“Dago Kayo’d Siak, . . . et Ikdan ta Kayoy Pampainawa”

‘Pastolan Yoy Pulok na Dios’

“Naynay kayon onderengel tan manguusar na saray salitan walad Biblia a kapapasesegan mi.”​—Pamela.

“Salamat ed amin a ginawa yo ed sikami. Baleg so epekto na satan ed sikami.”​—Robert.

APAKIWAS si Pamela tan Robert ya isulat irayan balikas na panamabli ra ed Kristianon mamatatken diad saray kongregasyon da. Misalsalamat met so pigara ed saray lingkor na Dios ed sankamundoan lapud tuloytuloy a panusuporta tan pangaasikaso na saramay ‘mamapastol ed pulok na Dios.’ (1 Pedro 5:2) On, pisalamatan na saray totoo nen Jehova so dakel a bengatlan gagawaen parad sikara na mamatatken tan say paraan na panggagawa ra ed saratan.

‘Lawas a Daakan so Kimey’

Dakel so responsabilidad a nimatalek ed Kristianon mamatatken. (Lucas 12:48) Manpaparaan iray paliwawa parad saray miting ed kongregasyon tan mapubliko ran ipupulong so maong a balita na Panarian na Dios. Laktipen na saray kimey da so pampastol ed saray kapananisiaan. Ilulugar na mamatatken so panaon da parad saramay mankaukolay nikaduman imano​—saray maedad la tan arum ni​—bangta agda met papaulyan so espiritual tan materyal a pankaabigan na dilin pamilya ra. (Job 29: 12-15; 1 Timoteo 3:4, 5; 5:8) Ontutulong so arum a mamatatken ed panagpaalagey na saray Kingdom Hall. Manseserbi so arum ed saray Hospital Liaison Committe odino membro na saray Patient Visitation Group. Tan dakel ed sikara so manboboluntaryo diad saray asamblea tan kombension. On, saray mamatatken et ‘daakan so kimey da ed Katawan.’ (1 Corinto 15:58) Talagan pinabpabli iratan a makukulin mamatatken na saramay nimatalek ed sikaran asikasoen da!​—1 Tesalonica 5:12, 13.

Lapuan na panamaseseg iramay mamatatken a maparanay ya ompapasyar ed kapara ran Kristiano diad abung odino inerman pian pabiskegen ira ed espiritual. “No ag’ak maaron sinuportaan tan pinaseseg na mamatatken,” inkuan nen Thomas, a binmaleg ed abung ya andiay ama, “ompan ag’ak la manlilingkor ed si Jehova natan bilang sigpot-panaon a ministro.” Bidbiren na dakel a tobonbalo a binmaleg ed mansusulon-ateng iran pamilya a lapud impangasikaso ed sikara na mamatatken et apaaligwas da so mismon siglaotan da ed Dios.

Pabpablien met na saray maedad la ed kongregasyon so panagpastol ed sikara. Kayarin binisita na duaran mamatatken so misionaryon sanasawa a masulok  lan 80 so edad da, insulat da: “Ibalikas mi so panamabli mi ed makapaliket ya impasyar yo. Kataynan yo, binasa mi lamet iray tekston siningbat yo ed sikami. Agmin balot nalingwanan iray balikas na panamaseseg yo.” Oniay insulat na 70-años lan balo ed mamatatken: “Abayag lan ipipikasik a tulongan ak nen Jehova, et imbaki to kayon dua dia ed abung ko. Say impasyar yo et panamendisyon nen Jehova!” Kasin diad agano ni et agunggonaan kayo lapud impasyar na mamatatken ed kongregasyon yo? Maseguron pablien tayon amin iray sagpot da a pastolan so pulok a nimatalek ed sikara!

Mamatatken a Mangaalig ed Dios tan ed Kristo

Si Jehova so maaron Pastol. (Salmo 23:1-4; Jeremias 31:10; 1 Pedro 2:25) Si Jesu-Kristo met so matalonggaring a Pastol a mangaasikaso ed espiritual iran pankaukolan tayo. Diad tua et sikatoy atawag a “maong a pastol,” ‘baleg a pastol,’ tan “manunan pastol.” (Juan 10:11; Hebreos 13:20; 1 Pedro 5:4) Panoy impideneng nen Jesus ed saramay malabay a magmaliw a babangatan to? Maligsa to ran binagaan: “Dago kayo’d siak, amin yon nasasagpotan tan nabebelatan, et ikdan ta kayoy pampainawa.”​—Mateo 11:28.

Pankikimeyan met natan na mamatatken so pagmaliw a pakarepreskoan tan pakasalimbengan na pulok. Saratan a lalaki so “magmaliw naani a singa sakey ya amotan na dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.” (Isaias 32:2) Saratan a mapangasin mananalimbeng so makaparepresko, rerespetoen na pulok, tan makakagamor na abobon na Dios.​—Filipos 2:29; 1 Timoteo 5:17.

Makanan Suporta na Kaasawaan Da

Misalsalamat iray totoo na Dios ed Kristianon mamatatken tan ed maaron suporta na kaasawaan na sarayan lalaki. Say pagmaliw a masuporta et mankaukolay pansakripisyo na saratan a bibii. No maminsan et natilak ira’d abung leleg ya aasikasoen na kaasawaan da iray pamaakaran ed kongregasyon odino manpapastol. No arum ni et iguntang daray plano ra lapud biglan onlesan problema ed kongregasyon. Inkuan nen Michelle: “Anggan ontan, sano naiimanok ya okupado so asawak a manpaparaan parad saray miting odino manpapastol, nononoten ko a say gagawaen to et kimey nen Jehova, kanian panggugunaetan koy pagmaliw a masuporta.”

Inkuan nen Cheryl, ya asawa met na matatken: “Amtak a saray agagin lalaki tan bibii ed kongregasyon et kaukolan day makapitongtong ed mamatatken, tan labay kon ipalikna ed sikara a naasinggeran day asawak ed panaon a sikatoy nakaukolan da.” Mabulos a mansasakripisyo iray masuportan bibii, singa si Michelle tan Cheryl, pian naasikaso na kaasawaan da so pulok na Dios. Papablien so kaasawaan na mamatatken ed masuportan awawey da.

Ingen, agmet ibabaliwala na okupadon matatken iray espiritual tan arum nin pankaukolan na asawa tan ananak to. Nepeg a say de-asawan matatken et “anggapo so kabalawan to, asawa na saksakey a bii, a walara so anak to a mananisia, ya ag-ira nidalem ed kaugsan, tan ag-ira matulay ed ganggan.” (Tito 1:6) Nepeg ton asikasoen so pamilya to diad maridios a paraan a kakaukolanen na Biblia parad saray Kristianon manangasikaso.​—1 Timoteo 3:1-7.

Parad okupadon matatken, makanakana so masuportan asawa! Ontan so liknaan na makonsideran mamatatken. Singa itan ed inkuan na Biblia: “Anggan siopa a makaromog na [“maong ya,” NW] asawa makaromog na maong a bengatla.” (Uliran 18:22) Diad salita tan gawa et impapuson papablien na saratan a mamatatken so kaasawaan da. Nilikud ed masimoon a pikakasi tan makapaliket a panagaral da, ipapanaon met na sarayan sanasawan Kristiano so panliket, singa say pampasyar diad baybay, diad kakiewan, odino diad parki. On, makapanliket iray mamatatken diad maaron pangasikaso ra ed kaasawaan da.​—1 Pedro 3:7.

Saray mamatatken a mabulos a manpastol ed pulok na Dios so lapuan na espiritual a pakarepreskoan na totoo nen Jehova. Tuan sikaray “langkap a lalaki,” a bendisyon ed kongregasyon!​—Efeso 4:8, 11-13, NW.