Propesiya nen Isaias​—Liwawa Parad Amin a Katooan II

Kapitulo Dies

‘Sakey a Panaon na Abig-Linawa’

Isaias 49:1-26

1, 2. (a) Anton bendisyon so nanggayagaan nen Isaias? (b) Siopa so nalalanor ed mapropetiko iran salita a nikurit ed primeron kapaldua na Isaias kapitulo 49?

 ABAYAGLAN panggagayagaan na amin a matoor a totoo so panangabobon tan proteksion na Dios. Balet agbasta ipapagamor nen Jehova so abig-linawa to ed anggan siopa. Nepeg a kualipikado so sakey a too ed satan ya agnaparaan a bendisyon. Si Isaias so sakey lan kinmualipika. Nanggayagaan to so pabor na Dios tan sikatoy inusar nen Jehova pian ipaamta so linawa To ed arum. Sakey lan alimbawa na saya et nikurit ed primeron kapaldua na kapitulo 49 na propesiya nen Isaias.

² Sarayan salita so mapropetikon manutukoy ed bini nen Abraham. Diad primeron kasumpalan, satan a bini et say nasyon na Israel a nanlapud poli nen Abraham. Balet, karaklan ed saratan a salita so malinew ya onaplika ed abayaglan iilaloan a Bini nen Abraham, say insipan a Mesias. Saratan ya impuyan a salita so onaplika met ed espiritual iran agagi na Mesias, a nagmaliw a kabiangan na espiritual a bini nen Abraham tan ed say “Israel na Dios.” (Galacia 3:7, 16, 29; 6:16) Nagkalautla, sayan kabiangan na propesiya nen Isaias so manedeskribe ed nikaduman relasyon nen Jehova tan say pinabli ton Anak, si Jesu-Kristo.​—Isaias 49:26.

Tinuro tan Sinalimbengan nen Jehova

3, 4. (a) Anto so walan suporta ed Mesias? (b) Siopa so pitotongtongan na Mesias?

³ Nanggayagaan na Mesias so abig-linawa, odino abobon na Dios. Inter ed sikato nen Jehova so autoridad tan saray kualipikasyon a nakaukolan pian nasumpal so inkigangganan to. Matukotukoy sirin ya inkuan na arapen a Mesias: “Talineng yo ak, O pulpulo; tan dengel kayo a balbaley a manlapu ed arawi: Si Jehova tinawag toak a nanlapu ed eges nanlapu ed eges nen inak asalsalita la so ngaran ko.”​—Isaias 49:1.

⁴ Dia et impaarap na Mesias iray balikas to ed saray totoo a “manlapu ed arawi.” Anggaman nisipan so Mesias ed Judion totoo, say ministeryo to so onkanan mamendisyon ed amin a nasyon. (Mateo 25:31-33) Saray “pulpulo” tan “balbaley,” anggaman ag-ira akisipanan ed si Jehova, so nepeg ya ontalineng ed Mesias na Israel lapud sikato so nibaki a mangitarok na kilalaban ed amin a katooan.

5. Panon so impanawag ed Mesias anggan sakbay ni na inkianak to bilang too?

⁵ Ibabaga na propesiya a ngaranan nen Jehova so Mesias sakbay a sikatoy nianak bilang too. (Mateo 1:21; Lucas 1:31) Antis nin nianak si Jesus, sikato so tinawag la a ‘Makapakelaw a Mananimbawa, Makapanyarin Dios, Andi-anggaan ya Ama, Prinsipe na Kareenan.’ (Isaias 9:6) Say Emmanuel, a nayarin ngaran na anak nen Isaias, so nagmaliw met a mapropetikon ngaran na Mesias. (Isaias 7:14; Mateo 1:21-23) Anggan say inter a ngaran a nakabat so Mesias​—Jesus​—so nipasakbay met la antis na inkianak to. (Lucas 1:30, 31) Sayan ngaran so nanlapu ed Hebreon salita a mankabaliksan na “Si Jehova so Kilalaban.” Malinew, aliwan si Jesus so anuro ed inkasikato pian magmaliw a Kristo.

6. Diad anton dalan a say sangi na Mesias et singa makdem a kampilan, tan panon a sikatoy niyamot, odino niyatol?

⁶ Oniay katuloyan na mapropetiko iran salita na Mesias: “Et ginawa to so sangik a singa sakey a kampilan a makdem; sinaniban to  ak ed anino na lima to: tan sikato ginawa to ak a sakey a masileng a pana: dia ed pasikit to inyatol toak.” (Isaias 49:2) Sanen sinmabi so panaon a ginmapo so Mesias nen Jehova ed mangaraldalin a ministeryo to nen 29 K.P., saray salita tan kiwas nen Jesus so talagan apaneknekan a singa makdem tan naubol ya ayura, ya ontanek ed puso na saray onderengel ed sikato. (Lucas 4:31, 32) Saray salita tan kiwas to so amasulag ed baleg a kabusol nen Jehova, si Satanas, tan saray alipores to. Manlapu la’d panaon na inkianak nen Jesus, sinali nen Satanas a tigwayen so bilay To, balet ta si Jesus so singa pana a niyatol ed mismon pasikit nen Jehova. * Sikato so makapanmatalek ed pananalimbeng na Ama to. (Salmo 91:1; Lucas 1:35) Diad aturon panaon et inter nen Jesus so bilay to nisesengeg ed katooan. Balet onsabi so panaon sano sikato so onsabi bilang makapanyarin mangatatawen a mibabakal a naayuraan ed miduman pantalos, tekep na makdem a kampilan ya ompapaway ed sangi to. Diad satan a panaon, say makdem a kampilan so mangirepresenta ed autoridad nen Jesus a mangiyabawag tan mangipaakseb ed saray panangukom sumpad kakabusol nen Jehova.​—Apocalipsis 1:16.

Aliwan Maapa Iray Pansasagpot na Lingkor na Dios

7. Siopa so kiyaplikaan na saray salita nen Jehova diad Isaias 49:3, tan akin?

⁷ Natan et sinalita nen Jehova irayan mapropetikon salita: “Sika so aripen ko; Israel, a dia ed sika so kigloriaan ko.” (Isaias 49:3) Tinukoy nen Jehova so nasyon na Israel bilang say lingkor to. (Isaias 41:8) Balet si Jesu-Kristo so matalonggaring a Lingkor na Dios. (Gawa 3:13) Anggapo la ed saray pinalsa na Dios so magmaong a makapangiwandag ed ‘gloria’ nen Jehova nen say si Jesus. Kanian, anggaman satan so literal ya ontutukoy ed Israel, saratan a salita so peteg ya onaaplika ed si Jesus.​—Juan 14:9; Colosas 1:15.

8. Panon so inkiwas na saray mismon kanasyonan na Mesias ed sikato, balet siopa so ilaloan na Mesias a manhusga ed italona to?

⁸ Balet, agta tua a si Jesus so minudmora tan impulisay na karaklan ed saray kanasyonan to? On. Diad inkalapagan, say nasyon na Israel so ag-angawat ed si Jesus bilang alanaan a Lingkor na Dios. (Juan 1:11) Singa anggapoy kakanaan odino ag-importante ed saray kapanaonan nen Jesus so amin a sinumpal to legan a wadiad dalin. Sayan ompatnag ya insaew ed ministeryo to so tinmumbok ya impasigilig na Mesias: “Nansagpot ak ed maapa, inagamil ko so biskeg ko a nipaakar ed anggapo tan ed kaapaan.” (Isaias 49:4a) Agnibesngaw irayan balikas lapud adismaya so Mesias. Konsideraen pa so ontumbok ya imbaga to: “[Say] inkatunong ya onnepeg ed siak a wala ed Jehova, tan say tumang ko wala ed Dios ko.” (Isaias 49:4b) Say intalona na Mesias so husgaan, na aliwan totoo, noagta say Dios.

9, 10. (a) Anto so angigangganan nen Jehova ed say Mesias, tan antoran resulta so arapat to? (b) Panon a napaseseg iray Kristiano natan ed saray naeksperiensya na Mesias?

⁹ Si Jesus so interesadon tuloy ed panangabobon, odino abig-linawa na Dios. Diad propesiya et oniay inkuan na Mesias: “Natan kuan nen Jehova a nanggawa ed siak ya aripen to a nanlapu ed eges, pian papawilen ko ed sikato si Jacob, tan pian say Israel natipon ed sikato (ta mabli ak ed saray mata nen Jehova, tan say Dios ko nagmaliw a biskeg ko).” (Isaias 49:5) Sinmabi so Mesias pian papawilen so kapusoan na saray anak na Israel ed mangatatawen ya Ama ra. Agkinmiwas so karaklan ed sikara, balet ta kinmiwas so arum. Balet, say peteg a tumang to et manlapud si Jehova a Dios. Nasukat so itatalona to, aliwan ed estandarte na too, noagta unong ed saray mismon estandarte nen Jehova.

 ¹⁰ Natan et nayarin liknaen na saray patumbok nen Jesus a kaapaan so pansasagpot da. Diad arum a paspasen, saray resulta na ministeryo ra so nayarin ompatnag ya andiay-kakanaan no nikompara ed karakel na trabaho tan impansagpot da. Balet sikara so siansian mansusungdo, lapud apaseseg ira ed ehemplo nen Jesus. Sikara so apabiskeg met ed saray salita nen apostol Pablo, ya angisulat: “Kanian inararok ira ya agagi, mansiansia kayo a malet, agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan.”​—1 Corinto 15:58.

“Silew na Saray Gentil”

11, 12. Panon a say Mesias et nagmaliw a “silew na saray Gentil”?

¹¹ Diad propesiya nen Isaias et pinaseseg nen Jehova so Mesias diad impangipanonot ed sikato a say pagmaliw a Lingkor na Dios et aliwan “daiset [“melag,” NW] a tuloy a bengatla.” Si Jesus so “mamaalagey ed saray kailalakan nen Jacob, tan mangipawil na niyagel ya Israel.” Oniay kaaruman ya impaliwawa nen Jehova: “Iter ta ka met naani a silew na saray Gentil, pian makapagmaliw ka a pangilaban ko angga ed sampot na dalin.” (Isaias 49:6) Panon a liliwawaan nen Jesus so totoo “angga ed sampot na dalin” anta angga ed Israel labat so mangaraldalin a ministeryo to?

¹² Ipapanengneng na rekord na Biblia a say ‘silew [na Dios] ed saray Gentil’ so agnaerep sano ontaynan si Jesus diad dalin. Manga 15 a taon kayari impatey nen Jesus, saray misionaryo a di Pablo tan Bernabe so angaon ed propesiya na Isaias 49:6 tan inyaplika ra itan ed saray babangatan nen Jesus, saray espiritual ya agagi to. Oniay impaliwawa ra: “Ingganggan na Katawan ed sikami, a nankuan; Inggaton ta ka a sakey a silew na saray Gentiles. Pian sika so onkanan kilabanan ya angga ed kasampotan na dalin.” (Gawa 13:47) Sakbay na impatey to, naimatonan nen Pablo a nikayat so maong a balita na kilalaban ya aliwa labat a diad saray Judio noagta dia “ed amin a pinalsa ed leksab na tawen.” (Colosas 1:6, 23) Natan et satan a kimey so itutultuloy na saray nakekeraan ya alanaan ya agagi nen Kristo. Diad suporta na “baleg ya ulop” a manbilang na minilyon, manlilingkor ira bilang “silew na saray Gentil” diad masulok a 230 a daldalin diad interon mundo.​—Apocalipsis 7:9.

13, 14. (a) Say Mesias tan saray patumbok to so nipaarap ed anton reaksion ed panagpulong a kimey? (b) Anto so agawan impanguman na saray kipapasen?

¹³ Maseguron apaneknekan a si Jehova so mamapabiskeg ed Lingkor to, say Mesias, ed saray alanaan ya agagi na Mesias, tan ed amin na saramay kabiangan na baleg ya ulop a kaiba ran mangitutuloy ed panangipulong na maong a balita. Tua, singa si Jesus, saray babangatan to so nipapaarap ed panagmudmora tan isusumpa. (Juan 15:20) Balet diad aturon panaon to, lawas imaneobra nen Jehova iray kipapasen pian nilegyas tan natumangan iray matoor a lingkor to. Nipaakar ed Mesias, a ‘minudmora na too’ tan ‘ginula na nasyon,’ oniay insipan nen Jehova: “Saray arari nanengneng da naani tan onalagey ira; saray uloen, et mangigalang ira naani; lapu ed Jehova a matoor, say Santo na Israel, ya amili ed sika.”​—Isaias 49:7.

¹⁴ Diad saginonor et oniay insulat nen apostol Pablo ed saray Kristiano diad Filipos nipaakar ed sayan impasakbay a panguman na saray sirkumstansya. Deneskribe to si Jesus bilang say minudmora ed panamairapan a kiew balet ta intandoro na Dios. Inikdan nen Jehova so Lingkor to na “sankatageyan ya impangirayew, tan inter to ed sikato so ngaran ya analonggaring ed ami-amin a ngaran; a dia ed ngaran a Jesus so talimukoran na amin a pueg.” (Filipos 2:8-11) Saray matoor a patumbok nen Kristo so apasakbayan a sikara met so napasegsegang. Balet singa say Mesias, sikara so apaseguroan na abig-linawa nen Jehova.​—Mateo 5:10-12; 24:9-13; Marcos 10:29, 30.

‘Say Nagkalalon Makapalikliket a Panaon’

15. Anton nikaduman “panaon” so asalambit ed propesiya nen Isaias, tan anto so kabaliksan na satan?

¹⁵ Nantultuloy so propesiya nen Isaias tekep  na importantin tuloy a balikas. Oniay kuan nen Jehova ed Mesias: “Dia ed sakey a panaon a makana [“abig-linawa,” NW] inebatan ta ka, tan dia ed sakey ya agew na kilalaban tinulongan ta ka; et yagel ta ka naani tan iter ta ka naani a sakey a sipan a nipaakar ed totoo.” (Isaias 49:8a) Mipadpara so propesiyan nikurit ed Salmo 69:13-18. Tutukoyen na salmista so ‘panaon na abig-linawa,’ ya inusar to so balikas a “manepenepeg a panaon.” Say kabaliksan na sarayan termino et ninanatnat so abig-linawa tan proteksion nen Jehova ed nikaduman paraan balet dia lambengat ed leleg na espesipiko tan temporaryon panaon.

16. Anto so panaon na abig-linawa nen Jehova parad kadaanan ya Israel?

¹⁶ Kapigan itan a panaon na abig-linawa? Diad orihinal a kipapasen, saray salita so kabiangan na propesiya nipaakar ed panangipawil tan nipasakbay so kipawil na saray Judio manlapud inkadestiero. Naeksperiensya na nasyon na Israel so panaon na abig-linawa sanen ‘nipaalagey da so dalin’ tan abawi da iray “abagbag a tawir.” (Isaias 49:8b) Aliwa la ran “abalor” ed Babilonia. Sanen pasempet la ra, sineguro nen Jehova ya ag-ira“naerasan” odino “napgaan,” nisay “nasakitan na petang tan say banwa.” Saray nikaykayat ya Israelitas so nantutugyop a pinmawil ed binalegan dan dalin “manlapu ed arawi . . . , manlapu ed amianen tan manlapu ed sagur.” (Isaias 49:9-12) Anggaman dramatiko iyan inmunan kasumpalan, ipapanengneng na Biblia a walaray malaknab nin aplikasyon na sayan propesiya.

17, 18. Anton panaon na abig-linawa so inggetar nen Jehova legan na inmunan siglo?

¹⁷ Unona, diad samay inkianak nen Jesus et inyabawag na saray anghel so deen tan abig-linawa, odino pabor na Dios ed totoo. (Lucas 2:13, 14) Sayan abig-linawa so agniyopresi ed totoo diad inkalapagan, noagta diad saraman lambengat so angagamil na pananisia ed si Jesus. Diad saginonor et mapublikon binasa nen Jesus so propesiya na Isaias 61:1, 2 tan inyaplika to itan ed inkasikato bilang say manangiyabawag na “makapaliket a taon na Katawan.” (Lucas 4:17-21) Sinaglawi nen apostol Pablo so nipaakar ed impangawat na Kristo ed nikaduman proteksion nen Jehova legan na panaon na impagmaliw ton too. (Hebreos 5:7-9) Kanian sayan panaon na abig-linawa et onaplika ed pabor na Dios ed si Jesus legan na impanbilay to bilang too.

¹⁸ Balet, wala ni so kaaruman ya aplikasyon na sayan propesiya. Kayari na impangaon ed saray salita na Isaias nipaakar ed panaon na abig-linawa, intuloy ya inkuan nen Pablo: “Nia, natan so makanan [“nagkalalon makapaliket a,” NW] panaon; nia, natan so agew na panangilaban.” (2 Corinto 6:2) Insulat nen Pablo irayan salita kayari na 22 taon manlapu la’d impatey nen Jesus. Mapatnag, diad inkaporma na Kristianon kongregasyon nen Pentecostes na 33 K.P., innatnat nen Jehova iyan taon na abig-linawa ta pian nilaktip iray alanaan a patumbok nen Kristo.

19. Panon a nagunggonaan natan iray Kristiano ed panaon na abig-linawa nen Jehova?

¹⁹ Komusta balet iray patumbok nen Jesus natan ya aliwan alanaan a mananawir ed mangatatawen a panarian na Dios? Kasin nagunggonaan iramay walaan na mangaraldalin ya ilalo ed sayan makapaliket a panaon? On. Ipapabitar na libro na Biblia ya Apocalipsis a sayan panaon na abig-linawa nen Jehova ed baleg ya ulop ya ompaway ed ‘baleg a kairapan’ so manggayaga ed bilay diad paraison dalin. (Apocalipsis 7:13-17) Sirin, naanamot na amin a Kristiano iyan limitadon panat na panaon leleg ya iyoopresi nen Jehova so abig-linawa to ed saray ag-ayadyarin totoo.

20. Anto so paraan ya agnasaew na saray Kristiano so gagala na agkanepegan a panangasi nen Jehova?

²⁰ Si apostol Pablo so amasakbay ni sakbay ton inyabawag so naabobonan a panaon nen Jehova. Sikato so akikasi ed saray Kristiano ‘ya agda aawaten so grasya na Dios ed andi-kakanaan.’ (2 Corinto 6:1) Mitunosan ed satan, aanamoten na saray Kristiano so amin a pankanawnawa pian paliketen so Dios tan gawaen so linawa to. (Efeso 5:15, 16) Pakagunggonaan  da so panumbok ed pananimbawa nen Pablo: “Nengneng yo, agagi, agla piga no wala naani ed sikayo so sakey a puson mauges ed agpanisia, diad yarawi to ed Dios a mabilay, balet mansisimbawaan kayo [ed] sakey tan sakey ed inagew-agew legan a nibabagay Natan ed sayan agew; ompan wala so manpaawet ed sikayo lapud panamalingo na kasalanan.”​—Hebreos 3:12, 13.

21. Anton magayagan balikas so anampotan na inmunan kabiangan na Isaias kapitulo 49?

²¹ Diad impanampot na mapropetiko iran balikas ed baetan nen Jehova tan say Mesias to, oniay magayagan imbalikas nen Isaias: “Mankanta kayo, O sikayo katawenan, tan manliket ka, O dalin; tan onarak-ak kayo ed pankanta, O palpalandey, ta si Jehova niligliwa to so baley to, tan maparaan naani panangasi ed saray maermen a totoo to.” (Isaias 49:13) Agaylan abig iratan a salita na ligliwa parad saray Israelita nensaman tan parad say baleg a Lingkor nen Jehova, si Jesu-Kristo, ontan met ed saray alanaan a lingkor nen Jehova tan ed ‘arum a karneron’ kakaiba ra natan!​—Juan 10:16.

Aglilingwanan nen Jehova so Totoo To

22. Panon so impangidanet nen Jehova ya agton balot lingwanan so totoo to?

²² Intuloy natan nen Isaias ya isalaysay iray panangiyabawag nen Jehova. Impasakbay to a saray adestieron Israelita so nayarin nakesawan tan naandian na ilalo. Inkuan nen Isaias: “Say Sion inkuan to, Si Jehova pinaulyan to ak, et say Katawan alingwanan to ak.” (Isaias 49:14) Tua kasi itan? Kasin intalirak nen Jehova so totoo to tan nilingwanan to la ra? Bilang pinagkasangiyan nen Jehova, oniay intuloy nen Isaias: “Nayarian ta na sakey a bii a lingwanan so anak to a mansuso, ya agto komon kasian so anak na eges to? On, saraya makalingwan ira, balet agak makalingwan ed sika.” (Isaias 49:15) Agaylan maaron kiwas nen Jehova! Say panangaro na Dios ed totoo to so pirmi ni nen say panangaro na ina ed anak to. Sikato so sinononot lawas ed saray matoor ed sikato. Nonodnonoten to ira a singano akaukit so kangaranan da ed lima to: “Nia, imbolik ta ka ed dakulap na saray limak; saray bakor mo wala ra a siansia ed arap ko.”​—Isaias 49:16.

23. Panon so impamaseseg nen Pablo ed saray Kristiano a manmatalek ya ag-ira lingwanan nen Jehova?

²³ Diad sulat to ed saray taga-Galacia, binilin nen apostol Pablo iray Kristiano: “Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil.” (Galacia 6:9) Diad saray Hebreo et oniay makapaseseg ya insulat to: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) Agtayon balot komon liliknaen a nilingwanan la nen Jehova so totoo to. Singa say kadaanan a Sion, saray Kristiano so walaan na maabig a rason pian manliket tan siaanos a manalagar ed si Jehova. Mapekder ton totooren iray kondisyon ed impisipanan tan sipan to.

24. Diad anton paraan a nipawil so Sion, tan antoray nitepet?

²⁴ Panamegley nen Isaias et angitarya si Jehova na kaaruman a ligliwa. Saramay ‘mamabagbag [ed Sion],’ balanglan saray taga-Babilonia odino apostatan Judio, so aliwa lan sesga. “Saray anak” na Sion, saray adestieron Judio a nansiansian matoor ed si Jehova, ‘nansiglat ira.’ Sikara so ‘natipon.’ Diad impanapura ran sinmempet ed Jerusalem, saray akapawil a Judio so magmaliw a dekorasyon ed kabiseran syudad da, a singa “sakey a nobya” ya akawesan na “along.” (Isaias 49:17, 18) Saray pasen na Sion so “kibalatar.” Isipen pa so inkasurprisa to sanen biglan dinmakel lay manaayam a nagmaliw lan maitop so panaayaman to. (Basaen so Isaias 49:19, 20.) Natural lambengat a tepeten to no iner so nanlapuan na sayan amin ya ananak: “Saman la ikuan mo ed pusom, Siopa so angiyanak ed saraya ed siak, anta naulila ak ed saray ana’ko, tan manbukbukor ak, sakey a nibantak, tan pawilpawil a manakar-akar? Et siopa so maniwi ed saraya? Nia, apaulyan ak a saksakey: saraya iner so kawalaan da nensaman?” (Isaias 49:21)  Agaylan liket a kipapasen parad datin lepes a Sion!

25. Diad moderno iran panaon, anton kipawil so naeksperiensya na espiritual ya Israel?

²⁵ Sarayan salita so walaan na modernon kasumpalan. Diad mairap iran taon na inmunan guerra mundial, asagmak na espiritual ya Israel so peryodo na impankibalatar tan impakautibo. Balet sikato so nipawil tan niwala ed espiritual a paraiso. (Isaias 35:1-10) Singa samay datin nankibalatar a syudad a deneskribe nen Isaias, panliketan to​—a singa panangibaga​—so namukot na maliket tan aktibo iran mandadayew ed si Jehova.

‘Tanda Parad Saray Totoo’

26. Anton panangidirehi so intarya nen Jehova ed nibulos a totoo to?

²⁶ Diad mapropetikon paraan, intarok natan nen Jehova si Isaias ed panaon sano nibulos so totoo To manlapud Babilonia. Kasin makaawat ira na madibinon panangigiya? Oniay ebat nen Jehova: “Nia, itagey ko naani so limak ed saray nasyon, tan ipatagey ko naani so laylay [“tanda,” NW] ko ed saray totoo; et yakar da naani so saray anak mo a lalaki ed saray akwalan da; et yakar da naani so saray anak mo a bibii ed abala ra.” (Isaias 49:22) Diad orihinal a kasumpalan, say Jerusalem, a datin sentro na gobierno tan kawalaan na templo nen Jehova, so nagmaliw a “tanda.” Anggan say prominente tan maimpluensyan totoo na arum iran nasyon, a singa “saray ar-ari” tan “saray reyna,” so onayuda ed saray Israelita diad pambaroy dan pasempet. (Isaias 49:23a) Saray Persianon arari a di Ciro tan Artaxerxes Longimanus tan saray sankaabungan da so kabiangan ed saray tinmulong. (Esdras 5:13; 7:11-26) Tan saray salita nen Isaias so walaan na kaaruman ya aplikasyon.

27. (a) Diad babaleg a kasumpalan, anton “tanda” so dagsaan na saray totoo? (b) Anto so resulta sano amin a nasyones so napaskar ya ondakmomo ed pananguley na Mesias?

²⁷ Asaglawi ed Isaias 11:10 so ‘tanda parad saray totoo.’ Inyaplika nen apostol Pablo irayan salita ed si Kristo Jesus. (Roma 15:8-12) Kanian, diad babaleg a kasumpalan, si Jesus tan saray alanaan na espiritu a kaiba ton manuley so “tanda” nen Jehova a pandagsaan na saray totoo. (Apocalipsis 14:1) Diad nigeter a panaon et amin a totoo diad dalin​—anggan saray manuuley natan​—so kaukolan ya ondakmomo ed pananguley na Mesias. (Salmo 2:10, 11; Daniel 2:44) Anto so resulta? Inkuan nen Jehova: “Naamtaan mo naani a siak si Jehova; et saray manalagar ed siak ag-ira naani nabaingan.”​—Isaias 49:23b.

‘Natan et Asingsingger la so Kilalaban Tayo’

28. (a) Diad antoran salita a papaseguroan lamet nen Jehova so totoo to a sikara so nibulos? (b) Anton pipapaknaan so totooren ni nen Jehova no nipaakar ed totoo to?

²⁸ Arum ed saramay adestiero ed Babilonia so nayarin mankelaw, ‘Posibli kasin talaga a nibulos so Israel?’ Satan a tepet so inkonsidera nen Jehova diad impanepet toy: “Naekal naani ta so samsam ed mabiskeg, odino say maptek ya adakep nabulosan ta?” (Isaias 49:24) Say ebat et on. Sikara so pinaseguroan nen Jehova: “Anggan saray adakep na biskeg naekal ira naani, tan say sinamsam na makapakebbiew nilaban naani.” (Isaias 49:25a) Agaylan makaligliwan panamaseguro! Niarum ni, say abig-linawa nen Jehova ed totoo to so atekepan na mapekder a pipapaknaan a nasalimbengan ira. Diad maseguro iran balikas et oniay kuanto: “Misangsangan ak naani ed misangsangan ed sika, tan ilaban ko naani so saray anak mo.” (Isaias 49:25b) Satan a pipapaknaan so onkukurang ni. Unong a nirekord ed Zacarias 2:8, oniay kuan nen Jehova ed totoo to: ‘Say maniwit ed sikayo diwiten to so bukel na matak.’ Tua, panggagayagaan tayo natan so panaon na abig-linawa a walaan ni na pankanawnawa iray totoo diad interon dalin ya ondagsa ed espiritual a Sion. Balet, satan a panaon na abig-linawa so mangangga.

29. Anton mauddiem ya iilaloan so manatalaran ed saramay agmanguunor ed si Jehova?

²⁹ Anto so nagawa ed saramay anawet-tenten ya agmanguunor ed si Jehova tan ed saramay  mamapasegsegang ni ingen ed saray mandadayew ed sikato? Inkuan to: “Pakanen ko naani so saray mamairap ed sika ed laman da lanlamang; et nabuek ira ed dala ra lanlamang, a singa masamit ya alak.” (Isaias 49:26a) Mauddiem ya iilaloan! Saratan a benger ya onsusumpa so andian na magnayon ya arapen. Naderal ira. Sirin, diad pangisalba to ed totoo to tan diad paneral to ed saray kabusol da, si Jehova so naimatonan bilang Manangilaban. “Amin a laman naamtaan to naani a siak, si Jehova, so Mangilaban ed sika, tan Mananondon mo, say Makapanyari nen Jacob.”​—Isaias 49:26b.

30. Antoran gawa na panangilaban so ginawa nen Jehova nisesengeg ed totoo to, tan anto so gawaen to ni?

³⁰ Saratan a salita so primeron inmaplika sanen inusar nen Jehova si Ciro pian ibulos so totoo To manlapud impakaaripen ed Babilonia. Inmaplika met iratan nen 1919 sanen inusar nen Jehova so nitronon Anak to, si Jesu-Kristo, pian ibulos so totoo To manlapud espiritual ya inkaaripen. Sirin, tutukoyen na Biblia so nipaakar ed si Jehova tan si Jesus bilang saray manangilaban. (Tito 2:11-13; 3:4-6) Si Jehova so Manangilaban tayo, tan si Jesus, say Mesias, so “Manunan Manangilaman” to. (Gawa 5:31, NW) Peteg a makapakelaw iray panangilaban na Dios panamegley nen Jesu-Kristo. Diad panamegley na maong a balita, imbulos nen Jehova iray maptek-impanpuso manlapud impakaaripen ed palson relihyon. Panamegley na dondon bagat, sikara so imbulos to manlapud impakaaripen ed kasalanan tan patey. Nen 1919 et inliktar to iray agagi nen Jesus manlapud espiritual ya inkaaripen. Tan diad manasingger lan bakal na Armagedon, iliktar to so baleg ya ulop na matoor iran totoo manlapud kadederal ya onsabi ed saray managkasalanan.

31. Panon so nepeg ya ikiwas na saray Kristiano diad pakagamor da na abig-linawa na Dios?

³¹ Agaylan pribilehyo sirin so pakagamor ed abig-linawa na Dios! Komon ta amin tayo so sikakabat a mangusar ed sayan makapaliket a panaon. Tan komon ta onkiwas itayo a mitunosan ed inkaganatan na panaon tayo, a manimano ed saray salita nen Pablo ed saray taga-Roma: “Dia ed pikabat na panaon, ta natan panaon la ya iliing yo ed ugip yo; ta natan asisingger ed sikatayo so kilalaban tayo nen sanen inmuna a sinisia tayo. Say labi aralem la, tan say agew asingger la: imbantak tayo sirin so saray gawa na kabilungetan, ikawes tayo so saray ayura na silew. Manakar itayo a masimpit a singa dia ed agew; aliwa a dia ed kasibaan tan panagbuanges, aliwan dia ed liket a minumundo tan kabaglan, aliwa a dia ed kolkol tan imon. Noag ingen ikawes yo so Katawan tayo a Jesu-Kristo, tan agyo papagaan so laman.”​—Roma 13:11-14.

32. Antoray panamaseguro ed totoo na Dios?

³² Itultuloy nen Jehova a paboran iramay ontatalineng ed simbawa to. Sikara so ikdan to na biskeg tan abilidad a nakaukolan da pian nasumpal da so panangipulong na maong a balita. (2 Corinto 4:7) Usaren nen Jehova iray lingkor to a singa panguusar to ed Lider da, si Jesus. Saray sangi ra so pagmaliwen ton singa “kampilan a makdem” ta pian nasabi ra so kapusoan na saray mauyamo tekep na mensahe na maong a balita. (Mateo 28:19, 20) Salimbengan to so totoo to “ed anino na lima to.” Singa “masileng a pana,” niyatol ira ed “pasikit to.” On, ag-ikaindan nen Jehova so totoo to!​—Salmo 94:14; Isaias 49:2, 15.

[Paimano ed Leksab]

[Tepetepet Parad Panagaral]