Propesiya nen Isaias​—Liwawa Parad Amin a Katooan II

Kapitulo Nuebe

Ibabangat Itayo nen Jehova Parad Pankaabigan Tayo

Isaias 48:1-22

1. Panon so ikikiwas na saray makabat a totoo ed saray salita nen Jehova?

 SANO mansalita si Jehova, saramay makabat so ontalineng tekep na pirmin panagrespeto tan onkiwas ira unong ed saray salita to. Amin ya ibabaga nen Jehova et pakagunggonaan tayo, tan sikato so interesadon tuloy ed pankaabigan tayo. Alimbawa, agaylan makapaligsay-puson nodnonoten so paraan na impitongtong nen Jehova ed akisipanan a totoo to nensaman: “O no komon ta dinengel mo so saray bilin ko!” (Isaias 48:18) Say apaneknekan lan kablian na saray bangat na Dios so nepeg a mamakiwas ed sikatayo ya ontalineng ed sikato tan ontumbok ed panangigiya to. Say rekord na asumpal lan propesiya so mangekal ed antokaman a panduaruwa ed determinadon panumpal nen Jehova ed saray sipan to.

2. Parad siopa a nikurit iray salita na Isaias 48, tan siopa nira so nagunggonaan ed saratan?

² Saray salita ed koma-48 a kapitulo na libro nen Isaias so mapatnag a nisulat nisesengeg ed saray Judio a nadestiero ed Babilonia. Niarum ni, lugan na sarayan salita so mensahe ya agnibaliwala na saray Kristiano natan. Diad Isaias kapitulo 47, impasakbay na Biblia so kageba na Babilonia. Natan et deneskribe nen Jehova so getma to parad saray adestieron Judio ed satan a syudad. Naermenan si Jehova ed pansimpisimpitan na pinili ton totoo tan ed benger lan agda panisia ed saray sipan to. Balet, labay to iran ibangat parad pankaabigan da. Amta to la so nipaakar ed panaon na panaggogol a mangitonton ed kipawil na matoor a nakdaan ed binalegan dan dalin.

3. Anto so makapuy ed panagdayew na Juda?

³ Agaylay inkasipa na saray totoo nen Jehova manlapud puron panagdayew! Seryoso iray manangilukas a salita nen Isaias: “Denglen yo so saya, O abung nen Jacob, ya inngaran na Israel, tan nanlapu ed saray danum na Juda; sikayo a mansamba ed ngaran nen Jehova, tan mangipanonot ed Dios na Israel, balet aliwan dia ed katuaan tan aliwa met ed inkatunong. (Ta tawagen da so laman da a totoo ra ed santo a syudad, tan onligen ira ed Dios na Israel; Jehova na saray ehersito so ngaran to).” (Isaias 48:1, 2) Agaylan pansimpisipitan! Say ‘pansamba ed ngaran nen Jehova’ so malinew a panguusar lambengat ed ngaran na Dios diad pormalistikon paraan. (Sofonias 1:5) Sakbay na inkadestiero ra ed Babilonia, saray Judio so nandayew ed si Jehova diad ‘masanto a syudad,’ say Jerusalem. Balet aliwan masimoon so panagdayew da. Arawrawi so kapusoan da ed Dios, tan saray gawa na panagdayew da so ‘aliwan diad katuaan tan aliwan diad inkatunong.’ Andian ira na pananisia a singa saray patriarka.​—Malaquias 3:7.

4. Anton nengneng na panagdayew so makapaliket ed si Jehova?

⁴ Ipapanonot ed sikatayo na saray salita nen Jehova a say panagdayew et nepeg ya aliwan rotina labat. Nepeg a masimoon itan. Say paspasaray a panaglingkor​—a nayarin gagawaen labat pian paliketen odino pandinayewen so arum​—so agpakapatnagan na “saray gawa na maridios a debosyon.” (2 Pedro 3:11, NW) Say pangikuan na sakey a too a sikatoy Kristiano et agmankabaliksan ya aabobonan lay Dios so panagdayew to. (2 Timoteo 3:5) Makana so pamidbir ed kiwawala nen Jehova, balet gapoan lambengat itan. Kaliktan nen Jehova so panagdayew ya interon-kamarerwa tan apakiwas unong ed aralem a panangaro tan apresasyon.​—Colosas 3:23.

Mangipapasakbay na Balo Iran Bengatla

5. Anto so pigara ed “saray inmuna a bengatla” ya impasakbay nen Jehova?

⁵ Nayarin nakaukolan a tariwaen na saraman a Judio ed Babilonia iray agawgawa. Kanian, sikaray pinanonotan lamet nen Jehova a sikato so Dios na tuan propesiya: “Impaliwawak so saray inmuna a bengatla a nanlapu nen gapo; on, pinmaway ira ed sangik, tan impatnag ko ra: bigla a ginawak ira, et agawa ra.” (Isaias 48:3) “Saray inmuna a bengatla” et saramay sinumpal la na Dios, a singa say  impangibulos to ed saray Israelita manlapud Ehipto tan say impangipatawir to ed sikara ed Insipan a Dalin. (Genesis 13:14, 15; 15:13, 14) Saratan a pasakbay so imbalikas na Dios; nanlapu iratan ed Dios. Impaamta na Dios ed katooan iray ganggan to, tan say nadngel da so nepeg a mamakiwas ed sikara a magmaliw a matulok. (Deuteronomio 28:15) Sikatoy kinmiwas a tampol pian gawaen so impasakbay to. Say katuaan a si Jehova so Makapanyarin-amin so mangipaseguro a nasumpal so gagala to.​—Josue 21:45; 23:14.

6. Diad anton kalaknab a saray Judio so nagmaliw a “benger tan masumpa”?

⁶ Saray totoo nen Jehova so nagmaliw a “benger tan masumpa.” (Salmo 78:8) Sikato so prangkan angibaga ed sikara: “Anawet ka, tan say tenger mo ulat a balatyang, tan say moling mo gansa.” (Isaias 48:4) Singa saray balatyang, mairap a pikloen iray Judio​—sikaray matunganga. Sakey itan a rason no akin ya imparungtal nen Jehova iray bengatla sakbay a nagawa iratan. Ta no andi, ibaga na totoo to ed saray bengatlan ginawa nen Jehova: “Say pidiosan ko ginawa to ra, tan say imbolik a talintao, tan say imbobo a talintao a kien ko imbilin to ra.” (Isaias 48:5) Kasin walay antokaman ya epekto na imbaga nen Jehova ed saray agmatoor a Judio? Oniay imbaga na Dios ed sikara: “Sika sikato so nadngel mo; pakanengnengen yo ya amin so saya; et sikayo, agyo ta ipaliwawa? Impanengneng ko ed sika so saray balobalo a bengatla a manlapu ed saya a panaon, a sikara so saray niyamot a bengatla, ya agmo ra naamtaan. Apalsa ra natan, tan aliwa a nanlapu nen gapo; et sanen arapen na saya ya agew agmo ra nadngelan; ompan lamang ikuan mo, Nia, amtak ira la nensaman.”​—Isaias 48:6, 7.

7. Anto so nepeg a bidbiren na saray adestieron Judio, tan anto so nailaloan da?

⁷ Antis ni et inkurit la nen Isaias so pasakbay nipaakar ed kageba na Babilonia. Sanen adestiero ira ed Babilonia, saray Judio so mapropetikon niganggan a manumameng ed kasumpalan na pasakbay. Niburi ra kasi a si Jehova so Dios na asumpal a propesiya? Tan lapud anengneng tan nadngel la na saray manaayam ed Juda a si Jehova so Dios na katuaan, agta nepeg da met ya iyabawag iyan katuaan ed arum? Say niparungtal a salita nen Jehova so angipasakbay ed balo iran bengatla a nagawa ni, a singa say pangonkesta nen Ciro ed Babilonia tan say kibulos na saray Judio. (Isaias 48:14-16) Satan a makapakigtot iran ebento so agnailaloan a nagawa. Anggapo so makayarin mangamta ed saratan diad pangonsidera labat ed peles iran kipapasen ed mundo. Nagawa iratan a singano anggapoy makasengeg. Siopa so mamalesa ed sarayan ebento? Lapud saratan so impasakbay la nen Jehova manga 200 a taon ed asasakbay, mapatpatnag so ebat.

8. Antoran balon bengatla so iilaloan na saray Kristiano natan, tan akin a walaan ira na sigpot a panagmatalek ed mapropetikon salita nen Jehova?

⁸ Niarum ni, sumpalen nen Jehova so salita to unong ed panag-orasan to. Saray asumpal lan propesiya so mamaneknek ed inka-Dios to, aliwa lambengat ed saray Judio nensaman noagta ontan met ed saray Kristiano natan. Say rekord na dakerakel a propesiya ya asumpal nensaman​—“saray inmuna a bengatla”​—so panamaseguro a nagawa iray balon bengatla ya insipan nen Jehova, salanti, say onsabin ‘baleg a kairapan,’ say kiliktar ed satan na “baleg ya ulop,” say “balon mundo,” tan dakel ni. (Apocalipsis 7:9, 14, 15; 21:4, 5; 2 Pedro 3:13) Satan a panamaseguro so mamakiwas ed saray matuan-impanpuso natan a maseseg a mangitongtong nipaakar ed sikato. Mipara so liknaan da ed salmista, ya angikuan: “Impulong ko so maligan balbalita na inkatunong ed pegley na balbaleg a muyongan; nia, agko pokpokan so saray bibil ko.”​—Salmo 40:9.

Mandadangka si Jehova

9. Panon a say nasyon na Israel so nagmaliw a “matunganga a nanlapu ed eges”?

⁹ Say agpanisia na saray Judio ed saray propesiya nen Jehova so angamper ed sikara ya ontalineng ed saray pasakbay to. Satan so rason no akin ya oniay inkuanto ni ed sikara: “On, agmo ra nadngelan; on, agmo met ira naamtaan; on, nanlapu nen inmuna say layag mo ag-alukasan nensaman: ta amtak nensaman ya agawa a liputan a tuloy, tan ningaran ka a sakey a matunganga a nanlapu ed eges.” (Isaias 48:8) Aglabay a dengelen na Juda iray maabig a balita nen Jehova. (Isaias 29:10) Say paraan na inkiwas na saray akisipanan a totoo na Dios so mangipanengneng a say nasyon so “matunganga a nanlapu ed eges.” Manlapu ed inkaporma tan ed interon awaran na satan, say nasyon na Israel so awalaay rekord na panagrebeldi. Say pakakalukso tan panagliput so kasalanan a niyugali la na totoo, ya aliwan sagpaminsan labat iran kasalanan.​—Salmo 95:10; Malaquias 2:11.

10. Akin a popokpokan nen Jehova so inkasikato?

¹⁰ Anggapo la kasi so ilalo? Wala ni. Anggaman rebelyoso tan managliput so Juda, si Jehova so lawas  matua tan matoor. Makasengeg ed kagalangan na mismon matalonggaring a ngaran to, banlongan to so kiyibung na sanok to. Inkuanto: “Lapu ed ngaran ko patantanen ko so sanok ko, tan lapu ed galang ko pokpokan ko nipaakar ed sika, pian agta ka ni puteren.” (Isaias 48:9) Agaylan pandumaan! Saray totoo nen Jehova, say Israel tan Juda, so agnanmatoor ed sikato. Balet pasantosen nen Jehova so ngaran to, ya onkiwas ed paraan a mangidayew tan mangigalang ed satan. Lapud saya, agto panganggaen so pinili ton totoo.​—Joel 2:13, 14.

11. Akin ya ag-iyabuloy na Dios so sigpot a kaderal na totoo to?

¹¹ Saray maptek-impanpuson totoo ed limog na saray adestieron Judio so aliing ed panamaat na Dios tan magmaliw a determinadon ontalineng ed saray bangat to. Parad sikara et makapaseguron tuloy so onggendan a panangiyabawag: “Nia, siak ginogolan ta ka, balet aliwa a singa say pilak; siak pinili ta ka ed palbaan na kairapan. Nipaakar ed dili a kakanaan ko, nipaakar ed dili a kakanaan ko, sikato naani gawaen ko; ta panon so kamudmora na ngaran ko? Et say gayagak agko naani iter ed sananey.” (Isaias 48:10, 11) Say makapasubok iran ir-irap​—a singa ed “palbaan na kairapan”​—ya inyabuloy nen Jehova a nagawa ed totoo to so anubok tan amino ed sikara, ya angiparungtal ed no anto so walad kapusoan da. Pigara nin siglo ed asasakbay et ontan met so agawa sanen inkuan nen Moises ed inmuunan atateng da: ‘Imbasbas ka nen Jehova a Dios mo ed saray apataplo a taon ed kalawakan, pian napauyamo to ka, a suboken to ka, pian naamtaan to so wala ed pusom.’ (Deuteronomio 8:2) Anggaman ed rebelyoson awawey da, agdineral nen Jehova so nasyon ed saman a panaon, tan agto sigpot a deralen so nasyon natan. Kanian say ngaran tan kagalangan to so nitandoro. No natawtaw iray totoo to ed lima na saray taga-Babilonia, agto natoor so sipan to tan say ngaran to so namudmora. Ompatnag a say Dios na Israel so andiay-pakayari a mangiliktar ed totoo to.​—Ezequiel 20:9.

12. Panon ya agogolan iray tuan Kristiano legan na inmunan guerra mundial?

¹² Diad modernon panaon, saray totoo nen Jehova so nakaukolan met a nagogolan. Nen kasakbayan iran agew na koma-20 siglo, karaklan ed melag a grupo na saray Estudyante na Biblia so nanlingkor ed Dios lapud masimoon a pilalek dan sikatoy paliketen, balet arum so walaan na makapuy iran motibo, a singa say pilalek ya ombantog. Sakbay ya idaulo na satan a melag a grupo so sankamundoan a panangipulong na maong a balita a nipropesiya ed panaon na anggaan, nakaukolan ni a sikara so nalinisan. (Mateo 24:14) Impropesiya nen propeta Malaquias a nagawa met so ontan a panaggogol a kimey unong ed isabi nen Jehova ed templo to. (Malaquias 3:1-4) Saray salita to so asumpal nen 1918. Asagmak na tuan Kristianos so peryodo na mangapuy-apoy a subok sanen kakkaktangan na inmunan guerra mundial tan amantok itan a panagsubok diad inkipriso nen Joseph F. Rutherford, say presidente nensaman na Watch Tower Society, tan arum ed saray manunaan ya opisyal. Saraman a masimoon a Kristiano so agunggonaan manlapud proseso na panaggogol. Kayari na Guerra Mundial I et sikara so lalon determinado nen say kapiganman a manlingkor ed matalonggaring a Dios da diad antokaman a paraan ya ipatnag to.

13. Panon so inkiwas na totoo nen Jehova ed panamasegsegang diad saramay taon a nanlapu la’d inmunan guerra mundial?

¹³ Manlapu la’d saraman a panaon, saray Tastasi nen Jehova so aminpigan nidunget ed mauge-uges iran nengneng na panamasegsegang. Agda nanduaruwaan so salita na Manamalsa ra lapud satan. Imbes, inimano da iray salita nen apostol Pedro ed saray apasegsegang a Kristiano ed panaon to: ‘Agonigon kayo na saray nambabangil a katuksoan, no ontan so nakaukolan, pian say pakapamintuaan na pananisia yo, so naalmo ed dayew, gayaga tan galang yo no ompanengneng si Jesu-Kristo.’ (1 Pedro 1:6, 7) Say pirmin panamasegsegang so ag-aneral ed integridad na saray tuan Kristiano. Imbes, impatnag na satan so inka-maralus na motibo ra. Iyaarum na satan so asubok lan kalidad ed pananisia ra tan ipatnag na satan so kaaralem na debosyon tan aro ra.​—Uliran 17:3.

‘Siak so Unona, Siak so Unor’

14. (a) Diad anton dalan a si Jehova et “unona” tan say “unor”? (b) Antoray makapanyarin gawa nen Jehova panamegley na ‘lima’ to?

¹⁴ Maligsan inmapelo si Jehova ed saray akisipanan a totoo to: “Dengel kayo ed siak, O Jacob, tan Israel a tinawag ko: Siak iman; siak so unona, siak met so unor. On, say limak, inletneg to so semento na dalin, tan say limak a kawanan inlaknab to so saray tawen: no tawagen ko ra, maminpinsan ira ya onalagey.” (Isaias 48:12, 13) Aliwan singa say too, say Dios et magnayon tan agmanguman. (Malaquias 3:6) Diad Apocalipsis, oniay inyabawag nen Jehova: “Siak so Alfa tan Omega, say  sengeg tan kasumpalan, say una tan unor.” (Apocalipsis 22:13) Sakbay nen Jehova et anggapo so makapanyarin-amin a Dios tan anggapo lay ontumbok ed sikato. Sikato so Supremo tan Magnayon a Sakey, say Manamalsa. Say ‘lima’ to​—say uusaren ton pakayari​—so angiletneg ed dalin tan anginatnat ed mabitewen a katawenan. (Job 38:4; Salmo 102:25) Sano tawagen to iray palsa to, saratan so akaparaan a manlingkor ed sikato.​—Salmo 147:4.

15. Diad anton dalan tan diad anton gagala ya “inaro” nen Jehova si Ciro?

¹⁵ Sakey ya importantin imbitasyon so nipaarap ed saray Judio tan aliwan Judio: “Mantitipon kayo lanlamang, sikayo ya amin, tan denglen yo; siopa ed sikara so mangipaliwawa naani na sarayan bengatla? Saman so inaro nen Jehova gawaen to naani labay to ed Babilonia, tan say taklay to nigaton naani ed saray Caldeo. Siak, siak lanlamang sinalitak, on, sikato so tinawag ko; sikato so inyakar ko, tan gawaen to naani a maaligwas so dalan to.” (Isaias 48:14, 15) Si Jehova lambengat so makapanyarin-amin tan suston makapangipasakbay ed saray ebento. Anggapo ed “sikara,” saray agmakanan talintao, so makapangibaga ed sarayan bengatla. Si Jehova, aliwan saray talintao, so ‘angaro ed sikato,’ si Ciro​—salanti, sikatoy pinili nen Jehova parad espesipikon gagala. (Isaias 41:2; 44:28; 45:1, 13; 46:11) Amta to la so iyapireng nen Ciro diad eksena na mundo tan sikatoy tinuro to a mangonkesta ed Babilonia.

16, 17. (a) Akin a nibagan ag-inter na Dios iray pasakbay to diad maamot a paraan? (b) Panon so pangipapaamta nen Jehova ed saray gagala to natan?

¹⁶ Oniay intuloy nen Jehova bilang pananangguyor: “Onasingger kayo ed siak, denglen yo so saya; a nanlapu nen gapo agak nansalita ed maamot; nanlapu nen panaon ya inkiwala to, wala ak diman.” (Isaias 48:16a) Saray prediksion a nanlapud si Jehova so agniiter a maamot odino nipaamta labat ed pigaran de-aral. Saray propeta nen Jehova so prangkan managsalita a parad Dios. (Isaias 61:1) Mapubliko ran inyabawag so linawa na Dios. Alimbawa, saray ebenton misiglaotan ed si Ciro so aliwa lan balo odino maamot ed Dios. Manga 200 a taon ni ed asasakbay et saratan so maparungtal lan impasakbay na Dios panamegley nen Isaias.

¹⁷ Ontan met natan, aliwan masekreto si Jehova nipaakar ed saray gagala to. Iyaabawag na minilyon a totoo ed nilasus a daldalin tan pulpulo na dayat diad kabkaabungan, diad saray karsada, tan inerman a pasen so pasakbay a nipaakar ed onsabin anggaan na sayan sistema na bengabengatla tan say maong a balita nipaakar ed saray bendisyon ya onsabi diad silong na Panarian na Dios. On, si Jehova so Dios a mangipapaamta ed saray gagala to.

‘Dengel Mo so Saray Bilin Ko!’

18. Anto so pilalek nen Jehova parad saray totoo to?

¹⁸ Lapud apabiskeg ed espiritu nen Jehova, oniay inyabawag na propeta: “Si Katawan a Jehova imbaki to ak, tan say espiritu to. Onia so kuan nen Jehova, say Mananondon mo, say Santo na Israel: Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:16b, 17) Sayan maaron balikas na panangiyansakit nen Jehova so nepeg a mangipaseguro ed nasyon na Israel a say Dios so mangiliktar ed sikara manlapud Babilonia. Sikato so Mananondon da. (Isaias 54:5) Say masimoon a pilalek nen Jehova et nipawil na saray Israelita so pisisiglaotan da ed sikato tan manimano ira ed saray ganggan to. Say tuan panagdayew so nibase ed katutulok ed saray bilin na Dios. Agmakapankurang iray Israelita diad suston dalan no ag-ira nibangat ed ‘dalan a nepeg dan laen.’

19. Anto so masimoon ya iyaapelo nen Jehova?

¹⁹ Alay santing so inkibalikas na pilalek nen Jehova a napaliisan na totoo to so desyang tan panggayagaan da so bilay: “O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.” (Isaias 48:18) Agaylan simoon so iyaapelo na makapanyarin Manamalsa! (Deuteronomio 5:29; Salmo 81:13) Imbes a nadakep, saray Israelita so makapanggayaga ed deen a daakan a singa ed danum ya onaagus ed ilog. (Salmo 119:165) Saray matunong a gawa ra so dakerakel a singa ed saray daluyon na dayat. (Amos 5:24) Lapud interesadon tuloy ed sikara, inmapelo si Jehova ed saray Israelita, a simamaaron mangigigiya ed sikara diad dalan a nepeg dan panakaran. No dinmengel labat ira komon!

20. (a) Anto so pilalek na Dios parad Israel anggaman ed inkarebelyoso ra? (b) Anto so naaralan tayo nipaakar ed si Jehova diad pidedeneng to ed saray totoo to? (Nengnengen so kahon ed pahina 133 na libro.)

²⁰ Antoran bendisyon so onsabi no magbabawi so Israel? Oniay kuan nen Jehova: “Say binim singa met komon buer, tan saray ilalak na eges mo singa ra komon ed saray dalakirik to; say ngaran to agkomon napunas odino nabagbag ed arap ko.”  (Isaias 48:19) Ipapanonot nen Jehova ed totoo so nipaakar ed sipan to a say bini nen Abraham so magmaliw a dakerakel, a “singa saray bitewen ed katawenan, tan singa saray buer a wala ed gilig na dayat.” (Genesis 22:17; 32:12) Balet, sarayan kapolian nen Abraham so nagmaliw a rebelyoso, tan andian ira na kanepegan ya onggamor ed kasumpalan na sipan. On, say rekord da so nagmaliw a mauge-uges kanian diad panamegley na mismon Ganggan nen Jehova et makanepegan a napegpeg so ngaran da bilang sakey a nasyon. (Deuteronomio 28:45) Balet, agpinilalek nen Jehova a natawtaw so totoo to, tan agto labay a sigpot iran nikaindan.

21. Antoran bendisyon so nagamoran tayo natan no paibangat itayo ed si Jehova?

²¹ Saray prinsipyo a lugan na sayan mapuersan teksto so onaaplika ed saray mandadayew ed si Jehova natan. Si Jehova so Subol na bilay, tan mas amta to no panon so nepeg a pangusar tayo ed bilay tayo nen say siopaman. (Salmo 36:9) Inter to ed sikatayo iray giya to, aliwan pian ikibot ed sikatayo so liket, noagta pian nagunggonaan itayo. Onkikiwas iray tuan Kristiano diad panggugunaet dan paibangat ed si Jehova. (Miqueas 4:2) Saray ganggan to so manalimbeng ed espiritualidad tan siglaotan tayo ed sikato, tan saratan so manalimbeng ed sikatayo manlapud makaderal ya impluensya nen Satanas. Sano pablien tayo iray prinsipyo ed saray ganggan na Dios, natebek tayo a babangatan itayo nen Jehova parad pankaabigan tayo. Namoria tayo a “saray ganggan to aliwa ran ambelat.” Tan ag-itayo napegpeg.​—1 Juan 2:17; 5:3.

‘Ompaway Kayo ed Babilonia!’

22. Anto so nipaseseg a gawaen na saray matoor a Judio, tan antoray panamaseguro ed sikara?

²² Sano nageba so Babilonia, wala kasi iray Judion mangipatnag na suston kipapasen na puso? Kasin anamoten da so panangiliktar na Dios, ya ompawil ira ed binalegan dan dalin, tan ipawil da so puron panagdayew? On. Ipanengneng na ontumbok iran salita nen Jehova so kompiyansa to a nagawa itan. “Manakar [“ompaway,” NW] kayo a manlapu ed Babilonia, taynan yo so saray Caldeo; ipaliwawa yo ed panamegley na boses na pankanta, ibaga yo so saya, ibelyaw yo angga ed sampot na dalin: Ikuan yo, Si Jehova dinondon to si aripen to a Jacob. Et ag-ira napgaan sanen intonton to ra ya indalan ed saray kabueran: sikato pinaagus to so saray danum a nanlapu ed bato a nipaakar ed sikara: pinisag to so bato met, et pinmaway so saray danum.” (Isaias 48:20, 21) Saray totoo nen Jehova so mapropetikon pinaseseg a mangganat ya ompaway ed Babilonia. (Jeremias 50:8) Say karondon da so nepeg ya ipaamta ed amin a sukong na dalin. (Jeremias 31:10) Kapaway da ed Ehipto, intarya nen Jehova iray pankaukolan na totoo to legan na pambabaroy da ed saray desierto. Ontan met, taryaan to so totoo to diad isempet da manlapud Babilonia.​—Deuteronomio 8:15, 16.

23. Siopa so agmakapanggayaga ed deen ya inter na Dios?

²³ Wala ni so importantin prinsipyo a nepeg a nodnonoten na saray Judio nipaakar ed panangiliktar nen Jehova. Saray nikiling ed inkatunong so nayarin manirap lapud saray kasalanan da, ingen ta ag-ira naderal. Balet, midumaan ed saray agmatunong. “Anggapo so deen, kuan nen Jehova, ed marelmeng.” (Isaias 48:22) Saray agmagbabawin managkasalanan so agmakagamor ed deen ya itatarya na Dios ed saramay mangaaro ed sikato. Saray gawa na panangilaban so agnigana ed saramay benger a marelmeng odino ed saramay agmananisia. Satan a panangilaban so parad saramay walaan lambengat na pananisia. (Tito 1:15, 16; Apocalipsis 22:14, 15) Say deen a nanlapud Dios so agniwala ed saray marelmeng.

24. Anto so amaliket ed totoo na Dios diad modernon panaon?

²⁴ Nen 537 K.K.P., say pankanawnawan ompaway ed Babilonia so angitarok na pirmin liket ed saray matoor ya Israelita. Nen 1919, say inkibulos na totoo na Dios manlapud impakakautibo ed Babilonia so amaliket ed sikara. (Apocalipsis 11:11, 12) Sikara so napno na ilalo, tan inanamot da so pankanawnawan mamalaknab ed kimey da. Tua, nakaukolan a manpakpel itan a melag a grupo na saray Kristiano pian naanamot da so balo iran posibilidad na panagpulong diad masumpan mundo. Balet diad tulong nen Jehova et pampepelengan da so kimey a panangipulong na maong a balita. Pepekderan na awaran a benendisyonan ira nen Jehova.

25. Akin ya importante so panimanon maong ed matunong iran ganggan na Dios?

²⁵ Idadanet na sayan kabiangan na propesiya nen Isaias ya ibabangat itayo nen Jehova parad pankaabigan tayo. Importantin tuloy so panimanon maong ed matunong iran ganggan na Dios. (Apocalipsis 15:2-4) No sinononot itayo ed kakabatan tan aro na Dios, ontulong itan ed sikatayo a mitunosan ed ibabaga nen Jehova a maptek. Amin a ganggan to so pakagunggonaan tayo.​—Isaias 48:17, 18.

[Tepetepet Parad Panagaral]