Anamoten so Manguuman Iran Sirkumstansya Yo

Si Pum, Jan, Dries, tan Otto, apatiran Kristianon mamatatken a manaayam diad Netherlands, so walaan na dakel a panpadpara. Sikaran apat so de-pamilya. Likud ed satan, diad apalabas iran taon, sikaran amin so awalaan na sigpot-panaon a sekular a trabaho tan nanayam ed komportablin kaabungan. Balet, amin da so tinmunda la ed sekular a trabaho tan inggana ra so amin a panaon pati biskeg da diad pamalaknab ed intereses na Panarian. Anto so akatulong pian nagawaan da iyan pananguman? Sikaran apat so anganamot ed anguman iran sirkumstansya ra.

DIAD saginonor et manguman iray sirkumstansya na maslak ed sikatayo. Dakel a pananguman, a singa say pangasawa, pan-anak, odino pangasikaso ed saray matatken lan atateng so mangitarok na kaaruman iran responsabilidad. Balet, saray arum a pananguman so mamawala na malaglaem a kawayangan pian napalaknab tayo so ministeryo tayo bilang Kristiano. (Mateo 9:37, 38) Singa bilang, nayarin saray binmaleg lan anak so andi la ed pudir tayo, odino nayarin manretiro itayo la ed trabaho.

Niarum ni, anggaman tua a saray sirkumstansya tayo so manguman, labay tayo man iratan odino andi, arum iran Kristiano so tinmalona a manguksoy na pananguman ed saray sirkumstansya ra ya angilukas ed pankanawnawan napalaknab so pibibiang da ed ministeryo. Ontan so ginawa a mismo di Pum, Jan, Dries, tan Otto. Panon?

Sano Andi la ed Pudir Iray Anak

Si Pum so mantratrabaho bilang bookkeeper diad sakey a parmaseutika a kompanya. Sikara nen akulaw to, a si Anny so mabetbet a manlilingkor bilang auxiliary payunir a ministro kaiba so duaran anak dan bibii. Si Pum tan si Anny so mangiyuuksoy met na makaligliwan pililimog ed arum a payunir. “Saya so salimbeng manlapud saray problema a nayarin onlesa lapud mauges a pipiulop,” so inkuan da. Lapud apaseseg ed ehemplo na atateng da, saray duaran marikit da so nanregular payunir kapan-graduar da ed haiskul.

Sanen anggapo la ed pudir da iray anak da, amoria di Pum tan Anny a sayan impanguman na saray sirkumstansya ra so amawala na malaglaem a kawayangan tan pinansyal, a naanamot da diad pampasyar ed mararakep iran lugar odino pian panggayagaan so arum a nengneng na panligliwaan. Balet, nandesisyon so sanasawa ya anamoten so anguman iran sirkumstansya ra diad pamalaknab ed ministeryo ra bilang Kristiano. Kanian kinerew nen Pum ed amo to a bawasan na sakey agew so pantrabaho ton sinimba. Diad saginonor, inyareglo nen Pum a sikatoy mantrabaho manlapud 7:00 na kabuasan anggad 2:00 na ngarem. Siempre, say apatikeyan ya oras a pantrabaho so mankabaliksan na pamasarag ed memelag ya anap. Anggaman ontan, sikaray tinmalona, tan nen 1991, si Pum so nanregular payunir a kaiba so akulaw to.

Insan si Pum so inimbitaan a magmaliw a katulongan a managkomponi ed sakey ya Assembly Hall na saray Tasi nen Jehova. Kabaliksan  na satan a taynan na sanasawa so abung da a nanayaman da ed loob na 30 taon tan onalis ed apartment diad kawalaan na Assembly Hall. Sikaray inmalis. Kasin mairap iman? Inkuan nen Anny a sano sikato lay makasesempet, tetepetan to so inkasikato, ‘Kasin singa ak samay asawa nen Lot?’ Agto nilabay so ‘onlingaw.’​—Genesis 19:26; Lucas 17:32.

Liknaen di Pum tan Anny a say desisyon da so angitarok na dakel a bendisyon. Pigara ed saray panggagayagaan da et say serbisyo ra ed Assembly Hall, saray panagparaan parad distriton kombension, tan say pakapituyaw ed saray manangasikaso na sirkito (managbiahe a ministros) a manpapaliwawa diad hall. Sagpaminsan et ondadalaw ira ed nanduruman kongregasyon sano si Pum so manlilingkor bilang kasandin manangasikaso na sirkito.

Anto so akatulong ed sayan sanasawa a matalona ed panamalaknab da ed serbisyo ra? Inkuan nen Pum: “Sano pirmin manguman so bilay yo, kaukolan a determinado kayon mangusar a sikakabat anggad posibli ed saray balon sirkumstansya yo.”

Pagmaliwen a Simpli so Bilay

Si Jan tan say akulaw to a si Woth so walaan na taloran anak. Singa si Pum tan say pamilya to, makabat ya inanamot nen Jan so anguman iran sirkumstansya to. Diad loob na pigaran taon et atagey so posisyon tan sueldo nen Jan diad sakey a banko tan nitataryaan to na mainawan panagbilay so pamilya to. Balet, pirmi so pampilalek to a palaknaben so ministeryo to. Oniay insalaysay to: “Legan na pambibilay ko, onaaralem so panangapresyak ed katuaan, tan oneelet so panangarok ed si Jehova.” Kanian nen 1986, nanggawa si Jan na pananguman ed saray sirkumstansya to. Inkuan to: Inanamot ko so balon impangorganisa ed opisina mi tan pinatikeyan ko so oras a pantratrabahok. Tinawag ak na saray nikelawan a katrabahoan ko a Diwodo lapud mantratrabaho ak labat kada dinsdag [Martes], woensdag [Mierkoles], tan donderdag [Huebes]. Abawasan na 40 porsiento so sueldok. Inlakok so abung mi tan angaliw ak na abung a baloto pian makapanlingkor kami ed walaay babaleg a pankaukolan parad saray manangipalapag na Panarian. Diad saginonor, inanamot ko so masakbay a panretiro; say almok so abawasan lamet na 20 porsiento, balet nen 1993, nigapok so panaglingkor bilang regular payunir.”

Natan, si Jan so membro na Hospital Liaison Committee tan regular a manlilingkor bilang manangasikaso na kombension. Anggaman makapuy so bunigas na laman nen Woth, sikato so  manlilingkor a panapanaon bilang auxiliary payunir. Amin a taloran anak da so walaan la na kaasawaan natan, tan saray kaasawaan da so maseseg a ministro na Panarian.

Panon ya apasarag nen Jan tan Woth so pinasimplin panagbilay? “Sanen maksil ni so anap mi,” so inkuan nen Jan, “sineguro min agkami maniilalon maong ed materyal iran bengatla. Natan nayarin medyo mairap so panalagar antis min nasaliw so sakey a bengatla, balet saray espiritual a bendisyon tan pribilehyo a naaawat mi so daakan a mamapano ed satan.”

Singa si Jan tan Woth, si Dries tan say akulaw to a si Jenny, so nandesisyon met a pagmaliwen a simpli so bilay da pian dakel so panaon da parad intereses na Panarian. Si Dries tan Jenny so nanlingkor bilang payunir anggad sanen sikaray nan-ilalak. Insan, pian nalegpet so pamilya to, si Dries so nantrabaho bilang administrador ed baleg a kompanya. Papablien na amo to so trabaho to kanian sikatoy inopresian ya itagey so posisyon to. Balet, ag-inawat nen Dries so promosyon lapud no awaten to itan ondaiset so panaon to ed saray kimey to bilang Kristiano.

Say panlegpet ed pamilya​—ontan met ed pangasikaso ed mansasakit ya ina nen Jenny​—so mankakaukolan na panaon tan sagpot na sanasawa. Anggaman ontan, intultuloy dan binayuboan so espiritu na panagpayunir. Anto so akatulong ed sikaran nagawaan iya? Oniay impaliwawa nen Jenny: “Walaray payunir a manaayam ed sikami, iimbitaan miray payunir a midungo ed saray panangan, tan papupundoen mi iray manangasikaso na sirkito ed sikami.” Inyarum nen Dries: “Pansiasiansiaen min simpli so bilay mi tan papaliisan mi so pan-otang. Nandesisyon kami ya agbalot mangawat na baleg iran transaksion ed negosyo odino manaliw na abung, pian diad arapen et agkami nasebelan na saratan a bengatla.”

Say desisyon di Dries tan Jenny a manggawa na sirkumstansya a mangiyabuloy ed sikaran nawalaan na dakel a panaon parad intereses na Panarian so walaan na makagunggona iran resulta. Say duaran anak dan lalaki so manlilingkor la natan bilang mamatatken, tan say sakey so manpapayunir a kaiba so asawa to. Si Dries tan Jenny so manlilingkor bilang espisyal payunir, tan diad saginonor et kaulop nen Jenny si Dries diad kimey ed sirkito. Natan et sikara lay boluntaryo ed Bethel, a ditan et manlilingkor si Dries bilang membro na Branch Comittee.

Masakbay a Panretiro

Mipara ed si Dries tan Jenny, si Otto tan say akulaw to a si Judy so payunir antis ya awalaan na duaran anak a bibii. Sanen lukon nen Judy so panguloan ya anak to, si Otto so akalmo na trabaho bilang sakey a maestro.

Legan ya ombabaleg iray ugugaw, mabetbet a paparawesen di Otto tan Judy iray payunir diad abung da pian nanengneng na saray anak da so gayaga na saray Kristiano a walad sigpot-panaon a kimey. Asabi panaon, say panguloan ya anak da so ginmapon nampayunir. Diad saginonor,  sikatoy nanaral ed Gilead School tan, natan et kaiba to so masiken to a manlilingkor bilang misionaryo diad sakey a bansa ed Aprika. Say yugtan ya anak dan bii so ginmapon nampayunir nen 1987, tan si Judy so nampayunir ed saginonor a kaiba to.

Sanen inyabuloy na anguman iran kipapasen a si Otto so makapantrabaho na antikey ya oras diad eskuelaan, inusar to so nakekeraan a panaon pian manpayunir. Diad saginonor, sikatoy tinmunda lan nantrabaho. Natan, diad panagbiahe a kimey, nauusar nen Otto so abilidad to bilang maestro pian pabiskegen ed espiritual iray kongregasyon.

Anto so simbawa nen Otto ed saramay masakbay a manretiro ed sekular a trabaho ra? “Sano manretiro kayo, agkayo mandedesisyon a manrelaks na sakey taon odino onsulok ni. Mainomay a nipasal so ‘panrelaks’. Agmanbayag, nalingwanan yo la so pampayunir. Imbes, igapo yon tampol a padaaken so kimey yo ed ministeryo.”

Usaren so Eksperiensya ed Bilay

Tua, saray agagin lalaki a singa di Pum, Jan, Dries, tan Otto so aliwa lan mabisbiskeg tan mapaot a singa nen kauga-ugawan da ni. Balet sikaray daakan ed inkatatken, eksperiensya, tan kakabatan. (Uliran 20:29) Amta ra no panon so magmaliw ya ama, tan diad pikikimey da ed kaasawaan da, walaan iray ideya no antoy nalalanor ed pagmaliw ya ina. Kaiba so kaasawaan da, atalonaan da iray problema ed pamilya tan angiletneg ira na saray teokratikon kalat parad saray anak da. Inkuan nen Otto: “Sano manisimbawa ak bilang manangasikaso na sirkito diad saray pamaakaran a nipaakar ed pamilya, makatutulong ed siak so impagmaliw kon de-pamilya.” Ontan met, say eksperiensya nen Dries bilang ama so mamapagmaliw ed sikato natan a makanan kabiangan na pamilyan Bethel, a dakel ditan so mantratrabaho a kalangweran.

On, say personal a pikakabat na sarayan agagin lalaki so ontutulong pian naasikaso ra so nanduruman klase na pankaukolan diad saray kongregasyon. Say eksperiensya ra so mamapatarem ed saray kagawaan ya uusaren da, a singa panangibaga, pian nausar da so biskeg da a pakagunggonaan a tuloy. (Eclesiastes 10:10) Diad Tua, diad espesipikon panat na panaon, mabetbet a mas dakel so nagagawaan da nen saramay mabiskeg so laman da balet agtanton eksperiensyado.

Sarayan agagin lalaki, kaiba iray kaasawaan da so maabig ya ehemplo parad saray kalangweran diad limog na totoo nen Jehova. Naiimano na saray kalangweran a saray sanasawa a singa saraya so akaeksperiensia a mismo na dakel iran angat tan bendisyon a nirereport ed saray Makristianon publikasyon. Makapaseseg a nanengneng so lalaki tan bibii a mangipapatnag na espiritu a singa si Caleb ya, anggaman masiken la et kinmerew na makapaangat ya asainmin.​—Josue 14:10-12.

Aligen so Pananisia Ra

Kasin nayarian yon aligen so pananisia tan kiwas na sarayan sanasawa ya asalambit ed sayan artikulo? Tandaan, inyapasakey da so bilay da ed katuaan. Binayuboan da ed ananak da so pilalek a manpayunir. Ginawa da itan, unong ya inkuan nen Jan, “diad pagmaliw ya ehemplo ed panangaro ed si Jehova tan ed organisasyon to, diad impangiyuksoy na maabig iran panlilimog, tan diad impangibangat ed ananak a suportaan so inkasikara.” Sikara met so nankimey tan nanggalaw a maniiba bilang sankapamilyaan. “Legan na bakasyon,” nanonotan ni nen Pum, “niyugali na interon pamilya mi so onlan manpulong diad kabuasan insan manrelaks kami diad ngarem.”

Niarum ni, masakbay a namplano irayan Kristiano, pian sano manguman iray sirkumstansya ra, akaparaan iran manganamot ed balon situasyon. Angiletneg ira na saray kalat tan sikaray nandesisyon pian nadampot dan tampol iray kalat da. Nannonot ira na paraan pian napatikeyan so sekular a pantrabaho ra tan mabulos iran nankontento ed daiset ya anap. (Filipos 1:10) Saray kaasawaan a bibii so sigpot a sinmuporta ed saray kaasawaan da. Pirmi so impampilalek da a makaloob ed “baleg a kapot a mangitonton ed kimey” tan, bilang resulta, panggagayagaan da so daakan iran bendisyon manlapud si Jehova.​—1 Corinto 16:9, NW; Uliran 10:22.

Kasin pampipilalekan yo met a palaknaben so pibibiang yo ed ministeryo? No ontan, say panganamot ed manguuman iran kipapasen so napaneknekan a tombok diad panggawa na ontan.

[Litrato ed pahina 20]

Si Pum tan Anny a mangaasikaso ed Assembly Hall

[Litrato ed pahina 20]

Si Jan tan Woth a manpupulong

[Litrato ed pahina 21]

Si Dries tan Jenny a manlilingkor ed Bethel

[Litrato ed pahina 21]

Si Otto tan Judy a manpaparaan ya ombisita ed ontumbok a kongregasyon