‘Manpakpel tan Manpabiskeg Kayo!’
‘Manpakpel tan Manpabiskeg Kayo!’
“Manpakpel kayo! Tinalok so mundo.”—JUAN 16:33, NW.
1. Lapu ed saray manatalaran ed saray Israelita diad Canaan, anto so nipaseseg ed sikara?
SANEN ombeltang laray Israelita ed Ilog Jordan pian onloob ed Insipan a Dalin, oniay kuan ed sikara nen Moises: “Manpakpel tan manpabiskeg kayo. Agkayo ontatakot odino natalagnaw ed arap da, lapud si Jehova a Dios so mibabansag ed sikayo.” Insan impatawag nen Moises si Josue, ya aturon mangidaulo ed saray Israelita ya onloob ed Canaan, tan inulit ton mismo ed si Josue so simbawan manpakpel ira. (Deuteronomio 31:6, 7, NW) Saginonor, si Josue so pinaseseg a mismo nen Jehova, a kuanto: “Manpabiskeg ka tan manpabayani ka a maong . . . Salambengat a manpabiskeg ka tan manpabayani ka a maomaong.” (Josue 1:6, 7, 9) Nipanpanaon iratan a salita. Saray Israelita so mankaukolan na inkakpel pian nalabanan da iray mabiskeg a kakabusol a manatalaran ed basil na Jordan.
2. Anton kipapasen so kidudungetan tayo natan, tan anto so nakaukolan tayo?
2 Natan, saray tuan Kristiano so magano lan onloob ed insipan a balon mundo tan, singa si Josue et nakaukolan itayon manpakpel. (2 Pedro 3:13; Apocalipsis 7:14) Balet miduma so kipapasen tayo ed kipapasen nen Josue. Sikato so akilaban panamegley na saray kampilan tan gayang. Sikatayo so mibabakal ed espiritual a paraan tan ag-itayon balot mangusar na literal ya armas. (Isaias 2:2-4; Efeso 6:11-17) Niarum ni, kinaukolan a mibakal si Josue ed dakel a maramsak iran panlalaban kaloob da ni ingen ed Insipan a Dalin. Balet nidudunget itayo ed sankaramsakan iran panlalaban natan—sakbay itayon onloob ed balon mundo. Imanoen tayo so pigaran kipapasen a kaukolan itayon manpakpel.
Akin a Nakaukolan Itayon Mibarangkaan?
3. Anto so ipaparungtal na Biblia nipaakar ed manunan onsusumpa ed sikatayo?
3 Oniay insulat nen apostol Juan: “Amta tayo a kien itayo na Dios tan say sankamundoan mandukdukol ed kaugsan.” (1 Juan 5:19) Ipapabitar na saratan a salita so manunan rason no akin a kinaukolan a mibarangkaan iray Kristiano pian namantini ra so pananisia ra. Sano pansiansiaen na sakey a Kristiano so integridad to, diad sakey a laknab et tinalo to si Satanas a Diablo. Kanian, onkikiwas si Satanas a singa “omoang a leon” a mamapagyaw tan manasalin mangakmon ed matoor iran Kristiano. (1 Pedro 5:8) On, babakalen to iray alanaan a Kristiano tan saray kakaiba ra. (Apocalipsis 12:17) Diad sayan pibabakal, uusaren to iray totoo parad saray gagala to, balanglan amta ra odino andi. Nakaukolan so panagpakpel pian makatalindeg a malet sumpad si Satanas tan amin na saray ahente to.
4. Anto so impasakbay nen Jesus, balet anton kalidad so impatnag na saray tuan Kristiano?
4 Lapud amta la nen Jesus a sumpaen nen Satanas tan saray ahente to so maong a balita, onia lay impasakbay To ed saray patumbok to: “Yawat da kayo ed pakapasegsegang, tan pateyen da kayo naani; tan gulaen da kayo naani na saray amin a nasyon nisengeg ed ngaran ko.” (Mateo 24:9) Asumpal iratan a salita nen inmunan siglo, tan nagagawa met itan natan. On, say panamasegsegang a sinungdoan na arum ed saray modernon Tasi nen Jehova so marukduksa a singa met ed agawa diad interon awaran. Balet, makpel iray tuan Kristiano anggaman ed ontan a pananesdes. Amta ra a say ‘takot ed too so mangitarok na kalot,’ tan agda labay so nakalotan.—Uliran 29:25.
5, 6. (a) Antoray situasyon a nakaukolan itayon manpakpel? (b) Panon so ikiwas na saray matoor a Kristiano sano nasubok so panagpakpel da?
5 Wala niray arum ya angat nilikud ed panamasegsegang a kaukolan tayon panpakpelan. Parad arum, sakey ya angat so pangitongtong na maong a balita ed saray agkabat. Nasusubok so panagpakpel na arum ya ananak a maneeskuela sano paidalatdat ed sikara iray balikas na katooran ed bansa odino ed bandira. Lapud walaan itan na relihyoson kabaliksan, saray Kristianon ananak so makpel tan determinadon onkiwas ed paraan a mamaliket ed Dios, tan makapaligsay-puso so maabig a gagawaen da.
6 Nakaukolan tayo met so panagpakpel sano impluensyaan na saray onsusumpa so media a mangikayat na mauges iran report nipaakar ed saray lingkor na Dios odino salien dan pegetan so tuan panagdayew a ‘mansaol panamegley na ganggan.’ (Salmo 94:20) Alimbawa, anto so liknaan tayo sano makapalikdo odino sigpot a katilaan iray report na peryodiko, radio, odino telebisyon nipaakar ed saray Tasi nen Jehova? Nabigla itayo kasi? Andi. Ilaloan tayo iratan a bengatla. (Salmo 109:2) Tan ag-itayo nabigla sano panisiaan na arum a totoo so impalapag iran katilaan tan panagpalikdo, lapud “siopaman ya andian na eksperiensya so manisia ed kada salita.” (Uliran 14:15, NW) Balet, agpanisiaan na saray matoor a Kristiano so antokaman a balikas na totoo nipaakar ed agagi ra, tan seguradon agda pinonoyan so palso iran report a mamasaew ed sikara diad Makristiano iran pantitipon, mamatayer ed sikara diad lawak na ministeryo, odino mamaletey ed pananisia ra. Diad pisunian, ‘imamatalek da so [inkasikaran] dili, a singa ministros na Dios, . . . lapu ed galang tan kaekalan na galang, lapu ed mauges a dengel tan maong a dengel; [unong ed saray onsusumpa] singa saray managtila, tan anggaman [diad inkapeteg] ontan matua.”—2 Corinto 6:4, 8.
7. Antoran manangusisan tepet so itepet tayo ed inkasikatayo?
7 Si Pablo, a nansulat ed si Timoteo, so angikuan: “Ag-itayo inikdan na Dios na espiritu na katakotan; noag say pakayari . . . Agmo sirin ibaing so pamatua na Katawan tayo.” (2 Timoteo 1:7, 8; Marcos 8:38) Diad impakabasa tayo ed saratan a salita, tepetan tayoy inkasikatayo: ‘Kasin ibabaing ko so pananisiak, odino makpel ak? Diad pantratrabahoan (odino paneeskuelaan) ko, kasin ipapakabat ko so inkasiak bilang Tasi nen Jehova, odino iyaamot ko itan? Ambaing ak kasin magmaliw a miduma ed arum, odino ikikinon ko so inkadumak lapud relasyon ko ed si Jehova?’ No pilekpilek so sakey nipaakar ed panangipulong na maong a balita odino ed panayakup ed aglabalabay a sisisiaen, nodnonoten to komon so simbawa nen Jehova ed si Josue: “Manpakpel tan manpabiskeg ka.” Agbalot lilingwanan a say importante et say panmoria nen Jehova tan si Jesu-Kristo, aliwan say nibaga na saray katrabaho odino kaeskuela tayo.—Galacia 1:10.
No Panon Tayon Bayuboan so Inkakpel
8, 9. (a) Diad sananey ya inkagawa, panon ya asubok so panagpakpel na saray akadkaunan Kristiano? (b) Panon so inkiwas nen Pedro tan Juan sanen nidunget ira ed panamagyaw, tan anto so asagmak da tan saray agagi ra?
8 Panon tayon nabayuboan so nengneng na panagpakpel ya ontulong ed sikatayon mamasiansia ed integridad tayo legan na sarayan mairap a panaon? Bueno, panon a binayuboan na akadkauna iran Kristiano so panagpakpel? Konsideraen pa so agawa sanen si Pedro tan Juan so papatundaen na saray manunan saserdote tan mamasiken ed Jerusalem a manpulong diad ngaran nen Jesus. Agtinmunda iray babangatan tan sikaray pinagyaw tan insan imbulos. Diad saman, akiulop lamet ira ed agagi ra, tan saniiba iran nampikasi, a kuanda: “Katawan, nengneng mo so saray gagaem da; tan yabuloy mo ed saray aripen mo a salitaen da a makmakpel so salitam.” (Gawa 4:13-29) Bilang ebat, pinabiskeg ira nen Jehova panamegley na masanton espiritu, tan unong a pinaneknekan ed saginonor na saray Judion lider, “pinano [ra] so Jerusalem na bangat” da.—Gawa 5:28.
9 Analisaen tayo no anto so agawa ed saman. Sanen dinogirog na saray Judion lider iray babangatan, agda ninonot so ontunda lapud pananesdes. Imbes, nampikasi iray babangatan a makapanpakpel pian makapantultuloy ira ed panagpulong. Insan sikara so kinmiwas unong ed pikakasi ra, tan pinabiskeg ira nen Jehova panamegley na espiritu to. Ipapabitar na eksperiensya ra a say insulat nen Pablo kayari na pigaran taon diad miduman konteksto so onaplika ed saray Kristiano sano sikaray napapasegsegang. Inkuan nen Pablo: “Nayarian ko a gawaen so ganagana ed saman so mamabiskeg ed siak.”—Filipos 4:13.
10. Panon a makatulong so eksperiensya nen Jeremias ed saramay sipor lan mabaing?
10 Balet, ipasen pan sipor lan mabaing so sakey a too? Sikato kasi so makapanpakel ed panaglingkor ed si Jehova anggaman ed isusumpa? Maseguron ontan! Nodnonoten so reaksion nen Jeremias sanen sikatoy tinuro nen Jehova bilang propeta. Inkuan na malangwer a laki: “Ugaw ak.” Unong ed satan ya ebat to, inisip ton sikatoy aliwan kualipikado. Siansia, sikatoy pinaseseg nen Jehova ed sarayan salita: “Agmo salitaen, Siak ugaw ak; ta dia ed amin a pangibakian ko ed sika onla ka naani, tan anggan iner a pangigangganan ko ed sika mansalita ka. Agka ontakot nisengeg ed sikara; ta wala ak ed sika pian ilaban ta ka.” (Jeremias 1:6-10) Si Jeremias so nankompiyansa ed si Jehova, tan bilang resulta et atalonaan to so inkamasuyat ton manpulong tan nagmaliw a makmakpel a tasi ed Israel lapud biskeg ya inter nen Jehova.
11. Anto so makatulong ed saray Kristiano natan pian magmaliw ira a singa si Jeremias?
11 Mipadpara ed si Jeremias so niganggan ed saray alanaan a Kristiano natan, tan diad suporta na “baleg ya ulop” na ‘arum a karnero’ et itutultuloy dan iyabawag iray gagala nen Jehova, anggaman ed agpananginenen, panagmudmora, tan panamasegsegang. (Apocalipsis 7:9; Juan 10:16) Apaseseg ira ed saray salita nen Jehova ed si Jeremias: “Agka ontakot.” Agdan balot nilingwanan a sikara so ingganggan na Dios a mangipulong ed mensahe to.—2 Corinto 2:17.
Saray Ehemplo na Inkakpel a Manepeg ya Aligen
12. Anton ekselentin alimbawa na inkakpel so impatnag nen Jesus, tan panon ton pinaseseg iray patumbok to?
12 Natulongan itayo ed saray sagpot tayon mamayubo ed inkakpel sano dalepdepen tayoray alimbawa na arum a kinmiwas a sipapakpel, a singa si Jeremias. (Salmo 77:12) Alimbawa, legan tayon uusisaen so ministeryo nen Jesus, nasagyat itayo ed inkakpel to sanen sikatoy tinukso nen Satanas tan nidunget ed pirmin isusumpa na saray Judion lider. (Lucas 4:1-13; 20:19-47) Lapud biskeg ya impagamor nen Jehova, agnagiing si Jesus, tan sakbay a tuloy na impatey to, oniay inkuanto ed saray babangatan to: “Dia ed mundo walaan kayo na kairapan, balet man-ilalo kayo’d siak [“manpakpel kayo,” NW] tinalok so mundo.” (Juan 16:33; 17:16) No tumboken na saray babangatan nen Jesus so alimbawa to, magmaliw iran mananalo. (1 Juan 2:6; Apocalipsis 2:7, 11, 17, 26) Balet nakaukolan da so “manpakpel.”
13. Anton panamaseseg so intarya nen Pablo ed saray taga-Filipos?
13 Pigay taon kayari na impatey nen Jesus, si Pablo tan Silas so nipangaw ed Filipos. Saginonor, pinaseseg nen Pablo so kongregasyon na Filipos a ‘magnayon ed sakey ya espiritu, pati pankakasakey na kamarerwa a manseet nipaakar ed pananisia ed ebanghelyo; tan anggapon balot so takotan [da] ed saray kabusol [da].’ Pian napabiskeg ira a manggawa ed satan, oniay kuan nen Pablo: “Dia ed sikara [saray Kristianon napapasegsegang] sikato so malinlinew a tanda na kabalang [na saray managpasegsegang], balet dia ed sikayo tanda na kilalaban, tan satan manlapu ed Dios; Ta niiter ed sikayo lapu ed Kristo, aliwan bukor [lambengat] na panisia ed sikato, noag say pantepel met lapud sikato.”—Filipos 1:27-29.
14. Anto so resulta na impanpakpel nen Pablo ed saray agagi to diad Roma?
14 Sanen sinulat nen Pablo so kongregasyon ed Filipos, sikato so walad prisoan lamet, a diad saman et diad Roma. Anggaman ontan, sikatoy nantultuloy a makpel a nampulong ed arum. Anto so resulta? Insulat to: “Saray inkabalorbalor ko pinmatnag ed Kristo ed amin na saray bantay a Pretoriano tan ed saray arum ni; Tan say karaklan ed saray agagi ed Katawan, mailalo ra ed kakanaan na saray inkabalorbalor ko, nagnap ira ed tepel a mangisalita na salita na Dios ya anggapoy takot.”—Filipos 1:13, 14.
15. Iner so pakaromogan tayo na maabig iran ehemplo na pananisia a mamabiskeg ed determinasyon tayon manpakpel?
15 Mamaseseg ed sikatayo so ehemplo nen Pablo. Ontan met ed saray maabig ya ehemplo na modernon-agew iran Kristiano a nansungdo ed panamasegsegang diad saray bansan uuleyan na diktador odino klero. Saray istorya nipaakar ed saratan so nirereport ed saray magasin a Panag-Bantayan tan Awake! tan diad saray Yearbook of Jehovah’s Witnesses. Legan yon babasaen iratan a salaysay, tandaan a saray indibidual a nisasalaysay ditan et ordinaryon totoo a singa sikatayo; balet sanen nidunget ira ed mairap iran sirkumstansya, inikdan ira nen Jehova na pakayari ed labas na normal tan akapansungdo ira. Makaseguro itayo ya ontan met so nagamoran tayo sano kaukolanen itan na saray kipapasen tayo.
Say Makpel a Talindeg Tayo so Mamaliket tan Mamagalang ed si Jehova
16, 17. Panon tayon nabayuboan natan so makpel ya awawey?
16 No ontalindeg a malet so sakey parad katuaan tan inkatunong, sikato so makpel. Tan no ontan so gawaen na sakey anggaman ed katatakot to, sikato so mas makpel. On, nasarag na siopaman a Kristiano so manpakpel no talagan labay ton gawaen so linawa nen Jehova, no sikatoy determinadon manmatoor, no naynay a manmatalek ed Dios, tan no lawas ton nodnonoten a si Jehova so amabiskeg la ed dakerakel ya indibidual a singa sikato. Niarum ni, sano namoria tayo a say makpel a talindeg tayo so mamaliket tan mangigalang ed si Jehova, lalo itayon determinadon ag-onletey. Akaparaan itayon mansungdo ed panagludlurey odino ed alodloor ni nen say satan lapud sikatoy inaro tayon maong.—1 Juan 2:5; 4:18.
17 Agbalot lilingwanan a sano maniirap itayo nisesengeg ed pananisia tayo, ag-itan mankabaliksan a walay agawa tayon kasalanan. (1 Pedro 3:17) Maniirap itayo lapud panangitandoro tayo ed inkasoberano nen Jehova, lapud panggagawa tayo na maong, tan lapud ag-itayo kabiangan na mundo. Nipaakar ed satan, oniay kuan nen apostol Pedro: “No dia ed panggawa yo na kaabigan tan napasegsegang kayo tan itepel yo, sayan peteg so makapaliket ed Dios.” Inkuan met nen Pedro: “Saray napasegsegang unong ed linawa na Dios imatalek da ed sikato so kamarerwa ra unong ed matoor a Manamalsa, dia ed panggawa ra na kaabigan.” (1 Pedro 2:20; 4:19) On, say pananisia tayo so mamaliket ed maaron Dios tayo, si Jehova, tan mamagalang ed sikato. Agaylan mapuersan rason pian manpakpel!
Piarap ed Saray Walad Pakauley
18, 19. Sano manpakpel itayo ed arap na huis, anton mensahe so singano ipapasabi tayo?
18 Sanen imbaga nen Jesus ed saray patumbok to a napasegsegang ira, inkuanto met: ‘Isaklang kayo naani [na totoo] ed saray konsilyo, tan leweten da kayo naani ed saray sinagogas da. On, tan niakar kayo naani ed arap na saray makauley tan arari nisengeg ed siak, pian pamintuan ed sikara tan ed saray Gentiles.” (Mateo 10:17, 18) Kaukolan so panagpakpel diad iparisi tayo ed arap na sakey a huis odino manuley lapud palso iran akusasyon. Balet, sano makpel tayon anamoten so ontan iran kipapasen pian makapanpulong ed saratan ya indibidual, say mairap a situasyon so pagmamaliwen tayon sakey a pankanawnawan makapanggaway bengatlan importante. Singano ipapasabi tayo so salita nen Jehova ed saramay manguusay ed sikatayo, a nikurit ed komaduan Salmo: “Mankalakal kayo natan sirin, O sikayo arari: nabilin kayo komon, sikayo uko-ukom ed dalin. Manlingkor kayo ed Jehova a tekepan na takot.” (Salmo 2:10, 11) Mabetbet, sano palson naakusaan ed korte iray Tasi nen Jehova, itatandoro na saray huis so kawayangan ed panagdayew, tan pisalamatan tayo itan. Balet, arum a huis so nampaimpluensya ed saray onsusumpa. Parad saratan, oniay kuan na Kasulatan: “Nabilin kayo komon.”
19 Nepeg a naamtaan na saray huis a say ganggan nen Jehova a Dios so sankatageyan a ganggan. Nepeg dan nodnonoten ya amin a totoo, pati saray huis, so mikuentaan ed si Jehova a Dios tan ed si Jesu-Kristo. (Roma 14:10) Nipaakar ed sikatayo, makaawat itayo odino andi na inkahustisya manlapud saray huis, walaan itayo na rason pian manpakpel lapud susuportaan itayo nen Jehova. Ibabaga ed sikatayo na Biblia: “Mapalar ya amin so saray onapireng ed Sikato.”—Salmo 2:12.
20. Akin a makapanliket itayo anggano susungdoan tayo so panamasegsegang tan panagpauges?
20 Diad Sermon ed Palandey, inkuan nen Jesus: “Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpa’d sikayo, nisengeg ed siak, a mantila ra. Manggayaga kayo tan manliket kayon mapalalo; ta balbaleg so tumang yo ed tawen; ta ontan met so impamasegsegang da ed saray propetas ya akaunan nambilay nen sikayo.” (Mateo 5:11, 12) Siempre, agmaabig a mismo so pamasegsegang, balet say italindeg tayon malet anggaman ed isusumpa, pati saray panagpauges ya ibabalita na media, so sengegan na panliket. Kabaliksan na satan a napapaliket tayo si Jehova tan nagamoran tayo so tumang to. Say makpel a talindeg tayo so mangipabitar a sikatayo so walaan na puron pananisia tan mangipaseguro ed sikatayo ya aabobonan itayo na Dios. On, pakapatnagan itan a walaan itayo na nagnap a panagmatalek ed si Jehova. Satan a panagmatalek so importante ed sakey a Kristiano, unong ya ipabitar na ontumbok ya artikulo.
Anto so Naaralan Yo?
• Antoran kipapasen natan so mankaukolan na inkakpel?
• Panon tayon nabayuboan so kalidad ya inkakpel?
• Siopa so pigaran maabig ya ehemplo na inkakpel?
• Akin a pilalek tayo so onkiwas tekep na inkakpel?
[Tepetepet Parad Panagaral]
[Saray litrato ed pahina 9]
Impatnag di Simone Arnold (Liebster la natan) diad Alemanya, Widdas Madon diad Malawi, tan Lidya tan Oleksii Kurdas diad Ukraine so panagpakpel tan niresistian da so marelmeng a sakey
[Saray litrato ed pahina 10]
Agtayo ibaing so maong a balita
[Litrato ed pahina 11]
Lapud impanpakpel nen Pablo diad prisoan, dakel so agawaan to pian iyalibansa so maong a balita
[Litrato ed pahina 12]
No makpel tayon isalaysay so Makasulatan a talindeg tayo diad arap na huis, ipapasabi tayo so importantin mensahe