Nasesesga so Inkapermanente tan Inkakontento ed Trabaho

“SAY kanepegan a mantrabaho” so importante ed amin a totoo, unong ed Universal Declaration of Human Rights, ya impalapag na Nasyones Unidas. Balet, satan a kanepegan so aglawas garantisado. Lalanoren na inkapermanente ed trabaho so dakel a bengatla​—manlapud inkalapagan a kipapasen na lokal iran ekonomya anggad kipapasen na sankagloboan a saliwan (global market). Anggaman ontan, sano naandi odino napepeligron naandi so trabaho, mabetbet a mansusumpal itan ed saray demostrasyon, panggugulo, tan welga. Pigpigara lambengat a bansa so agmakasasagmak na ontan. Anggan say salita a “trabaho, a singa lawas a nagagawa, et sakey a salitan makapasabo na dala,” so inkuan na sakey a managsulat.

Importante ed sikatayo so trabaho lapud dakel iran rason. Likud ed pakakalmoan tayo, satan so ontutulong ed mental tan emosyonal a pankaabigan tayo. Pepeneken na trabaho so pankaliktan na too a magmaliw a produktibon membro na sosyedad tan nawalaan na gagala ed bilay. Mamapawala met itan ed inkasikatayo na dilin-respeto. Kanian, anggan saramay walaan la na magenap a kuarta a panuporta ed saray pankaukolan da odino saramay makanepegan lan man-retiro et lablabayen da so mantultuloy a mantrabaho. On, importantin maong so trabaho a no anggapo itan, mabetbet a pansengegan itan na seryoso iran problema ed panagbilay.

Diad biek a dapag, walaray walaan na trabaho balet ta dakel iray desdes a nasasagmak da ed trabaho kanian naandi so liket da a mantrabaho. Alimbawa, lapud pirmin panlalaslasan natan ed komersyo, ondarakel iray kompanya a mamabawas na empleyado pian makagimper. Nayarin saya so makapairap ed saramay nakekeraan ya empleyado, a kaukolan a manakbat ed kaaruman a kimey.

Say modernon teknolohiya a nepeg komon a mamainawa ed bilay tan mamainomay ed panagtrabaho, so angarum la ingen na desdes diad pantratrabahoan. Alimbawa, saray kompyuter, fax machine, tan say Internet so angiyabuloy a nituloy so trabaho diad abung kayari detira ed trabaho, diad ontan et agla nibiig so pandumaan na abung tan opisina. Ipasen na sakey ya empleyado a say walad sikaton pager tan cell phone na kompanya et singa agnanengneng a gulonggulong, a sankabembenan na amo to.

Say katatakotan na dakel ya ontatakken a totoo ed maples a manguuman ya ekonomya tan kipapasen na trabaho et say pangipapasen ed sikara a makapuy la ran mantrabaho anggaman sarag da ni. Nipaakar ed saya et oniay  inkuan na datin Human Rights Commissioner a si Chris Sidoti: “Singano walay estandarte a likud no anggapo ni 40 años mo, agmo la nasarag so mangusar na kompyuter tan say balon teknolohiya.” Kanian, dakel ed saray makukulin empleyado ya ipapasen nensaman a sikaray walad kabisbiskegan da, so ipapasen la natan a matakken la pian pantrabahoen ni. Agaylan makapasinagem itan!

Natalosan no akin a say maong ya ugali ed panagtrabaho tan katooran ed kompanya so ibabaliwala la ed agano niran taon. “Sano sisisantien na saray korporasyon iray empleyado diad samet a panguuman na stock market, say katooran ed korporasyon so naaandi,” so inkuan na Pranses a magasin a Libération. “Siempre, kaukolan kan mantrabaho, balet parad inkasika, aliwan parad kompanya.”

Anggaman onloloor irayan problema, say manunan pankaukolan na too a mantrabaho et mantutultuloy. Kanian, diad maples a manguuman a panaon tayo, panon a nabayuboan na sakey so balansin panmoria ed sekular a trabaho, a kabansag na satan et napansiansia so inkapermanente tan inkakontento ed trabaho?

[Litrato ed pahina 3]

Say modernon teknolohiya so nayarin angarum na desdes diad pantratrabahoan