Tepetepet Manlapud Saray Managbasa

Kasin naynay ya obligadon tooren iray samba ed Dios?

Diad Biblia, say samba et sakey a masimoon a sipan ed Dios a manggawa, mangibagat, onggapo ed nikaduman serbisyo odino kipapasen, odino ompaliis ed pigaran bengatlan agmet sumlang ed ganggan. Naromog ed Biblia iray samban walaay kondisyon, salanti, tooren so insamba no gawaen nin unona na Dios so sakey a bengatla. Alimbawa, si Ana ya ina nen propetan Samuel, “so angisipan na sakey a sipan [o samba], tan inkuan to, O Jehova na saray ehersito, no . . . agmo lingwanan so aripen mo a bii, noag ingen mangiter ka ed aripen mo a bii na sakey ya anak a laki, sirin sikato so iter ko ed Jehova ed saray amin ya agew na bilay to tan anggapo so pangiskis ya onlabas ed ulo to.” (1 Samuel 1:11) Deneskribe met na Biblia iray samba bilang boluntaryo. Anggad anton laknab a nepeg a sumpalen iray samba ed Dios?

“Sano mangisipan ka na sakey a sipan ed Dios,” kuan nen Arin Solomon na Israel nensaman, “agmo ilaron a sumpalen.” Inkuan to ni: “Sumpalen mo so sipan mo. Magmaong ya agka mangisipan, nen say mangisipan ka tan agmo sumpalen.” (Eclesiastes 5:4, 5) Oniay ibabaga na Ganggan ya inter ed Israel panamegley nen Moises: “Bangno mangisipan ka na sakey a sipan ed kinen Jehova a Dios mo, agmo tatantanen a sumpalen: ta si Jehova a Dios mo pasumpal to naani ed sika; ta satan pankasalananan mo naani.” (Deuteronomio 23:21) Malinew a say pansamba ed Dios et seryoson bengatla. Nepeg a gawaen itan a walaan na dugan motibo, tan nepeg a samay manggagawa ed satan so agmanduaruwa ed abilidad ton manumpal ed antokaman ya insamba to. Ta no andi et maong lay agla nansamba. Balet, sano ayari la itan, obligado kasin tooren so amin a samba?

Panon to no kaukolanen na samba a gawaen na sakey so bengatlan diad kaunoran et naamtaan ton agmitunosan ed linawa na Dios? Bilbilang ta satan a samba et mangisiglaot na imoralidad ed tuan panagdayew? (Deuteronomio 23:18) Mapatnag, ag-obligadon tooren itan. Niarum ni, diad Mosaikon Ganggan et nayarin say samba na sakey a bii so babawien na ama odino masiken to.​—Numeros 30:3-15.

Konsideraen so kaso na toon nansamba ed Dios ya agmangasawa balet ta sengeg na pakaproblemaan to ed kaunoran. Lapud samba to et sikatoy nidunget ed situasyon a no sumpalen to itan et ompan sikatoy makasumlang ed estandarte na Dios nipaakar ed moralidad. Nepeg to ni kasin panggunaetan a sumpalen so samba to? Agta pankaabigan to no salimbengan to so inkasikato sumpad pankasalanan ed imoralidad diad agpanumpal ed sinambaan to tan imbes et masimoon ya onkerew na panangasi tan panamerdona na Dios? Sikato labat so makapandesisyon ed satan a pamaakaran. Anggapoy siopaman a too a makapandesisyon parad sikato.

Panon to no say sakey et nansamba insan to amoria ed saginonor a nanapura ed impansamba to? Nepeg to ni kasin sumpalen so samba to? Aliwan mainomay parad si Jefte a tooren so sinambaan to ed Dios, balet ginawa to itan unong ya ididikta na konsiensia to. (Uko-ukom 11:30-40) Say agpanumpal na too ed sinambaan to so ‘mamasanok’ ed Dios tan maneral ed ayari lan agawaan na too. (Eclesiastes 5:6) Say panleglemew a panumpal ed sinambaan so manresulta ed agpanangabobon na Dios.

Inkuan nen Jesu-Kristo: “Onia so panagsalita yo, On, on; Andi, andi; et say antokaman a nagkalalo nen saraya manlapud mauges.” (Mateo 5:37) Nepeg ya aglambengat interesado so sakey a Kristiano ed panumpal ed saray sinambaan to ed Dios noagta nepeg to met a paneknekan ya amin ya imbalikas to so napanmatalkan​—na Dios tan totoo. Panon to no sengeg na pakaproblemaan to so impipakna to ed sakey a too ya ompatnag a maabig ed gapo balet kayarin inusisan maong et apatnagan a kakulangkulangan? Agto nepeg a leglemewen so ontan iran bengatla. Balet lapu ed masimoon a pantongtong, nayarin mandesisyon imay akipaknaan to a sikatoy agto la obligaen.​—Salmo 15:4; Uliran 6:2, 3.

No nipaakar ed saray samba tan arum niran bengatla, anto so nepeg a manunan paninteresan tayo? Lawas tayon panggunaetan a pansiansiaen so maabig a relasyon ed si Jehova a Dios.