Ninodnonot Iray Pinatey a Tastasi nen Jehova

NEN Marso 7, 2002, imparungtal so sakey a pakanodnonotan a plake diad baley na Körmend diad bandad sagur a Hungary. Satan so pakanodnonotan ed impatey na taloran Tastasi nen Jehova a pinatey na saray Nazi nen 1945.

Say plake so impaskil ed padir na hedkuarter na fire department diad Hunyadi Road, ya akagawaan na saray impamatey. Indedika so plake bilang pakanodnonotan ed “saray Kristiano a pinatey diad agda intulok lapud konsiensia nen Marso 1945. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Tastasi nen Jehova.”

Agawa so impamatey duay bulan lambengat antis na impanampot na Guerra Mundial II. Akin a pinatey irayan Kristiano? Oniay impaliwawa na peryodiko ed Hungary a Vas Népe: “Sanen nagmaliw a mananguley si Hitler ed Alemanya, aliwan saray Judio lambengat noagta pati saray Tastasi nen Jehova so puntirya met na panamasegsegang tan panamairap, panangipukokan a kampo tan ipapatey no agda italirak so relihyoson kombiksion da. . . . Nen Marso 1945, walay pirmin inkatalagnaw diad bandad sagur a kabiangan na Hungary. . . . Kabiangan ed sayan katatakot et say pamataynan tan pamatey ed saray membro na Tastasi nen Jehova.”

Nankaduan parte so programa na pangiparungtal ed plake. Say inmuna so agawa diad teatro ed Batthyány Castle, a kabiangan ed saray espiker si Propesor Szabolcs Szita, head na Holocaust Documentation Center diad Budapest; László Donáth, membro na Parliament’s Committee for Human Rights, Minority and Religious Affairs; tan si Kálmán Komjáthy ya akatasi ed impamatey tan sikato la natan so historyador na baley. Binmasil ed baley so masulok a 500 a totoon presente parad komaduan parte na programa​—say pangiparungtal ed plake panamegley na Mayor na Körmend a si József Honfi.

Diad sulat a panamatanir nen Ján Žondor (János Zsondor), pinaseseg to iray Kristianon agagi to ya agmanermen. Oniay insulat to: “Siansian walad kanonotan ko iray salita nen Juan a naromog ed Apocalipsis 2:10: ‘Mansiansia kan matoor angga ed patey.’ . . . Pibaga yo ed saramay walad abung ya ag-ira maneermen, ta inatey ak lapu ed katuaan tan aliwan bilang sakey a kriminal.”

[Litrato ed pahina 32]

Bertalan Szabó

[Litrato ed pahina 32]

Antal Hőnisch

[Litrato ed pahina 32]

Ján Žondor