Say Sankaabigan a Panaon Pian Manbilay

SANO nipaarap ed mairap iran sirkumstansya, kasin pampipirawatan mo iray apalabas lan maabig a panaon? Konsideraen iray salita na makabat ya Arin Solomon: “Agmo kuan, Anto so sengeg a saray akauna ya agew sikara so magmaong nen saraya? ta agmo upapeten a makabkabat so nipaakar ed saya.”​—Eclesiastes 7:10.

Akin ya insimbawa nen Solomon iya? Lapud amta to a say pakawalaan na realistikon panmoria ed apalabas et makanan tulong pian natalonaan iray agmaabig a kipapasen ed kaplesan. Saraman so manpirawat ed saray apalabas lan maabig a panaon so diad tua et ompan nalilingwanan da a saraman a panaon so napno met na saray problema tan gonigon kanian say bilay so agbalot peteg a maabig. Nayarin walaray magmaong a bengatla ed apalabas, balet seguradon say arum so aliwan ontan. Singa impaimano nen Solomon, aliwan makabat so agrealistikon pannodnonot ed apalabas, lapud talagan agtayo napapawil itan.

Wala tay makapuy ed pampirawat ed apalabas? On, no nasesebelan itayo na satan a mangitukoy odino onadapta ed kaplesan odino no naaamper itayo na satan a mangapresya ed panaon a pambibilayan tayo natan tan ed ilalo a nakayarian tayo.

Diad tua, natan so sankaabigan a panaon pian manbilay, anggaman ondaraak iray problema ed mundo. Akin? Lapud manasingger itayo ed kasumpalan na gagala na Dios ed dalin tan saray bendisyon ed mareen ya uley ed Panarian to. Isisipan na Biblia: “Punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot. Ta saray una a bengatla sikara so linmabas la.” (Apocalipsis 21:4) Diad ontan, lapud maabig a tuloy iray kipapasen, anggapo lay manpirawat parad maabig a panaon ed apalabas.