Panamasegsegang Lapud Relihyon​—Akin?

DIAD padesir mo susto kasi a pasegsegangen so totoo lapu ed relihyon da? Nayarin andi​—anggad agda pibabalian iray kanepegan na arum. Anggaman ontan, nagagawa la nensaman tan anggad natan so panamasegsegang lapu ed relihyon. Alimbawa, mabetbet a nikibot ed dakel a Tasi nen Jehova diad Europa tan ed arum a parte na mundo so kanepegan da tan sikara so maruksan minaltrato diad interon koma-20 siglo.

Legan na saraman a panaon, asagmak na saray Tasi nen Jehova so maruksa, organisadon maong, tan abayag a panamasegsegang diad uley na duaran manunan diktador a rehimen ed Europa. Anto so ibabangat ed sikatayo na naeksperiensya ra a panamasegsegang lapu ed relihyon? Tan anto so naaralan tayo ed inkiwas da ed panamairap?

“Agkabiangan na Mundo”

Panggugunaetan na saray Tasi nen Jehova so pagmaliw a matulok ed ganggan, mareen, tan maptek ed moral. Ag-ira onsusumpa odino misasangsangan ed saray gobierno, nisay sasagyaten dan pasegsegangen ira pian magmaliw a martir. Sarayan Kristiano et neutral ed politika. Mipakna iya ed saray salita nen Jesus a: “[Saray patumbok ko so] agkabiangan na mundo, unong a siak so agkabiangan na mundo.” (Juan 17:16, NW) Bibidbiren na maslak ed saray gobierno so neutral a talindeg na saray Tasi. Balet saray diktador a manuley so agmangisesengansengan ed kakaukolanen na Biblia a saray Kristiano so nepeg ya agkabiangan na mundo.

Say rason ed satan so nipaliwawa diad komperensya ed Unibersidad na Heidelberg,  Alemanya, nen Nobyembre 2000. Say tema na komperensya et “Panangontrol tan Dilin-Panangipilit: Saray Tasi nen Jehova Diad Uley na Nasyonal a Sosyalista tan Saray Diktador a Komunista.” Oniay inkuan nen Dr. Clemens Vollnhals na Hannah-Arendt-Institute for Research Into Totalitarianism: “Aliwan politika lambengat so sasakopen na saray diktador a rehimen. Kakaukolanen da so interon inkatoo.”

Agnayarin isuko na saray tuan Kristiano so “interon inkatoo” ra ed gobierno na too, lapud sikaray akisipanan a sigpot a manmatoor lambengat ed si Jehova a Dios. Amoria na saray Tasi a manaayam ed pasen ya uuleyan na saray diktador a saray kerew na Estado et misumlangan no maminsan ed kakaukolanen na pananisia ra. Anto so ginawa ra sanen nipaarap ira ed ontan iran kairapan? Diad loob na dakel lan taon ed apalabas, inyaplika na saray Tasi nen Jehova ed kabibilay da so prinsipyo ya imbalikas na saray babangatan nen Jesu-Kristo: “Nakaukolan ya unoren mi so Dios, nen saray totoo.”​—Gawa 5:29.

Dakerakel a Tasi so nanmatoor ed pananisia ra tan nansiansian neutral ed pakurang na politika, anggaman sikaray marukruksan pinasegsegang. Panon iran akapansungdo? Iner so angalaan da na biskeg pian nagawaan itan? Abuloyan pan sikara a mismo so mangebat ed satan. Tan nengnengen tayo no anto so naaralan na balang sakey, balanglan Tasi odino aliwan Tasi, manlapud saray eksperiensya ra.

[Blurb ed pahina 4]

Asagmak na saray Tasi nen Jehova diad Alemanya so maruksa tan abayag a panamasegsegang diad uley na saray koma-20 siglo a diktador a rehimen

[Blurb ed pahina 4]

“Aliwan politika lambengat so sasakopen na saray diktador a rehimen. Kakaukolanen da so interon inkatoo.”​—Dr. Clemens Vollnhals

[Litrato ed pahina 4]

Inkibot ed pamilyan Kusserow so kawayangan da lapud agda inkompromiso so pananisia ra

[Litrato ed pahina 4]

Si Johannes Harms so pinatey diad prisoan na Nazi lapu ed sisisiaen to