Anto so Kabaliksan ed Sikayo na Pangdem na Katawan?
Anto so Kabaliksan ed Sikayo na Pangdem na Katawan?
“Siopaman a mangan ed tinapay tan oninum ed kopa na Katawan ya agmakana, mankasalanan ed laman tan dala na Katawan.”—1 CORINTO 11:27.
1. Anto so sankaimportantian ya ebento ya implano parad taon 2003, tan anto so gapoan na satan?
NAGAWA so sankaimportantian ya ebento ya implano la parad taon 2003 kaselek na agew no Abril 16. Mandaragup ed satan iray Tasi nen Jehova pian selebraan so Memoryal na impatey nen Jesu-Kristo. Unong a nipabitar ed akaunan artikulo, inletneg nen Jesus iyan selebrasyon, a tinawag met a Pangdem na Katawan, kayari na impangiselebra to tan saray apostol to ed Paskua nen Nisan 14, 33 K.P. Saray emblema ed Memoryal ya ag-alebaduraan a tinapay tan ambalangan alak so mangisisimbolo ed andiay-kasalanan a laman nen Kristo tan say nipaagus a dala to—say alenleneg a bagat a makarondon ed katooan manlapud atawir a kasalanan tan ipapatey.—Roma 5:12; 6:23.
2. Anton pasakbay so nikurit ed 1 Corinto 11:27?
2 Nepeg a mibiang a makana iramay mangan tan oninum ed saray emblema na Memoryal. Impabitar itan nen apostol Pablo sanen sinulat to iray Kristiano ed Corinto nensaman, ya agsuston naseselebraan diman so Pangdem na Katawan. (1 Corinto 11:20-22) Oniay insulat nen Pablo: “Siopaman a mangan ed tinapay tan oninum ed kopa na Katawan ya agmakana, mankasalanan ed laman tan dala na Katawan.” (1 Corinto 11:27) Anto so kabaliksan na saratan a salita?
Arum so Nanselebra ed Satan Diad Agmakanan Paraan
3. Anto so awawey na dakel ed saray Kristiano ed Corinto diad saray selebrasyon na Pangdem na Katawan?
3 Dakel a Kristiano ed Corinto so agmakanan akibiang ed Memoryal. Walay inkaapag-apag ed limog da, tan walay panaon ya inawit na arum so pangdeman da tan kinan da itan sakbay odino kaleganan na selebrasyon, a mabetbet et sobran panangan tan panag-inum. Aliwa iran alerto ed mental tan espiritual a paraan. Saya so sengegan na ‘impankasalanan da ed laman tan dala na Katawan.’ Saramay agni nangdem so narnarasan la kanian agda niyapasakey so imano ra. On, dakel so akibiang ya andiay respeto tan sigpot a pakamoria ed inkaseryoso na ebento. Andi-duaruwa ya intarok da ed inkasikaran dili so panangondena!—1 Corinto 11:27-34.
4, 5. Akin ya importante so dilin-panangusisa parad saramay naynay lan mibibiang ed saray emblema na Memoryal?
4 No asingger la so Memoryal ed kada taon, importante so dilin-panangusisa parad saramay naynay lan mibiang ed saray emblema. Pian makana ira a makapibiang ed sayan pandurungo, nepeg a mabunigas so kipapasen da ed espiritual. Siopaman a mangipanengneng na agpanagrespeto, panggula ni ingen, ed bagat nen Jesus so napepeligron ‘nisian ed saray totoo na Dios,’ a singa say Israelita ya agmalinis ya akibiang ed sakey a pandurungo.—Levitico 7:20; Hebreos 10:28-31.
5 Inkompara nen Pablo so Memoryal ed pandurungo diad kadaanan ya Israel. Sinaglawi to so nipaakar ed saray mibibiang ed pidungo ed Kristo insan inkuanto: “Agyo nayarian so oninum ed kopa na Katawan, tan say kopa na saray demonyos: agyo [nayariay] minabang ed dulang na Katawan, tan say dulang na saray demonyos.” (1 Corinto 10:16-21) No say sakey a toon naynay lan mibibiang ed saray emblema na Memoryal et makapankasalanan, nepeg ton ipatua itan ed si Jehova tan onkerew na espiritual a tulong ed saray mamasiken ed kongregasyon. (Uliran 28:13; Santiago 5:13-16) No sikatoy peteg a magbabawi tan mamawala na bunga a makanepegan na panagbabawi, sikatoy makana lan mibiang.—Lucas 3:8.
Onatendi Bilang Marespeton Oniimaton
6. Parad siopa labat so impangiganaan na Dios ed pribilehyon mibiang ed Pangdem na Katawan?
6 Nepeg kasin mibiang ed Pangdem na Katawan iramay manggagawa natan na maabig ed saray nakdaan na 144,000 ya agagi nen Kristo? (Mateo 25:31-40; Apocalipsis 14:1) Andi. Satan a pribilehyo so inggana labat na Dios parad saramay indibidual a nilanaan to na masanton espiritu pian magmaliw a “mitatawir ed Kristo.” (Roma 8:14-18; 1 Juan 2:20) Anto sirin so talindeg na saramay maniilalon manbilay na andi-anggaan ed englobon paraiso diad silong na uley na Panarian? (Lucas 23:43; Apocalipsis 21:3, 4) Lapud ag-ira kaiba nen Kristo a manawir ed mangatatawen ya ilalo, onaatendi ira ed Memoryal bilang marespeton oniimaton.—Roma 6:3-5.
7. Akin ya amta na saray inmunan-siglon Kristiano a sikara so nepeg a mibiang ed saray emblema na Memoryal?
7 Saray tuan Kristiano nen inmunan siglo so alanaan na masanton espiritu. Dakel ed sikara so makayarin mangusar na sakey odino dakel nin mamilagron langkap na espiritu, a singa say pansalita na nanduruman lenguahe. Kanian, agmairap ed saratan ya indibidual so panseguro no alanaan ira na espiritu tan nepeg iran mibiang ed saray emblema na Memoryal. Balet, diad panaon tayo, satan so nadetermina unong ed saray impuyan a salitan: “Ta ganagana yo intonton na espiritu na Dios sikara ya so anak na Dios. Ta agyo inawat lamet so espiritu na inkaaripen, ya onkana a takot; noag inawat yo ingen so espiritu na inkipaanak, a lapud saya yakis tayo, Abba, Ama.”—Roma 8:14, 15.
8. Sioparay inrepresenta na “trigo” tan saray “sisanyas” ya asalambit ed Mateo kapitulo 13?
8 Diad loob na dakel lan siglo, saray tuan alanaan so binmaleg bilang “trigo” diad uma na saray “sisanyas,” odino mankuankuanan a Kristianos. (Mateo 13:24-30, 36-43) Manlapu la’d 1870, say “trigo” so nagmaliw a mapatpatnag, tan kayari na pigay taon et oniay nibaga ed saray alanaan a Kristianon manangasikaso: “Saray mamatatken . . . so nepeg a mangidatak ed sarayan kondisyon parad saramay mantitipon [parad Memoryal],—(1) pananisia ed dala [nen Kristo]; tan (2) dedikasyon ed Katawan tan ed panaglingkor ed sikato, anggaman mansumpal ed ipapatey. Nepeg da sirin ya imbitaan so amin a walaan met na ontan a kaisipan tan dedikado sirin a miulop ed pangiselebra ed impatey na Katawan.”—Studies in the Scriptures, Series VI, The New Creation, pahina 473. *
Pananap ed “Arum a Karnero”
9. Panon a linminew nen 1935 so pakabidbiran ed “baleg ya ulop,” tan panon iyan akaapekto ed arum a mibibiang ed saray emblema ed Memoryal?
9 Sinmabi panaon, inyapasakey na organisasyon nen Jehova so nipaakar ed arum nilikud ed saray alanaan a patumbok nen Kristo. Say makatantandan pananguman a mitunosan ed saratan so agawa ed kapegleyan na dekaday 1930. Sakbay na satan, minoria na totoo na Dios so “baleg ya ulop” ed Apocalipsis 7:9 bilang say onsesegundan espiritual a grupo a miiba ed 144,000 ya alanaan ya apaoli ed tawen—singa ira katulongan odino kaiba na nobya nen Kristo. (Salmo 45:14, 15; Apocalipsis 7:4; 21:2, 9) Balet nen Mayo 31, 1935, diad paliwawa ed kombension na Saray Tasi nen Jehova ed Washington, D.C., E.U.A., nisalaysay manlapud Kasulatan a say “baleg ya ulop” (“baleg a karaklan,” King James Version) so manutukoy ed ‘arum a karnero’ a manbibilay legan na panaon na anggaan. (Juan 10:16) Kayari na satan a kombension, arum a datin akibiang ed saray emblema na Memoryal so tinmundan mibiang lapud amoria ra a mangaraldalin so ilalo ra, aliwan mangatatawen.
10. Panon yon deskribien so ilalo tan saray responsabilidad na kaplesan ya ‘arum a karnero’?
10 Nagkalalo la nen 1935 et nigapo la so panag-anap ed saramay kabiangan na ‘arum a karnero,’ a manisia ed dondon, mangidedika ed inkasikara ed Dios, tan manuporta ed alanaan a “melag a pulok” diad kimey a panangipulong na Panarian. (Lucas 12:32) Sarayan arum a karnero so maniilalon manbilay ed dalin diad andi-anggaan, balet diad arum niran pamaakaran, inyulibay da so kaplesan a nakdaan na saray mananawir ed Panarian. Singa saray sankailin manaayam ed kadaanan ya Israel a nandayew ed si Jehova tan nampasakop ed Ganggan, say arum a karnero natan so angawat ed saray Makristianon responsabilidad, a singa say panangipulong na maong a balita a kaiba iray membro na espiritual ya Israel. (Galacia 6:16) Anggaman ontan, no panon ya agnayarin magmaliw ya ari odino saserdote na Israel so sankailin manaayam, anggapo ed sarayan arum a karnero so makapanuley diad mangatatawen a Panarian odino makapanlingkor bilang saserdote.—Deuteronomio 17:15.
11. Akin a say petsa na inkidedika na sakey so walaan na epekto ed ilalo to?
11 Kasabi na dekaday 1930, linminew itan lapud diad interamenti et apili laray kabiangan na mangatatawen a klase. Diad loob la na saray dekada et saray arum a karnero so aanapen, saramay walaan na mangaraldalin ya ilalo. No agnanmatoor so sakey ya alanaan, nayarin say sakey a too a sitotoor tan abayag lan manlilingkor ed Dios bilang sakey ed saray arum a karnero so natawag ya onsalat ed pasen to ed 144,000.
No Akin a Nababaloan na Arum a Mangatatawen so Ilalo Ra
12. Diad antoran sirkumstansya a nepeg lan ontunda so sakey a too diad pibibiang to ed saray emblema ed Memoryal, tan akin?
12 Segsegurado iray alanaan a Kristiano a walaan ira na mangatatawen a tawag. Balet panon to no walaray indibidual ya aliwan mangatatawen balet ta mibibiang ira ed saray emblema na Memoryal? Natan ta amta da la ya aliwan mangatatawen so ilalo ra, maseguron pakiwasen ira na konsiensia ra ya ontundan mibiang. Ag-abobonan na Dios so siopaman a mangibabagan sikatoy atawag a magmaliw ya ari tan saserdote ed tawen bangta amta ton anggapon talaga so ontan a tawag ed sikato. (Roma 9:16; Apocalipsis 20:6) Tinigway nen Jehova so Levitan si Kore lapud mapalakbat ton ginegemtan so Aaronikon inkasaserdote. (Exodo 28:1; Numeros 16:4-11, 31-35) No amoria na siopaman a Kristiano a sikatoy alingon mibibiang ed saray emblema na Memoryal, sikato so nepeg ya ontunda lan mibiang tan mapaabeban onkerew na panamerdona nen Jehova diad pikakasi.—Salmo 19:13.
13, 14. Akin a nababaloan na arum a sikara so walaan na mangatatawen a tawag?
13 Akin a nababaloan na arum a sikara so walaan na mangatatawen a tawag? Say impatey na kapareha odino arum nin trahedya so nayarin sengegan lay pakaandi na interes da ed bilay diad dalin. Odino nayarin pampilalekan da met so mangatatawen ya ilalo lapud walay maapit a kaaro ra a mangibabagan sikatoy alanaan a Kristiano. Siempre, ag-impudir na Dios ed siopaman so panagyat ed arum a manpilalek ed satan a pribilehyo. Tan agto lalanaan iramay mananawir ed Panarian diad pakarengel da na saray boses a walaan na mensahen mamekder ed impakalanaan da.
14 Say palson relihyoson ideya ya amin a maong a totoo so onla ed tawen so nayarin mangitonton ed arum a manisip a walaan ira na mangatatawen a tawag. Nakaukolan sirin ya agtayo papaimpluensyaan ed apalabas iran lingon panmoria odino arum niran sengegan. Singa bilang, nayarin itepet na arum ed inkasikara: ‘Kasin manguusar ak na saray tambal a mangaapekta ed emosyon ko? Kasin maemosyon ak a too a nababaloan ko lan alanaan ak?’
15, 16. Akin a nayarin lingon isipen na arum a sikara et alanaan ira?
15 Nayarin itepet na arum ed inkasikara: ‘Labay ko kasi so ombantog? Kasin pipilaleken ko so pakawalaan na autoridad natan odino magmaliw a kaiban mananawir nen Kristo diad arapen?’ Sanen atawag iray mananawir na Panarian nen inmunan siglo, aliwan amin ed sikara et walaan na posisyon na responsabilidad diad kongregasyon. Tan agpanggugunaetan na saramay walaan na mangatatawen a tawag so ombantog odino mangilastog ed pagmaliw dan alanaan. Ipapatnag da so kapaabebaan ya iilaloan ed saramay walaan na ‘kanonotan nen Kristo.’—1 Corinto 2:16.
16 Nayarin ikuan na arum a walaan ira na mangatatawen a tawag lapud akagamor ira na malaknab a pikakabat ed Biblia. Balet say pakalanaan na espiritu et agmangitarok na nikadkaduman pakatalos, lapud kinaukolan a bangatan tan simbawaen nen Pablo so pigaran alanaan. (1 Corinto 3:1-3; Hebreos 5:11-14) Say Dios so walaan na uksoyan pian inabang so espiritual a tagano ed amin a totoo to. (Mateo 24:45-47) Kanian agnepeg ya isipen na siopaman a say pagmaliw ya alanaan a Kristiano et manggawa ed sikaton mas makabat nen saramay walaan na mangaraldalin ya ilalo. Say pakalanaan na espiritu so agnapatnagan diad inkadunong ya onebat ed Makasulatan iran tepet, panagpulong, odino panagpaliwawa ed Biblia. Saray Kristiano a walaan na mangaraldalin ya ilalo so kualipikado met ed saratan a pamaakaran.
17. Say panaglana na espiritu so akadependi ed anto tan ed siopa?
17 No walay kapananisiaan a mantepet nipaakar ed mangatatawen a tawag, satan a pamaakaran so nayarin isingbat ed sikato na sakey a matatken odino sakey a maespiritual a Kristiano. Balet, agnayarin idesisyonan na sakey a too so arum. Say too a talagan walaan na sayan tawag so agnakaukolan ya ontepet ed arum no sikato so walaan na ontan ya ilalo. Saray alanaan so ‘sinmibwal lamet ed aliwan diad maidederal a bini noag diad agnaderal, lapud panamegley na salitay Dios, a manbilay tan magnayon ya andi angga.’ (1 Pedro 1:23) Panamegley na espiritu tan Salita to, intanem na Dios so “bini” a manggawa ed indibidual a “balon pinalsa,” a walaan na mangatatawen ya ilalo. (2 Corinto 5:17) Tan si Jehova so mamili. Say pakalanaan so “aliwa a kien na manlabay, anggan say ombatik, noag say Dios.” (Roma 9:16) Panon sirin a naseguro a sikato so walaan na mangatatawen a tawag?
No Akin a Makakaseguro Ira
18. Panon a tasian na espiritu na Dios so espiritu na saray alanaan?
18 Say pantasi na espiritu na Dios so mangombinse ed saray alanaan a Kristiano a mangatatawen so ilalo ra. “Inawat yo ingen so espiritu na inkipaanak,” so insulat nen Pablo, “lapud saya yakis tayo, Abba, Ama. Say dilin espiritu so mamatua ed espiritu tayo, ya anak itayo na Dios: Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.” (Roma 8:15-17) Diad impluensya na masanton espiritu, say espiritu, odino say ontatalonan awawey, na saray alanaan so mamakiwas ed sikara a mangiyaplika ed inkasikara no anto so ibabaga na Kasulatan nipaakar ed espiritual ya ananak nen Jehova. (1 Juan 3:2) Say espiritu na Dios so mangiter ed sikara na liknaan ya anak ira na Dios tan mamawala itan ed sikara na nikadkaduman ilalo. (Galacia 4:6, 7) On, alay abig so andi-anggaan a bilay diad dalin bilang ayadyarin totoo a kaiba iray kapamilyaan da tan kakaaro ra, balet aliwan satan ya ilalo so inter ed sikara na Dios. Panamegley na espiritu to, pinawala na Dios ed sikara so ontan a mabiskeg ya ilalo ed tawen a sikara so mabulos a mangisakripisyo ed amin a pisisiglaotan tan iilaloan ed sayan dalin.—2 Corinto 5:1-5, 8; 2 Pedro 1:13, 14.
19. Anto so betang na balon sipanan ed bilay na sakey ya alanaan a Kristiano?
19 Segurado iray alanaan a Kristiano ed mangatatawen ya ilalo ra, say inkibiang da ed balon sipanan. Sinalambit itan nen Jesus sanen inletneg to so Memoryal tan kuanto: “Say kopa ontan met kayari panamangdem, ya inkuan to, Saya a kopa sikato so balon sipan dia ed dalak, a naibung nisengeg ed sikayo.” (Lucas 22:20) Saray kabiangan ed balon sipanan et say Dios tan saray alanaan. (Jeremias 31:31-34; Hebreos 12:22-24) Si Jesus so manamegley. Lapud inmepekto itan panamegley na nipaagus a dala nen Kristo, say balon sipanan so angala na totoo manlapud saray nasyon, ya aliwan diad saray Judio lambengat a parad ngaran nen Jehova tan inlaktip to ira ed “bini” nen Abraham. (Galacia 3:26-29; Gawa 15:14) Sayan ‘andi-anggaan a sipanan’ so ontulong ed amin ya espiritual ya Israelita a napaoli ed imortal a bilay diad tawen.—Hebreos 13:20.
20. Saray alanaan so nitarok ed anton pisisipanan ed si Kristo?
20 Segurado iray alanaan ed ilalo ra. Sikara so nitarok ed kaaruman a sipanan, say sipanan ed Panarian. Nipaakar ed piiba ra ed Kristo, oniay kuan nen Jesus: “Sikayo so nansiansia ed siak ed saray inkatuktuksok. Et manuro ak ed sikayo na sakey a panarian, a singa say Amak anuro ed siak.” (Lucas 22:28-30) Sayan sipanan ed baetan nen Kristo tan saray kaiba ton manari so onkurang ed andi-anggaan.—Apocalipsis 22:5.
Panaon na Memoryal—Maliket a Panaon
21. Panon itayon nagunggonaan a maong ed panaon na Memoryal?
21 Dakel so bendisyon legan na panaon na Memoryal. Nagunggonaan itayo ed panagbasa na Biblia parad satan a panaon. Sankaabigan met itan a panaon parad pikakasi, pandalepdep ed mangaraldalin a bilay nen Jesus tan ed impatey to, tan ed pibibiang ed kimey na panangipulong na Panarian. (Salmo 77:12; Filipos 4:6, 7) Say selebrasyon a mismo so mangipanonot ed sikatayo ed aron impanengneng na Dios tan si Kristo a misiglaotan ed dondon bagat nen Jesus. (Mateo 20:28; Juan 3:16) Sayan probisyon so mangiter ed sikatayo na ilalo tan ligliwa tan mamabiskeg ed determinasyon tayo pian gegemtanen so singa-Kriston kurang. (Exodo 34:6; Hebreos 12:3) Say Memoryal so nepeg a mamabiskeg met ed sikatayo pian sumpalen so dedikasyon tayo bilang lingkor na Dios tan magmaliw itayon matoor a patumbok na pinabpabli ton Anak.
22. Anto so sankaabigan a langkap na Dios ed katooan, tan anto so sakey a paraan a pangipanengneng na apresasyon ed satan?
22 Agaylan abig iray langkap nen Jehova ed sikatayo! (Santiago 1:17) Walaan itayo na panangigiya na Salita to, tulong na espiritu to, tan say ilalo ya andi-anggaan a bilay. Say sankaabigan a regalo na Dios et say bagat nen Jesus parad saray kasalanan na saray alanaan tan parad arum niran mangaagamil na pananisia. (1 Juan 2:1, 2) Kanian panon kaimportante ed sikayo so impatey nen Jesus? Kabiangan kayo kasi ed saramay mangipapanengneng na pisasalamat ed satan diad pandaragup da kaselek na agew no Abril 16, 2003, pian selebraan so Pangdem na Katawan?
[Paimano ed Leksab]
^ par. 8 Impalapag na Saray Tasi nen Jehova balet agla iyiimprinta natan.
Anto Iray Ebat Yo?
• Siopa so nepeg a mibiang ed saray emblema na Memoryal?
• Akin a say ‘arum a karnero’ so onatendi ed Pangdem na Katawan bilang marespeton oniimaton lambengat?
• Panon a naamtaan na alanaan a Kristianos a sikara so nepeg a mibiang ed tinapay tan alak ed Memoryal na impatey nen Kristo?
• Say panaon na Memoryal so maabig a panaon parad anto?
[Tepetepet Parad Panagaral]
[Graph/Saray litrato ed pahina 18]
(Parad aktual a format, nengnengen so publikasyon)
Inmatendi ed Memoryal
DIAD BILANG A MINILYON
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Litrato ed pahina 18]
Presente kayo kasi ed Pangdem na Katawan ed sayan taon?
[Saray litrato ed pahina 21]
Say panaon na Memoryal et maabig a panaon parad nagkalalon pambasa na Biblia tan pibibiang ed panangipulong na Panarian