Panggayagaan so Personal a Panagaral na Salitay Dios

“Umamengen ko so amin a kimey mo, tan mandalepdep ak ed saray gawagawam.”​—SALMO 77:12.

1, 2. (a) Akin a nepeg tayon ipanaon so panagdalepdep? (b) Anto so kabaliksan na “dalepdep” tan “morekdek”?

 BILANG babangatan nen Jesu-Kristo, nepeg ya ipasen tayon importantin tuloy so relasyon tayo ed Dios tan say motibo tayo ed panaglingkor ed Sikato. Balet natan, maslak a totoo so okupadon tuloy kanian anggapo lay panaon dan mandalepdep. Sikara so nigalet ed naynay lan panaggegemtan ed materyal, sasaliwen, tan agmakanan panagliket. Panon tayon napaliisan itan a maapan sagpot? No panon ya igagana tayo so panaon parad makana iran aktibidades, a singa say panangan tan kakaugip, nepeg ya ipanaon tayo met ed kada agew so pandalepdep ed saray kimey tan pidedeneng nen Jehova.​—Deuteronomio 8:3; Mateo 4:4.

² Kasin mandadalepdep kayo? Anto so kabaliksan na pandalepdep? Satan a salita so inukeran na sakey a diksionaryo bilang say “pangiyapasakey na sakey ed kanonotan to: panmolimoli odino panmorekdek.” Tan say salitan “morekdek” so mankabaliksan na “pannonotan: molimolien . . . isipen odino nodnonoten a nagkalalo la diad mareen, masimoon, tan aralem a paraan.” Anto so kaimportantian na saya ed sikatayo?

3. Diad anto so direktan pisiglaotanan na ibubulaslas ed espiritual?

³ Sakey lan bengatla et nepeg a mangipanonot itan ed sikatayo ed walan insulat nen apostol Pablo ed kapara ton lingkor a si Timoteo: “Angga ed yakar ko’d tan, manseet ka ed panagbasa, ed panagkalar, ed panangibangat. . . . Seetan [“morekdek,” NW] mo so sarayan bengatla, sikara labat so arapen [“ipasepsep,” NW] mo; pian say ibubunam nipatnag komon ed saray ganagana.” On, iilaloan ed sikatayo so ibubulaslas, tan impatnag na saray salita nen Pablo a wala so direktan pansiglaotan na panmorekdek ed saray espiritual a bengatla tan say ibubulaslas. Tua met itan natan. Pian naeksperiensya so ibubulaslas ed espiritual, nepeg tayon itultuloy a “morekdeken” tan “ipasepsep” iray bengatlan misiglaotan ed Salitay Dios.​—1 Timoteo 4:13-15.

4. Antoran probisyon so nausar yo pian regular kayon makapanmorekdek ed Salita nen Jehova?

⁴ Say sankaabigan a panaon pian makapandalepdep kayo et mandependi ed sikayo tan ed rotina na pamilya yo. Dakel so manmomorekdek ed sakey a teksto ed Biblia diad kabkabuasan sano basaen da so bokletan Usisaen so Kasulatan ya Inagew-agew. Diad tua, igagapo na manga 20,000 a boluntaryo diad saray ayaman a Bethel ed sankamundoan so sanagew da panamegley na 15-minuto a pangonsidera na teksto ed Biblia a parad kada agew. Anggaman walay pigara labat a mankomento ed pamilya na Bethel ed kada kabuasan, momorekdeken na arum so nibabaga tan babasaen. Momorekdeken met na arum a Tastasi so Salitay Dios sano mamapaarap la ra’d trabaho ra. Mandedengel ira na audiocassettes na Biblia tan saray magasin a Watchtower tan Awake! a wala la ed pigaran lenguahe. Ontan so gagawaen na dakel a kaasawaan a bibii legan a  mankikimey ira ed abung. Diad tua, aaligen da so salmistan si Asap, ya angisulat: “Salambiten ko so saray kimkimey nen Jehova; tan nodnonoten ko so gawam a makapakelaw nen ona. Umamengen ko so amin a kimey mo, tan mandalepdep ak ed saray gawagawam.”​—Salmo 77:11, 12.

Say Suston Awawey so Mamawala na Makagunggona Iran Resulta

5. Akin ya importante ed sikatayo so personal a panagaral?

⁵ Diad modernon panaon tayo a walaray TV, video, tan kompyuter, agla tanton manbabasa so maslak a totoo. Seguradon aliwan ontan ed limog na saray Tastasi nen Jehova. Diad tua, say panagbasa na Biblia et mangisisiglaot ed sikatayo diad si Jehova. Nilibo lan taon so apalabas, si Moises so sinalatan nen Josue bilang lider na Israel. Pian nagamoran nen Josue so panamendisyon nen Jehova, kinaukolan a basaen ton mismo so Salitay Dios. (Josue 1:8; Salmo 1:1, 2) Satan so siansia nin kakaukolanen natan. Balet, lapud limitadon edukasyon na arum, sikaray nairapan a manbasa odino moriaen da a makapakesaw itan. Kanian, anto so makatulong ed sikatayo pian labalabay tayon basaen tan aralen so Salitay Dios? Naromog so ebat ed saray salita nen Arin Solomon a nikurit ed Uliran 2:1-6. Ipangasi yon lukasan so Biblia yo tan basaen irayan bersikulo. Insan singbaten tayo iratan.

6. Anton awawey so nepeg tayon ipatnag nipaakar ed pikakabat na Dios?

⁶ Bilang pangigapo, naromog tayo iyan panamilin: “Ana’ko no awaten mo so saray salitak, tan yatol mo so saray ganggan ko ed sika; a singa pangikiling mo [“paniimano,” NW] na layag mo ed kakabatan, tan ipeket [“ikiling,” NW] mo so pusom ed pakatalos . . .” (Uliran 2:1, 2) Anto so naaralan tayo ed sarayan salita? Kada sakey ed sikatayo so walaan na responsabilidad a manaral na Salitay Dios. Imanoen pa so kondisyon a “no awaten mo so saray salitak.” Mabitar so salitan “no” lapud say Salitay Dios so ag-iimanoen na maslak ed katooan. Pian napanggayagaan tayo so panagaral ed Salitay Dios, nepeg a mabulos itayon mangawat ed saray salita nen Jehova tan ipasen iratan a singa kayamanan a lalaniran tayon maong. Agtayon balot aabuloyan a naokupado odino nisuawi itayo na inagew-agew a rotina, ya ipasen tayo lan makapasawa so Salitay Dios tan panduaruwaan ni ingen itan.​—Roma 3:3, 4.

7. Kapiganman a posibli, akin a nepeg itayon presente tan manimanon maong ed saray miting na Kristiano?

⁷ Kasin ‘maniimano’ tan ontatalineng itayon maong sano nipapaliwawa so Salitay Dios diad saray Makristianon miting tayo? (Efeso 4:20, 21) Kasin ‘ikikiling tayo so puso’ tayo ta pian nawalaan itayo na aralem a pakatalos? Nayarin aliwan eksperiensyadon tuloy so managpaliwawa, balet lapud sikatoy manguusar na Salitay Dios, sikato so makanepegan na sigpot a panangimano tayo. Siempre, ta pian natalineng tayo so kakabatan nen Jehova, nepeg a presente itayo ed saray miting na Kristiano, kapiganman a posibli. (Uliran 18:1) Isipen pa so inkadismaya na siopaman a nayarin ag-akapitipon diman ed silir diad Jerusalem nen Pentecostes 33 K.P.! Anggaman agtanton ekstra-ordinaryo iray miting tayo a singa ed onman, sisingbaten ditan so Biblia, say manunaan a libron-panaaralan tayo. Kanian, kada miting et pakagunggonaan tayo ed espiritual no manimano tayon maong tan tumboken tayo ed saray Biblia tayo so babasaen.​—Gawa 2:1-4; Hebreos 10:24, 25.

8, 9. (a) Anto so kakaukolanen ed sikatayo na personal a panagaral? (b) Panon yon ikompara so balor na balitok diad pakatalos ed pikakabat na Dios?

⁸ Onia so ontumbok a salita na makabat ya ari: “No kelyawan mo so kaisipan, tan itagey mo so boses mo nipaakar ed pakatalos; . . .” (Uliran 2:3) Anton awawey odino inklinasyon so ipapasabi ed sikatayo na sarayan salita? Siempre, say masimoon a pilalek a natalosan so Salita nen Jehova! Mankabaliksan iratan na inkamabulos a manaral tekep na gagala a makagamor na aralem a pakatalos, tan natebek so linawa nen Jehova. Saya so mankaukolan na sagpot, tan mangitonton itan ed sikatayo ed saray ontumbok a salita tan ilustrasyon nen Solomon.​—Efeso 5:15-17.

⁹ Oniay intuloy to: “No sikato [say pakatalos] so anapen mo a singa pilak, tan sikato so usisaen mo a singa saray inyamot a kayamanan. . . .” (Uliran 2:4) Saya so mangipanonot ed sikatayo ed panagminas na totoo a dakel lan siglo a manaanap ed tatawagen ya ankabli iran metal a pilak tan balitok. Amatey so totoo nisengeg ed balitok. Arum  so legay-bilay lan manaanap ed satan. Balet, anto so peteg a kablian na balitok? No abalang ka ed desierto tan ngalngali ka la naragas ed inkapgaan, anto so pilien mo: sakey a bareta na balitok odino sanbason danum? Balet ta agaylan seseg na saray totoo a mananap na balitok, a walaan na akintapew tan manguman-uman a balor! * Mas nagkalalo sirin a seseg so nepeg ya itekep tayo diad pananap ed kakabatan, pakatebek, tan pakatalos ed Dios tan ed linawa to! Balet antoray gunggona ed ontan a panag-anap?​—Salmo 19:7-10; Uliran 3:13-18.

10. Anto so naromog tayo no manaral itayo na Salitay Dios?

¹⁰ Oniay katuloyan na salaysay nen Solomon: “Diad ontan natalosan mo so takot ed Jehova, tan naromog mo so pikakabat ed Dios.” (Uliran 2:5) Agaylan makapasagyat a punto, salanti, sikatayon makasalanan a totoo so makaromog ed ‘mismon pikakabat na Dios,’ si Jehova, say Soberanon Katawan na uniberso! (Salmo 73:28; Gawa 4:24) Diad loob na pigaran siglo et sinali na saray pilosopo tan saray ibabagan makabat a totoo ed mundo so panebek ed saray misteryo ed bilay tan say uniberso. Balet, agda aromog so ‘mismon pikakabat na Dios.’ Akin? Anggaman nilibo lan taon a wala itan ed Salitay Dios, say Biblia, ipapasen da labat itan ya ordinaryo kanian agda inawat tan agda atalosan itan.​—1 Corinto 1:18-21.

11. Anto so pigaran gunggona na personal a panagaral?

¹¹ Wala so sananey nin gunggona ya ipapabitar nen Solomon: “Si Jehova mangiter na kakabatan; ompaway ed sangi to so pikakabat tan pakatalos.” (Uliran 2:6) Mabulos tan mabunlok si Jehova a mangiter na kakabatan, pikakabat, tan pakatebek ed siopaman a malabay a mananap ed saratan. Maseguron walaan itayo na rason a mangapresya ed personal a panagaral na Salitay Dios, anggaman mankaukolan itan na sagpot, disiplina, tan sakripisyo. Anggan panon et walaan itayo na akaimprinta iran kopya na Biblia, ya agla kaukolan a sakalen itan, unong a ginawa na arum nensaman!​—Deuteronomio 17:18, 19.

Pian Makapankurang a Makana ed si Jehova

12. Anto so nepeg a motibo tayo diad panaanap tayo ed pikakabat na Dios?

¹² Anto so nepeg a motibo tayo diad personal  a panagaral tayo? Pian ompatnag a magmaong nen say arum? Pian mangipangta ed atagtagey a pikakabat? Tan bilang resulta et pian magmaliw a marundunong ed Biblia? Andi. Say gagala tayo et say panugali bilang Kristiano, a lawas akaparaan ya ontulong ed arum, tekep na makaparepreskon awawey nen Kristo. (Mateo 11:28-30) Oniay impasakbay nen apostol Pablo: “Say kakabatan patageyen to so linawa, balet say panangaro so mamaabig.” (1 Corinto 8:1) Kanian, kaukolan a walaan itayo na mapaabeban awawey a singa ed si Moises sanen oniay inkuanto ed si Jehova: “Ipaimanom pa ed siak so saray dalan mo, pian napikabkabatan ta ka, pian naromog ko so panangaro ed arap mo.” (Exodo 33:13) On, nepeg tayon pilaleken so pikakabat ta pian napaliket tayo so Dios, aliwan pian pandinayewen so totoo. Labay tayo so magmaliw a makana, mapaabeban lingkor na Dios. Panon tayon narapat itan a kalat?

13. Anto so kinaukolan parad sakey pian magmaliw a lingkor na Dios?

¹³ Oniay insimbawa nen Pablo ed si Timoteo nipaakar ed no panon a napaliket so Dios: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.” (2 Timoteo 2:15) Say balikas ya “agamilen . . . ed matunong” so nanlapu ed Griegon compound verb ya orihinal a mankabaliksan na “marantal a panagkatli,” odino ‘katlien a maptek.’ (Kingdom Interlinear) Unong ed ibabaga na arum, saya so mangisusuheri na ideya nipaakar ed sakey a managdait a mantatabas na abel, nipaakar ed sakey a managdalus a manbabaka ed uma, tan arum ni. Antokaman so kipapasen, say resulta et susto tan maptek. Say punto et si Timoteo so kinaukolan a ‘manseet’ pian naseguro to a say panagbangat tan kondukta to et mitunosan ed salita na katuaan pian sikatoy magmaliw a makana tan naabobonan a lingkor na Dios.​—1 Timoteo 4:16.

14. Panon a mangapekta so personal a panagaral tayo ed walan gagawaen tan ibabaga tayo?

¹⁴ Ontan met so impabitar nen Pablo sanen pinaseseg to iray kaparan Kristiano diad Colosas a ‘mankurang ira a makana ed Katawan ya onarap ed amin a makapaliket’ diad ‘pambunga ed ganaganan maabig a gawa, tan ombaleg ed kakabatan na Dios.’ (Colosas 1:10) Indalatdat dia nen Pablo so pagmaliw a makana ed si Jehova diad ‘pambunga na ganaganan maabig a gawa’ ontan met ed ‘ibaleg ed kakabatan na Dios.’ Diad arum a panangibaga, say importante ed si Jehova et aliwa lambengat a say panamabli tayo ed pikakabat noagta no panon so panutumbok tayon maong ed Salitay Dios diad gagawaen tan ibabaga tayo. (Roma 2:21, 22) Saya so mankabaliksan a say personal a panagaral tayo so nepeg a mangapekta ed kanonotan tan kondukta tayo no labay tayon paliketen so Dios.

15. Panon tayon nasalimbengan tan nakontrol so isip tan kanonotan tayo?

¹⁵ Natan et determinado si Satanas a maneral ed espiritualidad tayo diad pangiyaalibansa to na pibabakal a mangilalanor ed kanonotan. (Roma 7:14-25) Nepeg sirin a salimbengan tan kontrolen tayo so isip tan saray nononoten tayo ta pian napaneknekan itayon makana ed Dios tayo, si Jehova. Say ayura tayo et say ‘pikakabat na Dios,’ a makayarin ‘manakep ed balang kanonotan diad katutulok ed Kristo.’ Saya so nagkalalon rason tayo pian manimano ed inagew-agew a panagaral na Biblia, lapud labay tayon iwaklit so sinisiblet tan minumundo iran bengatla a walad kanonotan tayo.​—2 Corinto 10:5.

Saray Katulongan ed Pakatalos

16. Panon itayon nagunggonaan a mismo ed pangibabangat nen Jehova ed sikatayo?

¹⁶ Say bangat nen Jehova so pakagunggonaan ed espiritual tan pisikal a paraan. Aliwa itan a makapasawa tan akademiko labat a teolohiya. Kanian onia so nabasa tayo: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:17) Panon itayon pakukurangen nen Jehova diad makagunggonan paraan to? Unona, walaan itayo na apuyanan a Salita to, say Masanton Biblia. Saya so manunan libron-panaaralan tayo, a naynay a tutuplegan tayo. Satan so rason no akin a maabig so panimano ed saray Makristianon miting ya akalukas so Biblia. Saray makagunggonan resulta ed panggawa ed satan so nanengneng ed salaysay nipaakar ed Etiopen eunoko, a nikurit ed Gawa kapitulo 8.

17. Anto so agawa ed biang na Etiopen eunoko, tan anto so iyiilustra na saya?

¹⁷ Say Etiopen eunoko et sakey ya akomberte ed Judaismo. Sikato so masimoon a mananisia ed Dios, tan inaral to so Kasulatan. Sanen manbabaroy panamegley na karwahe to, sikatoy manbabasa na sulat nen Isaias sanen sikatoy binatik tan inabot nen Felipe ya oniay tepet to: ‘Natatalosan mo so babasaen mo?’ Antoy ebat na eunoko? “Panon so pakayarik, no anggapo so mangiwanwan ed siak? Et akikasian to si Felipe ya onsapat tan miyurong ed sikato.” Insan si Felipe, ya inwanwan na masanton espiritu, so tinmulong ed eunoko a makatalos ed propesiya nen Isaias. (Gawa 8:27-35) Anto so iyiilustra na saya? Aliwan magenap so pambasa labat a bukor ed Biblia. Si Jehova, panamegley na espiritu to, so manguusar ed matoor tan makabat ya aripen a klase pian ontulong ed sikatayon makatalos ed Salita to diad dugan panaon. Panon iyan nagagawa?​—Mateo 24:45-47; Lucas 12:42.

18. Panon itayon tutulongan na matoor tan makabat ya aripen a klase?

¹⁸ Anggaman say aripen a klase so tinukoy a “matoor tan makabat,” ag-imbaga nen Jesus ya anggapoy kalilingoan na satan. Sayan grupo na matoor ya alanaan ya agagi so siansia nin tugyopen na saray ag-ayadyarin Kristiano. Anggaman sankaabigan so motibo ra, sikara so nayarin nalingo no maminsan, a singa met ed saramay lalaki nen inmunan siglo. (Gawa 10:9-15; Galacia 2:8, 11-14) Balet ta maralus so motibo ra, tan uusaren ira nen Jehova a mangitarya na saray katulongan ed panagaral tayo na Biblia pian napabiskeg so pananisia tayo ed Salitay Dios tan ed saray sipasipan to. Say manunan probisyon parad personal a panagaral ya intarya ed sikatayo na aripen et say New World Translation of the Holy Scriptures. Wala la itan natan, intero man odino kabiangan na satan, diad 42 a lenguahe, tan niimprinta la so 114 milyon a kopya diad pigaran edisyon. Panon tayon nausar itan ya epektibo ed personal a panagaral tayo?​—2 Timoteo 3:14-17.

19. Anto so arum ed saray aspekto na New World Translation​—With References a makatulong ed personal a panagaral?

¹⁹ Alaen pan alimbawa so New World Translation of the Holy Scriptures​—With References. Walaan itan na saray egpang na cross-references,  paimano’d-leksab, pinatikey a konkordansia diad “Bible Words Indexed” tan “Footnote Words Indexed,” tan sakey ya Appendix a malaknab a mangokobri ed 43 a tema, kalaktip met iray mapa tan tsart. Wala met so “Introduction,” a ditan nisalaysay so dakel a reperensya ya inusar parad sayan nikaduman patalos na Biblia. No wala la itan ed lenguahen natalosan yo, anamoten so pikabisado ed sarayan aspekto tan usaren iratan. Antokaman so kipapasen, say Biblia so napangigapoan parad programa tayo ed panagaral, tan diad New World Translation et walaan itayo na bersion a suston mangidadanet ed madibinon ngaran unong ya ipapabitar na satan so uley na Panarian na Dios.​—Salmo 149:1-9; Daniel 2:44; Mateo 6:9, 10.

20. Antoran tepet nipaakar ed personal a panagaral so mankaukolan na ebat?

²⁰ Natan et oniay nayarin itepet tayo: ‘Anto nin tulong so nakaukolan tayo pian natalosan so Biblia? Panon tayon nipanaon so personal a panagaral? Panon itayon makapanaral a lalon epektibo? Panon a mangapekta ed arum so panagaral tayo?’ Konsideraen ed ontumbok ya artikulo irayan importantin aspekto na iyaaligwas tayo bilang Kristiano.

[Paimano ed Leksab]

Kasin Natandaan Yo?

• Anto so kabaliksan na “pandalepdep” tan “panmorekdek”?

• Anto so nepeg ya awawey tayo nipaakar ed panagaral na Salitay Dios?

• Anton motibo so nepeg a niwala ed sikatayo diad personal a panagaral tayo?

• Antoran katulongan ed pakatalos ed Biblia so walad sikatayo?

[Tepetepet Parad Panagaral]

[Litrato ed pahina 15]

Moriaen na saray membro na pamilyan Bethel a makapabiskeg ed espiritual so pangigapo ed kada agew diad pangonsidera na teksto ed Biblia

[Saray litrato ed pahina 15]

Say makanan panaon so nausar a maong diad italineng ed saray tape na Biblia legan a manbiabiahe itayo

[Litrato ed pahina 16]

Pansasagpotan tan pipilaleken na totoo so pakalmo na balitok. Panon yon pansasagpotan so panagaral ed Salitay Dios?

[Credit Line]

Diad impangiyabuloy na California State Parks, 2002

 [Saray litrato ed pahina 17]

Say Biblia et sakey a kayamanan a makapangitonton ed andi-anggaan a bilay