‘Manbunga na Dakel’

‘Manbunga kayo na dakel tan dia ed ontan sikayo so babangatan ko.’​—JUAN 15:8.

1. (a) Anton kakaukolanen ed pagmaliw a babangatan so sinalambit nen Jesus ed saray apostol to? (b) Anto so nepeg tayon itepet ed inkasikatayo?

 LABI ed saman sakbay na impatey to. Malaem a panaon so inggana nen Jesus pian pasesegen iray apostoles to panamegley na masimoon ya impitongtong to ed sikara. Diad saman et nayarin manpalbangon la, balet si Jesus so nantultuloy a nansalita makasengeg ed aro ed saray maapit a kakaaro to. Insan, legan na pitotongtong to, impanonot to ed sikara so sakey nin kakaukolanen a nepeg dan kapeten pian mansiansia iran babangatan to. Inkuanto: “Dia ed saya so kigloriaan nen Amak, say pambunga yo na dakel tan dia ed ontan sikayo so babangatan ko.” (Juan 15:8) Kasin nakakapet tayo natan itan a kakaukolanen ed pagmaliw a babangatan? Anto so kabaliksan na ‘pambunga na dakel’? Pian naamtaan tayo, konsideraen tayo so pantotongtong da ed saman a labi.

2. Anton ilustrasyon nipaakar ed bunga so indalatdat nen Jesus diad samay labi sakbay na impatey to?

² Say bilin a manbunga et kabiangan ed sakey ya ilustrasyon ya indalatdat nen Jesus ed saray apostol to. Inkuanto: “Siak so tua a sengeg na ubas, et say Amak sikato so managtanaman. Balang sanga ed siak ya agmanbunga, sikato so ekalen to, et balang sanga a manbunga, sikato so palinan to, pian makabunga na dakdakel a bunga. Sikayo malinis kayo la nisengeg ed salita a sinalitak ed sikayo. Mansiansia kayo ed siak, tan siak ed sikayo. Unong a say sanga agmakapanbunga ed inkasikato, likud no sikato so mansiansia ed ubas, ontan met agyo nayarian, likud no  mansiansia kayo ed siak. Siak so ubas, sikayo so sangasanga. . . . Dia ed saya so kigloriaan nen Amak, say pambunga yo na dakel tan dia ed ontan sikayo so babangatan ko. Salanti singa impangaro na Ama ed siak, inaro ta kayo met, mansiansia kayo ed arok. No sumpalen yo so saray ganggan ko, mansiansia kayo ed arok.”​—Juan 15:1-10.

3. Anto so nepeg a gawaen na saray patumbok nen Jesus ta pian manbunga?

³ Diad sayan ilustrasyon, si Jehova so Managtanaman, si Jesus so sengeg na ubas, tan saray apostol a katongtong nen Jesus so sangasanga. Daput no panggugunaetan na saray apostol so “mansiansia” ed si Jesus, manbunga ira. Impaliwawa sirin nen Jesus no panon a matalonan napansiansia na saray apostol iyan makanan pankakasakey: “No sumpalen yo so saray ganggan ko, mansiansia kayo ed arok.” Diad saginonor et insulat nen apostol Juan so mipadpara iran salita ed saray kapara ton Kristiano: “Say manumpal na ganggan to mansiansia ed sikato.” * (1 Juan 2:24; 3:24) Diad panumpal sirin ed saray ganggan nen Kristo, saray patumbok to so mansiansian mikasakey ed sikato, tan bilang resulta et satan a pankakasakey so makatulong ed sikara pian manbunga. Anton nengneng na bunga so nakaukolan a pawalaen tayo?

Pankanawnawan Ombulaslas

4. Anto so naaralan tayo ed katuaan ya “ekalen” nen Jehova so amin a sanga ya agmanbubunga?

⁴ Diad ilustrasyon a nipaakar ed sengeg na ubas, “ekalen,” odino puteren nen Jehova so sanga sano ag-itan manbunga. Anto so ipapabitar na saya ed sikatayo? Aglambengat ipapabitar na satan ed sikatayo a kaukolan a manbunga so amin a babangatan noagta nayarian da met ya amin a gawaen itan, antokaman so sirkumstansya odino limitasyon da. On, sumlang ed maaro iran paraan nen Jehova so ‘pangekal,’ odino pangidiskualipika, ed babangatan nen Kristo ya agmakagawa na bengatlan agda nayarian.​—Salmo 103:14; Colosas 3:23; 1 Juan 5:3.

5. (a) Panon ya ipapabitar na ilustrasyon nen Jesus ya onaligwas itayo ed pagmaliw a mabunga? (b) Anton duaran klase na bunga so konsideraen tayo?

⁵ Say ilustrasyon nen Jesus nipaakar ed sengeg na ubas so mangipapabitar met ya anggad iyabuloy na saray sirkumstansya tayo, nepeg tayon anapen so pankanawnawan ombulaslas ed saray kimey tayo bilang babangatan. Imanoen so impangibalikas nen Jesus: “Balang sanga ed siak ya agmanbunga, sikato so ekalen to, et balang sanga a manbunga, sikato so palinan to, pian makabunga na dakdakel a bunga.” (Juan 15:2) Diad sampot a kabiangan na ilustrasyon, pinaseseg nen Jesus iray patumbok to a manbunga na “dakel.” (Bersikulo 8) Anto so labay ya ibaga na saya? Bilang babangatan, agtayon balot magmaliw a pasaray. (Apocalipsis 3:14, 15, 19) Imbes, nepeg a manggawa tayo na saray paraan pian onaligwas diad pambunga. Anton klase na bunga so nepeg tayon pawalaen a lalon daakan? Wala so duaran klase (1) “say bunga na espiritu” tan (2) say bunga na Panarian.​—Galacia 5:22, 23; Mateo 24:14.

Say Bunga na Kristianon Kalidades

6. Panon ya indanet nen Jesu-Kristo so kablian na unonan abitla a bunga na espiritu?

⁶ Say unonan nidatak ed “bunga na espiritu” et say aro. Papawalaen na masanton espiritu na Dios so aro ed saray Kristiano, lapud uunoren da so ingganggan nen Jesus sakbay a tuloy na impanaglawi to ed ilustrasyon a nipaakar ed manbubungan sengeg na ubas. Inkuan to ed saray apostol to: “Sakey a balon ganggan so iter ko ed sikayo, a manaaroan so sakey tan sakey ed sikayo.” (Juan 13:34) Diad tua, diad saman ya unor a labi na mangaraldalin a bilay to, aminpigan impanonot nen Jesus ed saray apostol so pankaukolan ya ipatnag da so kalidad na aro.​—Juan 14:15, 21, 23, 24; 15:12, 13, 17.

7. Panon ya impatnag nen apostol Pedro a say pambunga so misiglaotan ed pangipatnag na singa-Kriston kalidades?

⁷ Atebek nen Pedro, a wadman ed saman a labi, a nepeg ya ipatnag ed limog na saray tuan babangatan nen Kristo so singa-Kriston aro tan say misiglaotan iran kalidad. Kayari na pigaran taon, pinaseseg nen Pedro iray Kristiano a bayuboan da iray kalidad a singa say dangka, inaagin panamabli, tan aro. Inyarum to ni a say panggawa  ed satan so mangipaliis ed sikatayo ed pagmaliw a “manmenengmeneng tan ag-ombunga.” (2 Pedro 1:5-8) Antokaman iray sirkumstansya tayo, posibli so pakapangipatnag tayo ed bunga na espiritu. Panggunaetan tayo sirin a sigpot ya ipatnag so aro, panangasi, kaumildian, tan arum niran singa-Kriston kalidad, lapud “anggapo so ganggan ya onsumpa ed sarayan nengneng.” (Galacia 5:23) On, manbunga itayo na ‘dakel.’

Pamawala na Bunga na Panarian

8. (a) Anto so pansiglaotan na bunga na espiritu tan say bunga na Panarian? (b) Anton tepet so makanepegan na imano tayo?

⁸ Say makolor tan makbol iran prutas so mamarakep ed tanaman. Balet, say kablian na saratan a bunga so aliwa lambengat a panagparakep. Makana met iray prutas ed pamarakel ed tanaman panamegley na saray bukel na saratan. Ontan met, aliwa lambengat a pamarakep so nagawaan na bunga na espiritu ed personalidad tayo bilang Kristiano. Saray kalidad a singa say aro tan pananisia so mamakiwas met ed sikatayo a mangikayat ed singa-bukel a mensahe na Panarian a naromog ed Salitay Dios. Imanoen pa no panon ya indanet nen apostol Pablo iyan makanan siglaotan. Inkuanto: “Agamilen mi met so pananisia [kabiangan na bunga na espiritu] tan sirin et mansalita kami.” (2 Corinto 4:13) Oniay impangipaliwawa ni nen Pablo: “mangisaklang itayo ed Dios a naynay na bagat a panangidayew, salanti, say bunga na saray bibil”​—say komaduan nengneng na bunga a nakaukolan tayon ipatnag. (Hebreos 13:15) Kasin walaray pankanawnawa ed bilay tayo pian magmaliw a mas mabunga, a talagan manbunga na “dakel,” bilang manangiyabawag na Panarian na Dios?

9. Kasin say pamawala na bunga so mipadpara ed panggaway babangatan? Ipaliwawa.

⁹ Pian suston naebatan, nakaukolan tayon talosan ya unona so lalanoren na bunga na Panarian. Susto kasi so pangikuan a say pambunga et mankabaliksan na panggaway babangatan? (Mateo 28:19) Kasin say bunga a papawalaen tayo et manunan manutukoy ed saray indibidual a natutulongan tayon magmaliw a bautismadon managdayew ed si Jehova? Andi. Ta no ontan, say situasyon so pirmin manismaya ed amin na saramay pinablin Tastasi a matoor a mangiyaabawag ed mensahe na Panarian diad loob na dakel lan taon diad saray teritoryan agmanginennenen. On, no say bunga na Panarian a papawalaen tayo et mangirepresenta labat ed saray balon babangatan, saratan a maseet a Tastasi so singa saramay sangan andiay-bunga diad ilustrasyon nen Jesus! Siempre, aliwan ontan so kipapasen. Sirin, anto so manunan bunga na Panarian ed ministeryo tayo?

Mabunga Lapud Panangikayat ed Bini na Panarian

10. Panon ya ipapabitar na ilustrasyon nen Jesus nipaakar ed managtanem tan say nanduruman nengneng na dalin no anto so bunga na Panarian tan no anto so andi?

¹⁰ Say ilustrasyon nen Jesus nipaakar ed managtanem tan saray nanduruman nengneng na dalin so mangipabitar ed ebat​—sakey a makapaseseg ya ebat parad saramay manpupulong ed saray teritoryan agmanginennenen. Inkuan nen Jesus a say bini et say mensahe na Panarian a naromog  ed Salitay Dios tan say dalin so mangirepresenta ed piguratibon puso na too. Arum a bukel so “naplag ed mabunga a dalin, et tinmubo, tan angiter na bunga.” (Lucas 8:8) Anton bunga? Bueno, katubo tan katakken na trigo, ag-itan mangibuyag na angkekelag a dawa, noagta balo a bini. Ontan met, say Kristiano so mamawala na bunga, ya aliwa met a balon babangatan, noagta balon bini na Panarian.

11. Panon a naukeran so bunga na Panarian?

¹¹ Kanian, say bunga ed sayan kipapasen so aliwan balon babangatan nisay maabig iran kalidad na Kristiano. Lapud say bini a nitanem et say salita na Panarian, say tutukoyen na bunga et say dakerakel a napapawala ed satan a bini. Say pambunga ed sayan kipapasen so manutukoy ed saray panangiyabawag nipaakar ed Panarian. (Mateo 24:14) Kasin posibli so pamawala na bunga na Panarian​—pangiyabawag ed maong a balita na Panarian​—antokaman so sirkumstansya tayo? On! Diad satan met ya ilustrasyon et impaliwawa nen Jesus no akin.

Pangiter ed Sankaabigan Tayo a Kigloriaan na Dios

12. Kasin nagawaan na amin a Kristiano so pamawala na bunga na Panarian? Ipaliwawa.

¹² “Say nitanem ed maong a dalin,” kuan nen Jesus, so “mangiter na bunga, saray arum tunggal lasus, saray arum san-anemaplo, saray arum santatlomplo.” (Mateo 13:23) Nayarin nanduruma so karakel na anien ya ilik a nitanem ed uma depende ed saray kipapasen. Mipadpara, nanduruma so nagawaan tayo diad pangiyabawag ed maong a balita depende ed saray  sirkumstansya tayo, tan impatnag nen Jesus a binidbir to itan. Arum so nayarin walaan na dakel a pankanawnawa, arum so walaan na magmaong a bunigas tan kasil. Kanian, naliliketan si Jehova ed nagagawaan tayo; mas dakel man odino daiset nen say nagawaan na arum, daput no satan so sankaabigan tayo. (Galacia 6:4) Anggano lilimitaan na itatakken odino makapuy lan bunigas so nagawaan tayo ed panagpulong a kimey, say maabagey ya Ama tayo, si Jehova, so maseguron manmoria ed sikatayo bilang sakey ed saramay ‘manbubunga na dakel.’ Akin? Lapud iiter tayo ed sikato so ‘amin a walad sikatayo’​—say interon-kamarerwan serbisyo tayo. *​—Marcos 12:43, 44; Lucas 10:27.

13. (a) Anto so sankamanunaan a rason tayo pian ‘onlan’ mamawala na bunga na Panarian? (b) Anto so makatulong ed sikatayo pian mantultuloy a manbunga diad saray teritoryan agtanton manginennenen? (Nengnengen so kahon ed pahina 21.)

¹³ Antokaman so nagawaan tayo a mamawala na bunga na Panarian, napakiwas itayo ya ‘onla tan manbunga’ sano sinononot itayo no akin a gagawaen tayo itan. (Juan 15:16) Sinalambit nen Jesus so sankamanunaan a rason: “Dia ed saya so kigloriaan nen Amak, say pambunga yo na dakel.” (Juan 15:8) On, pasantosen na panagpulong a kimey tayo so ngaran nen Jehova diad amin a katooan. (Salmo 109:30) Oniay inkuan nen Honor, a matoor a Tasi tan ngalngali la man-75 años: “Anggan diad saray teritoryan agtanton manginennenen, sakey a pribilehyo so pangirepresenta ed Sankatageyan.” Sanen atepetan si Claudio, a maseseg a Tasi manlapu la’d 1974, no akin ya itutultuloy to so manpulong anggaman daiset so onkikiwas ed teritorya to, inaon to so Juan 4:34, a pakabasaan tayo ed saray salita nen Jesus: “Say kanen ko sikato so panggawak na linawa na saman so angibaki ed siak, tan manumpal na kimey to.” Inyarum ni nen Claudio: “Singa si Jesus, kaliktan ko ya aglabat igapo noagta sumpalen so kimey ko bilang manangiyabawag na Panarian.” (Juan 17:4) Mipakna ed sikato iray Tastasi nen Jehova ed sankamundoan.​—Nengnengen so kahon a “No Panon so ‘Pambunga Tekep na Panagsungdo,’” ed pahina 21.

Manpulong Tan Manbangat

14. (a) Anto so nankaduan gagala na kimey nen Juan a Managbautismo tan si Jesus? (b) Panon yon deskribien so Makristianon kimey natan?

¹⁴ Say inmunan manangiyabawag na Panarian a sinalambit na Ebanghelyo et si Juan a Managbautismo. (Mateo 3:1, 2; Lucas 3:18) Say manunan gagala to et say ‘pantasi,’ tan ginawa to itan tekep na aralem a pananisia tan ilalo ‘ya amin et manisia komon.’ (Juan 1:6, 7) On, arum ed saray pinulongan nen Juan so nagmaliw a babangatan nen Kristo. (Juan 1:35-37) Kanian, si Juan so managpulong tan managgaway-babangatan. Ontan met si Jesus. (Mateo 4:23; 11:1) Agmakapakelaw sirin ya ingganggan nen Jesus iray patumbok to ya aglambengat mangipulong ed mensahe na Panarian noagta tulongan da met iray indibidual ya angawat ed satan a magmaliw a babangatan to. (Mateo 28:19, 20) Say kimey tayo natan sirin et pinantekep a panagpulong tan panagbangat.

15. Anto so pamparaan na reaksion ed panagpulong a kimey nen inmunan siglo K.P. tan natan?

¹⁵ Diad saramay akadngel ed impanpulong tan impanbangat nen Pablo nen inmunan siglo K.P., “saray arum anisia ra ed saray salita to, et saray arum ag-ira anisia.” (Gawa 28:24) Natan et ontan met so reaksion. Makapaermen, maslak a bini na Panarian so napepelag ed anawet a dalin. Anggaman ontan, arum a bini so napepelag ed maabig a dalin, linmamot, tan tinmubo, a singa impasakbay nen Jesus. Diad tua, diad sankamundoan et walay promedyo a masulok a 5,000 a totoo a  magmamaliw a tuan babangatan nen Kristo diad sinimba ed loob na sakey taon! Sarayan balon babangatan so ‘anisia ed saray salita,’ anggaman agmanisia so maslak niran totoo. Anto so akatulong ed impagmaliw na puso ra a maawat ed mensahe na Panarian? Mabetbet a say personal ya interes ya impanengneng na Tastasi​—say panagsalog ed kapkapantanem a bini, a singa panangibaga​—so walaan na makagunggonan epekto. (1 Corinto 3:6) Konsideraen so duara labat ed dakel ya alimbawa.

Baleg so Nagawaan na Personal ya Interes

16, 17. Akin ya importantin ipanengneng so personal ya interes ed saramay nakakatongtong tayo ed ministeryo?

¹⁶ Si Karolien, a kalangweran a Tasi ed Belgium, so dinmalaw ed akulaw ya ag-interesado ed mensahe na Panarian. Lapud abedberan so lima na akulaw, si Karolien tan say kaiba to so angiyopresi na tulong balet ta ag-inawat na akulaw. Kayari na duay agew et pinmawil irayan Tastasi ed abung na akulaw tan kinumusta ra. “Baleg so agawaan na saman,” kuan nen Karolien. “Pandinayewan to so interes ya impanengneng min maong ed sikato bilang too. Pinaloob to kami ed abung to, tan nigapo mi so panangiyaral na Biblia.”

¹⁷ Si Sandi, a Tasi ed Estados Unidos, so angipanengneng met na personal ya interes ed saramay pupulongan to. Nenengnengen to iray anunsio na saray inyanak diad lokal a peryodiko insan bisitaen to iray balon atateng a tarok to so My Book of Bible Stories. * Lapud kaslakan a walad abung so ina tan panliketan ton ipanengneng so anak to ed saray bisita, mabetbet a nigagapo so pantotongtong. “Mitotongtong ak ed saray atateng nipaakar ed kaimportantian na maapit a siglaotan ed kapangiyanak panamegley na panagbasa,” so insalaysay nen Sandi. “Diad saginonor et sasaglawien ko so nipaakar ed problema ed panagpabaleg ed anak diad mundo natan.” Agano ni, bilang resulta na satan ya imbisita et ginmapon nanlingkor ed si Jehova so ina tan say anemiran ananak to. Say ikiwas lan unona tan say pangipanengneng na personal ya interes so nayarin mangitonton ed ontan a maliket a resulta diad ministeryo tayo.

18. (a) Akin a sarag tayon amin a kapeten so kakaukolanen a ‘pambunga na dakel’? (b) Anton taloran kakaukolanen ed pagmaliw a babangatan ya asalambit ed Ebanghelyo nen Juan so determinado tayon kapeten?

¹⁸ Agaylan makapaseseg a naamtaan a sarag tayon kapeten so kakaukolanen a ‘manbunga na dakel’! Malangwer tayo man odino matakken la, maong so bunigas tayo odino andi, maawat man odino andi iray teritoryan pampupulongan tayo, amin tayo so makapanbunga na dakel. Panon? Diad sigpot a pangipatnag ed bunga na espiritu tan diad pangikayat ed mensahe na Panarian na Dios diad sankaabigan a nagawaan tayo. Ontan met, panggunaetan tayo so ‘mansiansia ed salita nen Jesus’ tan ‘nawalaan na aro ed sakey tan sakey.’ On, diad pangapet ed sayan taloran importantin kakaukolanen ed pagmaliw a babangatan ya asalambit ed Ebanghelyo nen Juan, papaneknekan tayo a sikatayo “iray babangatan [nen Kristo].”​—Juan 8:31; 13:35.

[Saray paimano ed leksab]

Saray Tepet a Repasoen

• Anton klase na bunga so nakaukolan tayon pawalaen a mas daakan?

• Akin a nagawaan tayo so kalat a ‘pambunga na dakel’?

• Anton taloran importantin kakaukolanen ed pagmaliw a babangatan ya asalambit ed Ebanghelyo nen Juan so kinonsidera tayo?

[Tepetepet Parad Panagaral]

[Kahon/Litrato ed pahina 21]

NO PANON SO “PAMBUNGA TEKEP NA PANAGSUNGDO”

ANTO so makakatulong ed sikayo pian mansiansian matoor a mangipulong ed mensahe na Panarian diad saray teritoryan agtanton manginennenen? Nia so pigaran makatulong ya ebat ed satan a tepet.

“Say pakaamta ed sigpot a panusuporta nen Jesus ed sikatayo so mamaseseg pian magmaliw itayon positibo tan maanos, antokaman so reaksion ed teritorya.”​—Harry, 72 años; abautismoan nen 1946.

“Say tekston 2 Corinto 2:17 so lawas makapaseseg ed siak. Ibabaga na satan a mibibiang itayo ed ministeryo ‘diad arap na Dios, dia ed biang nen Kristo.’ Sano wala ak ed ministeryo, panliliketan ko so piiba ed saray kaarok.”​—Claudio, 43 años; abautismoan nen 1974.

“Diad tua, say panagpulong a kimey et personal a pipupuligesgesan ko. Ingen, naeksperiensyak so katuaan na saray salitan naromog ed Salmo 18:29: “Lapu ed Dios ko onlukso ak ed tapew na sakey a bakor.”​—Gerard, 79 años; abautismoan nen 1955.

“No nibasak so sakey labat a teksto diad ministeryo, naliliketan ak ta impausisa na sakey a too so puso to diad Biblia.”​—Eleanor, 26 años; abautismoan nen 1989.

“Sasalien ko so nanduruman metodo. Dakerakel so walan introduksion kanian agko nausar iratan ya amin ed nakekeraan niran taon na bilay ko.”​—Pablo, 79 años; abautismoan nen 1940.

“Agak naoopendi ed negatibo iran reaksion na totoo. Sinalik so pagmaliw a makaaro, a mitotongtong ak ed totoo tan ondedengel ed punto de bista ra.”​—Daniel, 75 años; abautismoan nen 1946.

“Akabat ko iray balon abautismoan ya angibaga ed siak a walay agawaan na impanpulong ko ed impagmaliw dan Tastasi. Agko amta a wala manayay angiyaral ed sikara na Biblia diad saginonor tan tinulongan da iran inmaligwas. Panliketan kon naamtaan a say ministeryo tayo so inggrupon kimey.”​—Joan, 66 años; abautismoan nen 1954.

Anto so akatulong ed sikayo a ‘manbunga tekep na panagsungdo’?​—Lucas 8:15, NW.

[Saray litrato ed pahina 20]

Diad pangipatnag ed bunga na espiritu tan diad pangiyabawag ed mensahe na Panarian, makapanbunga itayo na dakel

[Litrato ed pahina 23]

Anto so labay ya ibaga nen Jesus sanen inkuanto ed saray apostol ton: ‘Manbunga kayo na dakel’?