Propesiya nen Isaias​—Liwawa Parad Amin a Katooan II

Kapitulo Kinse

Manggayaga so Lepes a Bii

Isaias 54:1-17

1. Akin a pirawat nen Sara so mananak, tan anto so asagmak to ed sayan pamaakaran?

 PIRAWAT nen Sara so mananak. Balet makapaermen ta sikatoy lepes, tan satan so pirmin angonigon ed sikato. Nen panaon to, say inkalepes so impasen a makapabaing, balet nagkalalo ni nen say satan so paneermenan nen Sara. Pilalek ton nanengneng a nasumpal so sipan na Dios ed masiken to. Si Abraham so magmaliw ya ama na bini a mamendisyon ed amin a pamilya diad dalin. (Genesis 12:1-3) Bangbalet, apalabas lay pigaran dekada kayarin insipan na Dios itan, anggapo nin siansia so anak da. Inmakulaw lay Sara tan nansiansian andiay anak. No maminsan, nayarin ninonot to ya anggapo lay ilalo to. Balet, sakey ya agew, asalatan na gayaga so ermen to!

2. Akin a paninteresan tayo so propesiya a nikurit ed Isaias kapitulo 54?

² Say kipapasen nen Sara so makatulong ed sikatayo a natalosan so propesiya a nikurit ed Isaias kapitulo 54. Diman et tinawag so Jerusalem a singano lepes a bii a malikeliket sanen awalaan na dakel ya anak. Diad impangilitrato ed totoo to nensaman bilang asawa ton bii, impatnag nen Jehova so matamoy a liknaan to ed sikara. Niarum ni, tutulongan itayo na sayan kapitulo na Isaias a sukayan so importantin aspekto a tatawagen ed Biblia a “sagradon sekreto.” (Roma 16:25, 26, NW) Say pakabidbiran ed “bii” tan saray eksperiensya to ya impasakbay ed sayan propesiya so mangipapagamor na importantin pakaliwawaan nipaakar ed puron panagdayew natan.

Abidbir so “Bii”

3. Akin a walay rason a manliket so lepes a “bii”?

³ Ginmapo so kapitulo 54 ed maliket iran salita: “Mankanta ka, O lepes [“a bii,” NW], sika ya agnananak; onarak-ak ka ed pankanta, tan yingal mo, sika ya agnampasakit: ta nagkalalo ni so saray anak na apaulyan nen saray anak na bibii a naasawa, kuan nen Jehova.” (Isaias 54:1) Seguradon malikeliket si Isaias a mangibalikas ed sarayan salita! Tan agaylan makaligliwa so kasumpalan na satan parad saray Judion adestiero ed Babilonia! Diad saman a panaon, say Jerusalem so siansia nin nankibalatar. Diad panmoria na too, singano anggapo lay ilalo a napanayaman lamet itan, singa lepes a bii a sipor ya agla makapananak sano akulaw la. Balet sayan “bii” so nawalaan na baleg a bendisyon diad arapen​—sikato so makapananak. Say Jerusalem so manliket a maong. Sikato lamet so napusek na “saray anak,” odino saray manaayam.

4. (a) Panon itayon atulongan nen apostol Pablo a natalosan a say Isaias kapitulo 54 so walaan na babaleg a kasumpalan nen say samay diad 537 K.K.P.? (b) Anto so “Jerusalem a wala ed tagey”?

 ⁴ Nayarin ag-amta itan nen Isaias, balet say propesiya to so walaay masulok a sakey a kasumpalan. Angaon si apostol Pablo manlapud Isaias kapitulo 54 tan insalaysay to a say “bii” so mankabaliksan na bengatlan mas importante nen say mangaraldalin a syudad na Jerusalem. Insulat to: “Saman so Jerusalem a wala ed tagey sikatoy bulos, a sikatoy ina mi a lapag.” (Galacia 4:26) Anto iyan “Jerusalem a wala ed tagey”? Malinew ya aliwan samay syudad na Jerusalem diad Insipan a Dalin. Saman a syudad et mangaraldalin, aliwan “wala ed tagey” diad mangatatawen a panarian. Say “Jerusalem a wala ed tagey” et say mangatatawen a pinagkaasawan “bii” na Dios, say organisasyon to a tugyopen na saray mabiskeg ya espiritun pinalsa.

5. Diad simbolikon drama a nidatak ed Galacia 4:22-31, siopa so ililitrato nen (a) Abraham? (b) Sara? (c) Isaac? (d) Hagar? (e) Ismael?

⁵ Balet, panon ya awalaan si Jehova na duaran simbolikon bii​—sakey a mangatatawen tan sakey a mangaraldalin? Wala kasi so agpantunosan ed saya? Anggapo. Impanengneng nen apostol Pablo a say ebat so naromog ed mapropetikon impangilitrato na pamilya nen Abraham. (Galacia 4:22-31; nengnengen so “Say Pamilya nen Abraham​—Sakey a Mapropetikon Litrato,” diad kahon.) Ililitrato nen Sara, say “biin bulos” tan asawa nen Abraham, so singa asawan bii ya organisasyon nen Jehova a tugyopen na saray espiritun pinalsa. Si Hagar, ya aripen a bii tan komaduan asawa, odino agkasamento nen Abraham, so mangililitrato ed mangaraldalin a Jerusalem.

6. Diad anton pantalos ya asagmak na mangatatawen ya organisasyon na Dios so abayag ya inkalepes?

⁶ Diad satan a detalye, naamtaan tayo so aralem a kabaliksan na Isaias 54:1. Kayari na pigaran dekada na inkalepes, inyanak nen Sara si Isaac sanen sikatoy mantaon na 90. Mipadpara, say mangatatawen ya organisasyon nen Jehova so abayag a nagmaliw a lepes. Dia ni ed Eden et insipan la nen Jehova ed “bii” a sikatoy mamawala na “bini.” (Genesis 3:15, NW) Kayari na masulok a 2,000 taon, si Jehova et akisipanan ed si Abraham nipaakar ed insipan a Bini. Balet kaukolan a manalagar so mangatatawen a “bii” na Dios na dakel nin siglo antis a napawala itan a Bini. Anggaman ontan, asabi panaon sanen saray anak na sayan datin ‘lepes a bii’ so mas dakel ni nen saramay silalaman ya Israel. Ontulong ed sikatayo so ilustrasyon na lepes a bii a natalosan no akin a magunaet iray anghel a naimatonan so isabi na impasakbay a Bini. (1 Pedro 1:12) Kapigan itan agawa?

7. Kapigan nanggayaga so “Jerusalem a wala ed tagey,” unong ya impasakbay ed Isaias 54:1, tan akin ya ontan so ebat yo?

⁷ Say inkianak nen Jesus bilang toon ugaw so peteg a magayagan okasyon parad saray anghel. (Lucas 2:9-14) Balet aliwan satan so ebento ya impasakbay ed Isaias 54:1. Si Jesus so nagmaliw lambengat ya espiritual ya anak na “Jerusalem a wala ed tagey,” sanen sikato so nailalak na masanton espiritu nen 29 K.P., a mapublikon binidbir na Dios a mismo bilang say ‘inadaro ton Anak.’ (Marcos 1:10, 11; Hebreos 1:5; 5:4, 5) Diad saman et awalaan na rason so mangatatawen a “bii” na Dios a manggayaga, bilang kasumpalan na Isaias 54:1. Apawala to a siansia so insipan a Bini, say Mesias! Angangga la so pigay siglon inkalepes to. Balet, aliwan satan so anggaan na panggayaga to.

Dakerakel ya Anak Parad Lepes a Bii

8. Akin a walaan na rason so mangatatawen a “bii” na Dios a manggayaga kayarin apawala so insipan a Bini?

⁸ Kayari impatey tan inkioli nen Jesus, magayagan inawat na mangatatawen a “bii” na Dios iyan apaboran ya Anak bilang “panguloan ed saray inaatey.” (Colosas 1:18) Insan sikatoy ginmapon nananak na dakel ya espiritual ya ilalak. Nen Pentecostes 33 K.P., alanaan na masanton espiritu so manga 120 iran patumbok nen Jesus, diad ontan et atagibi ira bilang kaiban mananawir nen Kristo. Diad saginonor na satan ya agew et 3,000 ni so niarum. (Juan 1:12; Gawa 1:13-15; 2:1-4, 41; Roma 8:14-16) Sayan ulop na ananak so nantultuloy a dinmakel. Legan na inmuna iran siglo na apostasya na Kakristianoan, tinmayer so ibubulaslas. Balet, satan so anguman diad koma-20 siglo.

9, 10. Antoy kabaliksan na ganggan a ‘pabalegen so pasen na kobongkobong’ parad bii a manaayam ed kobongkobong nensaman a panaon, tan akin a maliket itan a panaon parad satan a bii?

⁹ Nantultuloy a nampropesiya si Isaias nipaakar ed peryodo na makatantandan idaraak: “Pabalegen mo so pasen na kobongkobong mo, tan pabuskag mo ed sikara so saray sakbong na saray panayaman mo; agka mangikera: padukeyen mo so saray lubir mo, tan pasekderen mo so saray palitek mo. Ta ontayak ka ed nikawanan tan nikawigi; et say binim kayarianen to naani so saray nasyon, et gawaen to a saray syudad ya abagbag natooan ira naani. Agka antakot; ta agka naani nibabaing; ta sika nalingwanan mo naani so baing na inkaugaw mo; tan say kabalaw na inkabalom agmo la naani nanonotan.”​—Isaias 54:2-4.

¹⁰ Ditan et tinawag so Jerusalem a singa asawan bii tan ina a manaayam ed saray kobongkobong, a singa si Sara. Sano nabendisyonan a nawalaan na ombabaleg a pamilya, panaon la pian paawangen na satan ya ina so ayaman to. Kaukolan a sikatoy mangibuskag na mas andukey iran tolda tan lubir tan ipalpal a maong iray latok ed balo iran pasen  da. Saya so maliket a kimey parad sikato, tan lapud okupado, nayarin mainomay ton nalingwanan iray taon ya impampaga ton maong no kasin sikatoy mananak ni pian napansiansia so kapolian na pamilya to.

11. (a) Panon ya abendisyonan so mangatatawen a “bii” na Dios nen 1914? (Nengnengen so paimano’d leksab.) (b) Manlapu nen 1919 a manpatuloy, anton bendisyon so naeksperiensya na saray alanaan diad dalin?

¹¹ Say mangaraldalin a Jerusalem so abendisyonan na ontan a panaon na impakapasimbalo kayari na inkadestiero ra ed Babilonia. Say “Jerusalem a wala ed tagey” so nagkalalo nin abendisyonan. * Nagkalautla nen 1919, say alanaan a ‘bini’ to so binmulaslas ed kapkapangipawil ed espiritual a kipapasen da. (Isaias 61:4; 66:8) ‘Kinayarian da iray nasyon’ lapud sikaray nikaykayat ed dakel a bansa pian anapen so amin na saramay miulop ed espiritual a pamilya ra. Bilang resulta, agawa so maples ya indaak diad panitipon ed alanaan ya ananak. Pinmatnag ya akompleto la so bilang na 144,000 nen manga kapegleyan na dekada 1930. (Apocalipsis 14:3) Diad saman a panaon say imano a panipon ed alanaan diad panagpulong a kimey so tinmunda la. Anggaman ontan, say ilalaknab so agtinmunda diad saray alanaan.

12. Niarum ed saray alanaan, siopa nira so tinipon ed Kristianon kongregasyon manlapu nen dekada na 1930?

¹² Impasakbay a mismo nen Jesus a likud ed “melag a pulok” na saray alanaan ya agagi to, sikatoy nawalaan na ‘arum a karnero’ a kaukolan ya awiten ed panangipukokan na saray tuan Kristiano. (Lucas 12:32; Juan 10:16) Anggaman ag-ira kabiangan na alanaan ya ananak na “Jerusalem a wala ed tagey,” sarayan matoor a kaiba na alanaan so walaan na importante tan abayag lan impropesiya a betang. (Zacarias 8:23) Manlapud dekada na 1930 anggad natan, natitipon ed sikara so “baleg ya ulop,” a manreresulta ed agnaparaan ya ilalaknab na Kristianon kongregasyon. (Apocalipsis 7:9, 10) Natan et satan a baleg ya ulop so minilyon la. Lapud sayan amin ya ilalaknab, inkaganatan so pankaukolan na dakel niran Kingdom Hall, Assembly Hall, tan saray sangan pasilidad. Saray salita nen Isaias so mapatnag a lalon matukotukoy. Agaylan pribilehyo so pagmaliw a kabiangan na satan ya impasakbay ya ilalaknab!

Ina a Mangiyaansakit ed Saray Anak To

13, 14. (a) Anton mapatnag ya irap so nanengneng ed saray pigaran balikas ya ontutukoy ed mangatatawen a “bii” na Dios? (b) Antoray natebek tayo diad impangusar na Dios ed ilustrasyon nipaakar ed saray relasyon na pamilya.

¹³ Anengneng tayo a diad babaleg a kasumpalan, say “bii” ed propesiya so mangirerepresenta ed mangatatawen ya organisasyon nen Jehova. Balet kayarin binasa so Isaias 54:4, nayarin pankelawan tayo no panon a satan ya organisasyon na saray espiritun pinalsa so apabanday odino amudmora. Saray ontumbok a bersikulo so mangibabaga a say “bii” na Dios so inkaindan, pinairap, tan inataki. Pasanoken to ni ingen so Dios. Panon ya onaplika so ontan iran bengatla ed sakey ya organisasyon na saray ayadyarin espiritun pinalsa ya agnin balot akapankasalanan? Say ebat so naromog ed kasiporan a walna na pamilya.

¹⁴ Si Jehova so manguusar na saray relasyon na pamilya​—asawan laki tan bii, ina tan ananak​—pian ipasabi so aralem iran espiritual a katuaan lapud saratan a simbolo so makabaliksan ed saray totoo. Antokaman so laknab odino kalidad na dilin eksperiensya na pamilya tayo, nayarin walaan itayo lay ideya no anto so maabig a panangasawa odino maabig a relasyon na ateng tan anak. Agaylan linew sirin so impangibangat nen Jehova ed sikatayo a sikato so walaan na ampetang, maapit, tan napanmatalkan a relasyon ed balbaleg ya ulop na saray espiritun lingkor to! Tan agaylan pandinayewan so pangibabangat to ed sikatayo a say mangatatawen ya organisasyon to so mangiyaansakit ed saray alanaan na espiritun ilalak to diad dalin! Sano manirap iray lingkor a totoo, saray matoor a mangatatawen a lingkor, say “Jerusalem a wala ed tagey,” so manlikna. Mipadpara itan ed inkuan nen Jesus: “Bangta sikatoy ginawa yo ed sakey ed sarayan [nilanaan na espiritun] agagik, anggan saraya a kamelagan, sikatoy ginawa yo ed siak.”​—Mateo 25:40.

15, 16. Anto so inmunan kasumpalan na Isaias 54:5, 6, tan anto so babaleg a kasumpalan?

 ¹⁵ Agpankelawan sirin a dakel ed saray impasakbay nipaakar ed mangatatawen a “bii” nen Jehova so napatnagan ed saray eksperiensya na ananak to diad dalin. Imanoen pa irayan salita: “Say Nanggawa ed sika sikato so asawam a laki; Jehova na saray ehersito so ngaran to: et say Santo na Israel sikato Mananondon mo; say Dios na sankamundoan so katawag to naani. Ta si Jehova tinawag to ka a singa sakey ya asawa a bii ya apaulyan tan apaermen ed linawa, say sakey lanlamang ya asawa na inkatobonbalo, no sikato so napataynan, kuan na Dios mo.”​—Isaias 54:5, 6.

¹⁶ Siopa so tatawagen dia ya asawan bii? Diad inmunan kasumpalan, satan et say Jerusalem, a mangirerepresenta ed totoo na Dios. Legan na 70 taon ya inkadestiero ra ed Babilonia, liknaen da a sikaray inkaindan nen Jehova tan sikaray sigpot ton tinaynan. Diad babaleg a kasumpalan, saray balikas so ontutukoy ed “Jerusalem a wala ed tagey” tan say eksperiensya to sanen akapawala a siansia na ‘bini’ bilang kasumpalan na Genesis 3:15.

Aganon Disiplina, Magnayon Iran Bendisyon

17. (a) Panon ya asagmak na mangaraldalin a Jerusalem so “manleplepuas” a madibinon sanok? (b) Anto so “manleplepuas” ya asagmak na saray anak na “Jerusalem a wala ed tagey”?

¹⁷ Oniay intuloy na propesiya: “Dia ed aganon kasanlilikna pinaulyan ta ka, balet dia ed baleg a panangasi alaen ta ka naani. Dia ed maleplepuas a sanok insanib ko so lupak ed sika ed sakey a kasanlilikna; balet dia ed ando lan ando a kabiangan na linawa, kasian ta ka naani, kuan nen Jehova a Mananondon mo.” (Isaias 54:7, 8) Say mangaraldalin a Jerusalem so apano na “manleplepuas” a sanok na Dios sanen inmataki iray puersa na Babilonia nen 607 K.K.P. Say 70 taon ya inkadestiero to so singano abaybayag a panaon. Anggaman ontan, saraman a subok so “kasanlilikna” lambengat sano ikompara ed magnayon iran bendisyon para ed saramay maabig a kinmiwas ed disiplina. Ontan met, liknaen na saray alanaan ya anak na “Jerusalem a wala ed tagey” a singa nadadaeg ira na “manleplepuas” a madibinon sanok sanen inabuloyan ira nen Jehova ya atakien na saray mapolitikan elemento diad sugsog na Baleg a Babilonia. Balet agaylay gano na satan a disiplina sano ikompara ed tinmumbok a panaon na espiritual iran bendisyon manlapu la nen 1919!

18. Anton importantin prinsipyo so natebek nipaakar ed sanok nen Jehova ed totoo to, tan panon itayon naapektaan a mismo na saya?

¹⁸ Imbalikas na sarayan bersikulo so sananey nin matalonggaring a katuaan​—a maganggano so sanok na Dios, balet say panangasi to so mansiansia ed ando lan ando. Ondalang so sanok to ed saray manggagawa na mauges, balet satan so kontrolado, lawas walaan na gagala. Tan no awaten tayo so panagdisiplina nen Jehova, say sanok to so “kasanlilikna” lambengat, insan la onkepa. Satan so nasalatan na “baleg a panangasi” to​—say panamerdona tan maaron-kaabigan to. Saraya so mansiansia ed “ando lan ando.” Kanian, sano makapankasalanan itayo sirin, agtayo komon masuyat a magbabawi tan onkerew ed Dios na panamerdona. No seryoso so agawan kasalanan, kaukolan ya onasingger itayon tampol ed saray mamatatken ed kongregasyon. (Santiago 5:14) Tua, nayarin nakaukolan so disiplina, tan nayarin mairap ya awaten itan. (Hebreos 12:11) Balet satan so maganggano sano ikompara ed saray magnayon a bendisyon a manlalapu ed pangawat na panamerdona nen Jehova a Dios!

19, 20. (a) Anto so kabunlalakaw a sipanan, tan panon itan a misiglaotan ed saray adestiero ed Babilonia? (b) Anton panamaseguro so itatarya na ‘sipan na kareenan’ ed saray alanaan a Kristiano natan?

¹⁹ Inikdan natan nen Jehova so totoo to na makaligliwan panamaseguro: “Ta saya sikato so singa saray dia ed saray danum nen Noe ed siak; ta singa insambak a saray danum nen Noe agda la naani delapen so dalin, ontan met ya insambak ed sika ya agak naani onsanok la ed sika, tan agta ka la baaten. Ta saray palandey makataynan ira tan saray pukdol niyalis ira; balet say maaro ya abig na linawak agnaani ontaynan ed sika, tan agmet naalis so sipan [“na kareenan,” NW] ko ed pipakna, kuan nen Jehova a walaan na panangasi ed sika.” (Isaias 54:9, 10) Kayari na Delubio, nanggawa so Dios na sipanan​—a tatawagen no maminsan a kabunlalakaw a sipanan​—ed si Noe tan ed amin a mabilay.  Insipan nen Jehova ya agto la deralen so dalin panamegley na delap ed interon globo. (Genesis 9:8-17) Anto so kabaliksan na satan ed si Isaias tan ed saray kabaleyan to?

²⁰ Makaligliwan naamtaan a say dusan sagmaken da​—say 70 taon ya inkadestiero ed Babilonia​—so nagawa labat a maminsan. Sano ayari la, agla itan naulit. Kayari na satan, nagawa la so ‘sipan na kareenan’ na Dios. Say Hebreo a salita para ed “kareenan” so aglambengat mankabaliksay kaandi na bakal noagta kiwala met na amin a klase na kaabigan. Diad biang na Dios sayan sipanan so permanente. Mas maganon naandipat iray pukdol tan palandey nen say maaron-kaabigan to ed matoor a totoo to. Makapaermen, say mangaraldalin a nasyon to so agnansiansian matoor ed sipanan tan binuyak da so dili ran kareenan diad impangipulisay ed Mesias. Balet, mas maabig so nansumpalan na saray anak na “Jerusalem a wala ed tagey.” Sanen ayari la so mairap a panaon na dusa ra, sikaray apaseguroan na pananalimbeng na Dios.

Say Espiritual a Kaligenan na Totoo na Dios

21, 22. (a) Akin a nibagan apairap tan abagyo so “Jerusalem a wala ed tagey”? (b) Anto so ipapatnag na abenditon kipapasen na mangatatawen a “bii” na Dios nipaakar ed saray ‘bini’ to diad dalin?

²¹ Intuloy nen Jehova ya impasakbay so kaligenan parad matoor a totoo to: “O sika ya apairap [“a bii,” NW], a pinakesaw na bagyo, tan ag-aligliwa, nia, ipasen ko so saray batom ed marakep a batebatek, tan ’yan ko so saray zafiro a simientom. Tan gawaen ko naani a panpantok mo so saray rubi, tan saray pintom a karkarbunklo, tan amin a ketegan mo a mabli a batobato. Tan amin iray anak mo nibangat ira ed Jehova; et baleg naani deen na saray anak mo. Dia ed inkatunong so kipasenan mo; arawi ka naani ed kapairap, ta agka la naani antakot; et say takot agla naani onasingger ed sika. Nia, sikara makapankakasakey ira, balet aliwa a lapu ed siak: anggan siopa a mantipon ya onsumpa ed sika nipasag naani a nisengeg ed sika.”​—Isaias 54:11-15.

²² Siempre, say “bii” nen Jehova diad kawalaan na saray espiritu so agnin balot direktan apairap odino abagyo. Balet sikato so nanirap sanen say alanaan a ‘bini’ to so apairap diad dalin, nagkalalo la sanen sikaray akautibo ed espiritual legan na peryodo na 1918-19. Diad biek a dapag, sanen nitandoro so mangatatawen a “bii,” ipapatnag na satan so miparan kipapasen na ilalak to. Konsideraen pa sirin so masnag ya impaneskribe ed “Jerusalem a wala ed tagey.” Saray angkablin bato diad saray wangalan, say mabmablin “batebatek,” saray pundasyon, tan anggan saray ketegan so mangisusuheri na “karakpan, karlangan, inkapuro, biskeg, tan inkasekder,” unong ya inkuan na sakey a reperensya. Anto so mangitonton ed saray Kristiano ed ontan a maligen tan abenditon kipapasen?

23. (a) Say ‘kibangat ed Jehova’ so walaan na anton epekto ed saray alanaan a Kristiano diad saray kaunoran ya agew? (b) Diad anton pantalos ya abendisyonan iray totoo na Dios na saray ‘ketegan a mabli a batobato’?

²³ Itatarya na bersikulo 13 kapitulo 54 na Isaias so tombok​—amin so ‘nibangat ed si Jehova.’ Inyaplika a mismo nen Jesus iray salita ed sayan bersikulo ed saray alanaan a patumbok to. (Juan 6:45) Impasakbay nen propetan Daniel a legan na sayan “panaon na anggaan,” saray alanaan so nabendisyonan na daakan a tuan kakabatan tan espiritual a pakatebek. (Daniel 12:3, 4, NW) Satan a pakatebek so ontulong ed sikaran nidaulo so sankalaknaban a panagbangat a kampanya ed awaran, say panangikayat ed madibinon bangat diad interon dalin. (Mateo 24:14) Ontan met, satan a pakatebek so akatulong ed sikaran nabidbir so pandumaan na tua tan palson relihyon. Sinalambit na Isaias 54:12 iray ‘ketegan a mabli a batobato.’  Manlapu nen 1919, inikdan nen Jehova so alanaan na mas malinew a pakatalos ed saray ketegan​—saray linya na espiritual a ketegan​—a mangibiig ed sikara ed palson relihyon tan saray agmaridios ya elemento na mundo. (Ezequiel 44:23; Juan 17:14; Santiago 1:27) Diad ontan et sikaray imbiig bilang dilin totoo na Dios.​—1 Pedro 2:9.

24. Panon tayon naseguro a sikatayo so ibabangat nen Jehova?

²⁴ Kanian, nepeg tayon amin a tepetan so inkasikatayo, ‘Kasin ibabangat ak nen Jehova?’ Agtayo automatikon naawat itan a bangat. Kaukolan itayon mansagpot. No regular tayon basaen so Salita na Dios tan dalepdepen itan tan no awaten tayo iray bilin panamegley na pambasa ed saray nibase ed Biblia a literatura ya impalapag na “matoor tan makabat ya aripen” tan panamegley na pamparaan tan iyatendi ed saray miting, peteg a sikatayo so ibabangat nen Jehova. (Mateo 24:45-47) No panggunaetan tayon iyaplika so naaralan tayo tan mansiansian aliing ed espiritual tan akabantay, ibiig itayo na madibinon bangat manlapud saramay wadia ed sayan agmaridios a mundo. (1 Pedro 5:8, 9) Nagkalalo nen satan, ontulong itan ed sikatayo pian “onapit ed Dios.”​—Santiago 1:22-25; 4:8, NW.

25. Anto so kabaliksan na sipan nen Jehova a kareenan parad saray totoo to ed modernon panaon?

²⁵ Ipapanengneng met na propesiya nen Isaias a saray alanaan so abendisyonan na daakan a kareenan. Kasin kabaliksan na saya ya ag-iran balot naataki? Andi, balet ipapaseguro na Dios ya agton balot iganggan iratan ya iyataki nisay abuloyan ton ontalona iratan. Oniay nabasa tayo: “Nia, pinalsak so panday a manibok ed saray ngalab, tan pawalaen to so sakey a kagawaan a pankimey to; tan pinalsak so mangigeba a maneral. Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak, kuan nen Jehova.”​—Isaias 54:16, 17.

26. Akin a makapaseguron naamtaan a si Jehova so Manamalsa na amin a katooan?

²⁶ Diad komaduan pankanawnawa ed sayan kapitulo na Isaias, impanonot nen Jehova ed saray lingkor to a sikato so Manamalsa. Diad akadkauna et inkuan to ed simbolikon asawa to a Sikato so “Nanggawa” ed sikato. Natan et inkuan to a sikato so Amalsa ed amin a katooan. Deneskribe na bersikulo 16 so managpanday a manisibok ed saray ngalab diad panagpandayan to legan a manggagawa na saray armas a paneral tan sakey a mibabakal, toon “mangigeba a maneral.” Nayarin makapataktakot so nengneng na saratan a lalaki parad kapara ran totoo, balet panon dan nailaloan a nadaeg so dili ran Manamalsa? Ontan met natan, anggano atakien na sankamakapanyarian a puersa na mundo iray totoo nen Jehova, ag-iran balot ontalona. Panon ya ontan?

27, 28. Diad anto itayo makaseguro legan na sarayan magonigon a panaon, tan akin ya amta tayon onsaew iray panangataki nen Satanas ed sikatayo?

²⁷ Agawa la so panaon na makaderal ya impangataki sumpad totoo na Dios tan ed say panangidayew da ed espiritu tan katuaan. (Juan 4:23, 24) Inabuloyan nen Jehova so Babilonia a Baleg ya onataki a maminsan, a tinmalonan agano. Diad aganon panaon, anengneng na “Jerusalem a wala ed tagey” so ilalak to ya apepe lawari legan a say panagpulong a kimey ed dalin so ngalngalin apatunda. Aglan balot naulit itan! Natan et sikato lay manliket ed saray anak to, lapud diad espiritual a pantalos et sikaray agnadaeg. (Juan 16:33; 1 Juan 5:4) On, walaray pinorman armas a pangataki ed sikara, tan wala niray ontumbok. (Apocalipsis 12:17) Balet ag-iraya tinmalona tan ontalona. Anggapoy ayura nen Satanas a manaeg ed pananisia tan mandarlang a seseg na alanaan tan saray kaiba ra. Sayan espiritual a kareenan et “tawir na saray ariripen nen Jehova,” kanian anggapoy makasamsam ed satan ed sikara.​—Salmo 118:6; Roma 8:38, 39.

²⁸ Andi, anggapoy nagawaan na mundo nen Satanas pian napatunda so kimey tan say magnayon tan malinis a panagdayew ed Dios na saray dedikadon lingkor to. Saray alanaan ya ilalak na “Jerusalem a wala ed tagey” so pirmin aligliwa ed satan a panamaseguro. Ontan met iray membro na baleg ya ulop. No lalo tayon nakakabat so nipaakar ed mangatatawen ya organisasyon nen Jehova tan saray pidedeneng to ed saray manlilingkor ed sikato diad dalin, mas lalon ombibiskeg so pananisia tayo. Daput no mabiskeg so pananisia tayo, onsaew iray armas nen Satanas diad pibabakal to sumpad sikatayo!

[Paimano ed Leksab]

[Tepetepet Parad Panagaral]

 [Kahon ed pahina 25]

Say Pamilya nen Abraham​—Sakey a Mapropetikon Litrato

Impaliwawa nen apostol Pablo a say pamilya nen Abraham so onkana bilang simbolikon drama, sakey a mapropetikon panangilitrato ed relasyon nen Jehova ed mangatatawen ya organisasyon to tan ed mangaraldalin a nasyon na Israel diad silong na Mosaikon Ganggan a sipanan.​—Galacia 4:22-​31.

Si Abraham, bilang ulo na pamilya, so mangirerepresenta ed si Jehova a Dios. Say inkamabulos nen Abraham a mangisaklang ed pinabli ton anak a si Isaac bilang bagat so mangililitrato ed inkamabulos nen Jehova a mangisaklang ed dili ton inadaron Anak bilang bagat parad saray kasalanan na katooan.​—Genesis 22:1-​13; Juan 3:16.

Si Sara so mangililitrato ed mangatatawen ya “asawa a bii” na Dios, say organisasyon to a tugyopen na saray espiritun pinalsa. Satan a mangatatawen ya organisasyon so matukoy a deneskribe bilang asawa nen Jehova, lapud sikato so walaan na maapit a siglaotan ed si Jehova, manpapasakop ed inkaulo to, tan sigpot a mikokoopera diad panumpal ed saray gagala to. Sikato met so natatawag a “Jerusalem a wala ed tagey.” (Galacia 4:26) Satan met imay “bii” a sinalambit ed Genesis 3:15, tan ililitrato ed pasingawey ed Apocalipsis 12:1-6, 13-​17.

Si Isaac so mangirerepresenta ed espiritual a Bini na asawan bii na Dios. Manuna et si Jesu-Kristo iya. Balet, nagmaliw met a kabiangan na bini so alanaan ya agagi nen Kristo, a tinagibi bilang espiritual ya ananak tan nagmaliw a kaiban mananawir nen Kristo.​—Roma 8:15-​17; Galacia 3:16, 29.

Si Hagar, a komaduan asawa nen Abraham odino agkasamento, so sakey ya aripen. Matukoy ton ililitrato so mangaraldalin a Jerusalem, ya inuleyan na Mosaikon Ganggan, ya angiparungtal ed amin ya ontutumbok ed satan bilang ariripen na kasalanan tan patey. Inkuan nen Pablo a “say Hagar sikato so palandey na Sinai, dia ed Arabia,” lapud ditan inletneg so Ganggan a sipanan.​—Galacia 3:10, 13; 4:25.

Si Ismael ya anak nen Hagar, so mangililitrato ed saray inmunan-siglon Judio, saray anak na Jerusalem a siansian naaripen ed Mosaikon Ganggan. No panon a pinasegsegang nen Ismael si Isaac, pinasegsegang met na saraman a Judio iray Kristiano, ya alanaan ya anak na piguratibon Sara, say “Jerusalem a wala ed tagey.” Tan no panon a pinataynan nen Abraham si Hagar tan Ismael, sigpot met ya intalirak nen Jehova so Jerusalem tan saray rebelyoson anak to.​—Mateo 23:37, 38.