Saray Leksion ed Nirekord ya Inkianak nen Jesus

MINILYON so nasasagyat ed salaysay na inkianak nen Jesus. Nipapatnag iya diad dakerakel a Belen ya ipaparungtal tan iyaakto ed nanduruman parte na mundo no panaon na Krismas. Anggaman satan so makapasagyat, saray ebento nipaakar ed inkianak nen Jesus so ag-insulat ed Biblia pian paliketen so totoo. Imbes, saratan et kabiangan na amin a Kasulatan ya impuyan na Dios pian kibangatan tan pakasimbawaan.​—2 Timoteo 3:16.

No kaliktan na Dios a selebraan na saray Kristiano so inkianak nen Jesus, intarya komon sirin na Biblia so eksakton petsa. Kasin intarya na satan? Kayarin sinalambit a nianak si Jesus sanen saray managpastol so walad paway a manpupuyat pian bantayan iray pulok da, oniay inkuan na koma-19 siglo ya iskolar na Biblia a si Albert Barnes: “Base’d saya et malinew a say Manangiliktar tayo so nianak antis na koma-25 na Disyembre . . . Diad satan a panaon et ambetel, tan nagkalalo la ed atagey tan pinmalandey iran rehyon ya asingger ed Betlehem. Ag-imparungtal na Dios so panaon na inkianak [nen Jesus]. . . . Nisay importante nin amtaen so petsa; ta no ontan, impreserba komon na Dios so rekord na satan.”

Diad kasunian, say apatiran managsulat na Ebanghelyo so malinew ya angipaamta ed sikatayo ed agew na impatey nen Jesus. Satan so agawa ed agew na Paskua, a seselebraan ed petsa 14 ed bulan na saray Judio a Nisan, diad primabera. Niarum ni, espesipikon ingganggan nen Jesus iray patumbok to a selebraan itan ya agew bilang pakanodnonotan ed  sikato. (Lucas 22:19) Anggapoy naromog ed Biblia a ganggan a kaukolan a selebraan so inkianak nen Jesus, nisay inkianak na arum a too. Makapaermen ta saray pansasangsang nipaakar ed petsa na inkianak nen Jesus so angiyamot ed mas makatantanda iran ebento ya agawa ed saman a panaon.

Atateng a Pinili na Dios

Diad nilibon pamilya ed Israel, anton klase na atateng so pinili na Dios a mamabaleg ed Anak to? Kasin impasen Ton importante iran aspekto so inkabantog tan kayamanan? Andi. Imbes, inimano nen Jehova so espiritual iran kalidad na sarayan ateng. Usisaen pa so panangidayew a kanta nen Maria a nirekord ed Lucas 1:46-55, a kinanta to kayarin nibaga ed sikato so pribilehyon magmaliw ya ina na Mesias. Kabiangan ed imbaga to so: “Itandoro na kamarerwak so Katawan . . . ta ninengneng to so kaabebaan na aripen to.” Sipapaabeba ton minoria so inkasikato bilang sakey a wala ed “kaabebaan” ya aripen nen Jehova. Mas importante, ipapatnag na marakdakep a balikas na panangidayew nen Maria diad kanta a sikatoy maespiritual a too a malaknab so kakabatan to ed Kasulatan. Anggaman sakey a makasalanan a kapolian nen Adan, sikato so sankaabigan a pili bilang ina na Anak na Dios diad dalin.

Komusta so asawa nen Maria, ya anagibi ed si Jesus? Si Jose so sakey a toon walaan na mausar a kakabatan ed panagkarpentero. Lapud mabulos a mankimey na impasya, alegpet to so pamilya to a nagmaliw a limaran anak a lalaki tan duaran anak a bibii diad saginonor. (Mateo 13:55, 56) Aliwan mayaman si Jose. Sanen kaukolan lan iparungtal nen Maria so panguloan ya anak ton laki diad templo na Dios, nayarin adismaya si Jose lapud agto niiter so bagat a karnero. Imbes, inusar da so parad saray mairap-bilay a probisyon. Nipaakar ed ina na kapangiyanak ya ugaw, oniay ibabaga na ganggan na Dios: “No saray kayarian to agda nasarag so mamawala na sakey a kilaw a karnero, say bii mangala naani na duaran palekpek, odino duaran sibong a malapati; say sakey onkana a sakey a yaapay a poolan, tan say sakey onkana a yaapay lapu ed kasalanan: tan say saserdote manggawa naani panakbong na kasalanan a nipaakar ed satan a bii et sikato naani malinis la.”​—Levitico 12:8; Lucas 2:22-24.

Ibabaga na Biblia a si Jose et “maptek.” (Mateo 1:19) Alimbawa, sikatoy ag-akiakdol ed birhen ya asawa to angga ed agnianak si Jesus. Saya so angamper ed antokaman a lingon pantalos ed no siopa so peteg ya Ama nen Jesus. Nayarin aliwan mainomay parad balon kasal a paliisan so piakdol bangta sanamong, balet ipapanengneng na satan a pinabli ra so pribilehyo ra ya apili a mamabaleg ed Anak na Dios.​—Mateo 1:24, 25.

Singa si Maria, si Jose so maespiritual a too. Sikatoy tinaon ya ontutundan mantrabaho tan aawiten toy pamilya to a manbaroy na taloy agew manlapud Nazaret pian onatendi ed tinaon a Piesta na Paskua diad Jerusalem. (Lucas 2:41) Ontan met, nayarin impasal nen Jose so kalangweran nin Jesus ed sinimba a niyugalin pibiang ed panagdayew diad sinagoga ra, a ditan babasaen tan ipapaliwawa so Salita na Dios. (Lucas 2:51; 4:16) Kanian, andi-duaruwan susto so pinili na Dios ya ina tan anagibin ama ed Anak to diad dalin.

Baleg a Bendisyon Parad Saray Pobrin Managpastol

Anggaman nairapan so akulaw to, a magano lan mananak, si Jose so nambaroy ed syudad na atateng to pian manparehistro, unong ed ganggan nen Cesar. Sanen akasabi so sanasawa ed Betlehem, anggapoy naromog dan napanayaman  ed apusek a syudad. Kanian apilitan iran manayam ed siroman na ayayep, a ditan nianak si Jesus tan imparukol ed kuwadra. Pian napabiskeg so pananisia ra, angitarya si Jehova na panamaseguro ed mapaabeban atateng a sayan inkianak et peteg a linawa na Dios. Kasin angibaki na grupo na prominentin mamasiken manlapud Betlehem pian pabiskegen so sanasawa? Andi. Imbes, imparungtal nen Jehova a Dios so pamaakaran ed saray makukulin managpastol a walad paway a manpupuyat pian bantayan iray pulok da.

Pinmatnag ed sikara so anghel na Dios tan ingganggan to iran onla ed Betlehem, a diman et naromog da so kapangiyanak a Mesias ya “akarukol ed atotong.” Kasin abigla odino imbaing na sarayan pobrin lalaki nen naamtaan da a say kapangiyanak a Mesias so walad siroman na ayayep? Andin balot! Intilak da iray pulok da tan sikaray linman tampol ed Betlehem. Sanen aromog da si Jesus, inistorya ra ed si Jose tan Maria so imbaga na anghel na Dios ed sikara. Peteg a saya so amabiskeg ed pananisia na sanasawa ya amin a bengatla so nasusumpal unong ed gagala na Dios. “Et pinmawil so saray pomapastol ya inggalgalang tan intantandoro ra so Dios lapu ed saray amin a nadngel tan anengneng da.” (Lucas 2:8-20) On, duga so pinili nen Jehova a pangiparungtalan to ed saray pamaakaran, salanti, saray walaan na takot ed Dios a managpastol.

Unong ed asingbat la, naaralan tayo no anton klase na totoo so nepeg tayon pagmaliwan pian abobonan nen Jehova. Agtayo kaukolan a panggunaetan so inkabantog odino kayamanan. Imbes, singa si Jose, Maria, tan saray managpastol, kaukolan tayon tuloken so Dios tan paneknekan so panangaro tayo ed sikato diad pangiyuna ed saray espiritual a bengatla imbes a say materyal iran bengatla. Petepeteg a walaray maabig a leksion a naaralan diad pandalepdep ed nirekord ya agawgawa diad panaon na inkianak nen Jesus.

[Litrato ed pahina 7]

Anto so napatnagan ed impangibagat nen Maria ed duaran malapati?

[Litrato ed pahina 7]

Pinili na Dios ya ipaamta so inkianak nen Jesus ed saray pobrin managpastol