Pabiskeg Yoy Lima Yo

DIAD Biblia, say lima so abitla ed masulok a 1,800 a danay. Saray idyom nipaakar ed lima so nauusar ed nanduruman paraan. Alimbawa, say malinis a lima et mankabaliksan na inka-inosente. (2 Samuel 22:21; Salmo 24:3, 4) Say pangilukas ed lima et kabaliksan toy pangipatnag na inkamabunlok ed arum. (Deuteronomio 15:11; Salmo 145:16) Say mangipeligro ed bilay to et nibabagan iiyan toy kamarerwa to ed lima to. (1 Samuel 19:5) Say ilaylay na lima na sakey et kabaliksan toy pakadismaya. (2 Awaran 15:7) Tan say pamabiskeg ed lima na sakey et kabaliksan toy napabiskeg tan napakasil pian onkiwas.​—1 Samuel 23:16.

Natan et maganat so pankaukolan a pabiskegen so lima tayo. Manbibilay itayo ed “maatap a panaon a mairap a pidenengan.” (2 Timoteo 3:1, NW) Sano nadismaya itayo, say tendensia na too et onsuko, a singano onlaylay so lima tayo. Kaslakan la so pakanengneng ed saray tin-edyer a tinmundan maneskuela, kaasawaan a lalaki a manaynan ed pamilya ra, tan kainaan a mamapaulyan ed ananak da. Bilang Kristianos, kaukolan tayon pabiskegen so kalimaan tayo ta pian nasungdoan iray subok ya aarapen tayo diad panlilingkor tayo ed Dios. (Mateo 24:13) Diad panggawa ed satan, napaliket tayo so puso nen Jehova.​—Uliran 27:11.

No Panon a Napapabiskeg so Kalimaan

Kaukolan na saray Judio ed panaon nen Esdras a pabiskegen so kalimaan da ta pian nasumpal so panangipaalagey lamet ed templo nen Jehova diad Jerusalem. Panon ya apabiskeg so kalimaan da? Ibabaga na salaysay: “Niliketan da so liket na andi lebag a tinapay ed pitoy agew a sililiket: ta si Jehova ginawa to ra a malikeliket, tan impanpataoli to so puso na ari ed Asirya ed sikara, pian pabiskegen to so lima ra dia ed kimey na abung na Dios, a Dios na Israel.” (Esdras 6:22) Malinew a diad panamegley na aktibon puersa nen Jehova et pinatalindeg to so “ari ed Asirya” pian abuloyan so totoo na Dios ya ompawil, tan pinakiwas Toy espiritu na totoo, ta pian nasumpal day kimey ya inggapo ra.

Diad saginonor, sanen kaukolan ya apigeren so bakor na Jerusalem, pinabiskeg nen Nehemias so lima na kapara ton Judio parad kimey. Onia so nabasa tayo: “Imbagak ed sikara so lima na Dios ko a maong ed siak, singa met saray salita na ari a sinalita to ed siak. Et inkuan da, Onalagey itayo tan ipaalagey tayo. Dia ed ontan pinabiskeg da so saray lima ra a nipaakar ed maong a kimey.” Panamegley na apabiskeg a lima, si Nehemias tan saray kapara ton Judio so akapangipaalagey lamet ed saray bakor na Jerusalem diad loob na makatantandan 52 ya agew!​—Nehemias 2:18; 6:9, 15.

Mipadpara, papabiskegen nen Jehova so kalimaan tayo pian ipulong so maong a balita na Panarian. (Mateo 24:14) Gagawaen to itan diad panamegley na ‘[pangiiter] to ed sikatayo na ganaganan maabig a bengatla pian gawaen so linawa to.’ (Hebreos 13:21) Inikdan to itayo na sankaabigan iran uusaren. Walaan itayo na Biblia tan nibase ed Biblia iran libro, magasin, brosyur, tract, tan nirekord iran audio tan video a nausar tayo  pian napakabatan iray totoo ed interon mundo. Diad tua, saray publikasyon tayo so wala la ed 380 a lenguahe. Niarum ni, diad panamegley na saray miting ed kongregasyon, asamblea, tan saray kombension, mangipapagamor si Jehova na teokratikon edukasyon tan panangipasal ed no panon ya usaren iyan maabig ya uusaren diad panumpal ed ministeryo tayo.

Anggaman papabiskegen nen Jehova so kalimaan tayo ed dakel a paraan, iilaloan to itayo met a mamasya. Nonoten so inkuan nen propetan Eliseo ed si Arin Joacaz, a linma ed si Eliseo pian patulongan diad pilaban sumpad saray onlulusob a Siryano. Inkuan nen Eliseo ed ari a mangala na pigaran pana tan isegkal to iratan ed dalin. Ibabaga na salaysay na Biblia: “Kinabil to ya amitlo, tan tinmunda. Et say laki na Dios nampasnok ed sikato, tan inkuan to, Kinabil mo komon ya aminlima odino aminem a danay: sirin kinabil mo komon so Sirya angga ed sikato so inupot mo; bangbalet natan kabilen mo so Sirya lambengat ed mamitlo.” (2 Arari 13:18, 19) Lapud agto impamasya, limitado labat so intalona nen Joacaz diad impilaban ed saray Siryano.

Pareho met a prinsipyo so onaplika ed sikatayo no labay tayon nasumpal so ipapagawa nen Jehova ed sikatayo. Imbes a panaburidoan tayo iray babeng ed sikatayo odino nipaakar ed no panon kairap so asainmin tayo, nepeg a maseseg tan sigpot-puso tayon pankimeyan itan. Kaukolan tayon pabiskegen so kalimaan tayo tan patulongan ed si Jehova.​—Isaias 35:3, 4.

Pabiskegen nen Jehova so Kalimaan Tayo

Ag-onsaew si Jehova ya ontulong ed sikatayo tan mamabiskeg ed kalimaan tayo pian gawaen so linawa to. Siempre, agmanggawa so Dios na milagro tan gawaen lan amin parad sikatayo. Iilaloan ton onkiwas itayo met​—basaen so Biblia ya inagew-agew, manparaan tan onatendi ed saray miting a regular, mibiang ed ministeryo a mabetbet anggad posibli, tan lawas panpikasi ed sikato. No sitotoor tan magunaet tayon onkiwas legan a walaan itayo na pankanawnawa, pabiskegen itayo nen Jehova pian nagawaan so iilaloan to ed sikatayo.​—Filipos 4:13.

Imanoen so kipapasen na sakey a Kristiano a naandi ed bilay so akulaw to tan say ina to ed loob na sakey taon. Siansian nalilikna to so ot-ot sanen tinaynan na manugang to so anak ton laki tan intalirak toy Kristianon kabibilay. “Naaralan kon agtayo makapampili na saray subok ed sikatayo, agtayo anggan makapampili no kapigan nagawa odino no kaunongan kabetbet a nagawa,” inkuan na sayan agin laki. Panon a sikatoy apabiskeg pian mantultuloy? “Say pikakasi tan personal a panagaral so tinmulong pian makapantultuloy ak. Tan say suporta na saray agagik ed espiritual so akaligliwa ed siak a maong. Nagkalalo ed amin, amoriak so kaimportantian na pamayubo na maabig a relasyon ed si Jehova antis ya onlesa iray mairap a situasyon.”

Antokaman so eksperiensya yo ed bilay, magmaliw a determinadon manmatalek a sigpot ed si Jehova tan anamoten iray amin a probisyon to a mamabiskeg ed kalimaan yo. Diad ontan et makapangiyapay kayo na sankaabigan a serbisyo ed si Jehova a mangidayew tan mamagalang ed mablin ngaran to.​—Hebreos 13:15.

[Litrato ed pahina 31]

Lapud agto impamasya, limitado labat so intalona nen Joacaz diad impilaban ed saray Siryano