Report na Saray Manangiyabawag na Panarian

“Narerengel” Da so Mensahe na Panarian Diad Brazil

PIAN niyabawag so maong a balita na Panarian diad komunidad na saray telek, dakel a Tastasi nen Jehova ed Brazil so angawat ed angat a manaral na Sign Language na Brazil. Saray sagpot da so walaan na alay abig iran resulta, unong ya ipabitar na saray onggendan ya eksperiensya.

Si Eva, * sakey a telek a bii diad São Paulo, so nanaral na sign language sanen sikato tan say taloran ananak to so akiamong ed sakey a telek a laki. Diad sakey a shopping mall, si Eva tan say piaamongan to so akaabet na saray telek a Tastasi tan naimbitaan ira ed sakey a pantitipon diad Kingdom Hall. Inawat da so imbitasyon, ya iisipen dan sosyal a pantitipon iman.

Lapud limitadoy amta to ed sign language, dagdaiset so atalosan nen Eva diad miting. Kayari na saman, sikatoy inimbitaan na pigaran Tastasi diad abung da pian manmerienda. Diad impangusar ed saray retrato ed brosyur ya Enjoy Life on Earth Forever!, impaliwawa da so sipan na Dios a paraison dalin ed arapen. Labalabay nen Eva so naaralan to tan ginmapon inmatendi a regular ed saray miting.

Ag-abayag kayari na saman, tinaynan nen Eva so piaamongan to pian manbilay a mitunosan ed saray estandarte na Biblia. Anggaman pirmin sinumpa na pamilya to, nantultuloy ya inmaligwas si Eva ed espiritual tan abautismoan nen 1995. Anem bulan ed saginonor, nampalista si Eva bilang payunir, odino sigpot-panaon a manangiyabawag na Panarian. Nanlapula’d saman et apatira lan telek a totoo so atulongan to ya angidedikay bilay da tan nampabautismo.

Si Carlos so sipor lan telek. Manlapud inkaugaw to et sikatoy alanor ed druga, imoralidad, tan panagtakew. Lapud sesesgaen na saray mankalaban a membro na pangkat, sikatoy binmatik ed São Paulo tan akiayam ya agano ed si João. Si João et telek tan imoral so kabibilay to a singa si Carlos.

Linmabas so pigaran taon, akabatan nen Carlos so mensahe na Panarian, ya amakiwas ed sikaton umanen so kabibilay to tan gawaen a legal so panamaley to. Kayari ton akapet iray Makasulatan a kakaukolanen, abautismoan si Carlos bilang simbolo na dedikasyon to ed si Jehova. Ambegya, ag-amta nen Carlos ya akabatan met la nen João so maong a balita, tan inuman to met so kabibilay to. Sanen naamtaan nen João ya ag-abobonan nen Jehova so pangusar na saray imahen, imbantak ton amin so koleksion ton “sasanto.” Kayarin inkaindan to so datin estilo na kabibilay to, abautismoan met si João.

Agaylay liket nen Carlos tan João sanen akapandumog ira diad sakey a Kingdom Hall tan naimano da iray impanguman na balang sakey! Natan et sikara lan dua so responsablin ulo na pamilya tan manlilingkor bilang maseseg a manangiyabawag na Panarian.

Diad Brazil, wala so peles a 30 sign-language a kongregasyon tan 154 a grupo, a walaan na masulok a 2,500 iran manangipalapag, a diad saratan et 1,500 so telek diad Brazil. Nen 2001 a “Manangibangat na Salitay Dios” a Distrito Iran Kombension parad saray telek, masulok a 3,000 so inmatendi, tan 36 so abautismoan. Tekep na panamendisyon nen Jehova, ilaloan a dakel niran telek so mangawat ed mensahe na Panarian.

[Paimano ed leksab]