Panon Tayon Gawaen a Makana Iray Agew Tayo ed si Jehova?

“Naandi, karuman, diad baetan na imbutay tan inselek na agew, so duaran mablin oras, a balang sakey et nigeter ed mabalor ya anemaplon minuto. Anggapo lay nitumang ta apalabas la itan!”​—Lydia H. Sigourney, Amerikanan edukador (1791-1865).

SARAY agew tayo so singa dagdaiset tan mapmaples ya onlalabas. Minolimoli nen salmista David so kinatikey na bilay kanian apakiwas a manpikasi: “Jehova, gawa moak a makapikabat na kasumpalan ko, tan say sukat na saray agew ko no anto kasi, ipaantam ed siak no panon so inkalupo’ko. Nia, sika ginawam so saray agew ko a singa sankalapar na lima, tan say taon ko a singa anggapo so nengneng to ed arapan mo.” Say kapagaan nen David et say pambilay a napaliket so Dios, diad panagsalita tan diad saray kiwas to. Diad impangibesngaw to ed panagmatalek ed Dios, inkuanto: “Say ilalok wala ed sika.” (Salmo 39:4, 5, 7) Dinmengel si Jehova. Talagan inusisa toray kimey nen David kanian tinumangan to unong ed saratan.

Mainomay so pagmaliw ya okupado ed kada minuto na sanagew tan kigalet ed bilay a mapmaples tan amayamay a kimey. Nayarin pansengegan iya na pirmin kapagaan tayo, nagkalalo la ta dakel so nagawaan tan naeksperiensya tayo balet daiset so panaon tayon manggawa’d satan. Kasin say kapagaan tayo et singa ed samay si David​—say pambilay tayon naabobonan na Dios? Pian makaseguro, iimanoen tan uusisaen a maong nen Jehova so balang sakey ed sikatayo. Manga 3,600 taon lay apalabas et binidbir nen Job a toon walaan na takot ed Dios, ya inimano nen Jehova iray dalan to tan inusisa Ton amin iray kimey to. Madanet ya intepet nen Job: “Sano ondalaw, anto so yebat ko ed sikato?” (Job 31:4-6, 14) Posibli a nagawaan tayon makana iray agew tayo ed Dios diad pangiyuna ed espiritual, itulok ed saray ganggan to, tan pangusar a makabat ed panaon tayo. Imanoen tayon maong irayan bengatla.

Iyuna Tayon Pampagaan Iray Espiritual a Bengatla

Matukoy a papasesegen itayo na apuyanan a Kasulatan ya iyuna iray espiritual a bengatla sanen inkuan na satan: “Seguroen yo iray mas importantin bengatla.” Anto irayan importantin bengatla? Sasaglawien na satan so “suston pikakabat tan sigpot a pakatebek.” (Filipos 1:9, 10, NW) Say pikabat ed gagala nen Jehova et mankaukolay makabat a panangusar ed panaon tayo. Anggaman ontan, no iyuna tayon pampagaan iray espiritual a bengatla, satan so mangipaseguro ed sikatayo na makatumang tan makapnek a bilay.

Ipapanonot ed sikatayo nen apostol Pablo ya ‘anapen so kaliktan komon na Katawan.’ Say panseguro tayo so mangilaktip ed dilin-pangusisa ed saray motibo tan pilalek na puso tayo. Intuloy ni na apostol: “Talosan yo no anto so linawa na Katawan.” (Efeso 5:10, 17) Kanian, anto so makapaliket ed si Jehova? Inmebat so proverbio na Biblia: “Say kakabatan sikato so manuna a bengatla;  kanian gamoran mo so kakabatan; on, ed simoon a panangamor mo gamoran mo so pakatalos. Sikato so paatageyen mo, et sikato ipatagey to ka.” (Uliran 4:7, 8) Panliketan nen Jehova so toon mangagamor tan manusumpal ed maridios a kakabatan. (Uliran 23:15) Agbalot nasamsam odino naderal so karakpan na ontan a kakabatan. Diad tua, magmaliw itan a salimbeng tan proteksion ‘manlapud dalan a mauges tan manlapud saramay mansasalita na makapuy a bengatla.’​—Uliran 2:10-15.

Agaylan makabat sirin so panresisti ed antokaman a tendensian panleglemew ed espiritual iran bengatla! Kaukolan tayon bayuboan so misalsalamat ya awawey ed saray salita nen Jehova ontan met ed say maabig a takot ed sikato. (Uliran 23:17, 18) Anggaman nagamoran itan a kiling na kanonotan ed anggan anton panaon ed bilay, sankaabigan lay pangiletneg ed sayan maabig a panuliranan tan pangipaslep ed saray prinsipyo na Biblia ed personalidad tayo legay inkatobonbalo. “Nonoten mo met so Manamalsam dia ed saray agew na inkaugaw mo,” so inkuan nen makabat ya Arin Solomon.​—Eclesiastes 12:1.

Say sankaimportantian a paraan a nabayuboan so panamabli ed si Jehova et diad personal a pampikasi ed sikato ed agew-agew. Binidbir nen David so kaimportantian na pangipiya ed si Jehova, lapud inyey-ey to: “Dengel mo so pikakasik, O Jehova, tan talineng mo so tagleey ko, aleg komon ya andi-esel mo ed saray lualuak.” (Salmo 39:12) Kasin say maapit a siglaotan tayo ed Dios so no maminsan et manenyeg ed emosyon tayo a makalua itayo ni ingen? On, no mabetbet itayon mitalosan ed si Jehova nipaakar ed saray bengatlan walad puso tayo tan mandalepdep ed Salita to, sikatoy onapit ed sikatayo.​—Santiago 4:8.

Aralen so Katutulok

Si Moises so sakey nin toon walaan na pananisia ya amidbir ed panagmatalek to ed Dios. Singa si David, atalosan nen Moises a napnoy gulo so bilay. Kinerew to sirin ed Dios ya ipanengneng ed sikato ‘no panon so pamilang ed saray agew to pian nagamoran so puso a makabat.’ (Salmo 90:10-12, NW) Nagamoran labat so puso a makabat diad panaral tan pambilay unong ed saray ganggan tan prinsipyo nen Jehova. Kabat nen Moises iya kanian maseet ton impaslep itan a makanan katuaan ed nasyon na Israel ya impurek to ed sikara iray ganggan tan totontonen na Dios antis a kayarianen da so Insipan a Dalin. Siopaman a toon ari a pilien nen Jehova ed saginonor pian manuley ed Israel so kaukolan a sakalen to so Ganggan insan to basaen itan ed interon bilay to. Akin? Pian naaralan toy ontakot ed Dios. Lapud satan et nasubok so katutulok na ari. Manalimbeng itan ed sikato pian agto itandoroy puso to ed saray agagi to tan mamarukey met ed panaon na panarian to. (Deuteronomio 17:18-20) Naulit iyan sipan sanen inkuan nen Jehova ed anak nen David a Solomon: “No manakar ka dia ed saray dalan mo, ya unoren mo so saray panontonan ko tan saray ganggan ko singa impanakar nen amam a David, diad ontan parukeyen ko so saray agew mo.”​—1 Arari 3:10-14.

Seryoson bengatla so katutulok ed Dios. No leglemewen tayo so pigaran aspekto na saray kakaukolanen tan ganggan nen Jehova, sankaimano to itan ya awawey. (Uliran 15:3) Say pikabat ed saya so mamakiwas ed sikatayon pansiansiaen so pirmin pangigalang ed amin a panangiwanwan nen Jehova, anggaman aliwan lanang a mainomay so panggawa’d satan. Mamapasya si Satanas ya “onsabat ed basbas tayo” sano magunaet tayon tuloken iray bilin tan ganggan na Dios.​—1 Tesalonica 2:18, NW.

Nagkalautlan importante so itulok ed Makasulatan a simbawa a mantitipon ed panagdayew tan panlilimog. (Deuteronomio 31:12, 13; Hebreos 10:24, 25) Kanian itepet tayo pa’d  inkasikatayo: ‘Kasin determinado tan maseet kon gawaen so talagan makana?’ No paulyan tayoy panlilimog tan instruksion diad Makristiano iran miting lapu labat ed panseguro ed pinansyal a pamaakaran, onkapuy so siglaotan tayo ed si Jehova. Insulat nen apostol Pablo: “Nabulos kayo komon a manlapu ed aro na pilak, panliketan yo so bengatla a wala ed sikayo: ta imbaga [nen Jehova]: Agtaka naani taynan, tan agtaka naani ikaindan.” (Hebreos 13:5) Say mabulos a katutulok ed saray ganggan nen Jehova so mangipatnag na nagnap a talek ya asikasoen to itayo.

Inaral nen Jesus so katutulok kanian agunggonaan. Ontan itayo met. (Hebreos 5:8) No lalo tayon bayuboan so katutulok, mas mainomay so ontulok, anggan ed angkelag iran bengatla. Tua, lapud katooran tayo et nasungdoan tayoy makapaingongot tan anggan say maramsak a panagtrato na arum. Nagkalalo lan onia dia ed pantratrabahoan, diad eskuelaan, odino diad nanduruman relihyon a sankaabungan. Balet, naligliwa tayo ed say nideklara ed saray Israelita a no ‘aroen da si Jehova diad italineng ed boses to tan diad ipeket ed sikato, sikatoy bilay da tan kinarukey na saray agew da.’ (Deuteronomio 30:20) Ontan met so insipan ed sikatayo.

Usaren a Makabat so Panaon

Say makabat a pangusar ed panaon tayo so ontulong met ed sikatayo pian nagawaan a makana iray agew tayo ed si Jehova. Aliwan singa say kuarta a nisimpen, say panaon so nepeg ya usaren pian agnadarak. Naandi la so kada oras a linmabas. Lapud lawas a dakel so gawaen nen say nagawaan tayo, uusaren tayo kasi so panaon tayo unong ed saray gagala tayo ed bilay? Say manunan gagala na amin a Kristiano et say regular a pibiang ed panangipulong ed Panarian tan panaggaway-babangatan.​—Mateo 24:14; 28:19, 20.

Nausar tayo labat a makabat so panaon tayo no naamtaan tayo la so kablian  na satan. Matukoy so impamaseseg ed sikatayo na Efeso 5:16 a ‘saliwen so pankanawnawan panaon,’ ya ipapatnag na saya so pangipireg ed agtanton importante iran bengatla. Kabaliksan toy pamawas ed saray madarak na panaon ya aktibidades. Nakesawan itayo lapud alabas a pambantay ed telebisyon odino pannengneng ed Internet, pambasa ed agmakanan sekular a materyal, odino alablabas a panliliket tan panligliwaan. Niarum ni, say alabas a pantipon ed materyal iran kayarian so mangupot ed kaukolan a panaon pian nagamoran so puso a makabat.

Inkuan na saray pabor ed maalwar a panangigana ed panaon: “Imposible so maong a pakausar ed panaon yo no anggapoy inletneg a malinew tan espisipiko iran kalat.” Angisuheri ira na limaran panontonan ed pangiletneg na saray kalat: espisipiko, natantya, nadampot, realistiko, tan nigeter.

Sakey a makanan kalat et say pamaaligwas ed panagbasa tayo ed Biblia. Say unonan kundang et gawaen ya espisipiko so kalat tayo, a basaen so interon Biblia. Say ontumbok a kundang et pian natantya so kalat tayo. No gawaen tayo iya naimano so iyaaligwas tayo. Saray kalat so mamaseseg ed sikatayon isekar so inkasikatayo pian ombulaslas. Saratan met so nadampot tan realistiko. Ikonsidera iray abilidad, dunong, tan say walan panaon tayo. Parad arum, kaukolay malaem a panaon pian nadampot so kalat. Kaunoran, kaukolan ya igeter so kalat tayo. Say pangigeter na petsa pian sumpaley sakey a bengatla so lalon mamakiwas ed sikatayo a gawaen itan.

Amin a membro na sankagloboan a pamilyay Bethel, a manlilingkor ed sankamundoan a hedkuarter na Tastasi nen Jehova odino diad sakey ed saray sanga to ed sankamundoan, so walaay espisipiko a kalat a basaen so interon Biblia leleg na unonan taon da ed Bethel. Amoria ran say makagunggonan panagbasa na Biblia so mamabulaslas ed espiritualidad da tan ed maap-apit a siglaotan da ed si Jehova, a mangibabangat ed sikara pian nagunggonaan ira. (Isaias 48:17) Kasin nagawaan tayo met a kalat so regular a panagbasa na Biblia?

Saray Gunggona ed Panggawan Makana ed Saray Agew Tayo

Say panangiyuna ed espiritual iran bengatla so mansumpal ed dakel a bendisyon. Singa bilang, lalon makapaliket itan lapud walay agawaan tan gagala ed bilay. Say maparanay a pitatalosan ed si Jehova diad masimoon a pikakasi et napaapit itayo ed sikato. Ipanengneng na mismon panagpikasi tayo so talek tayo ed sikato. Say inagew-agew a panagbasa ed Biblia tan saray nibase’d Biblia a palapagan ya intarya na “matoor tan makabat ya aripen” so mangipatnag na inkamabulos tayon ontalineng ed Dios a singa sikatoy mitotongtong ed sikatayo. (Mateo 24:45-47) Ontulong iya ed sikatayon gamoran so puso na kakabatan ta pian duga iray desisyon tan pilien tayo ed bilay.​—Salmo 1:1-3.

Panliketan tayo so itulok ed saray ganggan nen Jehova, ta ag-ambelat so panggawa ed satan. (1 Juan 5:3) Sano gawaen tayon makana ed si Jehova so kada agew tayo, napaelet tayo so siglaotan tayo ed sikato. Magmaliw itayo met a tuan espiritual a suporta ed saray kapara tayon Kristiano. Napaliket si Jehova a Dios ed saratan a kiwas. (Uliran 27:11) Tan anggapo lay babaleg nin tumang nen say panggayaga ed abobon nen Jehova natan tan ed andi-anggaan!

[Litrato ed pahina 21]

Seryoso so panmoria na saray Kristiano ed espiritual iran bengatla

[Saray litrato ed pahina 22]

Kasin uusaren yon makabat so panaon yo?

[Litrato ed pahina 23]

Napaelet tayoy siglaotan tayo ed si Jehova no gawaen tayon makana so kada agew tayo ed sikato