‘Dios Ko, Akin ya Inabuloyan Mo Iya?’
‘Dios Ko, Akin ya Inabuloyan Mo Iya?’
NANONOTAN ni nen Ricardo so inyurong da nen akulaw to diad panag-alagaran ed doktor. * Sikara so agmakakpel a mangamta ed saray resulta na kasumsumpal a medikal ya impan-eksamin ed si Maria. Insan, nilukasan nen Ricardo so sobre, tan tampol dan inimano so medikal a termino ed report. Apasikmatan da so salitan “kanser,” tan manakis iran dua diad impakatebek da ed kabaliksan na satan a salita.
“Maomaong imay doktor,” so inkuan nen Ricardo, “balet mapatnag ya amoria to so inkaseryoso na kipapasen lapud paulit-ulit ton ibabaga ed sikami a kaukolan kamin manmatalek ed Dios.”
Antis a ginapoan so panagtambal a radiation, naimano na doktor so agnakontrol a panggiwgiw na kawanan a sali nen Maria. Apatnagan ed kaaruman ya eksaminasyon a kinmayat la so kanser ed utek to. Kayari labat na sakey simba a panagtambal et intunda la so radiation. Si Maria so a-comatose tan sikatoy inatey kayari na duay bulan. “Maliket ak ta angangga lay paniirap to,” so insalaysay nen Ricardo, “balet makakailiw ak a maong ed sikato tan amoriak a labay ko met lay ompatey. Mabetbet kon ikelyaw ed Dios: ‘Akin ya inabuloyan mo iya a nagawa?’”
Sano Onsabi so Trahedya, Onlesa Iray Dakel a Tepet
Singa si Ricardo, dakerakel a totoo ed interon mundo so napapaskar ya arapen so inkapeteg na paniirap. Mabetbet, saray inosente so maniirap. Isipen pa so pirmin ermen a resulta na agnapatundan pambabakal a manasalot ed katooan. Odino imanoen so ot-ot a nalilikna na dakerakel a biktima na panagpasoot (rape), panag-abuso ed ugaw, panagduksa diad loob na pamilya, tan arum niran kaugsan na too. Diad interon awaran et singa anggapoy panganggaan na ag-inkahustisya tan panamasakit na lalaki tan bibii ed balang sakey. (Eclesiastes 4:1-3) Wadtan met so pirmin paniirap na saray biktima na kalamidad odino saray mansasakit ed emosyon, mental, tan pisikal. Agla pankelawan a dakel so mangitetepet, “Akin ya aabuloyan na Dios so ontan a panirap?”
Anggan diad saramay walaan na relihyoson sisisiaen et say panirap so aliwan mainomay ya arapen. Nayarin panumamengan mo met no antoy rason ed pangiyaabuloy na maaro tan makapanyari ed amin a Dios ed paniirap na too. Makana so pananap na makapenek tan matuan ebat ed sayan makawetwet a tepet parad kareenan na nonot tan relasyon tayo ed Dios. Mangitatarya so Biblia na ebat ed satan. Ipangasin imanoen no anto so ibabaga na satan unong ya iparungtal ed onggendan ya artikulo.
[Paimano ed Leksab]
^ par. 2 Sinalatan iray ngaran.
[Saray litrato ed pahina 3]
Paulit-ulit ya ibabaga na doktor ed sikami a kaukolan kamin manmatalek ed Dios