Diad Pananganan na Kapitan
Diad Pananganan na Kapitan
SARAY makapainteres a totoo, mananam a tagano, tan magayagan pantotongtong so makapaliket diad pananganan na kapitan ed barko. Balet say pantotongtong diad pananganan nen Kapitan Robert G. Smith, na White Star Line, so angiparungtal na espiritual a bankete.—Isaias 25:6.
Nen 1894, diad edad a 24, si Robert so nagmaliw a kapitan na panaglayag a barko a Kinclune of Dundee diad sankaunaan a pambaroy to ed interon globo. Diad saginonor sikatoy kapitan ed saray barko na White Star, a singa say Cedric, Cevic, tan say Runic. * Legan ton bebeltangen so Atlantiko manlapud New York a mamapaarap ed Liverpool, Inglatera, diad panamegley na sakey ed sarayan barko, sinangkaili nen Robert si Charles Taze Russell diad pananganan na kapitan. Say impitongtong ed si Russell so akasagyatan nen Robert ed Biblia, tan pian makaaral ni na dakel, maliket ton inawat ed si Russell iray kopya na Studies in the Scriptures.
Nantultuloy ya akisulatan si Russell, tan bilang resulta, binmulaslas so interes nen Robert ed Biblia. Innabang nen Robert ed akulaw to so balon akabatan to. Ag-abayag et nagmaliw iran aktibon Estudyante na Biblia, a tawag ed saray Tastasi nen Jehova nensaman. Diad saginonor et apribilehyoan si Robert a mangiter na saray paliwawa a base ed Biblia. Alimbawa, diad Brisbane, Australia et impaliwawa to so “Say Balsamo na Gilead” tan impanengneng to no panon a say Salita na Dios so walaan na mensahe a “solusyon ed amin a kairapan ed dalin.” Diad Inglatera, say akulaw to tan saray ugugaw nin anak da so tinmulong ed pangipresentay “Photo-Drama of Creation,” a patotogtogen da iray nirekord a komentaryo nen Russell legan ya ipapalabas iray slide.
Impatawir nen Robert ed ananak to so naawat ton katuaan na Panarian. Natan, kalabas na limaran kailalakan, 18 a membro na pamilya to so okupadon manginanabang na maong a balita ed arum, a misalsalamat ed nitaryan espiritual a tagano diad pananganan na kapitan.
Diad panamegley na saray publikasyon tan say makaibangat ed Biblia a kimey da, saray Tastasi nen Jehova so ontutulong ed totoo diad sankamundoan pian makaaral ed mensahe na Biblia ya akasagyat ed interes nen Kapitan Smith. Nayarian mo met a naamtaan no anto so makapainteres a maong ed pananganan na kapitan.
[Paimano ed Leksab]
^ par. 3 Say mipadpara a barko, say Titanic, so impangulo nen Kapitan E. J. Smith (agto kanayon) ed sankaunaan ya impanbaroy ya akadesyangan na satan.
[Litrato ed pahina 8]
Robert G. Smith
[Litrato ed pahina 8]
Charles T. Russell