Akin a Selebraan so pangdem na Katawan?

“Inawat ko ed Katawan a sikayo met so inyawat ko ed sikayo.”​—1 Corinto 11:23.

1, 2. Anto so ginawa nen Jesus ed samay labi na Paskua nen 33 K.P.?

 PRESENTE ed saman so bogbogtong ya Anak nen Jehova. Ontan met ed 11 a lalaki a ‘nansiansia ed sikato ed saray inkasubok to.’ (Lucas 22:28, NW) Huebes na labi iman, Marso 31, 33 K.P., tan managaag so tulaw a bulan diad Jerusalem. Say Paskua so kasumsumpal a senelebraan nen Jesu-Kristo tan saray apostol to. Apapaway lay Judas Iscariote, balet aliwa nin oras pian onalis met so arum. Akin? Lapud walay importantin tuloy a gawaen nen Jesus. Anto iman?

² Lapud wadman so managsulat na Ebanghelyo a si Mateo, sikatoy abuloyan tayon mangidalatdat ed sikatayo. Oniay insulat to: “Angalay Jesus na tinapay, tan benendisyonan to, tan sikatoy pinipisag to; tan inter to’d saray babangatan, inkuan to, Ala yo, kanen yo; saya sikatoy laman ko. Et angala na sakey a kopa, tan angiter na pisasalamat, tan inter to’d sikara, a kuan to, Oninum kayo ya amin ed saya. Ta sikato ya’y dalak ed sipan a sikatoy naibung nipaakar ed amayamay a pangekal ed saray kasalanan.” (Mateo 26:26-28) Kasin aminsan labat itan ya agawa? Anto so kaimportantian na satan? Wala kasi so kabaliksan na satan ed sikatayo natan?

“Mantultuloy Yon Gawaen Iya”

3. Akin a makabkabaliksan so ginawa nen Jesus ed samay labi na Nisan 14, 33 K.P.?

³ Say kundang a ginawa nen Jesus ed saman a labi na Nisan 14, 33 K.P., so aliwa lambengat a nibanbana ed bilay to. Siningbat itan nen apostol Pablo sanen sinulat to iray alanaan a Kristiano diad Corinto, a siansia nin manutumbok ed satan kayari na masulok a 20 a taon. Anggaman ag-akaiba si Pablo ed si Jesus tan say 11 ya apostol nen 33 K.P., maseguron naamtaan to ed arum ya apostol no anto so agawa ed saman. Niarum ni, mapatnag ya apekderan nen Pablo  iray aspekto na saman ya ebento panamegley na impuyan a panangiparungtal. Inkuan nen Pablo: “Inawat ko ed Katawan a sikato met so inyawat ko ed sikayo, a say Katawan a Jesus dia ed saman a labi ya inkiawa’to, angala na tinapay; tan nen akapisalamat la, pinisag to, tan inkuan to, Saya sikato so laman ko, a napisag lapu ed sikayo; gawa yo so saya a pannodnonotan yo ed siak. Ontan met say kopa, nen kayari to a nangdem, kuanto, Sayan kopa sikato so Balon Sipan ed dalak; gawa yo so saya kapag no inuman yo, a pannodnonotan yo ed siak.”​—1 Corinto 11:23-25.

4. Akin a nepeg a selebraan na saray Kristiano so Pangdem na Katawan?

⁴ Pinekderan na managsulat na Ebanghelyo a si Lucas so onian ingganggan nen Jesus: “Mantultuloy yon gawaen iya bilang pakanodnotan ed siak.” (Lucas 22:19, NW) Saratan a salita so nipatalos met a “Gawa yo iya a pakanodnotan ed siak.” Diad tua, sayan selebrasyon so mabetbet a tutukoyen bilang Memoryal na impatey nen Kristo. Tinawag met itan nen Pablo bilang say Pangdem na Katawan​—a matukoy a tawag lapud ta inletneg itan ed labi. (1 Corinto 11:20) Niganggan iray Kristiano a selebraan da so Pangdem na Katawan. Balet akin ya inletneg iyan selebrasyon?

No Akin ya Inletneg Itan

5, 6. (a) Anto so sakey a rason no akin ya inletneg nen Jesus so Memoryal? (b) Mangiter na sananey nin rason no akin ya inletneg so Pangdem na Katawan.

⁵ Sakey lan rason no akin ya inletneg so Memoryal et makalanor ed sakey a gagala na inateyan nen Jesus. Sikatoy inatey bilang manangiyalangon ed inkasoberano na mangatatawen ya Ama to. Pinaneknekan sirin nen Kristo a matila si Satanas a Diablo, a palson angiyakusa a saray totoo so manlilingkor labat kuno ed Dios lapud sinisiblet iran motibo. (Job 2:1-5) Say impatey nen Jesus tekep na katooran so amaneknek a palso itan ya akusasyon tan amaliket itan ed si Jehova.​—Uliran 27:11.

⁶ Sakey nin rason no akin ya inletneg so Pangdem na Katawan et pian nipanonot ed sikatayo ya ‘inter nen Jesus so bilay to bilang dondon ed amayamay’ panamegley na impatey to bilang ayadyari tan andiay kasalanan a too. (Mateo 20:28) Sanen nankasalanan ed Dios so inmunan too, abalang to so ayadyarin bilay to tan amin na saray ilalon katekep na satan. Balet, oniay inkuan nen Jesus: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) On, “say bayar na kasalanan say patey; bangbalet say langkap ya andi-bayar na Dios say bilay ya andi-angga ed Kristo Jesus a Katawan tayo.” (Roma 6:23) Say panselebra ed Pangdem na Katawan so mangipapanonot ed sikatayo ed pirmin panangaro ya impatnag nen Jehova tan say Anak to a misiglaotan ed masakripisyon impatey nen Jesus. Apresyaen tayo sirin itan a panangaro!

Kapigan Itan Selebraan?

7. Panon ‘kabetbet’ so pibiang na saray alanaan a Kristiano diad Memoryal?

⁷ Nipaakar ed Pangdem na Katawan, oniay kuan nen Pablo: “Kapagno kanen yo so saya a tinapay, tan inuman yo so kopa, ipakabat yo so impatey na Katawan angga ed isabi to.” (1 Corinto 11:26) Saray alanaan a Kristiano so mibiang ed saray emblema na Memoryal anggad ipatey da. Kanian, diad imaton nen Jehova a Dios tan say mundo, maminpiga ran iyabawag so pananisia ra ed uksoyan na Dios nipaakar ed dondon bagat nen Jesus.

8. Anggad kapigan so panselebra na ulop na saray alanaan ed Pangdem na Katawan?

⁸ Anggad kapigan so panselebra na ulop na saray alanaan a Kristiano ed Memoryal na impatey nen Kristo? “Angga ed isabi to,” so kuan nen Pablo, a mapatnag a mankabaliksan a mantultuloy itan a selebrasyon anggad isabi nen Jesus pian awaten to ed tawen iray alanaan a patumbok to panamegley na kioli ra legan na “kiwawala” to. (1 Tesalonica 4:14-17, NW) Saya so mitunosan ed saray salita nen Jesus ed 11 a matoor ya apostoles: “Onla ak tan mangiparaan ak na pasen ya onkana’d sikayo, onla ak dia lamet, tan awaten ta kayo ed inkasiak, pian no iner so kawalaan ko, diman makapanayam kayo met.”​—Juan 14:3.

9. Anto so kabaliksan na saray salita nen Jesus a nikurit ed Marcos 14:25?

 ⁹ Sanen inletneg nen Jesus so Memoryal, sinaglawi to so kopa na alak tan inkuanto ed saray matoor ya apostol to: “Agak la oninum ed bunga na ubas, angga ed saman ya agew sano inumen ko a balo dia ed panarian na Dios.” (Marcos 14:25) Lapud aliwan literal ya oninum na alak si Jesus diad tawen, mabitar a say walad kanonotan to et say gayaga ya isisimbolo no maminsan na alak. (Salmo 104:15; Eclesiastes 10:19) Say pakapaniiba ed Panarian et magayagan eksperiensya a pitamitam to tan saray patumbok to tekep na pirmin panatalaran.​—Roma 8:23; 2 Corinto 5:2.

10. Panon kabetbet so nepeg a panselebra ed Memoryal?

¹⁰ Nepeg kasin selebraan so impatey nen Jesus ed kada bulan, simba, odino inagew-agew ni ingen? Andi. Inletneg nen Jesus so Pangdem na Katawan tan sikatoy pinatey ed agew na Paskua, a senelebraan bilang ‘pakanodnonotan’ ed inkiliktar na Israel manlapud impakakautibo ra ed Ehipto nen 1513 K.K.P. (Exodo 12:14) Say Paskua so tinaon lambengat a gagawaen, diad koma-14 ya agew na Judion bulan na Nisan. (Exodo 12:1-6; Levitico 23:5) Saya so mangipabitar a nepeg a nodnonoten lambengat so impatey nen Jesus a singa kabetbet na Paskua​—tinaon​—aliwan binulan, sinimba, odino inagew-agew.

11, 12. Anto so ipaparungtal na awaran nipaakar ed inmuna iran impannodnonot ed Memoryal?

¹¹ Kanian matukoy sirin so tinaon a panselebra ed Memoryal diad Nisan 14. Inkuan na sakey a reperensya: “Saray Kristiano ed Asia Minor so tinawag a saray Quartodeciman [Fourteenthers] lapu ed kustombre ra a panagselebra na pascha [Pangdem na Katawan] ed kada koma-14 na Nisan . . . Nayarin ompetek so petsa ed Biernes odino ed antokaman niran agew na simba.”​—The New Schaff-Herzog Encyclopedia of Religious Knowledge, Tomo IV, pahina 44.

¹² Sanen nankomento so manag-awaran a si J. L. von Mosheim nipaakar ed satan ya agamil nen komaduan siglo K.P., imbaga to a saray Quartodeciman so nanselebra ed Memoryal ed Nisan 14 lapud “impasen da so ehemplo nen Kristo bilang walaan na puersa na sakey a ganggan.” Oniay inkuan na sakey nin manag-awaran: “Say gagala na saray iglesia na Quartodeciman diad Asia so mipadpara ed gagala na iglesia ed Jerusalem. Nen komaduan siglo, ninodnonot na sarayan iglesia diad Pascha ra ed koma-14 na Nisan so pananondon a niletneg lapud impatey nen Kristo.”​—Studia Patristica, Tomo V, 1962, pahina 8.

Kabaliksan na Tinapay

13. Anton klase na tinapay so inusar nen Jesus sanen inletneg to so Pangdem na Katawan?

¹³ Sanen inletneg nen Jesus so Memoryal, sikatoy ‘angalay tinapay, tan sanen amendisyon, pinipisag to itan, tan inter to ed [saray apostol].’ (Marcos 14:22) Say tinapay ed satan ya okasyon so mipadpara ed samay tinapay ya inusar ed Paskua. (Exodo 13:6-10) Lapud inluto itan ya anggapoy lebadura, tirampiak tan masalangsang itan tan nakaukolan a pisagen pian ibunog. Sanen mamilagron pinarakel nen Jesus so tinapay parad nilibon totoo, masalangsang met iman lapud pinisag to itan ta pian niyutob. (Mateo 14:19; 15:36) Mapatnag sirin a say pamisag ed tinapay diad Memoryal et aliwan relihyoson ritual.

14. (a) Akin a matukoy ya andiay lebadura so tinapay ed Memoryal? (b) Anton klase na tinapay so naala odino niluto ya usaren ed Pangdem na Katawan?

¹⁴ Nipaakar ed tinapay ya inusar sanen niletneg so Memoryal, inkuan nen Jesus: “Saya so mankabaliksan a laman ko a parad sikayo.” (1 Corinto 11:24, NW; Marcos 14:22) Manepeg ya ag-alebaduraan so tinapay. Akin? Lapud say lebadura so mankabaliksan na inkauges, karelmengan, odino kasalanan. (1 Corinto 5:6-8) Irerepresenta na tinapay so ayadyari tan andiay kasalanan a laman nen Jesus bilang too, a matukoy ya iyapay bilang dondon bagat. (Hebreos 7:26; 10:5-10) Sinononot iray Tasi nen Jehova ed satan tan tinumbok da so padron ya inletneg nen Jesus diad impangusar to na ag-alebaduraan a tinapay diad saray selebrasyon ed Memoryal. Diad arum a kipapasen, inusar da so andiay-taway a tinapay na Judio ya andian na arum niran rekado, a singa saray sibuyas odino iknol. No anggapo, nayarin iparaan so andiay-lebaduran  tinapay panamegley na daiset ya arina na bukebukel (no posibli et trigo) ya alaokan na daiset a danum. Nepeg a maimpis so panmasa ed satan tan iluto ed kawalin nantaba na daiset anggad namaga tan onsalangsang so tinapay.

Kabaliksan na Alak

15. Anto so karga na kopa ya inusar nen Kristo sanen inletneg to so Memoryal na ipapatey to?

¹⁵ Kayari ton imbunog so ag-alebaduraan a tinapay, si Jesus so angala na kopa, ‘akisalamat tan inter to ed [saray apostol], et inminum ira ya amin ed satan.’ Impaliwawa nen Jesus: “Saya so dalak ed sipan, a naibung nipaakar ed amayamay.” (Marcos 14:23, 24) Anto so karga na kopa? Pinaikneng ya alak, ya aliwan tariwan tabol na ubas. Sanen tinukoy na Kasulatan so alak, agto labay ya ibaga a satan et tariwan tabol na ubas. Singa bilang, say pinaikneng ya alak, aliwan say tabol na ubas, so mametag ed “daan a supot a katat,” unong ya inkuan nen Jesus. Tan inyakusa na saray ombubusol ed Kristo a sikatoy “mainum na alak.” Satan so anggapoy kakanaan ya akusasyon sano say alak et tabol labat na ubas. (Mateo 9:17; 11:19) Alak so iinumen sanen seselebraan ni so Paskua, tan inusar itan nen Kristo sanen inletneg to so Memoryal na ipapatey to.

16, 17. Anton klase na alak so manepeg ed saray selebrasyon na Memoryal, tan akin?

¹⁶ Say ambalangan alak lambengat so manepeg a simbolo ed walan irerepresenta na karga na kopa, salanti, say nipaagus a dala nen Jesus. Inkuanto a mismo: “Saya so mankabaliksan na ‘dalak ed sipanan,’ a niyibung nisesengeg ed dakel.” Tan insulat nen apostol Pedro: “Amta yo [alanaan iran Kristiano] ya aliwan dia ed panamegley na maidederal a bengatla a singa say pilak tan balitok so impakarondon ed sikayo ed saray andi-kakanaan a panagbilay yo ya abangonan yo ed saray atateng yo; noag ingen dia ed panamegley na mablin dala, a singa dala na sakey a kordero ya andi dumsis tan tilol, salanti say dala nen Kristo.”​—1 Pedro 1:18, 19.

¹⁷ Say ambalangan alak na ubas so maseguron inusar nen Jesus sanen inletneg to so Memoryal. Balet, agnayari so arum ed saray ambalangan alak natan lapud aliwan puro iratan odino nilaokan na saray herbs tan pampabayani. Magenap la so dala nen Jesus, ya agla kinaukolan a laokan ni na antokaman. Kanian, agmanepeg iray alak a singa say port, sherry, tan vermouth. Say kopa ed Memoryal so nepeg a kargaan na ag-atimplaan tan agmabayanin ambalangan alak. Nayarin usaren so ginawan mismo tan ag-atimplaan ya ambalangan alak na ubas, tan nayari iray alak a singa say red burgundy tan claret.

18. Akin ya agnanggawa si Jesus na milagro nipaakar ed tinapay tan alak diad Memoryal?

¹⁸ Sanen inletneg to iyan panangan, agnanggawa na milagro si Jesus, a pinagmaliw ton literal a laman tan dala to iray emblema. Say pangan na laman na too tan iyinum na dala et kanibalismo, a sumlang ed ganggan na Dios. (Genesis 9:3, 4; Levitico 17:10) Wala ni’d saman ed si Jesus so interon laman tan dala to. Say laman to so insaklang bilang ayadyarin bagat, tan say dala to so nipaagus ed ontumbok a ngarem diad saman met lanlamang ya agew na Judio, Nisan 14. Kanian, say tinapay tan alak ed Memoryal so simboliko lambengat, a mangirerepresenta ed laman tan dala nen Kristo. *

 Memoryal​—Sakey a Pandurungo

19. Akin a nayarin dakel a plato tan kopa so usaren ed selebrasyon na Pangdem na Katawan?

¹⁹ Sanen inletneg nen Jesus so Memoryal, inimbitaan to iray matoor ya apostol to pian oninum ed saksakey a kopa. Oniay kuan na Ebanghelyo nen Mateo: “Angala [si Jesus] na sakey a kopa, tan angiter na pisasalamat, tan inter to’d sikara, a kuan to, Oninum kayo ya amin ed saya.” (Mateo 26:27) Say pangusar na “sakey a kopa,” aliwan dakel a kopa, so aliwan problema lapud diad saman ya okasyon et 11 lambengat so nandurungo ed sakey a lamisaan tan mainomay ya ipasa so kopa. Diad sayan taon et minilyon so mantitipon parad Pangdem na Katawan diad masulok a 94,000 a kongregasyon na Saray Tasi nen Jehova ed sankamundoan. Lapud dakel so mantitipon ed sayan selebrasyon ed parehon labi, posiblin agmakanono so sakey lambengat a kopa parad amin. Balet pansiansiaen so uksoyan diad angkabaleg iran kongregasyon diad pangusar da na pigaran kopa ta pian saratan so nipasa ed dumerengel diad makatunongan a karukey na oras. Ontan met, dakel a plato so usaren parad tinapay. Anggapo so nibaga ed Kasulatan a say kopa odino baso et walaan na espesipikon desinyo. Balet, nepeg a nipatnag na satan tan say plato so kagalangan na ebento. Makabat so agpamano ed kopa ta pian agnaibung so alak sano ipasa.

20, 21. Akin a nibaga tayo a say Memoryal et sakey a pandurungo?

²⁰ Anggaman dakel a plato na tinapay tan kopa na alak so usaren, say Memoryal et sakey a pandurungo. Diad Israel nensaman, nayarian na sakey a too so mangitarya na pandurungo diad pangitarok to na ayep ed santuaryo na Dios, a diman itan partien. Say arum a parte na ayep so pinoolan ed altar, say arum et kien na mangiimaton a saserdote tan say arum et parad saray saserdoten ilalak nen Aaron, kaiba lay angiyapay tan say sankaabungan to a mandurungo ed panangan. (Levitico 3:1-16; 7:28-36) Say Memoryal met et sakey a pandurungo lapud lalanoren na satan so pannanabang.

²¹ Kaiba si Jehova ed sayan pandurungo bilang say Angiletneg ed sayan uksoyan. Si Jesus so bagat, tan saray alanaan a Kristiano so mibiang ed saray emblema bilang saray kadungo. Say pangan ed lamisaan nen Jehova so mankabaliksan a saray mibiang so walad pikakareenan ed sikato. Kanian oniay insulat nen Pablo: “Say kopa na bendisyon a sikatoy bendisyonan tayo, aliwa ta’n sikato so pakapinabangan tayo ed dala nen Kristo? Say tinapay a pisagen tayo, aliwa ta’n sikato so pakapinabangan tayo ed laman nen Kristo? Ta anggan dakel itayo, saksakey itayo a tinapay, saksakey a laman: ta amin tayo minabang itayo ed saksakey a tinapay.”​—1 Corinto 10:16, 17.

22. Antoran tepet nipaakar ed Memoryal so konsideraen tayo ni?

²² Say Pangdem na Katawan so alenleneg a tinaon a relihyoson selebrasyon na Saray Tasi nen Jehova. Matukoy iya lapud oniay ingganggan nen Jesus ed saray patumbok to: “Gawa yo iya bilang pakanodnonotan ed siak.” Diad Memoryal, nodnonoten tayo so impatey nen Jesus, say impatey ya angitandoro ed inkasoberano nen Jehova. Unong a naimano tayo, diad sayan pandurungo, say tinapay so mangisimbolo na imbagat a laman nen Kristo bilang too tan say alak et say impaagus a dala to. Ingen, dagdaiset so mibiang ed embleman tinapay tan alak. Akin ya ontan? Wala kasi so peteg a kabaliksan na Memoryal ed saramay minilyon ya agmibibiang? On, anto so kabaliksan ed sikayo na Pangdem na Katawan?

Paimano ed Leksab]

Anto Iray Ebat Yo?

• Akin ya inletneg nen Jesus so Pangdem na Katawan?

• Panon kabetbet so nepeg a panselebra ed Memoryal?

• Anto so kabaliksan na ag-alebaduraan a tinapay ed Memoryal?

• Anto so irerepresenta na alak ed Memoryal?

[Tepetepet Parad Panagaral]

[Litrato ed pahina 15]

Inletneg nen Jesus so Pangdem na Katawan