No Panon a Bayuboan so Balansin Panmoria ed Trabaho

DIAD sayan makapadesdes a maong a mundo na sankagloboan a saliwan (global market), agresibon panlalaslasan, tan sandarakel a pamapawala na produkto, dakel a totoo so agmaliket a mantrabaho kada agew. Ingen, nepeg komon a panliketan tayo so trabaho tayo. Akin? Lapud apalsa itayo a kaulibay na Dios tan panliliketan na Dios so kimey to. Alimbawa, sanen inimano to so agawaan to kayari na anem “agew,” odino andukey a peryodo na panaon ya impamalsa, ‘anengneng na Dios so amin a bengatla a ginawa to, et nia maong iran tuloy,’ so inkuan na Genesis 1:31.

Maseguron say panlabay nen Jehova a mantrabaho so sakey a rason a sikatoy tinawag a “say maliket a Dios.” (1 Timoteo 1:11, NW) Agta makatunongan sirin a diad nagkalalon pangalig tayo ed sikato et lalon magmaliw itayon maliket? Nipaakar ed saya et oniay insulat nen Arin Solomon na Israel nensaman, a sakey a marundunong a managpaalagey tan manangorganisa: “Balang too mangan tan oninum, tan manliket a maong ed amin a kimey to, sikato so pamalangkap na Dios.”​—Eclesiastes 3:13.

Mairap a nabayuboan so balanse tan dugan panmoria ed trabaho diad sayan maples a manguuman a pantratrabahoan. Balet bebendisyonan nen Jehova a Dios iramay ontatalineng ed maaron panangiwanwan to. (Salmo 119:99, 100) Saratan so magmamaliw a papablien tan panmamatalkan ya empleyado tan sirin et baleg so posibilidad a makapansiansia ira ed trabaho ra. Naaaralan da met a moriaen so bilay tan trabaho ra ya aliwa lambengat ed materyal a punto de bista noagta ontan met ed espiritual. Makakatulong iya ed sikara pian responsablin makapandesisyon ed bilay tan makamoria a say liket tan inkaligen da et aglabat alimitaan ed trabaho ra odino ed manguman-uman a lawak na trabaho. (Mateo 6:31-33; 1 Corinto 2:14, 15) Ontutulong itan ed sikaran nabayuboan so peteg a balansin ugali ed trabaho.

Bayuboan so Maridios ya Ugali ed Trabaho

Arum a totoo so alablabas a mantratrabaho, a manuna ed sikara so trabaho ra. Saray arum so  manpirpirawat a makapandetira la ed trabaho ta pian makasempet la ra. Anto so balansin panmoria? Oniay ebat na Biblia: “Magmaong so sankaakop a tekep na kareenan [“painawa,” NW], nen [say] duaran kaakop a sagpot tan panguusil ed dagem.” (Eclesiastes 4:6) Say alablabas odino andukerukey a panagtrabaho so diad tua et aliwan mabunga​—satan so anggapoy kakanaan a “panguusil ed dagem.” Akin ya ontan? Lapud ompan naderal tayo laingen iray mismon lapuan na pirmin liket tayo: say relasyon tayo ed pamilya tan kakaaro tayo, say espiritualidad tayo, bunigas na laman tayo, tan anggan say dukey na bilay tayo. (1 Timoteo 6:9, 10) Say balansin panmoria et say pagmaliw a kontento ed daiset a materyal ya almo bangta panggagayagaan so kareenan imbes a nabebelatan ed dakerakel a trabaho tekep na balingaan tan kairapan.

Anggaman ipapaseseg na Biblia itan a balansin panmoria, agto aabobonan so inkangiras. (Uliran 20:4) Say inkangiras so maneral ed dilin-respeto tan say respeto na arum ed sikatayo. Mas alodloor ni, deralen na satan so relasyon tayo ed Dios. Prangkan imbaga na Biblia a say toon agmalabay a mantrabaho so agmanepeg a mangan ed nansagpotan na arum. (2 Tesalonica 3:10) Imbes, kaukolan a sikatoy manguman tan mansagpot a mankimey, pian mapagalang a nitaryaan to so inkasikato tan saray maniilalo ed sikato. Diad pansagpot to et natulongan to ni ingen iramay talagan mankakaukolan​—ugalin ipapaseseg na Salitay Dios.​—Uliran 21:25, 26; Efeso 4:28.

Nipasal Manlapud Inkaugaw a Pablien so Trabaho

Say maabig a niyugalin panagtrabaho et agnibanbana lambengat; naaralan itan manlapud inkaugaw. Kanian, bibilinen na Biblia so atateng: “Ibangat mo so anak ed dalan a nepeg to a laen, tan anggan sano masiken la ag-onarawi ed sikato.” (Uliran 22:6) Likud ed pangiletneg na maabig ya ehemplo panamegley na pantrabaho ra a mismo, saray makabat ya atateng so onggapon mangipasal ed angkelag nin ananak da diad pangiter ed sikara na kimey ed abung a matukoy ed edad da. Anggaman maingongot so ugugaw ed pigaran kimey, agmanbayag et ipasen da so inkasikara a papablien a membro na pamilya​—nagkalalo la no komendaan ira nen Tatay tan Nanay da lapud maabig ya atrabaho ra. Makapaermen, walaray atateng a manggagawa na amin lawarin bengatla parad ananak da, nayarin lapu ed agmatukoy a panangasi. Saratan ya atateng so makapangonsidera ed ibabaga na Uliran 29:21, ya onia so nabasa ed New World Translation: “No iter na sakey so amin a labay na aripen [odino  ilalak] to manlapu ed inkaugaw to, sikatoy magmaliw ya anggapoy otang na linawa diad kaunoran na bilay to.”

Saray responsablin atateng so interesado met a maong ed panaaral na ananak da, a papasesegen da ran manaral tan mankimey a maong legan a maneeskuela ira. Saya so makagunggona ed saray kalangweran diad saginonor sano sikara lay mantrabaho.

Magmaliw a Makabat Diad Pampili Yo na Trabaho

Anggaman ag-imbinsabinsa na Biblia no anton klase na trabaho so anapen, mangiiter itan ed sikatayo na maabig iran giya pian say ibubulaslas tayo ed espiritual, serbisyo tayo ed Dios, tan saray arum nin importantin responsabilidad so agnikompromiso. Alimbawa, insulat nen apostol Pablo: “Say panaon apatikeyan la, ta pian manlapud natan, . . . saray managamil ed mundo, agda komon aagamilen ya alabas: ta say ugali na sayan mundo nanaebas.” (1 Corinto 7:29-31) Anggapoy permanente tan sigpot a maligen ed kaplesan a sistema na bengabengatla. Say pangusar ed amin ya oras tan sagpot tayo ed satan et singa panangipundar tayo ed interon-bilay a tipon tayo ed abung a niletneg ed midedelap a lugar. Agaylan agmakabat a panangipundar!

Impatalos na arum a bersion na Biblia so balikas ya “agda komon aagamilen ya alabas” bilang “ag-okupadon tuloy ed saratan.” (Today’s English Version) Agbalot ibabaliwala na makabat a totoo so katuaan a say panaon na kaplesan a sistema so “apatikeyan” tan say pagmaliw ya “okupadon tuloy” ed satan so mansumpal ed pakadismaya tan pagbabawi.​—1 Juan 2:15-17.

‘Agka Ikaindan na Dios’

Amta nen Jehova so kaukolan tayo a nagkalalo nen say sikatayon dili. Amta to met no iner lay kawalaan tayon panaon diad kasumpalan na gagala to. Kanian, papanonotan to itayo: “Nabulos kayo komon a manlapu ed aro na pilak, panliketan yo so bengatla a wala ed sikayo: ta [say Dios a] dili imbaga to: Agtaka naani taynan, tan agtaka naani ikaindan.” (Hebreos 13:5) Agaylan makapaseseg iratan a salita! Diad pangaalig ed maaron panagpaga na Dios ed totoo to, inggana nen Jesus so karaklan ed bantog a Sermon to ed Palandey pian ibangat ed saray babangatan to so manepeg a panmoria ed trabaho tan ed materyal iran bengatla.​—Mateo 6:19-33.

Panggugunaetan na saray Tasi nen Jehova a tuloken iratan a bangat. Alimbawa, sanen inyopresi na amo ed sakey a Tasi ya electrician, a sikatoy regular a man-overtime, satan so agto inawat. Akin? Lapud agto labay a naamper na trabaho to so oras ya igagana to parad pamilya to tan ed espiritual iran bengatla. Lapud sikatoy maong tan napanmatalkan ya empleyado, nirespeto na amo to iray panlabayan to. Siempre, aliwan ontan a naynay so pansusumpalan, tan nayarin kaukolan a mananap na sananey a trabaho so sakey pian namantini to so balansin panagbilay. Bangbalet, saramay sigpot a manmamatalek ed si Jehova so kaslakan lan makakamoria a say maabig ya ugali tan walna ed panagtrabaho so sengegan a sikaray papaboran na amo ra.​—Uliran 3:5, 6.

Sano Makagunggona la so Amin a Trabaho

Diad kaplesan ya ag-ayadyarin sistema na bengabengatla, say trabaho tan pananap na trabaho so lawas katekep na saray problema tan inka-agsegurado. Diad tua, nayarin onloor ni so kipapasen  legan a say mundo so magmaliw a mas agmaligen tan say ekonomya so manguman-uman odino onkapuy. Balet temporaryo labat iyan kipapasen. Agla manbayag, amin so nawalaan lay trabaho. Likud ed satan, amin a trabaho so makapainteres tan makagunggona. Panon a nagawa itan? Anto so makapanguman ed satan?

Diad panamegley na propeta ton si Isaias et impabitar nen Jehova itan a panaon. “Nia, mamalsa ak na saray balo a tawen tan balo a dalin,” kuan nen Jehova, “ta saray inmuna a bengatla ag-ira la nanonotan, ag-ira la onla ed nonot.” (Isaias 65:17) Say tutukoyen to et nipaakar ed balo a gobierno to, a diad satan et magmaliw a petepeteg so sigpot a balo tan duman sosyedad na totoo.​—Daniel 2:44.

Nipaakar ed panagbilay tan trabaho na saray totoo diad satan et oniay intuloy na propesiya: “Sikara ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag-ira naani mantanem et sananey naani mangan; ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra. Sikara ag-ira naani mankimey na maapa, ag-ira naani mananak a nipaakar ed kaderya: ta sikara so bini a benendisyonan nen Jehova, tan say simit da a pati sikara.”​—Isaias 65:21-23.

Agaylan nikadkaduma so gawaen na satan a balon mundo a denisinyo na Dios! Agmo ta labay so manayam ed ontan a mundo, ya agka la “mankimey na maapa” noagta sigpot a panggayagaan mo so “bunga” na sagpot mo? Balet, imanoen pa no siopa so makagamor ed saratan a bendisyon: “Sikara so bini a benendisyonan nen Jehova.” Nayari kan magmaliw a sakey ed saratan a “benendisyonan” diad panaral mo nipaakar ed si Jehova tan kapeten iray kakaukolanen to. Inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Maliket iray Tasi nen Jehova ya ontulong ed sikan nagamoran so manangiter-bilay a pikakabat diad sistematikon panagaral ed Salita na Dios, say Biblia.

[Kahon ed pahina 6]

“Lawas Kakaliktanen”

“Dinanman a gawaen yo, gawaen yon mabulos, a singa nipaakar ed Katawan, et aliwan dia ed saray totoo,” so inkuan na Biblia. (Colosas 3:23) Mapatnag a say toon say ugali to ed trabaho et papakiwasen na maabig a prinsipyo so kalkaliktan ya empleyado. Lapud satan, si J. J. Luna so amilin ed saray amo, diad libro ton How to Be Invisible, a mananap na saray aktibon membro na saray relihyoson grupo, balet inyarum to: “Diad katuaan to et kaslakan lan dedesidien ya awaten iray Tasi [nen Jehova].” Pigara ed saray rason ya inter to et sikaray kabkabat ed inkamatua ra, tan satan so rason a sikaray “lawas kakaliktanen” ed nanduruman nengneng na trabaho.

[Saray litrato ed pahina 5]

Say pamalansi ed trabaho, espiritual a kimkimey, tan panligliwa so lapuan na inkakontento