“Duga Ka, Talagan Makapaliket so Bilay!”

ABAY mo ta’n amtaen so tuan kabaliksan na bilay? Say labin-walon años a si Magdalena, sakey ed saray Tastasi nen Jehova a manaayam diad Szczecin, Poland, so tinmulong ed kaklase to ed haiskul a mangamta ed satan. Si Katarzyna et sakey a mankuan ya ateista, balet sanen innabang nen Magdalena ed sikato so nipaakar ed Biblia, sikatoy interesadon maong.

Anggaman labalabay nen Katarzyna so innabang nen Magdalena ed sikato manlapud Biblia, agto itan sigpot a naawat. Aminsan, legan a mitotongtong ed si Magdalena nipaakar ed tuan kakaaro, oniay inkuan nen Katarzyna: “Walay Bibliam; amtan no antoran prinsipyo so tumboken tan no iner so pakaromogan ed tuan kakaaro. Balet panon to iramay agda ni naawat natan iratan a prinsipyo ey?”

Ginmapon anguman si Katarzyna sanen sikatoy nambiahe ed London, Inglatera. Binisita to so sangan opisina na saray Tastasi nen Jehova diman, tan sikatoy atenyeg ed kaabigan da ed sikato. Sikatoy asagyat ed saray simplin kaabigan a singa say pangilukas na kapot parad sikato tan say panangipanengneng na tuan interes ed ibabaga to.

Kagapo na pan-eskuela nen Setyembre 2001, denesidi nen Katarzyna ya awaten so regular a panagaral na Biblia. Sikato lay mamapabli ed saray prinsipyo na Biblia tan mangiyaaplika ed saratan ed inagew-agew a bilay to. Agano ni et inkuan to ed si Magdalena: “Say pakaliknak et singa onggagapo ak ed balon bilay ko.” Sikatoy nan-text ni ingen ed si Magdalena a kuan ton: “Salamat na baleg ed panagaral ta natan! Duga ka, talagan makapaliket so bilay! Makapaliket so pakaamta no siopa so pisalamatan ed satan.”