Propesiya nen Isaias​—Liwawa Parad Amin a Katooan II

Kapitulo Trese

‘Sigagayaga Kayon Onkelyaw a Manbabansag’!

Isaias 52:1-12

1. Akin a lapuan na gayaga so mapropetiko iran salita na Isaias kapitulo 52, tan anto so duaran kasumpalan na saratan?

 KIBULOS! Wala ni kasi mas maliket ya iilaloan para ed akautibon totoo? Lapud say manunan tema ed libro na Isaias et kibulos tan kipawil, agpankelawan a likud ed Salmos et lugan na sayan libro na Biblia so mas dakel a balikas na gayaga nen say arum. Say Isaias kapitulo 52 so nagkalalo lan mangiiter na rason ed panggayaga na totoo na Dios. Saray mapropetikon salita na satan so asumpal ed Jerusalem nen 537 K.K.P. Tan walaan iratan na babaleg a kasumpalan nipaakar ed “Jerusalem a wala ed tagey,” say mangatatawen ya organisasyon nen Jehova a tugyopen na saray espiritun pinalsa, a nadedeskribe no maminsan bilang ina tan asawan bii.​—Galacia 4:26; Apocalipsis 12:1.

“Isulong Mo so Biskeg Mo, O Sion”!

2. Kapigan aliing so Sion, tan panon iyan agawa?

² Diad panamegley nen Isaias et ingganggan nen Jehova ed inadaro Ton syudad, say Sion: “Liing ka, liing ka, isulong mo so biskeg mo, O Sion; isulong mo so marakerakep a kawes mo, O Jerusalem, santo a syudad: ta manlapud natan agla naani onloob ed sika so ag-agalsiman tan say agmalinis. Pokpokan mo so laman mo ed dabok: onalagey ka, onyurong ka ed tronom, O Jerusalem: ukbaren mo so saray balor na tenger mo, O adakep a bii ya anak na Sion.” (Isaias 52:1, 2) Lapud pinasanok na saray manaayam ed Jerusalem si Jehova, satan so nansiansian nankibalatar ed loob na 70 a taon. (2 Arari 24:4; 2 Awaran 36:15-21; Jeremias 25:8-11; Daniel 9:2) Natan et panaon la pian sikatoy onliing ed abayag a panaon ya inka-inaktibo to tan isulong to so marakdakep a kawekawes na kibulos. Tinenyeg nen Jehova so puso nen Ciro a mangibulos ed “adakep a bii ya anak na Sion” pian taynan na saray datin manaayam ed Jerusalem tan saray ilalak da so Babilonia, ompawil ed Jerusalem, tan ipawil so tuan panagdayew. Anggapoy siopaman ya ag-agalsiman tan marutak a naromog dia ed Jerusalem.​—Esdras 1:1-4.

3. Akin a natawag a “bii ya anak na Sion” so kongregasyon na alanaan iran Kristiano, tan diad anton pantalos a nibulos ira?

³ Walaan met na kasumpalan irayan salita nen Isaias ed Kristianon kongregasyon. Nayarin deskribien so kongregasyon na alanaan iran Kristiano bilang modernon-agew a “bii ya anak na Sion,” lapud ina ra so “Jerusalem a wala ed tagey.” * Lapud nibulos la ra ed saray paganon bangat tan apostatan doktrina, kaukolan a mantinien na alanaan so malinis a talindeg da ed si Jehova, aliwan diad panaggalsim ed laman, noagta diad panaggalsim ed kapusoan da. (Jeremias 31:33; Roma 2:25-29) Kabiangan ed saya so panmantini ed espiritual, mental, tan moral a kalinisan ed imaton nen Jehova.​—1 Corinto 7:19; Efeso 2:3.

4. Anggaman agnin balot sinumlang na “Jerusalem a wala ed tagey” si Jehova, anto so asagmak na saray manangilaman to ed dalin a mipara ed saramay manaayam nensaman ed Jerusalem?

⁴ Tua, agnin balot sinumlang na “Jerusalem a wala ed tagey” si Jehova. Balet, legan na inmunan guerra mundial, saray manangilaman to ed dalin​—saray alanaan a Kristiano​—so akalukso ed ganggan nen Jehova lapud agda atalosan a maong so peteg a Kristianon neutralidad. Diad impakabalang da ed pabor na Dios, sikaray  akautibo ed espiritual diad “Babilonia a Baleg,” say sankamundoan ya empiryo na palson relihyon. (Apocalipsis 17:5) Amantok so inkaaripen da nen Hunyo 1918 sanen impangaw so walora a membro na Watch Tower Society lapu ed palso iran akusasyon, a sakey la dia so impannononong. Diad saman a panaon et ngalngali apatunda so naorganisan panangipulong ed maong a balita. Balet, nen 1919, impaknol so maksil ya anunsio parad iliing ed espiritual. Saray alanaan a Kristiano so ginmapon sigpot a sinmian ed moral tan espiritual ya inkarutak na Babilonia a Baleg. Binmangon ira manlapud dabok na impakakautibo, tan say “Jerusalem a wala ed tagey” so awalaan na karlangan na “santo a syudad” a ditan et agnaabuloyan so espiritual a karutakan.

5. Akin a sigpot a makanepegan si Jehova a manondon ed totoo to ya agmanbayar ed saray nandakep?

⁵ Si Jehova so sigpot a makanepegan a mangibulos ed totoo to nen 537 K.K.P. tan nen 1919 K.P. Oniay impaliwawa nen Isaias: “Ta onia so kuan nen Jehova, Alako kayo ya andi bili; et narondon kayo ya anggapo so pilak.” (Isaias 52:3) Agnambayar na antokaman so Babilonia nensaman tan say Babilonia a Baleg sanen inaripen da so akisipanan a totoo na Dios. Lapud anggapoy agawan impanbayar, si Jehova so siansia nin legal a Makankayarian ed totoo to. Kasin sikatoy akaotang ed siopaman? Siempre andi. Diad saratan ya inkagawa, makanepegan si Jehova a manondon ed saray managdayew ed sikato ya agmanbayar ed saray nandakep.​—Isaias 45:13.

6. Antoran leksion ed awaran so ag-inimano na kakabusol nen Jehova?

⁶ Ag-akaaral na leksion iray kakabusol nen Jehova manlapud awaran. Oniay nabasa tayo: “Ta onia so kuan nen Katawan a Jehova, Say baley ko linmasur ed Ehipto nen inmuna, pian manayam diman: et say Asiryo pinairap da ra ya anggapo so makasengeg.” (Isaias 52:4) Inaripen na Faraon ed Ehipto iray Israelita, pinan-ayam to ira ed bansa to bilang sankaili. Balet nilener nen Jehova si Faraon tan say armada to diad Ambalangan Dayat. (Exodo 1:11-14; 14:27, 28) Sanen pinagyaw nen Arin Senakerib na Asirya so Jerusalem, tinigway na anghel nen Jehova so 185,000 ed saray sundalo na ari. (Isaias 37:33-37) Mipadpara, agnapaliisan na kadaanan a Babilonia tan say Babilonia a Baleg iray resulta na impamairap da ed totoo na Dios.

‘Naamtaan na Baley Ko so Ngaran Ko’

7. Anto so epekto na impakakautibo na totoo to ed ngaran nen Jehova?

⁷ Say ngaran nen Jehova so naapektaan ed impakakautibo na totoo to, unong ya ipapanengneng na propesiya: “Natan sirin, anto so gawaen ko dia, kuan nen Jehova, bangta say baley ko niyarawi ya andi bili to? Saray makauley ed sikara ondangol ira, kuan nen Jehova, tan say ngaran ko naynay a naayew a sanngarem. Kanian say baley naamtaan to naani so ngaran ko: kanian naamtaan da naani ed satan ya agew a siak iman so nansalita; nia, Siak.” (Isaias 52:5, 6) Antoy paninteresan nen Jehova ed situasyon? Anto so pampapagaan to sanen naaripen so Israel ed Babilonia? Nakaukolan ya onkiwas si Jehova lapud kinautibo na Babilonia so totoo to tan mapalaloy pankantiaw da ed sikara lapu ed impanalo ra. Satan a panaglastog so angitonton ed ag-impanrespeto na Babilonia ed ngaran nen Jehova. (Ezequiel 36:20, 21) Agda binidbir a say impankibalatar na Jerusalem et lapu ed insanok nen Jehova ed totoo to. Imbes, minoria na Babilonia so impakaaripen na saray Judio bilang paneknek ed kakapuyan na Dios da. Si Jehova so minudmora ni ingen na kaiban manuley na Babilonia a si Belsasar diad impangusar to ed saray kagawaan na templo To legan na piesta a panangigalang ed dirios na Babilonia.​—Daniel 5:1-4.

8. Panon so impangipasen ed ngaran nen Jehova manlapu la nen inatey iray apostol?

⁸ Panon iyan onaaplika ed “Jerusalem a wala ed tagey”? Manlapu nen niletneg so apostasya ed limog na saray mankuan a Kristiano, nayarin nibaga a “say ngaran na dios naayew lapu ed [saramay] dia ed utel na saray Gentiles.” (Roma 2:24; Gawa 20:29, 30) Alimbawa, lapu ed anito et agla inusar na saray Judio so madibinon ngaran. Ag-abayag kayarin inaatey iray apostol, saray apostatan Kristiano so anumbok met ed satan tan tinmundan angusar ed personal a ngaran na Dios. Say apostasya so nanresulta ed inkatibukel na Kakristianoan, a manunan kabiangan na Babilonia  a Baleg. (2 Tesalonica 2:3, 7; Apocalipsis 17:5) Say kasmak ya imoralidad tan parungtalan a panagkasalanan ed dala a gagawaen na Kakristianoan so angitarok na kabandayan ed ngaran nen Jehova.​—2 Pedro 2:1, 2.

9, 10. Anton aralem a pakatalos nipaakar ed saray estandarte tan ed ngaran nen Jehova so niwala ed saray akisipanan a totoo na Dios diad modernon panaon?

⁹ Sanen imbulos na Babaleg a Ciro, si Jesu-Kristo, so akisipanan a totoo na Dios manlapud impakautibo ed Babilonia a Baleg nen 1919, nagkalalo ran atalosan iray kakaukolanen nen Jehova. Nilinisan da la so inkasikara manlapud dakel a bangabangat na Kakristianoan a nibase ed paganismo antis na panaon na Kristiano, a singa say Trinidad, imortalidad na kamarerwa, tan say magnayon a dusa ed mangapuy-apoy ya impierno. Natan et ginapoan da lan ekalen so amin a pakapatnagan na Binababilonian impluensya. Binidbir da met so kaimportantian na mapeget a pansiansian neutral ed saray naapag-apag a partido ed mundo. Kaliktan da ni ingen a linisan so inkasikara ed antokaman a kasalanan ed dala a nayarin agawaan na pigara ed sikara.

¹⁰ Awalaan met na aralem a pakatalos iray modernon-agew a lingkor na Dios ed kaimportantian na ngaran nen Jehova. Nen 1931 et inawat da so ngaran a saray Tasi nen Jehova, diad ontan et mapubliko ran inyanunsio a susuportaan da si Jehova tan say ngaran to. Niarum ni, diad inkipalapag na New World Translation manlapu la nen 1950, pinansiansia na saray Tasi nen Jehova so madibinon ngaran ed manepeg a pasen to ed Biblia. On, aapresyaen da so ngaran nen Jehova tan ipapakabat da itan anggad kasampotan na dalin.

‘Samay Mangiyaakar na Maong a Balita’

11. Akin a matukoy so kelyaw a “Say Dios mo man-ari!” no nipaakar ed saray ebento nen 537 K.K.P.?

¹¹ Nipawil natan so imano tayo ed Sion sanen sikatoy nankibalatar ni. Inmasingger so sakey a mensahero a walaay maong a balita: “Agayla so kalimgasan ed tapew na saray palandey so saray sali na [“samay,” NW] mangiyakar na saray maong a balita, a mangibawag na deen, a mangiyakar na saray maong a balita na kaabigan, a mangibawag na kilalaban, a kuan to ed Sion, Say Dios mo man-ari!” (Isaias 52:7) Nen 537 K.K.P., panon a nibaga a say Dios na Sion so nagmaliw ya Ari? Agta lawas lan Ari si Jehova? Peteg a sikato so “Ari ya andi-angga”! (1 Timoteo 1:17) Balet matukoy so kelyaw a “Say Dios mo man-ari!” lapud say inkagba na Babilonia tan say ganggan na manuley ya ipaalagey lamet so templo ed Jerusalem tan ipawil so tuan panagdayew diman et onkanan balon pakapatnagan ed inkaari nen Jehova.​—Salmo 97:1.

12. Siopa so angidaulo ed ‘pangiyakar na maong a balita,’ tan panon?

¹² Nen panaon nen Isaias et anggaporay atukoy ya indibidual odino grupo na indibidual a ‘mangiyaakar na maong a balita.’ Balet natan, naamtaan la no siopa so mangaakbibit ed maong a balita. Si Jesu-Kristo so sankaabigan a mensahero nen Jehova nipaakar ed kareenan. Sanen wadia ed dalin, impulong to so maong a balita a walay kibulos manlapud amin ya epekto na kasalanan ya atawir ed si Adan, a pati say sakit tan ipapatey. (Mateo 9:35) Angiletneg si Jesus na maseseg ya ehemplo diad impangiyabawag to ed sayan maong a balita na maabig a bengatla, ya inanamot to so balang pankanawnawa ya ibangat so totoo nipaakar ed Panarian na Dios. (Mateo 5:1, 2; Marcos 6:34; Lucas 19:1-10; Juan 4:5-26) Tan tinumbok na saray babangatan to so ehemplo to.

13. (a) Panon a pinalaknab nen apostol Pablo so kabaliksan na balikas ya ‘Agayla so kalimgasan ed tapew na saray palandey so saray sali na samay mangiyakar na saray maong a balita’? (b) Akin a nibagan ‘malimgas’ iray sali na saray mensahero?

¹³ Diad sulat nen apostol Pablo ed saray taga-Roma, inaon to so Isaias 52:7 pian ipabitar so kaimportantian na kimey a panangipulong ed maong a balita. Imparungtal to so nanggegendanan a makatenyeg-kanonotan a tepetepet, a pati ‘Panon so pakadngel na totoo no anggapo so mangipulong?’ Insan to inkuan: “Unong na nisulat, Alay karakpan na saray sali na saray mangitarok na saray magayaga a balita na saray maong a bengatla!” (Roma 10:14, 15) Diad ontan et pinalaknab nen Pablo so aplikasyon na Isaias 52:7, diad impangusar to ed plural form a “saray” imbes a say singular a “samay” a pinmatnag ed orihinal a teksto ed Isaias. Diad pangaalig ed si Jesu-Kristo, amin a Kristiano so mensahero na maong  a balita na kareenan. Panon a ‘malimgas’ iray sali ra? Si Isaias so mansasalita a singano onsasabi la so mensahero ed Jerusalem manlapud kabangibang a kapalandeyan na Juda. Diad arawi et imposiblin nanengneng iray sali na mensahero. Imbes, say naiimano dia et say mensahero, kanian saray sali so mangirerepresenta ed mensahero a mismo. No panon a si Jesus tan saray babangatan to so marakep a nenengnengen parad saray mauyamon totoo nen inmunan siglo, saray Tastasi ed kaplesan so makapalikliket a nenengnengen parad saray mapaabeban ontatalineng ed manangisalbay-bilay a mensahe na maong a balita.

14. Panon a nagmaliw ya Ari si Jehova diad modernon panaon, tan manlapu nen kapigan a niyanunsio iya ed katooan?

¹⁴ Manlapu nen kapigan a nadngel diad modernon panaon so kelyaw a “Say Dios mo man-ari!”? Manlapu la nen 1919. Diad saman a taon diad kombension ed Cedar Point Ohio, si J. F. Rutherford, a presidente ed saman na Watch Tower Society, so anagyat ed saray onderengel diad paliwawa ya apauloan na “Paimano ed Saray Kaiban Komikimey.” Say paliwawa a nibase ed Isaias 52:7 tan Apocalipsis 15:2, so amaseseg ed amin a wadman ya onggapo ed panagpulong a kimey. Diad ontan et ginmapon apatnagan iray ‘malimgas a sali’ diad “saray palandey.” Diad inmuna et saray alanaan a Kristiano insan diad saginonor et saray kaiba ran ‘arum a karnero’ so maseseg a linman angipulong ed maong a balita a si Jehova so nagmaliw ya Ari. (Juan 10:16) Panon a nagmaliw ya Ari si Jehova? Imbalikas to lamet so inkaari to nen 1914 sanen impasen to so Anak ton si Jesu-Kristo bilang Ari ed balon niletneg a mangatatawen a Panarian. Tan imbalikas lamet nen Jehova so inkaari to nen 1919 sanen imbulos to so “Israel na Dios” manlapud Babilonia a Baleg.​—Galacia 6:16; Salmo 47:8; Apocalipsis 11:15, 17; 19:6.

‘Saray Managbantay Mo so Mangitagey ed Boses Da’

15. Sioparay “manbabantay” a kinmelyaw nen 537 K.K.P.?

¹⁵ Kasin walay onkiwas ed kelyaw a “Say Dios mo man-ari!”? On. Oniay inrekord nen Isaias: “Say boses na saray manbabantay ed sika itagey da so boses [da], mankanta ra a bansag; mannengnengan ira naani ed mata tan mata, sano ompawil si Jehova ed Sion.” (Isaias 52:8) Anggapoy literal a managbantay diad Jerusalem nen 537 K.K.P. ya angabrasa ed saray inmunan akapawil ya adestiero. Nankibalatar so syudad diad loob na 70 a taon. (Jeremias 25:11, 12) Kanian saray “manbabantay” ya angikasil ed boses da et saramay Israelita a makaamta lan inmuna ed balita nipaakar ed kipawil na Sion tan responsablin angipaamta ed balita ed arum nin anak na Sion. Sanen anengneng na managbantay ya inter nen Jehova so Babilonia ed lima nen Ciro nen 539 K.K.P., maseguron walad kanonotan da so pangibulos nen Jehova ed totoo to. Say managbantay kaiba iramay kinmiwas ed impaimano ra, so nantultuloy a kinmelyaw a malikeliket tan nankakasakey, ya ipapaamta ra ed arum so maong a balita.

16. Siopa so pinenengnengan ed “mata tan mata” na managbantay, tan diad anton pantalos?

¹⁶ Saray alerton managbantay so angiletneg na maapit tan personal a relasyon ed si Jehova, a minenengnengan ed “mata tan mata” odino lupalupaan, a singa panangibaga. (Numeros 14:14) Say maapit a pisisiglaotan da ed si Jehova tan ed balang sakey so mangipapabitar ed inkasaksakey da tan ed maliket a nengneng na mensahe ra.​—1 Corinto 1:10.

17, 18. (a) Panon ya inkasil na modernon-agew a managbantay a klase so boses to? (b) Diad anton pantalos a nankakasakey ya angiyanunsio so managbantay a klase?

¹⁷ Diad modernon-panaon a kasumpalan, say managbantay a klase, say “matoor tan makabat ya aripen,” so aglambengat angikasil ed boses to ed saramay wala la’d nanengneng ya organisasyon na Dios noagta ontan met ed saramay walad paway. (Mateo 24:45-47) Nen 1919 et akerew so panipon ed saray nakekeraan ya alanaan, tan nen 1922 et pinmalalo so kerew diad kombension ed Cedar Point, Ohio, tekep na pananagyat ya “iyanunsio, iyanunsio, iyanunsio, so Ari tan say panarian to.” Manlapu nen 1935, imbaling so imano ed panipon ed baleg ya ulop na saray kinmarneron totoo. (Apocalipsis 7:9, 10) Diad imbebeneg iran taon, say anunsio ed inkaari nen  Jehova so pinmalalo. Panon? Diad taon 2000, manga anemiran milyon so mibibiang ed pangiyaabawag ed inkaari nen Jehova diad masulok a 230 a daldalin tan teritorya. Niarum ni, ipapaknol na Say Panag-Bantayan, a manunan instrumento na managbantay a klase, so magayagan mensahe diad masulok a 130 a lenguahe.

¹⁸ Pian makapibiang ed sayan manamakasakey a kimey, nakaukolan so kaumildian tan inaagin aro. Pian magmaliw ya epektibo so kerew, amin a nalalanor so kaukolan a mangipulong ed parehon mensahe, ya iparungtal so ngaran nen Jehova, say intarya ton dondon, say kakabatan to, say aro to, tan say Panarian to. Legan a benebenek a mankikimey iray Kristiano ed interon mundo, say personal a relasyon da ed si Jehova so napapabiskeg pian mankakasakey ya ipaknol so maliket a balita.

19. (a) Panon a nagmaliw a masayaksak so ‘nankibalatar a paspasen na Jerusalem’? (b) Diad anton pantalos a “nilislisan [nen Jehova] so taklay to a masanto”?

¹⁹ Lapud magayagan onkekelyaw so totoo na Dios, pati say pasen a panaayaman da et nengneng toy masayaksak. Oniay intuloy na propesiya: “Onarak-ak kayo ed liket, mankanta [“sigagayagan onkelyaw,” NW] kayo a bansag, sikayo a kibalatar a paspasen na Jerusalem; ta si Jehova niligliwa to so baley to, dinondon to so Jerusalem. Si Jehova nilislisan to so taklay to a masanto ed saray mata na saray amin a nasyon; tan amin a sampot na dalin nanengneng da so panangilaban na Dios tayo.” (Isaias 52:9, 10) Diad insabi na saray pinmawil manlapud Babilonia, say makapasinagem ya itsura na nankibalatar a paspasen na Jerusalem so nagmaliw a masayaksak lapud nipawil la so puron panagdayew. (Isaias 35:1, 2) Malinew a saya so inmaneobra nen Jehova. “Nilislisan to so taklay to a masanto,” a singa panangibaga, pian onkiwas a mangiliktar ed totoo to.​—Esdras 1:2, 3.

20. Anto so resulta tan magmaliw a resulta diad pangilislis nen Jehova ed masanton taklay to diad modernon panaon?

²⁰ Diad sarayan “kaunoran ya agew,” nilislisan nen Jehova so masanto a taklay to pian bilayen so alanaan a nakdaan, say ‘duaran tasi’ diad libro na Apocalipsis. (2 Timoteo 3:1; Apocalipsis 11:3, 7-13) Manlapu nen 1919, saraya so intarok ed espiritual a paraiso, say espiritual a kipapasen a naeeksperiensya ra kaiba iray minilyon nin kalimog da, say arum a karnero. Nasabi panaon, lislisan nen Jehova so masanton taklay to pian iliktar so totoo to diad “Armagedon.” (Apocalipsis 16:14, 16) Insan, “amin a sampot na dalin nanengneng da so panangilaban na Dios tayo.”

Maganat a Kakaukolanen

21. (a) Anto so kakaukolanen ed saramay ‘mangaawit ed saray kagawaan nen Jehova’? (b) Akin ya agkaukolan a nakigtot iray Judion ontataynan ed Babilonia?

²¹ Saramay ontaynan ed Babilonia pian ompawil ed Jerusalem so kaukolan a mangapet ed sakey a kakaukolanen. Oniay insulat nen Isaias: “Ontaynan kayo, ontaynan kayo, a manlapud’man, agkayo maniwit na anggan anto a bengatla ya agmalinis; ontaynan kayo ed pegley to; linisan yo so laman yo, sikayo a mangawit ed saray kagawaan nen Jehova. Ta agkayo naani ompaway a magangganat, tan agkayo met naani onla a manbabtik: ta si Jehova onla naani ed unaan yo; tan say Dios na Israel sikato naani so talabay yo ed beneg yo.” (Isaias 52:11, 12) Nepeg ya itilak na saray ontaynan lan Israelita diad Babilonia so antokaman a matik na palson panagdayew na Babilonia. Lapud aawiten da iray kagawaan nen Jehova a nanlapu ed templo diad Jerusalem, kaukolan a malinis ira, aliwa labat a diad akinpaway, a seremonyal a paraan, noagta nagkalalo la diad kapusoan da. (2 Arari 24:11-13; Esdras 1:7) Niarum ni, walad unaan da si Jehova, kanian ag-ira kaukolan a nakigtot, odino manbabtik, a singa naabotan la ra na saray napgaan ed dala a manguusil. Say Dios na Israel so wala ed benegan da a manbabantay.​—Esdras 8:21-23.

22. Panon ya indanet nen Pablo so pankaukolan ed kalinisan diad limog na alanaan a Kristianos?

²² Saray salita nen Isaias nipaakar ed pansiansian malinis so walaan na manunan kasumpalan ed saray ilalak na “Jerusalem a wala ed tagey.” Sanen pinaseseg nen Pablo iray Kristianon taga-Corinto ya agmipako ed saray agkapananisiaan, inaon to iray salita ed Isaias 52:11: “Kanian, ekal kayo ed leet da, tan onsian kayo, kuan na Katawan, tan agyo diwiten so marutak.” (Isaias 52:11; 2 Corinto 6:14-17) Singa saray Israelita ya  onsesempet la a nanlapu ed Babilonia, saray Kristiano so kaukolan a sigpot ya onsian ed palson panagdayew na Babilonia.

23. Diad antoran dalan a panggugunaetan na saray lingkor nen Jehova natan a pansiansiaen a malinis so inkasikara?

²³ Nagkalautlan tua iya ed saray alanaan a papatumbok nen Jesu-Kristo a tinmaynan ed Babilonia a Baleg nen 1919. Tuloytuloy dan nilinisan so inkasikara ed amin a pakapatnagan na palson panagdayew. (Isaias 8:19, 20; Roma 15:4) Nagmaliw met iran nagkalalon maimano ed kaimportantian na moral a kalinisan. Anggaman lawas itatandoro na saray Tasi nen Jehova so atagey ya estandarte ed moral, say The Watchtower so walaan na saray artikulo nen 1952 a mangidadanet ed pankaukolan a panisiplina ed saray imoral pian napansiansian malinis so kongregasyon. Say ontan a panagdisiplina so makatulong met a mismo ed akapankasalanan pian natebek so pankaukolan ed masimoon a pagbabawi.​—1 Corinto 5:6, 7, 9-13; 2 Corinto 7:8-10; 2 Juan 10, 11.

24. (a) Diad modernon panaon, antoray “kagawaan nen Jehova”? (b) Akin a matalek iray Kristiano natan a si Jehova so mantultuloy a wala ed unaan da tan manbantay ed benegan da?

²⁴ Determinado iray alanaan a Kristiano tan say baleg ya ulop na arum a karnero ya agmaniwit ed antokaman a marutak ed espiritual. Say alinisan a kipapasen da so angikualipika ed sikaran magmaliw a manangakbibit ed “saray kagawaan nen Jehova”​—saray mablin probisyon a ginawa na Dios parad sagradon serbisyo diad panagkabkaabungan tan panagaral ed Biblia a ministeryo tan arum niran nengneng na Kristianon kimey. Diad panmantini ed malinis a talindeg, matalek iray totoo na Dios natan a mantultuloy si Jehova a wala ed unaan da tan manbantay ed benegan da. Bilang malinis a totoo na Dios, walaan ira na dakerakel a rason a ‘sigagayagan onkelyaw a manbabansag!’

[Paimano ed Leksab]

[Tepetepet Parad Panagaral]