“Mantultuloy Kayon Akabantay”!

“Say ibagak ed sikayo et ibagak ed amin, Mantultuloy kayon akabantay.”​—MARCOS 13:37, NW.

1, 2. (a) Anton leksion so naaralan na sakey a laki nipaakar ed panagbantay ed saray kayarian to? (b) Unong ed ilustrasyon nen Jesus nipaakar ed matakew, anto so naaralan tayo nipaakar ed pansiansian aliing?

 INYAMOT nen Juan iray ankablin kayarian to diad abung to. Inyatol to iratan ed silong na dukolan to​—a diad pakaamta to et sankaseguroan lan pasen ed abung. Balet, sakey a labi a nanaugip iran sanasawa, linmoob so matakew ed kuarto ra. Mapatnag ya amta na matakew no iner so pananapan to. Kalkalna ton inala so kada ankablin bengatla a walad silong na dukolan da ontan met ed kuartan inkarga nen Juan ed drower a walad abay na kama ra. Kaimbuasan la sanen naimano nen Juan ya atakewan ira. Agto nalingwanan so makapasinagem a leksion a naaralan to: Agnabantayan na nanaugip a too iray kaykayarian to.

² Tua met itan ed espiritual a pantalos. Agtayo naprotektaan so ilalo tan pananisia tayo no makaugip itayo. Kanian, onia so imbilin nen Pablo: “Ag-itayo onugip, a singa gawa na saray arum, et manpuyat itayo tan mandangka itayo.” (1 Tesalonica 5:6) Pian nipabitar so kaimportantian na pansiansian aliing, inusar nen Jesus so ilustrasyon a nipaakar ed matakew.  Deneskribe to iray ebenton mangitonton ed isabi to bilang Ukom, insan oniay impasakbay to: “Manpuyat [“manbantay,” NW] kayo sirin; ta agyo amta no anton agew so isabi Katawan yo. Balet amtaen yo so saya, a no say makan-abung akabatan to no anton oras ed panagbantay so isabi matakew, sikato komoy nampuyat, tan agto komon inabuloyan a nabungawan so abung to. Kanian manparaan kayo met komon; ta dia ed oras ya agyo isisipen onsabi’ Anak na too.” (Mateo 24:42-44) Ag-ipapaamta na matakew no kapigan so isabi to. Iilaloan ton sikatoy agnaliklikas ya onsabi. Mipadpara, unong ya inkuan nen Jesus et onsabi so anggaan na sayan sistema ed ‘oras ya agtayo is-isipen.’

“Mansiansia Kayon Aliing, Mansiansia Kayon Malet ed Pananisia”

3. Panon ya impabitar nen Jesus so kaimportantian na pansiansian aliing diad impangusar to ed ilustrasyon nipaakar ed saray aripen a manatalaran ed ipawil na katawan da a manlapud bansal?

³ Diad saray salitan nikurit ed Ebanghelyo nen Lucas, inyaliling nen Jesus iray Kristiano ed saray aripen a manatalaran ed katawan da a manlapud sakey a bansal. Nakaukolan a mansiansia ira ya alerto ta pian aliing ira tan akaparaan ira a mangabrasa sano sikatoy onsabi. Diad ontan met a paraan et inkuan nen Jesus: “Dia ed oras ya agyo isisipen onsabi so Anak na too.” (Lucas 12:40) Nayarin naandi ed liknaan na arum a taotaon lan manlilingkor ed si Jehova so inkaganatan na panaon a pambibilayan tayo. Nayarin isipen da ni ingen a mabayag ni so anggaan. Balet nayarin itonton itayo na ontan a panag-isip diad agla panimano ed espiritual iran bengatla noagta dia la ed saray materyalistikon kalat, tan saray pakagirogiroan a mamateglep ed sikatayo diad espiritual a paraan.​—Lucas 8:14; 21:34, 35.

4. Anton kombiksion so mamakiwas ed sikatayon mansiansian akabantay, tan panon itan ya impabitar nen Jesus?

⁴ Makaaral itayo na sananey nin leksion diad ilustrasyon nen Jesus. Anggaman ag-amta na saray aripen so oras na isabi na katawan da, mapatnag ya amta ra no dinan a labi. Mairap so sanlabin akaliing no isipen da ya ompan say isabi na katawan da et diad arum ni a labi. Balet ta andi, amta ra no dinan a labi so isabi to, tan satan so pirmin amakiwas ed sikara pian mansiansian aliing. Diad ontan met a paraan et malinew ya imparungtal na saray propesiya na Biblia a manbibilay tayo la ed panaon na anggaan; balet ag-ibabaga na saratan so agew odino oras na anggaan. (Mateo 24:36) Say panisia tayo ya onsabi la so anggaan so ontulong ed sikatayon mansiansian aliing, balet no kombinsido itayo a talagan asingsingger la so agew nen Jehova, lalo itayon onkiwas pian manbantay.​—Sofonias 1:14.

5. Panon itayon onkiwas unong ed bilin nen Pablo a ‘mansiansian aliing’?

⁵ Oniay impaseseg nen Pablo sanen sinulat to iray taga-Corinto: “Mansiansia kayon aliing, mansiansia kayon malet ed pananisia.” (1 Corinto 16:13, NW) On, say pansiansian aliing so nisiglaot ed pakawalaan tayo na malet a talindeg ed pananisian Kristiano. Panon itayon makapansiansian aliing? Diad igamor na mas aralem a pikakabat ed Salitay Dios. (2 Timoteo 3:14, 15) Say maabig ya ugali ed personal a panagaral tan say regular ya iyaatendi ed saray miting  so ontulong ed sikatayon ombiskeg ed pananisia, tan say pansiansia a sinononot ed agew nen Jehova so importantin aspekto na pananisia tayo. Kanian say panapanaon a panrepaso ed Makasulatan ya ebidensya a manbibilay tayo la ed asingsingger ya anggaan na sayan sistema so makatulong ed sikatayo pian agtayo nalingwanan iray importantin katuaan nipaakar ed onsabin anggaan. * Makagunggona met so panimano ed saray ebenton naiimatonan ed mundo a manusumpal ed propesiya na Biblia. Sakey ya agi ed Alemanya so nansulat: “Kapagno manbantay ak na balita​—saray bakal, yegyeg, karawalan, tan say pakakarutakan na planeta tayo​—nipupurek ed siak so kinaasingger na anggaan.”

6. Diad anton paraan ya inyilustra nen Jesus so tendensya a naandi so inkaalerto ed espiritual legan ya onlalabas so panaon?

⁶ Diad Marcos kapitulo 13, naromog tayo so sananey nin salaysay nipaakar ed impamilin nen Jesus ed saray patumbok to a mansiansia ira ya aliing. Unong ed sayan kapitulo, inyaliling nen Jesus so kipapasen da ed samay managbantay na puerta (doorkeeper) a mantatalaran ed isempet na katawan to manlapud arawin impanbiahe. Ag-amta na managbantay na puerta so oras na ipawil na katawan to. Sikato so mansiansia labat ya akabantay. Tinukoy nen Jesus so apatiran panagbantay ed labi a nayarin isabi na katawan. Say komapat a panagbantay et saglawien toy manga alas tres ed palbangon anggad ipelnak na agew. Diad saman ya unor iran oras na panagbantay, mainomay a makateglep so managbantay na puerta. Unong ed report et ipapasen na saray sundalo a sankaabigan so palbangon pian agmakalikas so kabusol. Mipadpara, diad satan ya unor laran oras, sano diad espiritual a pantalos et maitlep so ugip na mundon walad kaliberliber tayo, nayarin lalo itayon mipuligesgesan pian mansiansian aliing. (Roma 13:11, 12) Sirin, dia ed ilustrasyon to, oniay aminpigan impaseseg nen Jesus: “Manlikas kayo, manbantay . . . Manpuyat kayo sirin . . . No anto so kuan ko ed sikayo, kuan ko ed amin, Manpuyat kayo.”​—Marcos 13:32-37.

7. Anto so walan peteg a kapeligroan, tan tekep na satan a panmoria et anton panamaseseg so mabetbet a nabasa tayo ed Biblia?

⁷ Legan na ministeryo tan kayari na inkioli nen Jesus et aminpiga ton impaseseg so inkamalikas. Diad tua, diad amin lawarin impanukoy na Kasulatan ed anggaan na sayan sistema na bengabengatla et naromog tayo so pasakbay a mansiansian aliing odino mantultuloy ya akabantay. *  (Lucas 12:38, 40; Apocalipsis 3:2; 16:14-16) Malinew, mapeligron tuloy so pakateglep ed espiritual. Nakaukolan tayon amin iratan a pasakbay!​—1 Corinto 10:12; 1 Tesalonica 5:2, 6.

Taloran Apostol ya Ag-akapansiansian Aliing

8. Diad hardin na Getsemani, panon so inkiwas na taloran apostol nen Jesus ed kerew ton mansiansia ira ya akabantay?

⁸ Aliwa lambengat a maabig iran getma so kinaukolan ed pansiansian aliing, unong a nanengneng tayo ed alimbawa nen Pedro, Santiago, tan Juan. Saraya so taloran ma-espiritual a lalaki a matoor a tinmumbok ed si Jesus tan pirmin angaro ed sikato. Anggaman kuan, diad samay labi na Nisan 14, 33 K.P., ag-ira akapansiansian aliing. Kaalis da ed silir a nanselebraan day Paskua, si Jesus so inibaan na taloran apostol diad hardin na Getsemani. Oniay inkuan nen Jesus ed sikara diman: “Say kamarerwak maermen a tuloy angga ed ipapatey; ontila’kayo dia, ta mipuyat kayo ed siak.” (Mateo 26:38) Amitlon nampikasi a masimsimoon si Jesus ed mangatatawen ya Ama to, tan amitlo ton pinawil iray kakaaro to, ya asabian to iran nanaugip.​—Mateo 26:40, 43, 45.

9. Anto so makasengeg ed impakateglep la na saray apostol?

⁹ Akin ya ag-akapansiansian aliing iratan a matoor a lalaki ed si Jesus? Makasengeg itan ed impakabanalan da la. Atrasado lan maong so oras ed saman, a nayarin linmabas lay pegley-labi, tan ‘saray mata ra ed saman so ambelbelat la’ ed pakakaugip. (Mateo 26:43) Siansia, oniay inkuan nen Jesus: “Manpuyat tan manpikasi kayo, pian agkayo onloob ed katutukso; say espiritu tua a sikatoy malikeliket, balet say laman makapuy.”​—Mateo 26:41.

10, 11. (a) Anggaman abanalan la, anto so akatulong ed si Jesus pian mansiansian akabantay diad hardin na Getsemani? (b) Anto so naaralan tayo ed walan agawa ed taloran apostol sanen kinerew nen Jesus ed sikara a manbantay ira?

¹⁰ Andi-duaruwan naksawan met la si Jesus ed saman ya importantin tuloy a labi. Balet, imbes a naugip et inusar to so makanakana tan nakekeraan niran oras parad masimoon a panagpikasi. Pigaran agew ni ed akadkauna et pinaseseg to iray patumbok to a manpikasi, a kuanto: “Manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa, tan makaalagey kayo ed arap na Anak na too.” (Lucas 21:36; Efeso 6:18) No talinengen tayo so simbawa nen Jesus tan tumboken tayo so maabig ya ehemplo to nipaakar ed pikakasi, say masimoon iran pikakasi tayo ed si Jehova so ontulong ed sikatayon mansiansian aliing ed espiritual.

¹¹ Siempre, atebek nen Jesus​—aliwan singa ed saray babangatan to ed saman a bekta​—a sikatoy magano lan erelen tan kondenaen ed ipapatey. Saray subok ed sikato so mamantok ed makapaot-ot ya ipapatey diad panamairapan a kiew. Pinasakbayan nen Jesus iray apostol to nipaakar ed saratan a bengatla, balet agda atalosan so ibabaga to. Kanian, akateglep ira legan a sikatoy sililiing nin manpipikasi. (Marcos 14:27-31; Lucas 22:15-18) Singa met ed saray apostol to, say laman tayo so maletey tan walaray bengatlan agtayo ni amta. Balet, no agtayo natebek so inkaganatan na saray panaon a pambibilayan tayo, makateglep itayo ed espiritual a pantalos. Diad pansiansia tayon alerto et makapansiansia itayon aliing.

Taloran Makanan Kalidad

12. Anton taloran kalidad so insiglaot nen Pablo ed pandangka tayo?

¹² Panon tayon napansiansia so inkaganatan tayo? Naimano tayo la so kaimportantian na pikakasi tan say pankaukolan a sinononot ed agew nen Jehova. Niarum ni, sinalambit nen Pablo so taloran makanan kalidad a nepeg tayon bayuboan. Inkuanto: “Bangta anak itayo na agew, mandangka itayo, mankawes itayo na kinlong na pananisia tan aro; tan onkana a sanib na ulo, so panilalo ed kilalaban.” (1 Tesalonica 5:8) Konsideraen tayon antikey so betang na pananisia, ilalo, tan aro ed pansiansia tayon aliing ed espiritual.

13. Anto so betang na pananisia ed pansiansia tayon alerto?

¹³ Nepeg a walaan itayo na agnatenyeg a pananisia a petepeteg si Jehova tan sikato so “mananumang ed saray mananap ed sikato.” (Hebreos 11:6) Say primero tan inmunan-siglon kasumpalan na propesiya nen Jesus nipaakar ed anggaan so mamabiskeg ed pananisia tayo diad babaleg a kasumpalan na satan legan na panaon tayo. Tan say pananisia tayo so mamasiansia ed sikatayon  magunaet a mantalaran ed agew nen Jehova, a maseguron “[say mapropetikon pasingawey so] so petepeteg ya onsabi, ya agmanbayag.”​—Habacuc 2:3.

14. Panon kaimportante so ilalo ta pian makapansiansia itayon sililiing?

¹⁴ Say seguradon ilalo tayo et singa say “malet a pataga na kamarerwa” ya ontulong ed sikatayo a mansungdo ed saray kairapan anggano nakaukolan a manalagar itayo ed kasumpalan na saray sipan na Dios. (Hebreos 6:18, 19) Oniay inaksobi nen Margaret, sakey a 90 años ya agin alanaan na espiritu, ya abautismoan masulok lan 70 a taon ed apalabas: “Sanen say masiken ko so ompapatey la lapud kanser nen 1963, inisip ko a maabig no onsabi lan tampol so anggaan. Balet amoriak a manunan iisipen ko so inkasiak. Anggapo so ideya mi ed saman a panaon no kaunongan so laknaban ni na kimey ed interon mundo. Anggan natan et wala niran siansiay dakel a pasen a nalulukasan so kimey. Kanian naliliketan ak ed panaanos nen Jehova.” Oniay ipapaseguro ed sikatayo nen apostol Pablo: ‘Say panagsungdo [so mamawala na] naabobonan a kipapasen; say naabobonan a kipapasen, bilang resulta et ilalo, tan say ilalo so agmangitonton ed pakadismaya.’​—Roma 5:3-5, NW.

15. Panon itayon pakiwasen na aro anggan singano abaybayag lan panaon so aalagaren tayo?

¹⁵ Say Makristianon aro so matalonggaring a kalidad lapud satan so manunan mamapakiwas ed amin a gagawaen tayo. Manlilingkor itayo ed si Jehova lapud sikatoy inaro tayo, antokaman so walad panag-orasan to. Say aro ed kaparan too so mamapakiwas ed sikatayon mangipulong ed maong a balita na Panarian, anggan panon kabayag so panggawa tayo ed satan unong ed linawa na Dios tan anggan panon karakel a danay so ipawil tayo ed saratan met lanlamang a kaabungan. Unong ya insulat nen Pablo, “mansiansia so pananisia, ilalo, aro, sarayan talo; et say kabalbalgan ed saraya say aro.” (1 Corinto 13:13) Say aro so ontulong ed sikatayon makapansungdo tan makapansiansian aliing. “[Say aro] amin ilaloan to, amin sungdoan to. Say aro agbalot mangangga.”​—1 Corinto 13:7, 8.

‘Mantultuloy a Bembenan a Malet so Walad Sikayo’

16. Imbes ya ontayer, anton awawey so nepeg tayon bayuboan?

¹⁶ Manbibilay itayo ed importante iran panaon a naynay a nipapanonot ed sikatayo na saray ebento ed mundo a wala itayo la ed kapantokan na kaunoran iran agew. (2 Timoteo 3:1-5) Aliwa lan panaon pian ontayer itayo noagta panaon la pian ‘bembenan a malet so walad sikatayo.’ (Apocalipsis 3:11, NW) Napaneknekan tayo ya akaparaan itayo ed oras na subok diad ‘pampeleng tayo ed pikakasi’ tan diad pamayubo tayo ed pananisia, ilalo, tan aro. (1 Pedro 4:7) Daakan so gawaen tayo ed kimey na Katawan. Say pagmaliw ya okupado ed saray gawa na maridios a debosyon so ontulong ed sikatayo a mansiansian sililiing.​—2 Pedro 3:11.

17. (a) Akin ya agtayo nepeg a nadismaya ed saray sagpaminsan ya inkadismaya? (Nengnengen so kahon ed pahina 21.) (b) Panon tayon naalig si Jehova, tan anton bendisyon so mantatalaran ed saramay mangaalig ed sikato?

¹⁷ “Si Jehova so apag ko,” so insulat nen Jeremias, “kanian manilalo ak ed sikato. Si Jehova maong ed saray manalagar ed sikato, ed kamarerwa a mananap ed sikato. Maong a say too manilalo tan mareereen komon a manalagar ed panangilaban nen Jehova.” (Tagleey 3:24-26) Arum ed sikatayo so agano ni labat a manaalagar. Arum so dakel lan taon a manaalagar a naimatonan so panangilaban nen Jehova. Balet, agaylan tikey itan a panaon na panag-alagar no ikompara ed andi-anggaan ed arapen! (2 Corinto 4:16-18) Tan legan a manaalagar itayo ed suston panaon nen Jehova, nabayuboan tayo so makana iran kalidad na Kristiano tan natulongan tayo so arum a manganamot ed anos nen Jehova tan sayakupen da so katuaan. Amin tayo sirin so mansiansian akabantay. Aligen tayo komon si Jehova tan mananos itayo, a pisalamatan so ilalon inter to ed sikatayo. Tan legan a matoor itayon sililiing, komon ta mantultuloy itayon ombemben a malet ed ilalon andi-anggaan a bilay. Insan, sarayan mapropetikon sipan so maseguron onaplika ed kipapasen tayo: ‘Itandoro ka [nen Jehova] a manawir na dalin: sano napater so saray bagel, nanengneng mo.’​—Salmo 37:34.

[Saray paimano ed leksab]

Panon Yon Ebatan?

• Panon tayon napabiskeg so kombiksion tayo ya asingger la so anggaan na sayan sistema na bengatla?

• Anto so naaralan tayo ed saray alimbawa nen Pedro, Santiago, tan Juan?

• Anton taloran kalidad so ontulong ed sikatayo pian mansiansian akabantay ed espiritual?

• Akin a saya la so panaon pian ‘bembenan a malet so walad sikatayo’?

[Tepetepet Parad Panagaral]

[Kahon/Litrato ed pahina 21]

‘Maliket so Too a Mantatalaran.’​—Daniel 12:12, NW

Isipen pan walay inap na sakey a managbantay a manplaplano so sakey a matakew ya onloob ed sular a babantayan to. Sinmabi labi, lilikasen a maong na managbantay so antokaman a kalasakas a nayarin pakalikasan ed matakew. Inoras-oras a sikatoy manlilikas. Mainomay a natalosan no nabaloan to so ungol labat na palayupoy na dagem ed saray kakiewan odino say pakasipeg na pusa ed sakey a bengatla.​—Lucas 12:39, 40.

Ontan met so nagawa ed saramay “manaalagar ed ipatnag na Katawan tayo a Jesu-Kristo.” (1 Corinto 1:7) Inisip na saray apostol ya ‘ipawil nen Jesus so panarian ed Israel’ kayarin tuloy na kioli to. (Gawa 1:6) Pigaran taon ed saginonor et nakaukolan a napanonotan iray Kristiano diad Tesalonica a dia ni’d arapen so kiwawala nen Jesus. (2 Tesalonica 2:3, 8) Balet, saray ag-asumpal ya iilaloan nipaakar ed agew nen Jehova so agnagmaliw a sengegan pian benegan na saratan ya inmunan patumbok nen Jesus so dalan ya ompugta ed bilay.​—Mateo 7:13.

Diad panaon tayo, say pakadismaya ed ompatnag ya inkaabala na isabi na anggaan na sayan sistema na bengabengatla so agnepeg a mamateglep ed sikatayo. Say alerton managbantay so nayarin napalikdo ed abaloan ton nagawa la, ingen ta sikato so nepeg a mansiansian akabantay! Satan so kimey to. Ontan met ed saray Kristiano.

[Litrato ed pahina 18]

Kombinsido kayo kasi ya asingger la so agew nen Jehova?

[Saray litrato ed pahina 19]

Ontulong ed sikatayo iray miting, pikakasi, tan maong ya ugali ed panagaral pian makapansiansia itayon akabantay

 [Litrato ed pahina 22]

Singa si Margaret, komon ta maanos tan aktibo itayon manbantay