Saray Pasen a Panagdayewan​—Kasin Kaukolan Tayo Iratan?

‘Pinusek na nilibon pilgrim a nanlalapud nanduruman parte na bansa ya akakawes na makolor, grupo-grupon taga-India ya onsasayaw na sakbay-Kastila iran sayaw a totogtogan na saray tambol, tan saray debotadon akatalimukor a miseseksekan a mamapaarap ed altar, so lolooban tan saray karsada diad liber na basilica.’

ONTAN so impaneskribe na peryodikon El Economista ed pinasyan totoo nen Disyembre 2001. Diad saman et onliligada’d taloran milyon a totoo so binmisita ed basilica na Mexico City pian ipatnag so pananisia ra ed Birhen na Guadalupe. Arum a simbaan a singa say St. Peter’s Basilica diad Roma, so labalabay met a pasyaren na dakerakel a bisita.

Saray relihyoson paalagey so espisyal a pasen parad dakel a manpilalek a mandayew ed Dios. “Parad siak, say simbaan so pasen a napaapit ak ed Dios,” inkuan nen Maria a taga-Brazil. “Satan so masanto a pasen. Panisiaan kon nalinisan so kamarerwa diad iyakar ed simbaan tan ipasen kon kasalanan so agpi-Misa tan agpankompisar kada Simba.” Oniay inkuan nen Consuelo a taga-Mexico: “Sasagyaten na simbaan so liknaan ko; papablien kon maong itan. Sano wadman ak, say pakaliknak et wala ak ed tawen.”

Anggaman parad arum et importantin tuloy iray simbaan, arum so manduaruwa ed inkamakana na saray pasen a panagdayewan. Oniay inkuan nen Peter Sibert, sakey a Katolikon pari diad Inglatera, sanen tutukoyen to so dagdaiset lan mimimisa: “Pipilien [na totoo] iray kabiangan na relihyon a labay da. Dakel ed saray maedad lan totoo so Katoliko tan manbibilay ira unong ed pananisia ra​—balet diad saray kalangweran et moriaen dan ag-ira obligado.” Inkuan na Daily Telegraph na London nen Nobyembre 20, 1998: “Manlapu la nen 1979 et onliligada ed 1,500 a simbaan so insara ed Inglatera  no ikompara ed 495 a simbaan a nilukasan tan 150 ya inapiger.”

Nen 1997 et inreport na peryodiko a Süddeutsche Zeitung na Munich, Alemanya: “Saray simbaan et ginawa lan sinean tan apartment: Saray mananisia so agla mimimisa, sananey lay panguusaran ed saray pasen a panagdayewan. . . . Say kaslakan lan nagagawa ed Netherlands odino ed Inglatera et nagagawa met la ed Alemanya.” Inyarum na satan: “Naromog so manga 30 odino 40 a makatantandan impangilako ed saray simbaan diad Alemanya ed loob na pigaran taon ed apalabas.”

Kasin nakaukolan ni iray relihyoson paalagey pian dayewen so Dios? Kasin walay piulibayan na saray basilica tan malabor iran simbaan diad Biblia? Antoran klasen paalagey so insiglaot ed panagdayew ed tua tan mabilay a Dios? Anto so naaralan tayo ed saratan a paalagey nipaakar ed pankaukolan ed saray pasen a panagdayewan tan nipaakar ed no anto so nepeg a nagagawa ditan?