Tepetepet Manlapud Saray Managbasa

Kasin mauges so mipustaan anggan daiset labat a kuarta?

Say Salita na Dios so aliwan detalyado ya angibinsabinsa ed panagsugal, balet magenap la so imbalikas na satan pian ipanengneng ya amin a panagsugal so agmipakna ed saray prinsipyo na Biblia. * Singa bilang, aawaten na karaklan a say panagsugal et mangilalagyat na agum. Satan lambengat a katuaan et importante lan konsideraen na saray Kristiano, lapud ibabaga na Biblia a “saray maagum” so agmakatawir ed Panarian na Dios tan say inkaagum et nipasen ya idolatriya.​—1 Corinto 6:9, 10; Colosas 3:5.

Ilalagyat met na panagsugal so inka-makasarili tan makapuy a pilalaslasan ya awawey, say pampilpilalek a manalo. Si apostol Pablo so amasakbay sumpad saratan a bengatla sanen insulat to: “Ag-itayo komon mapaagum ed maapan dayew, a pasanoken so sakey tan sakey, a mansisibletan so sakey tan sakey.” (Galacia 5:26) Niarum ni, say panagsugal et mamapakiwas ed arum a maaniton manmatalek ed suwerti. Nababayuboan na saray sugarol so amin a klase na anito, a maniilalon naswertian ira. Saratan so mangipapanonot ed sikatayo ed saray agmatoor ya Israelita “ya angiparaan na dulang a para ed dios na Suwerti tan saramay mangibabales na alaokan ya alak para ed dios na Kapalaran.”​—Isaias 65:11, NW.

Nayarin ikatunongan na arum ya aliwan makapuy a panligliwaan so mangipusta na melag a kantidad na kuarta legan a migagalaw na baraha odino chess, dama, tan arum ni ed kakanayon odino maapit a kakaaro. Tua, nayarin agmoriaen na angipusta na daiset a kuarta a sikatoy maagum, makasarili, milalaslasan, odino maanito. Balet, anto kasi so epekto na pigagalaw to ed saray kasugal to? Dakel ed saray mansusugal so ginmapo diad ankelag a pustaan ‘pian manliliket lambengat.’ (Lucas 16:10, NW) Say singano agmakapuy a pamalabasan na oras so nagmaliw a bengatlan makadesyang ed sikara.

Satan so nagkalalo lan tua sano nalalanor iray ugugaw. Dakel ya ugugaw so naliliketan a manalo na ankelag iran pusta tan natutukso iran mangipusta na babaleg a kantidad. (1 Timoteo 6:10) Pepekderan na abayag ya impanaral na Arizona Council on Compulsive Gambling, ya impalapag ed Estados Unidos, a ginmapo so dakel a sugarol sanen ugaw ni ra “diad pangipusta na melag a kantidad diad saray pagalaw odino diad saray baraha a kaiba iray kakaaro odino kakanayon da.” Inkuan ni na sananey a report a “saray ugugaw so onggagapon mansusugal diad abung, a kaslakan et panamegley na saray baraha kaiba so pamilya tan kakaaro ra.” Inyarum ni na report a “trenta porsiento ed ugugaw so ginmapon nansugal antis na pan-11 años da.” Dakel a sugarol a tin-edyer so manusuporta ed bisyo ra panamegley na krimen odino imoralidad, unong ed impanaral a Why Do People Gamble Too Much​—Pathological and Problem Gambling. Peteg a mauges so pansusumpalan na bengatlan singa agmakapuy ed gapo!

Lapud manbibilay itayo ed mundon walaan la na dakerakel a kalot tan tukso, akin ya andi-kakanaan ya iparungtal tayo so inkasikatayo ed arum ni? (Uliran 27:12) Say panagsugal​—wala man odino anggapoy manbabantay ya ugugaw, melag man odino baleg a kantidad​—so mameligro ed espiritualidad kanian nepeg a paliisan. Saray  Kristiano a labalabay da so man-chess, man-dama, odino manbaraha bilang panligliwaan so maabig a napanonotan a mangisulat lambengat ed saray iskor odino basta labat la manggalaw ya anggapo lay iskor. Saray makabat a Kristiano a mapaga ed dilin espiritualidad da ontan met ed saray kakaaro tan pamilya ra so ompaliis ed panagsugal​—anggano melag labat a kantidad na kuarta.

Nibaga kasin interfaith (pipiulop ed arum a relihyon) so panaliw ed bilding na sananey a relihyoson grupo pian pagmaliwen itan a Kingdom Hall?

Diad inkalapagan et papaliisan na Tastasi nen Jehova so ontan a pidedeneng ed arum a relihyon. Anggaman ontan, satan a transaksion et aliwan gawa na interfaith. Ipasen labat itan bilang pinsanan a transaksion ed negosyo. Agmimimuyong so lokal a kongregasyon na Tastasi nen Jehova ed sananey a grupoy relihyon pian ipaalagey so pasen a panagdayewan ya usaren dan dua.

Antoy ipapasen a gawa na interfaith diad imaton nen Jehova? Imanoen so panangiwanwan nen apostol Pablo: “Agkayo miulop ed pako a duma na saray agmananisia, ta anto so piulopan na katunongan ed kaugsan? Odino anto so piulopan [“pibiangan,” NW] na silew ed bilunget? Tan anto so pinonongan nen Kristo ed si Belial? Odino anto so pinabangan na mananisia ed agmanisia? Tan anto a pinonongan so wala ed templo na Dios ed saray talintao? . . . Kanian ekal kayo ed leet da, tan onsian kayo, kuan na Katawan, tan agyo diwiten so marutak, tan akoen takayo.” (2 Corinto 6:14-17) Antoy labay ya ibaga nen Pablo ed saray salitan “piulopan” tan “pibiangan”?

Say pipiulop a binitla nen Pablo so malinew a manasaglawi ed panagdayew tan espiritual iran aktibidad na saray managtalintao tan agmananisia. Pinasakbayan toray taga-Corinto sumpad ‘pinabang ed . . . dulang na saray demonyo.’ (1 Corinto 10:20, 21) Kanian, say gawa na interfaith et pibiang ed panagdayew odino nipaakar ed maespiritual a piulop ed arum a relihyoson organisasyon. (Exodo 20:5; 23:13; 34:12) Sano asaliw lay bilding ya inusar na sakey a relihyoson organisasyon, say manunan gagala na saya et pian naala so bilding a kaukolan parad Kingdom Hall. Antis ya usaren a Kingdom Hall, ekalen so antokaman a misiglaotan ed palson panagdayew. No naapiger la, satan so idedika’d si Jehova ya usaren labat parad pandayew ed sikato. Anggapoy pibiangan odino piulopan na tuan panagdayew ed palso.

Diad paningbat ed saray detalye nipaakar ed panaliw, magano labat so pi-transaksion tan parad panaliw labat. Nonoten a maong na saray membro ed Kristianon kongregasyon so pasakbay nen Pablo ya ‘agmipako ed saray agmananisia.’ Anggaman agtayo ipasen a superyor itayo ed saramay sananey so relihyon da, paliisan tayoy pilimog ed sikara odino paimpluensyaan ed panagdayew da. *

Panon to no abangan na kongregasyon so bilding a kien na sakey a relihyoson organisasyon? Kaslakan et mabetbet so pakapilimog no man-abang, a satan so paliisan. Anggan maminsan labat so pan-abang ed satan a bilding, kaukolan a konsideraen na ulop na mamatatken so onggendan: Wala kasi iray rebulto tan relihyoson simbolo ed loob tan paway na bilding? Panoy panmoria na totoo ed komunidad no usaren tayo so pasilidad? Wala kasi nagapol ed kongregasyon no usaren itan a bilding? (Mateo 18:6; 1 Corinto 8:7-13) Konsideraen na mamatatken irayan katuaan insan ira mandesisyon unong ed satan. Ikonsidera day dilin konsiensia ra ontan met ed amin ed kongregasyon pian determinaen no kasin saliwen da itan a bilding insan pagmaliwen a Kingdom Hall.

[Saray paimano ed leksab]

[Litrato ed pahina 31]

Sayan bilding a datin sentro na panagdayewan na Judio et sinaliw tan pinagmaliw a Kingdom Hall