Pantalikarkar a Panangiter

“TATAWAGEN mo ak a mipapayabol; baliwala ed siak itan. Mipapayabol ak parad si Jesus.” Saratan a prangkan salita na ministro na Protestanti so mangipapabitar ed kontrobersia a kaslakan diad pamapawala na pundo na relihyon. Ompatnag a say niletneg lan relihyon so makapansiansia lambengat no dakel so kuarta a panuporta na satan. Kaukolan so isueldo, saray templo so kaukolan ya ipaalagey tan apigeren, saray kampanya ed panag-ebanghelyo so kaukolan a gastosan. Panon a napawala so nakaukolan a kuarta?

Parad dakel a relihyon, say solusyon et say pangiter na kakaplo. * “Say panangiter na kakaplo et paraan na Dios pian gastosan so panarian To diad dalin,” so inkuan na ebanghelisador a si Norman Robertson. “Satan so sistema To ed ekonomya pian nipulong so Ebanghelyo.” Oniay diretsaan tan maranet a panonot to ed saray patumbok to ed responsabilidad da a mangiter: ‘Say panangiter na kakaplo et aliwan sakey a bengatlan gagawaen mo lapud nayarian mo. Satan et kiwas a katutulok. Say agpangiter na kakaplo et malinew ya isusumlang ed saray ganggan na Dios. Satan et panagkupit.’​—Tithing​—God’s Financial Plan.

Nayarin onabobon ka a say panangiter et kabiangan ed panagdayew bilang Kristiano. Balet, kasin makapaaburido odino makapaingongot ni ingen ed sika so tuloytuloy ya ikerew na kuarta? Si Inácio Strieder a teologon taga-Brazil so angakusa ed saray relihyon a mangaanamot ed panangiter na kakaplo pian “nasolbar iray problema na institusyon da” tan tinawag to so ontan a kagagawa ya “agmakatunongan, panag-abuso, tan ikakasipa ed teolohiya.” Naoobserbaan to a say resulta et “saray totoon andiay trabaho, saray balo, saray manaayam ed kubong-kubong, tan saramay agmatudio so maniisip a pinaulyanan la’ra na Dios tan kapilitan iran mangiter na dakel ed saray ‘manag-ebanghelyo’ a sengeg na kaeerasan na mismon pamilya ra.”

Nayarin isipen mo: ‘Kasin susto so pangiyaaplika na saray relihyon ed Kasulatan a mangipipilit ed pangiter na kakaplo? Odino kasin aanamoten na arum a relihyon so katatakot ed Dios pian katkatan daray membro ra? Tua kasi ya iilaloan na Dios ed sikatayo so pantalikarkar a pangiter?’

[Paimano ed Leksab]