Mangangga ni Kasi so Inkaduka?

“NIA, saray lua na saray naaposan, tan andian ira na managligliwa; et dia ed abay na saray manangapos da wala nensaman so pakayari; balet andian ira na managligliwa,” so inkuan na makabat ya Ari na Israel nensaman a si Solomon. (Eclesiastes 4:1) Seguradon kaslakan ed saramay nononoten nen Solomon a naaposan et mairap-bilay met.

Say inkaduka so aglambengat nasukat base’d kuarta. Unong ed impormasyon ya inter na World Bank nen Hunyo 2002, “akalkula a nen 1998 et 1.2 bilyon a totoo ed sankamundoan so mangukonsumo na kulang a $1 kada agew . . . tan pasasaragen na 2.8 bilyon so kulang a $2 kada agew.” Naimano ya anggaman sarayan bilang na totoo so abeba nen saray akadkaunan kalkulasyon, “siansia nin atagtagey iratan no imanoen so paniirap na totoo.”

Mangangga ni kasi so inkaduka? Inkuan nen Jesu-Kristo ed saray babangatan to: “Saray duruka walaran naynay ed sikayo.” (Juan 12:8) Balet, labay kasin ibaga na satan a say inkaduka tan saray makapasinagem a pansusumpalan na satan so lawas mantultuloy? Andi, lapud anggaman ag-insipan nen Jesus ed saray patumbok to ya amin da so magmaliw a mayaman, agtayo nepeg ya ikuan, base ed saray salita to, ya anggapo lay ilalo na saray mairap-bilay.

Anggaman mansasagpot so too tan anggaman mabetbet ya onsasaew iray sipan a panganggaen so inkaduka, ipapaseguro ed sikatayo na Salita na Dios, say Biblia, ya agla mabayag et anggapo lay totoo a pobri. Diad tua et inyabawag nen Jesus so “maong a balita ed saray duruka.” (Lucas 4:18) Kabiangan ed sayan maong a balita so sipan a naandi la so inkaduka. Nagawa iya sano iletneg na Panarian na Dios so matunong iran kipapasen diad dalin.

Agaylan nikadkaduma la ed satan so mundo! Say mangatatawen ya Ari a si Jesu-Kristo et “ilagak to so makabos tan naukolan, tan ilaban to so kamarerwa na naukolan.” On, “dondonen to so kamarerwa ra a yarawi ed panamalingo tan panamasoot.”​—Salmo 72:13, 14.

Nipaakar ed satan a panaon, inkuan na Miqueas 4:4: “Onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara: ta say sangi nen Jehova na saray ehersito sikato so sinalita to.” Solbaren na Panarian na Dios so amin a problema a mamapairap ed katooan, ekalen to ni ingen so sakit tan ipapatey. ‘Akmonen na Dios so patey ed ando lan ando; et say Katawan a Jehova punasen to naani so saray lua ya onagus ed saray amin a lupa.’​—Isaias 25:8.

Napanmatalkan yo irayan sipan lapud impuyan na Dios iraya a mismo. Akin ya ag-usisaen iray ebidensya a mamapaneknek a saray propesiya na Biblia so napanmatalkan?

[Picture Credit Line sa pahina 32]

FAO photo/M. Marzot