Tepetepet Manlapud Saray Managbasa

Unong ed Apocalipsis 20:8, nepeg tayo kasin ikuan a dakerakel a totoo so nibalang nen Satanas diad unor a subok?

Dedeskribien na Apocalipsis 20:8 so unor ya iyataki nen Satanas ed totoo a manaayam ed dalin diad sampot na sanlibon taon ya uley na Mesianikon Panarian. Onia so ibabaga na bersikulo nipaakar ed si Satanas: “Ompaway pian siliban to so nasyones a wala ed apatiran suyok na dalin, diad Gog tan Magog, pian sikara so tiponen to nipaakar ed bakal. Say bilang na saraya sikato so singa buer ed dayat.”

Anggaman onaaligwas iray sientipikon metodo tan instrumento, siansian ag-amta so karakel odino bilang na “buer ed dayat.” Kanian, nibaga a say balikas so mangirerepresenta ed ag-amta tan agnadeterminan bilang. Balet kasin kabaliksan ton dakerakel a maong, alablabas, tan agni ingen narandan so bilang na saratan, odino kasin basta labat la ag-amta so karakel ingen ta magenap, odino kabkaabigan?

Say balikas a “singa buer ed dayat” so inusar na Biblia ed pigaran paraan. Alimbawa, onia so nabasa tayo ed Genesis 41:49: “Insinop nen Jose so bukebukel a singa saray buer na dayat, dakerakel a tuloy, angga ed impangitunda to a nambilang; ta agnabilang ed saman.” Say nidadanet dia et say agpakabilang ed satan. Ontan met, inkuan nen Jehova: “Unong ed saray ehersito ed tawen ya agnabilang, ontan met so buer na dayat ya agnasukat; ontan naani so pamarakel ko ed saray ilalak nen David ya aripen ko.” No panon a seguradon agnabilang iray bitewen ed tawen tan buer na dayat, ontan met a seguradon sumpalen nen Jehova so sipan to ed si David.​—Jeremias 33:22.

Mabetbet a say balikas a “buer ed dayat” so manutukoy ed bengatlan dakel tan baleg a bilang. Saray Israelita diad Gilgal so naaburidon maong lapud saray sundalo na Palestina so nandaragup diad Micmas, a “singa buer a wala ed gilig na dayat a karakel.” (1 Samuel 13:5, 6; Uko-ukom 7:12) Ontan met, “say Dios inikdan to si Solomon na kakabatan tan pakatalos a mapalalo ed karakel tan malawig a puso, a singa say buer a wala ed gilig na dayat.” (1 Arari 4:29) Anggaman say abitla ed kada kipapasen et dakel, siansia nin limitado itan.

Say “buer ed dayat” so mankabaliksan met na ag-amta a bilang, anggapoy nisusuherin karakel. Inkuan nen Jehova ed si Abraham: “Papalaren ta ka, tan dia ed panamarakel parakelen ko so ilalak mo a singa saray bitewen ed katawenan, tan singa saray buer a wala ed gilig na dayat.” (Genesis 22:17) Diad impangulit ed sayan sipan ed apo nen Abraham a si Jacob, inusar nen Jehova so balikas a “dabok na dalin,” ya inulit nen Jacob bilang “saray buer na dayat.” (Genesis 28:14; 32:12) Unong ed nansumpalan na saray bengatla, likud ed si Jesu-Kristo, say “bini” nen Abraham so manbilang na 144,000, a tinawag nen Jesus a “melag a pulok.”​—Lucas 12:32; Galacia 3:16, 29; Apocalipsis 7:4; 14:1, 3.

Antoy naaralan tayo ed sarayan alimbawa? Say balikas “a singa buer ed dayat” et aglawas mankabaliksan na agnabilang, agnarandan a bilang; nisay lawas uusaren itan pian deskribien so bengatlan dakerakel odino alablabas ed karakel. Mabetbet a mangirerepresenta itan ed bilang ya ag-amta balet ta magenap ed karakel. Kanian, makatunongan a panisiaan a say rebelyoson ulop a manuporta ed si Satanas ed unor ya iyataki to ed totoo na Dios et, aliwan dakerakel a maong, noagta magenap labat odino kabkaabigan ed karakel pian pakasesgaan. Balet say bilang so siansian ag-amta ed kaplesan.