Personal a Panagaral a Manginlong ed Sikatayo Bilang Managbangat
Personal a Panagaral a Manginlong ed Sikatayo Bilang Managbangat
“Seetan [“morekdek,” NW] mo so sarayan bengatla, sikara labat so arapen mo; pian say ibubunam nipatnag komon ed saray ganagana. Imatonan mo so kaabigan na laman mo tan say ibabangat mo.”—1 TIMOTEO 4:15, 16.
1. Anto so petepeteg nipaakar ed panaon tan personal a panagaral tayo?
“NIPAAKAR ed amin a bengatla wala so sakey a panaon,” so kuan na Biblia diad Eclesiastes 3:1. Petepeteg itan ed personal a panagaral. Naiirapan so dakel a manmorekdek ed saray espiritual a bengatla no agmatukoy so oras odino aliwan maabig so pasen. Alimbawa, kayari na makapabanal a sanagew a trabaho tan makapesel a pangdem, labay yo ni kasi so manaral, nagkalalo la no akayurong kayo la ed sopa diad arap na TV? Andi la. Anto sirin so solusyon? Mabitar, nakaukolan tayon pilien no kapigan tan no iner itayo manaral tekep na gagala a dakel so nagamoran ed saray sagpot tayo.
2. Anto so mabetbet a sankaabigan a panaon parad personal a panagaral?
2 Amoria na arum a say sankaabigan a panaon na panaral et diad kabkabuasan sano sikara so alerto nin maong. Uusaren na arum so panagpainawa ed kaagwan parad antikey a panaon na panagaral. Imanoen ed onggendan iran alimbawa so impanukoy ed panaon a parad importante iran espiritual ya aktibidad. Oniay insulat nen Arin David na kadaanan ya Israel: “Ipadngel mo ed siak so maaro ya abig na linawam no ontan a kabuasan; ta sika so panmatalkan ko; ipaamtam ed siak so dalan a nepeg ko a dalanan; ta itangay ko so kamarerwak ed sika.” (Salmo 143:8) Ontan met so impangapresya nen propeta Isaias sanen inkuanto: “Si Katawan a Jehova initer to ed siak so dila na saray abangatan, pian naamtaan ko komon no panon so panamabiskeg ed saray naksawan ed panamegley na saray salita. Sikato so onliing a kinabuasan, sikato liingen to so layag ko a pandengel a singa pandengel na saray abangatan.” Say punto et nakaukolan tayo so manaral tan maapit a mitalosan ed si Jehova sano alerto so kanonotan tayo, antokaman itan ya oras ed loob na sanagew.—Isaias 50:4, 5; Salmo 5:3; 88:13.
3. Antoran kipapasen so maabig parad epektibon panagaral?
3 Sananey nin makatulong ed epektibon panagaral et agtayo onyuyurong ed komportablin tuloy a yurongan odino sopa. Aliwan ontan so paraan pian mansiansian alerto. Sano manaaral itayo, say kanonotan tayo so nepeg ya aliing, tan say inka-komportablin maong so manresulta ed pakateglep. Ontan met, say maabig ed panagaral tan panagdalepdep et say mareen a kaliberliber tan anggapo ray makadisturbo. Say panagaral a walay ontatanol a radyo, TV, odino ugugaw a manasamsam ed imano yo so agmamawala na sankaabigan iran resulta. Sanen kinaliktan nen Jesus so mandalepdep, sikato so linma ed mareen a pasen. Sinaglawi to met so nipaakar ed kablian na pananap na pribadon pasen a pampikasian.—Mateo 6:6; 14:13; Marcos 6:30-32.
Personal a Panagaral a Manginlong ed Sikatayon Onebat
4, 5. Diad antoran praktikal a paraan a makatulong so brosyur a Kakaukolanen?
4 Makapenek so personal a panagaral sano mangusar itayo na nanduruman katulongan ed panagaral na Biblia ta pian mas onaralem so nausisa tayo nipaakar ed sakey a tema, nagkalalo la no labay tayon ebatan so masimoon iran tepet na sakey. (1 Timoteo 1:4; 2 Timoteo 2:23) Bilang pangigapo, dakel a balo ni so manaaral na brosyur ya Anto so Kakaukolanen na Dios ed Sikatayo?, * a wala la natan ed 261 a lenguahe. Satan so simsimpli balet ta malinew a publikasyon, a nibasen amin ed Biblia. Ontulong itan ed saray manbabasa a maples a makatalos ed saray kakaukolanen na Dios parad tuan panagdayew. Balet, say inkadesinyo na satan so agdetalyadon manisingbat ed kada tema. No walaray itepet na iyaaralan yo na Biblia nipaakar ed pigaran tema na Biblia legan na diskusyon, panon yon naromog so dakel nin impormasyon ed Biblia a makatulong ed sikato a naebatan iratan a tepet?
5 Parad saramay walaan na Watchtower Library diad CD-ROM ed lenguahe ra, mainomay so mananap na malaknab iran lapuan na impormasyon diad sakey a kompyuter. Balet komusta iramay totoo ya andian na ontan a kagawaan? Surien tayo so duaran tema a siningbat ed brosyur a Kakaukolanen ta pian nanengneng tayo no panon tayon napalaknab so pakatalos tayo tan makaebat ed mas detalyadon paraan—nagkalalo la no walay mamalesa na saray tepet a singa say, Siopa so Dios, tan siopa si Jesus?—Exodo 5:2; Lucas 9:18-20; 1 Pedro 3:15.
Siopa so Dios?
6, 7. (a) Anton tepet so onlesa nipaakar ed Dios? (b) Anto so inekal na sakey a klero diad paliwawa to?
6 Say Leksion 2 ed brosyur a Kakaukolanen so mangebat ed makanan tepet a, Siopa so Dios? Saya so makanan punto lapud say sakey a too so agmakapandayew ed tuan Dios no sikatoy agmikabat odino nayarin manduaruwa ed kiwawala na Dios. (Roma 1:19, 20; Hebreos 11:6) Ingen, say totoo ed sankamundoan so manisia ed nilasus iran ideya nipaakar ed no siopa so Dios. (1 Corinto 8:4-6) Kada relihyoson pilosopiya so walaan na miduman ebat ed tepet a manasaglawi ed pakapikabat ed Dios. Diad Kakristianoan et momoriaen na maslak iran relihyon a say Dios et sakey a Trinidad. Sakey a bantog a klerigo ed Estados Unidos so angipaliwawa ed teman “Kasin Kabat Mo so Dios?” balet diad paliwawa to et agto anggan sinalambit so ngaran na Dios, anggaman sikatoy aminpigan angaon ed Hebreon Kasulatan. Siempre, sikatoy nambasa ed sakey a patalos na Biblia ya angusar ed aliwan espesipiko tan titulon “Katawan” ya aliwa met a ngaran imbes a Jehova odino Yahweh.
7 Importantin tuloy a punto so asaew na klerigo sanen inaon to so Jeremias 31:33, 34: “‘Agla ibangat na kada too so kapara ton too, tan kada too so agi to, a kuanto, “Amtaen mo so Katawan” [Hebreo, “Amtaen mo si Jehova”], lapud nakabatan da Ak, manlapud kamelagan ed sikara anggad kabalegan ed sikara,’ so kuan na Katawan [Hebreo, Jehova].” Say patalos ya inusar to so angekal ed nikabiig a ngaran na Dios, a Jehova.—Salmo 103:1, 2.
8. Anto so mangiyiilustra ed kaimportantian na pangusar ed ngaran na Dios?
8 Inyilustra na Salmo 8:9 no akin ya importantin tuloy so pangusar ed ngaran nen Jehova: “O Jehova, Katawan mi, alay kablian na ngaran mo ed amin a dalin!” Ikompara itan ed: “O KATAWAN, a Katawan mi, agaylan talonggaring na ngaran mo ed interon dalin!” (King James Version; nengnengen met so The New American Bible, The Holy Bible—New International Version, Tanakh—The Holy Scriptures) Ingen, unong ya asalambit la ed inmunan artikulo, makagamor itayo na ‘mismon pikakabat na Dios’ no abuloyan tayo so Salita to a mangibangat ed sikatayo. Balet dinan a katulongan ed panagaral na Biblia so mangebat ed saray tepet tayo nipaakar ed kaimportantian na ngaran na Dios?—Uliran 2:1-6.
9. (a) Dinan a publikasyon so makatulong ed sikatayo pian nipaliwawa so kaimportantian na pangusar ed ngaran na Dios? (b) Panon ya impatnag na dakel a managpatalos so agpanagrespeto ed ngaran na Dios?
9 Nayarian tayoy ontupleg ed brosyur a The Divine Name That Will Endure Forever, a nipatalos ed 69 a lenguahe. * Say seksion ya apauloan na “God’s Name—Its Meaning and Pronunciation” (pahina 6-11) so malinew ya angipanengneng a say Hebreon Tetragrammaton (manlapud Griego, a mankabaliksan na “apatiran letra”) so pinmatnag na masulok a 7,000 a danay ed kadaanan iran Hebreon teksto. Ingen ta ginagala na saray klero tan managpatalos ed Judaismo tan Kakristianoan ya ekalen itan diad karaklan ed saray patalos da na Biblia. * Panon dan nibaga a kabat da so Dios tan walaan ira na naabobonan a siglaotan ed sikato anta agda bibidbiren so ngaran to? Say tuan ngaran to so mangilukas ed dalan pian natalosan no anto iray gagala to tan say nipaakar ed sikato. Niarum ni, antoy kaimportantian na samay kabiangan ed modelon pikakasi nen Jesus ya “Ama min wala ka ed tawen, nagalang komon so ngaran mo” no ag-anggan uusaren so ngaran na Dios?—Mateo 6:9; Juan 5:43; 17:6.
Siopa si Jesu-Kristo?
10. Diad antoran paraan a nawalaan itayo na kompleton detalye nipaakar ed bilay tan ministeryo nen Jesus?
10 Say Leksion 3 ed brosyur a Kakaukolanen et apauloan na “Siopa si Jesu-Kristo?” Diad anemira labat a parapo et angitarya itan na antikey iran detalye nipaakar ed si Jesus, say nanlapuan to, tan say gagala na inyakar to diad dalin. Balet, no labay yo so kompleton salaysay nipaakar ed bilay to, say sankaabigan—nilikud ed saray mismon salaysay na Ebanghelyo—et say The Greatest Man Who Ever Lived, a wala la natan ed 111 lenguahe.* Ipaparungtal na sayan libro so kompleton kronolohikon salaysay nipaakar ed bilay tan bangabangat nen Kristo, a nibase ed apatiran Ebanghelyo. Say 133 a kapitulo na satan so angobri ed saray ebento na bilay tan ministeryo nen Jesus. Parad midumaan tan naal-alasir a metodo, nayarian yo so ontupleg ed Insight, Tomo 2, diad silong na paulon “Jesus Christ.”
11. (a) Anto so pidumaan na sisiaen na saray Tastasi nen Jehova nipaakar ed si Jesus? (b) Anto so pigaran teksto ed Biblia a malinew a manusuppiat ed doktrina na Trinidad, tan anton publikasyon so makatulong ed sayan pamaakaran?
11 Diad Kakristianoan, say isyu nipaakar ed si Jesus so nisentro ed no kasin sikato so “Anak na Dios” odino “Dios-Anak”—diad arum a salita et satan so pansusuppiatan a “manunan misteryo ed Makristianon pananisia,” say Trinidad, unong ya impanawag na Catechism of the Catholic Church. Miduma ed saray relihyon na Kakristianoan, manisia iray Tastasi nen Jehova a si Jesus et pinalsa na Dios tan aliwan Dios. Sakey ya alay abig ya impangiwalwal ed sayan tema so naromog ed brosyur a Should You Believe in the Trinity?, a nipatalos ed 95 a lenguahe. * Kabiangan ed dakel iran teksto ya inusar ed satan pian suppiaten so doktrinan Trinidad et say Marcos 13:32 tan 1 Corinto 15:24, 28.
12. Anto so kaaruman a tepet a makanepegan na imano tayo?
12 Saray impaningbat ed tagey nipaakar ed Dios tan si Jesu-Kristo so mangiyilustra ed saray paraan pian personal itayon makapanaral tekep na gagalan tulongan iramay agmikabat ed katuaan na Biblia pian nagamoran da so suston pikakabat. (Juan 17:3) Komusta balet iramay mililimog ed Kristianon kongregasyon ed loob na dakel lan taon? Lapud agamoran da lan pikakabat ed Biblia, kasin nakaukolan da ni so manimanon maong ed personal a panagaral da ed Salita nen Jehova?
Akin a “Manimanon Naynay”?
13. Anto so lingon panmoria na arum nipaakar ed personal a panagaral?
13 Arum ed saray abayaglan membro na kongregasyon so nayarin nailuam a manmatalek labat ed agamoran dan pikakabat ed Biblia diad primero iran taon da bilang Tastasi nen Jehova. Magmainomay so pangikatunongan: “Agko la nakaukolan so manaral nin maong a singa ed saray balo ni. Tutal, no imanoen et aminpigak lan abasa so Biblia tan saray publikasyon na Biblia diad loob na dakel lan taon.” Saya so mipadpara ed pangibagan: “Agko la nakaukolan ya imanoen nin maong so panangan ko, ta nodnonoten pa so amin a kinan ko la ed apalabas.” Amta tayo a nakaukolan na laman so naynay a natagano na masustansia, imparaan a maong a tagano, ta pian mansiansia itan a mabunigas tan aktibo. Agaylan nagkalalo so panmantini tayo ed espiritual a bunigas tan biskeg tayo!—Hebreos 5:12-14.
14. Akin a nakaukolan tayo so manimanon naynay ed inkasikatayo?
14 Kanian amin tayo, balanglan abayaglan manaaral na Biblia odino balo ni, so nakaukolan ya ontalineng ed simbawa nen Pablo ed si Timoteo, a matakken la’d saman ed espiritual tan responsablin manangasikaso: “Manimanon naynay ed inkasika tan ed panagbangat mo. Mansiansia ka ed saratan a bengatla, lapud no gawaen mo itan et nilaban mo so inkasika tan saramay ondengel ed sika.” (1 Timoteo 4:15, 16, NW) Akin ya imanoen tayon maong so bilin nen Pablo? Tandaan, impabitar met nen Pablo a walaan itayo na pibabakal sumpad saray ‘panangalot na Diablo’ tan “sumpa ed saray mauges ya espiritu ed pasen a mangatatawen.” Tan impasakbay nen apostol Pedro a say Diablo so ‘manaanap na buagen to,’ tan satan so nayarin sakey ed sikatayo. Say pagmaliw tayon kampante so nayarin sakey a pankanawnawa a tatalaranan to.—Efeso 6:11, 12; 1 Pedro 5:8.
15. Anto so walan espiritual a depensa tayo, tan panon tayo itan a mantinien?
15 Kanian, anto so pandepensa tayo? Oniay impanonot ed sikatayo nen apostol Pablo: “Alaen yo so sankabukel a kinlong na Dios, pian nayarian yo so mitalindegan ed mauges ya agew, tan, sano agawa yo la yan amin, wala kayo a sitatalindeg.” (Efeso 6:13) Say inkaepektibo na satan ya espiritual a kinlong so aglabat akadepende ed datin kipapasen to noagta ontan met ed regular a panmantini ed satan. Satan a kompleton kagawaan a nanlapud Dios so nepeg sirin a mangilaktip ed kaplesan a pikakabat ed Salitay Dios. Ipapabitar na satan so kaimportantian na pansiansian sikakabat ed kaplesan a pakatalos tayo ed katuaan unong ed ipaparungtal nen Jehova panamegley na Salita to tan diad panamegley na matoor tan makabat ya aripen a klase. Say personal a panagaral ed Biblia tan ed saray publikasyon na Biblia diad regular a paraan so makanakana ed panmantini tayo ed espiritual a kinlong tayo.—Mateo 24:45-47; Efeso 6:14, 15.
16. Anto so nagawaan tayo pian naseguro a namamantini tayon maong so “kinlong na pananisia” tayo?
16 Bilang makanan kabiangan na depensa tayo, impabitar nen Pablo so “kinlong na pananisia,” pian nasarag tayon samperen tan erepen iray mandarlang a gayang nen Satanas, salanti, saray palson akusasyon tan apostatan bangabangat to. (Efeso 6:16) Kanian importantin seguroen so kabiskeg na kinlong na pananisia tayo tan no antoran kundang so gawaen tayo pian namantini tan napaputel tayo itan. Alimbawa, nayarin itepet yo: ‘Panon so pampaparaan ko parad sinimban panagaral ed Biblia panamegley na Say Panag-Bantayan? Kasin aaralen kon maong itan pian ‘makaayat ed aro tan maabig iran gawa’ diad pangiter na inisip a maong iran ebat legan na aral? Kasin bubukayen ko so Biblia tan babasaen ko iray tekston akasitas balet ta ag-inaon? Kasin papasesegen ko so arum diad maligsan pibibiang ko ed saray aral?’ Say espiritual a tagano tayo et anawet, tan nakaukolan a gilingen itan a maong pian nagunggonaan.—Hebreos 5:14; 10:24.
17. (a) Anton samal so uusaren nen Satanas pian napakapuy so espiritualidad tayo? (b) Anto so pansumbra ed samal nen Satanas?
17 Amta nen Satanas iray kaleteyan na ag-ayadyarin totoo, tan masilib iray pakana to. Sakey ed saray paraan na pangikakayat to ed mauges ya impluensya to et diad lawas pangipaparungtal to na pornograpiya diad TV, diad Internet, video, tan diad saray babasaen. Sayan samal so inabuloyan na arum a Kristiano ya ontanek ed maletey iran depensa ra, tan nansumpal iya ed inkabalang na saray pribilehyo ra diad kongregasyon odino mas seryoso ni ingen iran nansumpalan. (Efeso 4:17-19) Anto so panumbra ed espiritual a samal nen Satanas? Agtayo nepeg a paulyanan so regular a panagaral tayo ed Biblia, saray Makristianon miting tayo, tan say kompleton kinlong tayo manlapud Dios. Amin na saraya et mangiiter ed sikatayo na abilidad a mangibiig ed no anto so duga tan aliwa tan gulaen so gugulaen na Dios.—Salmo 97:10; Roma 12:9.
18. Panon itayon nakinlongan na “kampilan na espiritu” diad espiritual a pibabakal tayo?
18 No pansiansiaen tayo so niyugali tayon regular a panagaral na Biblia, aliwa lambengat a putel so depensa tayo lapud suston pikakabat ed Salitay Dios noagta magmaliw met itan ya epektibon opensa panamegley na ‘kampilan na espiritu, salanti, say salitay Dios.’ Say salita na Dios et “mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Efeso 6:17; Hebreos 4:12) No magmaliw itayon onsianon mangusar ed satan a “kampilan,” ag-itayo mainomay a napalikdo ed bengatlan singano agmakapasakit, odino makapasagyat ni ingen, no nipaarap itayo ed saray pakatuksoan, tan ombitar itan bilang makapatey a patit na marelmeng a sakey. Say simpenan tayoy pikakabat tan pakatalos ed Biblia so ontulong ed sikatayon mangipulisay ed marelmeng tan gawaen tayo so maabig. Kanian nakaukolan tayon tepetan so inkasikatayo: ‘Kasin napanmatalkan ni so kampilan ko, odino alatian la? Nairapan ak la kasin makanonot ed saray teksto na Biblia a mamabiskeg ed opensak?’ Mantinien tayo komon so maong ya ugali ed personal a panagaral ed Biblia pian nalabanan so Diablo. —Efeso 4:22-24.
19. Antoray nagunggona tayo no panseetan tayo so personal a panagaral?
19 Insulat nen Pablo: “Amin a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo komon so pankulangan to, a nabangatan a maong ed amin a gawa a maabig.” No ipapuso tayo iray salita nen Pablo ed si Timoteo, napabiskeg tayo so mismon espiritualidad tayo tan mas epektibo so ministeryo tayo. Saray maespiritual a mamatatken tan ministeryal a lingkor so mas makagunggonan tuloy ed kongregasyon, tan makapansiansia itayon amin a malet ed pananisia.—2 Timoteo 3:16, 17; Mateo 7:24-27.
[Saray paimano ed leksab]
^ par. 4 Kaslakan, say interesadon too a manaaral na brosyur a Kakaukolanen so ontuloy a manaral ed libron Pikakabat a Mangitonton ed Andi-anggaan a Bilay, ya impalapag na saray Tastasi nen Jehova. Saray suhestion ed satan a libro so ontulong a mangekal ed saray babeng ed espiritual ya iyaaligwas to.
^ par. 9 Impalapag na saray Tastasi nen Jehova. Saramay walaan na Insight on the Scriptures diad lenguahe ra so nayarin onkonsulta ed Tomo 2, diad silong na paulon “Jehovah.”
^ par. 9 Makatantandan nipuera so pigaran patalos ed Español tan Catalonian lapu ed impangipatalos da ed Hebreon Tetragrammaton, ya angusar na “Yavé,” “Yahveh,” “Jahvè,” tan “Jehová.”
^ par. 11 Impalapag na saray Tastasi nen Jehova.
Kasin Nanonotan Yo?
• Antoran sirkumstansya so makatulong ed epektibon personal a panagaral?
• Antoy lingo ed dakel a patalos na Biblia nipaakar ed ngaran na Dios?
• Antoran teksto ed Biblia so usaren yo pian suppiaten so bangat a Trinidad?
• Anto so nepeg tayon gawaen ta pian nasalimbengan tayoy inkasikatayo manlapud saray pakana nen Satanas, anggano pigapigay taon tayo la bilang tuan Kristiano?
[Tepetepet Parad Panagaral]
[Saray litrato ed pahina 19]
Parad epektibon personal a panagaral, nakaukolan so dugan pasen a daiset so makadisturbo
[Saray litrato ed pahina 23]
Kasin napanmatalkan ni so “kampilan” yo odino alatian la?