“Mansiansia Kayo ed Salitak”

“No mansiansia kayo ed salitak, sirin petepeteg a sikayo so babangatan ko.”​—JUAN 8:31.

1. (a) Sanen pinmawil ed tawen si Jesus, anto so intilak to diad dalin? (b) Antoran tepet so konsideraen tayo?

 SANEN pinmawil ed tawen si Jesu-Kristo, say Angiletneg na Inkakristiano, sikatoy ag-angitilak diad dalin na saray libron insulat to, saray monumenton impaalagey to, odino kaykayamanan ya atipon to. Say intilak to et saray babangatan ontan met ed espesipiko iran kakaukolanen ed pagmaliw a babangatan. Diad tua, naromog tayo ed Ebanghelyo nen Juan so taloran importantin kakaukolanen a sinalambit nen Jesus a nepeg a kapeten na siopaman a malabay a magmaliw a patumbok to. Anto iratan a kakaukolanen? Anto so gawaen tayo pian nakapet iratan? Tan panon tayon naseguro a kualipikado itayo bilang babangatan nen Kristo natan? *

2. Anto so sakey ya importantin kakaukolanen ed pagmaliw a babangatan, unong a nikurit ed Ebanghelyo nen Juan?

² Manga anemiran bulan sakbay na impatey to, tinmatdang si Jesus ed Jerusalem tan pinulongan to iray totoo a nandaragup diman pian manselebra ed sakey-simban Piesta na Kobongkobong. Bilang resulta, sanen mameglepegley lay piesta et “amayamay ed saray dakel a katooan so anisia ed sikato.” Intuloy nen Jesus so nampulong, kanian diad unor lan agew na piesta, “amayamay so anisia ed sikato.” (Juan 7:10, 14, 31, 37; 8:30) Diad saman a panaon et impaarap nen Jesus so imano to ed saray balon mananisia tan sinaglawi to so importantin kakaukolanen ed pagmaliw a babangatan, unong ya inkurit nen apostol Juan: “No mansiansia kayo ed salitak, sirin petepeteg a sikayo so babangatan ko.”​—Juan 8:31.

3. Anton kalidad so nakaukolan na sakey pian ‘makapansiansia ed salita [nen Jesus]’?

³ Diad saratan a salita, aglabay ya ibaga nen Jesus a saray balon mananisia et onkukulang ira na pananisia. Imbes, impabitar to a walaan ira na pankanawnawan magmaliw a tuan babangatan to​—no mansiansia ira ed salita to tan no mansungdo ira. Inawat da la so salita to, balet kinaukolan a mantultuloy ira ed satan. (Juan 4:34; Hebreos 3:14) On, minoria nen Jesus so panagsungdo bilang importantin kalidad na saray patumbok to diad unor lan impitongtong to ed saray apostol to, a nikurit ed Ebanghelyo nen Juan, kanian oniay amiduan impaseseg nen Jesus: “Tumbok mo ak.” (Juan 21:19, 22) Ontan so ginawa na dakel ed saray inmunan Kristiano. (2 Juan 4) Anto so akatulong ed sikara pian mansungdo?

4. Anto so akatulong ed saray inmuunan Kristiano pian mansungdo?

⁴ Si apostol Juan, a matoor a babangatan nen Kristo ed loob na manga pitoran dekada, so angipabitar ed importantin sengegan. Kinomendaan to iray matoor a Kristiano, a kuanto: “Mabiskeg kayo, tan say salita na Dios manayam ed sikayo, tan dinaeg yo so samay mauges.” Saratan a babangatan nen Jesus so nansungdo, odino nansiansia ed salita na Dios, lapud nansiansia ed sikara so salita na Dios. Walaan ira na impapuson apresasyon ed satan. (1 Juan 2:14, 24) Mipadpara natan, ta pian ‘makapansungdo anggad kasampotan,’ nakaukolan tayon seguroen a mansiasiansia ed sikatayo so salita na Dios. (Mateo 24:13) Panon tayon nagawaan itan? Say ilustrasyon ya imbaga nen Jesus so mangiter na ebat.

‘Ondedengel ed Salita’

5. (a) Anton nanduruman klase na dalin so sinalambit nen Jesus diad sakey ed saray ilustrasyon to? (b) Anto so irerepresenta na bini tan say dalin diad ilustrasyon nen Jesus?

⁵ Indalatdat nen Jesus so ilustrasyon nipaakar ed managtanem ya angisibwag na bini, tan nikurit itan ed Ebanghelyo nen Mateo, Marcos, tan Lucas. (Mateo 13:1-9, 18-23; Marcos 4:1-9, 14-20;  Lucas 8:4-8, 11-15) Legan yon babasaen iray salaysay, naimano yo a say manunan kabiangan na ilustrasyon et naplag so saksakey a klase na bini ed nanduruman klase na dalin, a walaan na nanduruman resulta. Anawet so primeron klase na dalin, atapew so komadua, tan say komatlo et atuboan na sabsabitan. Say komapat a klase et “maong” tan “mabuna a dalin,” ya aliwan singa say inmunan talora. Unong ed mismon salaysay nen Jesus, say bini et say mensahe na Panarian a naromog ed Salitay Dios, tan say dalin so mangirerepresenta ed totoo a walaan na nanduruman kipapasen na puso. Anggaman walay pigaran pampadparaan na totoo ya inlitrato na nanduruman klase na dalin, saramay inlitrato na maong a dalin so walaay pakapangibiigan manlapud arum.

6. (a) Panon a midumaan so komapat a klase na dalin diad ilustrasyon nen Jesus manlapud talora nin klase, tan anto so kabaliksan na satan? (b) Anto so importante ed pangipanengneng na panagsungdo bilang babangatan nen Kristo?

⁶ Impabitar na salaysay ed Lucas 8:12-15 ya amin ed apatiran klase, saray totoo so ‘dinmengel ed salita.’ Balet, saramay walaan na “masimpit tan maong a puso” so agbasta labat ‘dinmengel ed salita.’ Satan so ‘binembenan da, tan nambunga ira tekep na anos.’ Say maong tan maabig a dalin, ya anlemek tan aralem, so mangiyabuloy ed bini ya onlamot, tan bilang resulta et ontubo tan manbunga itan. (Lucas 8:8) Mipadpara, saramay walaan na maabig a puso so makatalos, mangapresya, tan makatebek ed salita na Dios. (Roma 10:10; 2 Timoteo 2:7) Mansiasiansia ed sikara so salita na Dios. Kanian, manbubunga ira tekep na panagsungdo. Say aralem tan impapuson apresasyon ed Salitay Dios so makana sirin ed pangipatnag na panagsungdo bilang babangatan nen Kristo. (1 Timoteo 4:15) Balet, panon tayon nabayuboan itan ya impapuson apresasyon ed Salita na Dios?

Kipapasen na Puso tan Aralem a Panmolimoli

7. Anton kimey so maapit a misiglaotan ed maong a puso?

⁷ Imanoen pa no anton kimey so aminpigan insiglaot na Biblia ed maong tan maabig a puso. “Say puso na matunong et mandalepdep pian onebat.” (Uliran 15:28, NW) “Abuloyan mo so saray salitak, tan say dalepdep na pusok naako ra ed pakanengneng mo, O Jehova.” (Salmo 19:14) “Say dalepdep na pusok say pakatalos.”​—Salmo 49:3.

8. (a) Sano manbabasa na Biblia, anto so nepeg tayon paliisan balet anto so nepeg tayon gawaen? (b) Antoray nagunggona tayo ed masimoon a panagdalepdep ed Salita na Dios? (Ilaktip so kahon ya “Onletneg a Malet Diad Katuaan.”)

⁸ Singa sarayan managsulat na Biblia, nakaukolan tayo met a dalepdepen so Salitay Dios tan say kimey to tekep na apresasyon tan pikakasi. Sano babasaen so Biblia odino saray publikasyon a nibase ed Biblia, agtayo nepeg so magmaliw a singano mansalgan turista ya apuradon alis-alis ed nanduruman lugar, a litrato lan litrato balet ta nasasaew to so marakep a nenengnengen. Imbes, sano manaaral na Biblia, labay tayon ipanaon so panggayaga ed marakep a nenengnengen, a singa panangibaga. * Legan tayon mareen a momolimolien so babasaen tayo, say salitay Dios so mangapekta ed puso tayo. Aapektaen na satan so emosyon tayo tan momoldien na satan so isip tayo. Satan so mamakiwas met ed sikatayo a mangibalikas ed aralem iran nonot tayo ed Dios diad pikakasi. Kanian napaelet so pisisiglaotan tayo ed si Jehova, tan say aro tayo ed Dios so  mamakiwas ed sikatayon mantultuloy ya ontumbok ed si Jesus anggan diad makapaangat iran sirkumstansya. (Mateo 10:22) Malinew, say pandalepdep ed walan ibabaga na Dios so makana no labay tayoy mansiansian matoor anggad anggaan.​—Lucas 21:19.

9. Panon tayon naseguro a say puso tayo so mansiansian mabulos a mangawat ed salita na Dios?

⁹ Ipapabitar met na ilustrasyon nen Jesus a walaray babeng ed ibabaleg na bini, say salitay Dios. Pian mansiansia sirin a matoor a babangatan, nepeg tayon (1) ibiig iray babeng ya irerepresenta na makapuy iran kipapasen na dalin ya asalambit ed ilustrasyon tan (2) manggawa na saray kundang pian ipetek odino paliisan iratan. Diad ontan a paraan, makaseguro itayo a say puso tayo so mansiansian mabulos a mangawat ed bini na Panarian tan mantultuloy itayon manbunga.

‘Diad Gilig na Dalan’​—Pagmaliw ya Okupado

10. Deskribien so unonan klase na dalin diad ilustrasyon nen Jesus, tan ipaliwawa so kabaliksan na satan.

¹⁰ Say unonan klase na dalin a naplagan na bini et ‘diad gilig na dalan,’ a ditan ‘agatin-gatinan’ so bini. (Lucas 8:5) Say dalin ed gilig na dalan a mamaarap ed uma so aperper la lapud naynay ya idadalan na totoo. (Marcos 2:23) Mipadpara, saramay mangiyaabuloy ed amayamay ya aktibidades na mundo a mangipaakseb na agmanepeg iran kakaukolanen ed sikara so okupadon tuloy kanian agda nabayuboan so impapuson apresasyon ed salita na Dios. Nadngel da itan, balet agda dinalepdep itan. Kanian say puso ra so ag-onkikiwas. Sakbay dan nabayuboan so aro ed satan, “onsabi Diablo, et ekalen to so salita ed kapusoan da, pian ag-ira manisia tan ag-ira nilaban.” (Lucas 8:12) Kasin napaliisan iya?

11. Panon tayon naamper so pagmaliw na kipapasen na puso tayo a singa anawet a dalin?

 ¹¹ Dakel so nagawaan pian naamper so pagmaliw na puso a singa agmabungan dalin diad gilig na dalan. Say agatin-gatinan tan anawet lan dalin so magmaliw ya anlemek tan mabunga no bukalkalen itan tan agla dalanan. Mipadpara, say pangipanaon ed panaral tan pandalepdep ed Salitay Dios so manresulta ed pagmaliw na puso a singa maabig tan mabungan dalin. Say tombok et say agpagmaliw ya okupadon tuloy ed saray inagew-agew a bengatla ed bilay. (Lucas 12:13-15) Imbes, seguroen a wala so panaon ed panmolimoli ed “mas importante iran bengatla” ed bilay.​—Filipos 1:9-11.

‘Diad Kabatoan’​—Pagmaliw a Matakot

12. Anto so peteg a pakalenesan na balo ni labat a tubo diad komaduan klase na dalin unong ya asalambit ed ilustrasyon nen Jesus?

¹² Sano napelag so bini ed komaduan klase na dalin, aglabat itan mansiansia ed tapew, a singa ed kipapasen na inmuna. Onlamot tan ontubo itan. Balet sano ontagey lay agew et napiktat itan ed petang tan nalenes. Balet, imanoen iyan importantin detalye. Say peteg a pakalenesan na balo ni labat a tubo et aliwan say petang. Siempre, say tanaman a tinmubo ed maong a dalin so naagew met, balet ag-itan nalenes​—diad tua et ombuna itan. Anto so pandumaan? Nalenes iyan balo ni labat a tubo, so insalaysay nen Jesus, “nisengeg ed ag-ira niaralem ed dalin” tan “lapu ed anggapo so basa to.” (Mateo 13:5, 6; Lucas 8:6) Say ‘bato’ a walad dalem na akintapew a dalin, so mangamper ed ilamot na bini pian makasepsep na danum tan agnabagot. Nalenes so balo ni labat a tubo lapud atapew so dalin.

13. Anton nengneng na indibidual iramay singa atapew a dalin, tan anto so aragdalem a rason na paraan na ikikiwas da?

¹³ Sayan kabiangan na ilustrasyon so manutukoy ed saray indibidual a ‘malikeliket ya angawat ed salita’ tan maseseg a tinmumbok ed si Jesus diad ‘aganon panaon.’ (Lucas 8:13) Sanen niiyan itan ed mansasnit a petang na agew na “kairapan ono pakapasegsegang,” sikara so nagmaliw a matakot a tuloy kanian abalang da so liket da tan biskeg da tan agla ra tinmumbok ed si Kristo. (Mateo 13:21) Balet, say komaduan rason na intakot da et aliwan say isusumpa. Siempre, sinungdoan na minilyon a babangatan nen Kristo so nanduruman nengneng na kairapan, ingen ta sikara so nansiansian matoor. (2 Corinto 2:4; 7:5) Say peteg a rason na impagmaliw na arum a matakot tan kinmasipa ed katuaan et say singa-baton kipapasen na puso ra ya angamper ed aralem a pakapandalepdep da ed makapabiskeg tan maespiritual iran bengatla. Kanian, say apresasyon ya abayuboan da ed si Jehova tan say salita to so ataptapew tan maletletey ya ontalindeg ed isusumpa. Panon a napaliisan na sakey so ontan a pansumpalan?

14. Antoran kundang so nepeg a gawaen na sakey ya indibidual pian naamper to so pagmaliw na kipapasen na puso to a singa atapew a dalin?

¹⁴ Kinaukolan na sakey ya indibidual a seguroen ya anggaporay singa-baton babeng a walad puso to, a singa say nigalet ya inkaingongot, akaamot ya inkasiblet, odino arum niran anawet tan akaamot a liknaan. No niwala man itan a babeng, say impluensya na salitay Dios so mangekal ed satan. (Jeremias 23:29; Efeso 4:22; Hebreos 4:12) Kayari na satan, say masimoon a panagdalepdep so managyat ed aralem a ‘kitanem na salita’ diad puso na too. (Santiago 1:21) Satan so mangiter na biskeg pian natalonaan iray panaon na inkadismaya tan ed inkakpel pian mansiansian matoor anggaman ed saray subok.

‘Diad Saray Sabisabit’​—Naapag ed Puso

15. (a) Akin a say komatlon klase na dalin ya asalambit nen Jesus so nagkalalo lan makanepegan na imano tayo? (b) Anto so nagawa ed kaunoran diad komatlon klase na dalin, tan akin?

¹⁵ Say komatlon klase na dalin, a walaan na  saray sabsabitan, so nagkalalo lan makanepegan na imano tayo lapud diad arum a dalan et mipadpara itan ed maong a dalin. Singa say maong a dalin, say dalin a napnoy sabsabitan so mangiyabuloy ed bini ya onlamot tan ontubo. Diad primero et anggapo so pandumaan na itutubo na satan a tanaman diad sayan duaran klase na dalin. Balet, diad ilabas na panaon, niwala so kipapasen a mangamper la ed tanaman diad saginonor. Aliwan singa samay maabig a dalin, sayan dalin so natabonan na saray sabsabitan. Diad itutubo na sayan melag nin tanaman ed satan a dalin, milumbaan itan ya ombaleg ed ‘saray sabsabitan a tinmubon kaiba na saratan.’ Walay panaon a mansamsaman la iratan na sustansia, liwawa, tan espasyo, balet diad kaunoran et amperen na saray sabsabitan so tanaman tan ‘mangilereg ed satan.’​—Lucas 8:7.

16. (a) Antoran indibidual so iyuulibay na dalin a napnoy sabsabitan? (b) Unong ed salaysay na taloran Ebanghelyo, anto so irerepresenta na saray sabsabitan?​—Imanoen so paimano’d-leksab.

¹⁶ Anton nengneng na saray indibidual so kaulibay na dalin a napnoy sabsabitan? Insalaysay nen Jesus: “Saraya so dinmengel, et nen onla ra ed dalan da nalner ira ed kapagaan tan kayamanan tan likeliket ed saya a bilay, et ag-ira manbunga na naluto.” (Lucas 8:14) Singa ed bansag ya intubo na bini na managtanem tan saray sabsabitan diad dalin, ontan met iramay indibidual a parehon mangaabrasa ed salita na Dios tan saray “likeliket ed saya a bilay.” Nitanem so katuaan na salitay Dios diad kapusoan da, balet milaslasan itan ed arum niran gegemtan a mangaalay imano ra. Naapag so piguratibon puso ra. (Lucas 9:57-62) Satan so mangamper ed sikara a nawalaan na malaem a panaon ed masimoon tan makabaliksan a panagmolimoli ed salitay Dios. Agda sigpot a natebek so salitay Dios tan kulang ira na impapuson apresasyon a nakaukolan pian makapansungdo ira. Kalkalna, saray espiritual ya interes da so nadaeg na materyal iran gegemtan anggad punton saratan so ‘sigpot lan nilereg.’ * Agaylan makapaermen so pansumpalan na saramay aliwan interon-puson mangaaro ed si Jehova!​—Mateo 6:24; 22:37.

17. Antoran pampilian so nakaukolan tayon gawaen ed bilay ta pian ag-itayo nadaeg na piguratibo iran sabsabitan ya asalambit ed ilustrasyon nen Jesus?

¹⁷ Diad pangiyuna ed saray espiritual a pamaakaran nen say materyal iran bengatla, napaliisan tayo so pakadaeg ed saray kairapan tan likeliket ed sayan mundo. (Mateo 6:31-33; Lucas 21:34-36) Agnepeg a paulyanan so panagbasa na Biblia tan panagmolimoli ed nababasa tayo. Makaromog itayo na malaem a panaon parad niyapasakey tan masimoon a panagdalepdep no pasimplien tayo so bilay tayo anggad posibli. (1 Timoteo 6:6-8) Saray lingkor na Dios a manggagawa ed satan​—a singano amalin la ed saray sabsabitan manlapud dalin pian mangiter na nagkalalon sustansia, liwawa, tan espasyo ed manbubungan tanaman​—so makakaeksperiensya ed panamendisyon nen Jehova. Inkuan nen Sandra, a manedad lay 26: “Sano dalepdepen ko iray bendisyon ed siak diad katuaan, namoriak ya anggapo so niyopresi na mundo a mipara ed satan!”​—Salmo 84:11.

18. Panon itayon makapansiansia ed salita na Dios tan makapansungdo bilang Kristianos?

¹⁸ Malinew sirin ya amin tayo, malangwer man odino matakken, so makapansiansia ed salita na Dios tan mansungdo bilang babangatan nen Kristo daput no mansiansia ed sikatayo so salita na Dios. Kanian, seguroen tayo a say dalin na piguratibon puso tayo so agbalot onawet, atapew, odino natuboan na arum niran tanaman noagta pansiansiaen itan ya anlemek tan aralem. Diad satan a paraan, nayarian tayon sigpot a talosan so salita na Dios tan ‘manbunga tekep na panagsungdo.’​—Lucas 8:15, NW.

[Saray paimano ed leksab]

Antoray Ebat Yo?

• Akin a nakaukolan tayo so ‘mansiansia ed salita nen Jesus’?

• Panon tayon napansiansia so salitay Dios ed puso tayo?

• Antoran klase na saray indibidual so irerepresenta na apatiran nanduruman klase na dalin a sinalambit nen Jesus?

• Panon yon nipanaon so panmolimoli ed salitay Dios?

 [Tepetepet Parad Panagaral]

[Kahon/Litrato ed pahina 10]

‘ONLETNEG A MALET DIAD KATUAAN’

DAKEL ya abayaglan babangatan nen Kristo so taotaon lan “akaletneg a malet diad katuaan.” (2 Pedro 1:12, NW) Anto so akatulong ed sikara a mansungdo? Konsideraen so pigara ed saray komento ra.

“Diad kada pansumpal na sanagew ko et manbabasa ak na sakey a parte na Biblia tan manpipikasi ak. Insan morekdeken ko so abasak.”​—Jean, abautismoan nen 1939.

“Say pandalepdep ed no panon a si Jehova, ya atagtagey, so mangaaron maong ed sikatayo so mangiiter ed siak na inkaligen tan biskeg pian mansiansian matoor.”​—Patricia, abautismoan nen 1946.

“Diad pansiasiansiak ed maong ya ugali na panagaral na Biblia tan diad panetebek ko ed ‘aralem iran bengatla na Dios,’ makapantutultuloy ak [ed panaglingkor ed si Jehova].”​—1 Corinto 2:10; Anna, abautismoan nen 1939.

“Babasaen ko so Biblia tan saray nibase’d Biblian publikasyon tekep na gagala ya usisaen so pusok tan motibok.”​—Zelda, abautismoan nen 1943.

“Say sankaabigan a panaon ko et sano manaakar ak tan mitotongtong ak ed si Jehova diad pikakasi tan ibabagak ed sikato no anton talaga so naliliknak.”​—Ralph, abautismoan nen 1947.

“Igagapok so agew ko diad pangonsidera ed inagew-agew a teksto tan ed pambasa na sakey a parte na Biblia. Saya so mangiiter ed siak na balon bengatla a nadalepdep ed loob na sanagew.”​—Marie, abautismoan nen 1935.

“Parad siak et makapasagyat so bersikulo por bersikulon impaningbat ed sakey a libro na Biblia.”​—Daniel, abautismoan nen 1946.

Kapigan kayo masimoon a manmomolimoli ed Salitay Dios?​—Daniel 6:10b; Marcos 1:35; Gawa 10:9.

[Litrato ed pahina 13]

Diad pangiyuna ed saray maespiritual a bengatla, ‘makapanbunga itayo tekep na panagsungdo’