“Aromog Ko so Amin a Nakaukolan Ko”

SAY depresyon, unong ed report na World Health Organization, so akalkula a diad kaplesan et mangaapekta ed masulok a 120 milyon a totoo ed sankamundoan. Tinaon et sakey milyon a totoo so manbibikkel tan manga 10 anggad 20 milyon a totoo so manasalin manbikkel. Anto so walan tulong parad saramay walaan na depresyon? Nayarin makatulong so medikal a pampatambal, tan makana so emosyonal a suporta. Niarum ni, akaromog iramay makakalikna na ontan na kaaruman a tulong diad praktikal a nibase ed Biblia iran publikasyon na saray Tasi nen Jehova, unong ya ipapanengneng na onggendan a sulat manlapud Pransya.

“Agano ni et liknaen kon anggapo lay gagala na pambilay ko ni. Impikasik ed Dios ya ompatey ak la komon. Singano inatey ak la diad akindalem ko. Masimoon ak a nampikasi ed si Jehova, pian onkerew na panangiwanwan. Nandesisyon ak met a basaen so 2002 a Yearbook of Jehovah’s Witnesses tan asumpal ko itan diad loob na taloran agew. Nibagak a satan so amaseseg ed siak a maong tan amabiskeg ed pananisiak.

“Nansukimat ak ed saray Panag-Bantayan tan Awake! a magasin, tan nikelkelawan ak! Regular kon nababasa irayan magasin diad loob la na 15 taon, balet agkon balot amoria ya agaylan makapaseseg tan makapainteres irayan artikulo. Napno iraya na aro​—kalidad a mataltalag ed sarayan panaon. Aromog ko so amin a nakaukolan ko.”

Ibabaga na Biblia a: “Si Jehova [so] asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” (Salmo 34:18) Andi-duaruwan amin na saramay “nabtagan na puso” odino “masakit ed pagbabawi” so makalmo ed Biblia na panamaseseg tan ilalo ed arapen. Saray Tasi nen Jehova so mangibubunog na saray literaturan nibase ed Biblia pian tulongan iramay mankakaukolan a nagunggonaan ed impuyan na Dios a lapuan na ligliwa.