan panagdayew diad interon mundo. On, sano molimolien tayo no panon so impangiwanwan nen Jehova ed sikatayo diad saray apalabas a taon, napakiwas itayon mangulit ed saray salita nen Nehemias, a misalsalamat ya angikuan: ‘Say lima na Dios ko, maomaong ed siak.’​—Nehemias 2:18.

[Paimano ed leksab]

[Kahon/Saray litrato ed pahina 22, 23]

Saray Paraan a Pinili na Arum Pian Mangiter na

KONTRIBUSYON PARAD SANKAMUNDOAN A KIMEY

Dakel so mangigagana, odino mangigegetar, na kantidad ya ipelag da ed saray “contribution box” ya atatakan na “Contributions for the Worldwide Work​—Matthew 24:14.”

Kada bulan et ipapawit na saray kongregasyon irayan kantidad balanglan diad sankamundoan a hedkuarter na saray Tastasi nen Jehova odino diad lokal a sangan opisina. Saray boluntaryon donasyon a kuarta so nayarin direktan ipawit ed Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, odino diad sangan opisina a manlilingkor ed bansa yo. Saray alahas odino arum niran ankablin bengatla so nayari met ya idonasyon. Nepeg a nitekep ed sarayan kontribusyon so sakey ya antikey a sulat a mangibabagan satan so direktan langkap.

UKSOYAN NA KONDISYONAL A DONASYON

Nayarin nidonasyon so kuarta panamegley na espisyal a reglamento ya ipawil so donasyon ed angidonar, no bilang ta walay personal a pankaukolan to. Parad nagkalalon impormasyon, ipangasin mitalosan ed say Treasurer’s Office diad address a nipaimano ed tagey.

NIPLANON PANANULONG

Bilang kaaruman ed direkta iran langkap tan kondisyonal iran donasyon a kuarta, wala niray arum a paraan na panangiter pian benepisyoan so serbisyo nipaakar ed Panarian ed sankamundoan. Laktipen na saraya so:

Insurance: Say Watch Tower Society so nayarin ingaran a minanabang ed sakey a life insurance policy odino ed retirement /pension plan.

Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek odino ibayar ed Watch Tower Society diad ipatey unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.

Lote tan Abung: Say nayarin ilakon lote tan abung so nayarin idonasyon ed Watch Tower Society diad panamegley na direktan langkap odino diad pangireserba ed satan bilang panayaman na angidonar, a makapantultuloy a manayam ditan legay bilay. Mitalosan ed sangan opisina diad bansam sakbay ya iyalis ed ngaran so antokaman a lote tan abung.

Gift Annuity: Say gift annuity et sakey a reglamento a say sakey so nayarin mangiyalis ed kuarta odino saray seguridad diad Watch Tower Society. Bilang kasalat, say angidonar, odino say tinuro na angidonar, so makaawat na inggeter a bayaran a kuarta a tinaon legay bilay. Say angidonar so nabawasan ed babayaran ton buis-na-anap diad taon ya inggapo so gift annuity.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Watch Tower Society so ingaran bilang minanabang ed sakey a paknaan na pangimatalek. Say sakey a nimatalek a pakabenepisyoan na sakey a relihyoson organisasyon so nayarin mangitarya na pigaran bentaha ed panag-buis.

Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian tulongan iray indibidual a manpipilalek a benepisyoan so sankamundoan a kimey na saray Tastasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Say brosyur so nisulat bilang ebat ed dakel a tepet a naawat nipaakar ed saray langkap, testamento, tan imatalek. Lugan met na satan iray kaaruman a nausar ya impormasyon nipaakar ed pangiplano ed lote, pinansyal, tan ed buis. Papakabatan met na satan iray indibidual diad nanduruman paraan a saray langkap so nayarin iter la natan odino ipatawir diad ipatey. Naala iyan brosyur diad direktan ikerew na kopya manlapud Sangan Opisina na Tastasi nen Jehova.

Kayari impamasa ed brosyur tan impangonsulta ed Sangan Opisina na Tastasi nen Jehova, dakel so akatulong ed saray Tastasi nen Jehova ed sankamundoan tan ontan met, nagamoran so sankatagyan a balor ed saray benepisyo’d buis ed panggawa’d satan. Say Sangan Opisina na Tastasi nen Jehova so kaukolan a pakabatan tan nawalaan na kopya na antokaman a mitukoyan a dokumento nipaakar ed dinanman ed sarayan uksoyan. No interesado ka ed dinanman ed saray niplanon pananulong iran uksoyan, mitalosan ka ed Sangan Opisina na Tastasi nen Jehova, balanglan diad pansulat odino diad pantelepono, diad address a nilista ed leksab odino diad opisina na Sosyedad a manlilingkor ed bansa yo.

Sangan Opisina na Tastasi nen Jehova

Watch Tower Society

186 Roosevelt Avenue

San Francisco del Monte

1105 Quezon City

Telephone: (02) 411-6090

[Kahon ed pahina 24]

Saray Pakapatnagan ed Boluntaryon Panangiter

Diad sulat to ed saray taga-Corinto, sinaglawi nen apostol Pablo so taloran makanakanan pakapatnagan ed boluntaryon panangiter. (1) Sanen nansulat nipaakar ed panagkolekta na kuarta, oniay imbilin nen Pablo: ‘Kada unonan agew na sinimbasimba balang sakey ed sikayo so mangibiig na yatol to diad dilin abung to.’ (1 Corinto 16:2a) Kanian, kaukolan a masakbay lan iplano so panangiter, tan kaukolan a gawaen itan a sistematiko. (2) Insulat met nen Pablo a balang sakey so mangiter “unong ed naanap to.” (1 Corinto 16:2b, New International Version) Diad arum a panangibaga, say sakey a toon malabay a mibiang ed boluntaryon panangiter so makapanggawa ed satan a dugaruga. Anggaman daiset so anap na sakey a Kristiano, say melag a kantidad a nidonasyon to so papablien nen Jehova. (Lucas 21:1-4) (3) Insulat ni nen Pablo: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Corinto 9:7) Saray masimoon a Kristiano so mangiiter a manlalapud puso, a malikeliket.

[Saray litrato ed pahina 20]

Si Nehemias so toon mililikna tan desididon onkiwas

[Saray litrato ed pahina 24]

Saray boluntaryon kontribusyon so manusuporta ed saray kimey ed panag-imprinta, panangiter na tulong, panagpaalagey na Kingdom Hall, tan arum niran makagunggonan kimey diad sankagloboan