“Manpakpel Kayo! Dinaeg Ko so Mundo”

SAY agew na impatey nen Jesus, salanti, diad koma-14 ya agew ed bulan na saray Judio a Nisan, so ginmapo kaselek na agew na Huebes, Marso 31, 33 K.P. Diad saman a mansirunget, nandaragup si Jesus tan saray apostol to diad tagey a silir na sakey ya abung ed Jerusalem pian selebraan so Paskua. Legan a manpaparaan ya “ontaynan ed sayan mundo ya onla ed Ama,” impanengneng nen Jesus ya inaro to iray apostol to angga ed kasampotan. (Juan 13:1) Panon? Diad impangibangat to ed sikara na alay abig iran leksion, pian iparaan ira ed saray nagawa.

Legan ya onlalabi la, inkuan nen Jesus ed saray babangatan to: “Manpakpel kayo! Dinaeg ko so mundo.” (Juan 16:33, NW) Antoy labay ton ibaga ed saratan a mapuersan balikas? Singa to ibabaga so onia: ‘Agak apagmaliw na karelmengan ed mundo a manimbel nisay ombawi. Agak nampaimpluensya ed mundo. Tua met itan ed sikayo.’ Ontulong ed saray matoor ya apostol nen Jesus so imbangat to diad saraman ya unor ya oras na bilay to diad dalin pian nadaeg da met so mundo.

Siopa so makapangiburi a kasmak la natan so kaugsan ed mundo? Antoy reaksion tayo ed saray ag-inkahustisya tan saray gawan inaambagel a karawalan? Kasin saraya so panimbelan tayo odino pakatuksoan tayon ombawi? Komusta so impluensya ed sikatayo na abulok ed moral ya akapaliber ed sikatayo? Likud ed satan et ag-itayo ayadyari tan walaan itayo na makasalanan iran tendensia, kanian duaray kaukolan tayon pibakalan: say marelmeng a mundo tan say mauges iran tendensia tayo a mismo. Kasin ontalona itayo no anggapoy tulong na Dios? Panon tayon naawat so tulong to? Antoran kalidad so kaukolan tayon bayuboan a makatulong ed sikatayon onsumpa ed saray kaliktan na laman? Pian naebatan iratan, imanoen tayo pa so imbangat nen Jesus ed saray inad-aro ton babangatan diad samay unor lan agew na bilay to diad dalin.

Daegen so Kinon Panamegley na Inkamapaabeba

Alimbawa, imanoen pa so kakapuyan a kinon, odino inkamapaatagey. Nipaakar ed satan et oniay inkuan na Biblia: “Say mapangta onla ed unaan na kabagbag, tan say mapasang ya espiritu ed unaan na kapelag.” (Uliran 16:18) Sisimbawaen itayo met na Kasulatan: “No say sakey a too manis-isip a wala so daiset a kakanaan to, anta andi gapon mogmo, say inkasikaton dili tilaan to.” (Galacia 6:3) On, say kinon so makaderal tan makapalikdo. Makabat so pamusol tayo ed “dilin-panagpaatagey tan kinon.”​—Uliran 8:13, NW.

Kasin mapaatagey tan makinon iray apostol nen Jesus? Diad sakey ya inkagawa, nansasangsangan da no siopa so matalonggaring ed sikara. (Marcos 9:33-37) Diad sananey ya inkagawa et kekerewen di Santiago tan Juan iray manunan posisyon diad Panarian. (Marcos 10:35-45) Pirawat nen Jesus a tulongan iray babangatan to a mangiwaklit ed satan a tendensia. Kanian legan na pangdem ed Paskua, sikatoy inmalagey tan imbalkes  to so sakey a tuwalya, insan to inurasan iray sali na babangatan to. Sikatoy diretsaan no nipaakar ed leksion a kaliktan ton naaralan da. “No siak sirin so Katawan tan Managbangat, et inurasan ko so saray sali yo,” so kuan nen Jesus, “sikayo met nepeg yo so manuurasan na sali sakey tan sakey.” (Juan 13:14) Nepeg a nasalatan so kinon na kasunian ton kalidad​—say inkamapaabeba.

Balet, aliwan mainomay a daegen so kinon. Diad saginonor ed saman a labi kayarin pinataynan nen Jesus si Judas Iscariote, a mangitapat la ed sikato, nansasangsangan lamet iray 11 ya apostol. Antoy nansasangsangan da? No siopa so sankatalonggaringan ed sikara! Imbes a pantamian ira nen Jesus, maan-anos to lamet ya impurek ed sikara so kaimportantian na panlingkor ed arum. Inkuan to: “Saray arari na saray Gentil walay inkakatawan da ed sikara, et saray walaan na pakauley ed sikara natawag ira a Mapalangkap. Ingen sikayo aliwan ontan; ingen say balbaleg ed sikayo, sikato so magmaliw a singa kayugtanan; et say manunaan, sikato so singa aripen.” Impanonot to ed sikara so ehemplo to diad impangikuan to ni: “Wala ak ed pegle’yo a singa sakey a manserbi.”​—Lucas 22:24-27.

Kasin atalosan da so labay ton ibaga? Mapatnag ya atalosan da. Pigaran taon ed saginonor et insulat nen apostol Pedro: “Mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan.” (1 Pedro 3:8) Agaylan makana a daegen tayo met so kinon panamegley na inkamapaabeba! Makabat no ag-itayo nigalet ed pangegemtan ed inkabantog, pakayari, odino posisyon. “Say Dios sumpaen to so atagey a linawa,” so inkuan na Biblia, “bangbalet mangiter na grasya ed mauyamo.” (Santiago 4:6) Ontan met, inkuan na makabat a proverbio nensaman: “Say tumang na kauyamoan tan say takot ed Jehova sikato so saray kayamanan, tan dayew, tan bilay.”​—Uliran 22:4.

Daegen so Gula​—Panon?

Imanoen so sananey nin ugali a kaslakan ed mundo​—say gula. Balanglan lapu ed takot, inka-ignorante, panaglabi, panamairap, ag-inkahustisya, nasyonalismo, panangidalangirang ed tribu odino rasa, mapatnag a say gula so inkalapagan la. (2 Timoteo 3:1-4) Satan met so kasmak nen panaon nen Jesus. Saray managsingil na buis so kagula tan intaboy na saray Judio. Saray Judio so agmililimog ed saray Samaritano. (Juan 4:9) Tan saray Gentil, odino aliwan-Judio, so minudmora met na saray Judio. Balet, nasabi panaon et sakopen na say inletneg nen Jesus a paraan na panagdayew so totoo ed amin a nasyon. (Gawa 10:34, 35; Galacia 3:28) Kanian sikatoy maaron angiter na bengatlan balo ed saray babangatan to.

Inyabawag nen Jesus: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo.” Kaukolan dan aralen ya ipatnag iyan aro, ta intuloy to: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) Say ganggan so balo lapud satan so nagkalalo ni nen say pangaro ed ‘kaparan too [a singa] sikan dili.’ (Levitico 19:18) Panon? Pinalinew nen Jesus iyan pamaakaran a kuanton: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo. Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:12, 13) Kaukolan a mabulos iran mangisakripisyo ed mismon bilay da parad balang sakey tan parad arum.

 Panon a naekal na ag-ayadyarin totoo so mauges a panggula ed kabibilay da? Diad pansalat ed satan na dilin-masakripisyon aro. Minilyon a masimoon a totoo a manlalapud amin ya etniko, kultura, relihyon, tan mapolitikan lapuan so manggagawa na ontan. Sikara la natan so nankakasakey, tan agmanggugulaan a komunidad​—say interon globo ya impanaagi na saray Tasi nen Jehova. Tinalineng da so impuyan a salita nen apostol Juan: “Anggan siopa a mamusol ed agi to sikato so akapatey: tan amta yo a siopaman ya akapatey anggapo so bilay ya andi-angga a mansiansia ed sikato.” (1 Juan 3:15) Saray tuan Kristiano so aglambengat mibibiang ed pambabakal noagta sikaray manggugunaet met a mangipatnag na aro ed balang sakey.

Balet, anto so panmoria tayo ed saramay agtayo kapananisiaan tan manggula ed sikatayo? Legan ya akapasak ed kiew, si Jesus so nampikasi parad saray mamapatey ed sikato, inkuan to: “Ama, perdonam ira; ta agda amta so gawaen da.” (Lucas 23:34) Sanen tinutupak na saray napno na gula a lalaki si Esteban ya anggad inatey, say unor iran balikas to et: “Jehova, agmo ipakasalanan ed sikara iyan kasalanan.” (Gawa 7:60, NW) Kaliktan nen Jesus tan Esteban so sankaabigan anggan pati diad saramay nanggula ed sikara. Agda’ra binusol. “Manggawa itayo na maabig ed saray amin,” so isisimbawa na Biblia ed sikatayo.​—Galacia 6:10.

‘Sakey a Katulong ed Andi-angga’

Legan a mitotongtong ed saray 11 a matoor ya apostol to, impaamta nen Jesus ed sikara ya agmanbayag et sikatoy agda la nakaiba diad dalin. (Juan 14:28; 16:28) Balet pinaseguroan to ira: “Kerewen ko ed Ama tan ikdan to kayo na sananey a katulong a kaiba yo ed andi-angga.” (Juan 14:16, NW) Say insipan a katulong et say masanton espiritu na Dios. Ibangat na satan ed sikara iray aralem iran bengatla na Kasulatan tan ipanonot na satan ed sikara so imbangat nen Jesus legan na ministeryo to ed dalin.​—Juan 14:26

Panon itayon natulongan na masanton espiritu natan? Bueno, say Biblia so pinuyanan a Salita na Dios. Saray totoo ya angiyabawag ed saray propesiya tan angisulat ed Biblia so ‘tinenyeg na espiritu santo.’ (2 Pedro 1:20, 21; 2 Timoteo 3:16) Say panaral tayo ed Kasulatan tan say pangiyaplika ed saray naaralan tayo so mangiter ed sikatayo na pikakabat, inkadunong, pakatalos, inkatudio, pakatebek, tan abilidad a mannonot. Agta mas akaparaan itayon onarap ed saray desdes na marelmeng a mundo?

Say masanton espiritu so katulong diad sananey nin paraan. Say masanton espiritu na Dios et makagunggona tan mabiskeg ya impluensya, ya ontutulong ed saramay paiimpluensyaan ed satan a mangipatnag na maridios iran kalidad. “Say bunga na espiritu sikato so aro, liket, deen, kasungdoan, kauyamoan, kaabigan, sisia, tayadno, dangka,” so kuan na Biblia. Agta sarayan mismo so kalidad a nakaukolan tayo pian nadaeg tayo so pankaliktan na laman ed imoralidad, pankokolkol, imon, sanok, tan saray arum ni?​—Galacia 5:19-23.

Diad panmatalek ed espiritu na Dios, naawat tayo met so “sankatageyan ya inkabaleg na pakayari” pian arapen so antokaman a problema odino gonigon. (2 Corinto 4:7) Anggaman ag-ekalen na masanton espiritu iray subok odino tukso, seguradon makatulong itan ed sikatayo pian nasungdoan iratan. (1 Corinto 10:13) “Nayarian ko a gawaen so ganagana ed saman so mamabiskeg ed siak,” so insulat nen apostol Pablo. (Filipos 4:13) Ipapagamor na Dios itan a biskeg panamegley na masanton espiritu to. Agaylay pisasalamat tayo lapu ed masanton espiritu! Satan so insipan ed saramay ‘mangaaro ed si Jesus, a manusumpal ed saray ganggan to.’​—Juan 14:15.

“Mansiansia Kayo ed Arok”

Diad unor lan labi to bilang too, inkuan met nen Jesus ed saray apostol to: “Say walaan na ganggan ko, et sumpalen tora, sikato so mangaro ed siak. Et say mangaro ed siak sikato so inaro nen Amak.” (Juan 14:21) “Mansiansia kayo ed arok,” so impurek to ed sikara. (Juan 15:9) Panon ya ontulong ed sikatayo so pansiansia ed aro na Ama tan Anak diad pibabakal tayo sumpad makasalanan iran tendensia tayo a mismo tan sumpad marelmeng a mundo?

Bueno, nayarian tayo kasin pegetan so mauges iran tendensia no anggapoy gunaet tayon gawaen itan? Anto ni so mamapakiwas ed sikatayo noag say pilalek a nawalaan na maabig a relasyon  ed si Jehova a Dios tan say Anak to? Si Ernesto, * sakey a kalangweran a laki ya akipuligesgesan ed datin imoral a kabibilay to manlapu nen sikatoy tin-edyer ni, so angisalaysay: “Labay kon napaliket so Dios, tan naaralan ko ed Biblia ya agto aabobonan so klase na kabibilay ko. Kanian nandesisyon ak a manguman, a tuloken iray panangiwanwan na Dios. Inagew-agew et mipuligesgesan ak ed negatibo tan mabanday a kanonotan a siansian nanononotan ko. Balet determinado ak a manalo ed sayan bakal, tan ipipikasik a mantultuloy a tulongan ak na Dios. Kayari duay taon et asumpal la so sankairapan a parte, anggaman siansia nin mapeget ak ed inkasiak.”

No nipaakar ed pibabakal ed mundo, imanoen pa so unor a pikakasi nen Jesus antis iran tinmaynan ed tagey a silir diad Jerusalem. Nisengeg ed saray babangatan to, sikato so nampikasi ed Ama to tan inkerew to: “Agko pikasi ya ekalen mo ra ed mundo, noag ingen ilaban mo ra ed mauges. Ag-ira taga mundo, salanti unong ya agak taga mundo.” (Juan 17:15, 16) Agaylan makapaseguro itan! Babantayan nen Jehova iramay inaro to tan pabibiskegen to ra legan a mansiasiansia iran biig ed mundo.

“Manisia”

Peteg a makatulong ed sikatayo so itulok ed saray ganggan nen Jesus pian manbiktorya diad pipupuligesgesan tayo ed marelmeng a mundo tan ed saray makasalanan a tendensia tayo. Balet, anggaman importante iratan a pambiktorya, agda napaandi so mundo pati say atawir a kasalanan. Balet agtayo naaandiay ilalo.

“Say mundo mangangga, tan saray penel to,” so inkuan na Biblia, “sabalet so mangunor ed linawa na Dios onsiansia lawas.” (1 Juan 2:17) Inter nen Jesus so bilay to pian iliktar ed kasalanan tan patey so “siopaman a manisia ed sikato.” (Juan 3:16) Legan ya ombubulaslas itayo sirin diad pikakabat ed Dios, talinengen tayo so bilin nen Jesus: “Manisia kayo ed Dios, manisia kayo met ed siak.”​—Juan 14:1.

[Paimano ed Leksab]

[Litrato ed pahina 6, 7]

“Mansiansia kayo ed arok,” so impurek nen Jesus ed saray apostol to

[Litrato ed pahina 7]

Magano lan naandi so kasalanan tan saray epekto na satan